¿Kunapachas Bibliat yatiqäta uk amtxtati?

PASÏR maraxa, tantachäwinakax janiw kimsa urüxaniti sasaw Uraqpachan Jilïr Irpirinakax yatiyawayapxistu, jichax jukʼamp tiempow utjxi Bibliat familjam yatiqañatakixa. Jumatï familia pʼiqtʼirïstaxa, kunatï familiamataki wakiski ukanakwa sapa semana yatxatapxasma. Jan wawanïkasax panpachaniw yatiqapxasma. Sapakïsksta ukat janirak familiaman kuna phuqañas utjkani ukhaxa, Bibliat yatxatañatakiw uka tiemp apsusisma.

Jichhax Diosar familjam yupaychañataki mä arumaw utji, ukatwa jilat kullakanakax yuspärapxi. Mario sat mä irpir chuymanixa,a akham siwa: “Tamanxa wali kusisitaw taqinis jikxatasipxta, ukax wali askiw nänakatakixa. Jichax mä arumaw utjistu, kunjamsa uka arumanxa familian Bibliat yatiqasktan uka tuqit irpir chuymaninakax parltʼapxirïta, ukham lurasax kuntï Uraqpachan Jilïr Irpirinakax iwxtʼapkistu ukarjamaw lurasktanxa” sasa.

Ukhamarakiw mä irpir chuymanin Juana sat warmipax akham säna: “Kimsa phuchanïpxtwa, jilïrix 15 maraniwa, sullkapax 11 maraniraki ukat sullk sullkax 2 maranirakiwa. Jichhakiw yaqha tamar sarxaptxa, ukanxa jan istʼir amparampik parlir jilat kullakanakaw tantachasipxi, ukhamax tantachäwinakataki wakichayasiñatakix walja tiempow munasi. Jichax mä arumaw utjapxitu Jehová Diosar familjam yupaychañataki” sasa.

Andresumpi Aliciampix precursorjamaw irnaqtʼasipki, ukat akham sapxiwa: “Tamanxa walja luräñanakaw utji, ukatwa panpachani Bibliat sapa seman yatxatañax chʼamänxa, janiw tiempos utjkänti. Ukampis jichhax tiempox utjxiwa, ukax Diosan bendicionapapuniwa; ukampis uka tiempxa janiw ina chʼusaru aptʼañ munapktti” sasa.

25 marani Tomás sat soltero waynax sapa martesaw Bibliat yatxatañataki tiempo apsusi, ukat yaqha urunakax tantachäwinakatakiw wakichasiraki. Jupax akham siwa: “Martes urun puriniñap wal suytxa. Uka arumax Jehová Diosatakiwa. Jupamp sum apasiñatakix kunas wakisi uka tuqit niya pä horjamaw Bibliat yatxatta, ukat liytʼatarjam lupʼiñataki tiempos utjarakiwa” sasa. ¿Kuna askinaksa Tomasix jikxatawayi? Akham saskakiwa: “Jichhax kuntï yatiqta ukax chuymaruw purtʼitu. Perspicacia sat libro liytʼaskayäta, ukat kunjamsa Davitampi Jonatanampix apasipxäna uka chiq liytʼasinxa, Jonatanat yatiqta, jupax janiw askipak thaqhirïkänti. Kunjamäñapas mä chiqpach amigoxa ukwa yatiqawayta. Ukham wali aski yatichäwinakwa sapa martesax jikxatta, ukatwa uka uru wal suytxa” sasa.

Bibliat yatxatañatakix mä arumaw utji, ukhamaxa, Diosan luqtirinakapjamaw Diosar familjam yupaychañataki ukat Bibliat jukʼamp yatxatañatakix tiempo aspusiñasa, ukhamäni ukhaxa, walja askinakwa jikxatañäni.

[Qhanañchäwi]