LECCIÓN 18

Kuntï yatichkäta ukajj yanaptʼkirïñapawa

1 Corintios 9:19-23

¿KUNSA LURAÑAMA? Istʼirinakarojj lupʼipjjañapatakiw yanaptʼañama. “Kuntï yateqawaykta ukajj nayar yanaptʼitaniwa” sasaw istʼirinakajj amuyapjjañapa.

¿KUNJAMSA UK LURASMA?

Kuntï istʼirinakajj yatjjapjje uk amuytʼam. Kuntï nayrajj istʼawayapki ukanak janiw mayamp arsuñamajj wakiskaspati, jan ukasti yaqha toqenakat amuytʼapjjañapatakiw istʼirinakar yanaptʼañama.

Kuntï istʼirinakajj yatjjapjje ukanakat sinti parlañat sipansa, kuntï jan yatipki uka toqenakatwa jukʼamp parlañama.
Yatjjatam ukat lupʼirakim. Mä wakiskir puntot qhanañchañ munkäta ukhajja, kunanakatï jichhak pasawayki jan ukajj kunanakatï jan yatitäki ukanakatwa parlasma. Ukanakajj kunjamsa arstʼäwimarojj yanaptʼi ukwa amuytʼañama, ukat parlkäta uka wakiskir puntotsa lupʼiñamarakiwa.

Wakichtʼaskäta ukhajja, akhamwa jisktʼasiñama: “¿Kuna?, ¿kunatsa?, ¿kunapachasa?, ¿kawkjansa?, ¿khiti?, ¿kunjama?” sasa. Yatichkäta ukhajja, uka jisktʼanakwa istʼirinakarojj jisktʼasma, ukatjja uka jisktʼanakarojj qhanañchañamarakiwa.
Kuntï yateqapki ukanakajj kunjamsa yanaptʼani uk uñachtʼayam. Biblian suma yatichäwinakapajj kunjamsa sapürunjam yanaptʼaspa, ukwa istʼirinakar qhanañchañama. Jan walinakar saykatañatakisa, suma jaqëñatakisa, kun lurañatakisa, kunjamsa Biblian suma yatichäwinakapajj yanaptʼaspa ukwa qhanañchañama.