LECCIÓN 6

Textonak sum qhanañchaña

Juan 10:33-36

¿KUNSA LURAÑAMA? Janiw aleqak mä texto liytʼañamäkiti, jan ukasti janïr yaqha toqet parlkasajj sumwa uka textot qhanañchtʼañama. Kunatsa uka texto liytʼta, kunsa jupanakar yatichañ munta uk istʼirinakajj sumwa amuyapjjañapa.

¿KUNJAMSA UK LURASMA?

Arunak sum qhanstayam. Mä texto liytʼasajja, kuntï istʼirinakar yatichañ munkta uka arunakwa qhanstayañama. Ukatakejja, qhanstayañ munkta uka arunak kutin kutinwa arsusma, jan ukajj mä jisktʼampiw amuytʼayarakisma.

Pachpa arunakamamp mä textot arstʼkäta ukhajja, kunjamsa uka textojj yatichkta ukar yanaptʼi uk istʼirinakajj sumwa amuyapjjañapa.
Kun amtapjjañapsa munta uk qhanstayam. Kunatsa mä texto liytʼäta uk säta ukhajja, liytʼkäta uka qhepat sumwa qhanañchtʼañama. Liytʼawaykta uka texton kawkïr arunaksa (palabras claves) qhanstayäta, ukajj kunjamsa yatichañ munkta ukarojj yanaptʼi ukwa qhanañchtʼañama.

Mä texto liytʼasajja, Bibliam jistʼaratwa jaytañama. Ukhamtï lurätajja, istʼirinakajj Biblianakap janirakiw jistʼantapkaniti, ukat kuntï yatichkta ukajj Bibliankatapwa amuyapjjani.
Jukʼa arunakampik qhanañchtʼam. Arstʼkäta uka toqetakwa parlañama, janiw yaqha toqenakat parlañamäkiti. Arstʼkäta uka toqet qhawqsa istʼirinakajj yatipjje, ukwa amuytʼañama. Ukatjja ukarjamaw qhawqsa uka toqet parläta uk amtjjañama, ukhamatwa istʼirinakajj arstʼäwim sum amuyapjjani.