¡Sapa mayni ukat familpacha Bibliat yatxatañax wali wakiskiriwa!
1. Uraqpachan Jilïr Irpirinakaxa, ¿kuna tuqitsa llakisipxi ukat kunatsa?
1 Kunjamtï nayrïr cristianonakar uñjkänxa ukhamarakiw Uraqpachan Jilïr Irpirinakax jichha tiempon Jehová Diosan markaparux walikïsipkañapatakix uñjaski (Hech. 15:6, 28). Jachʼa tʼaqhisïwixa wali jakʼankxaspasa ukhamwa chʼamakthaptanxi, ukatwa Diosan Apnaqäwipat taqpach yatiyirinakax jankʼaki Jehová Diosar jukʼamp jakʼachasipxañapaxa. Librot Yatiqañataki Taman Tantachäwipax apasirïkäna uka tiemponxa, ¿kuns lurañäni? Taqiniw yatiñkankañampi uka tiemponxa familpacha Diosar yupaychañasa. Ukhamatwa Diosan amuytʼayat Arupatxa sum yatxatañäni ukat walja bendicionanakwa katuqarakiñäni (Sal. 1:1-3; Rom. 11:33, 34).
2. Familpach Diosar yupaychañatakixa, ¿kunjamsa waktʼayassna?
2 Uka arumax Diosar familpach yupaychañatakiwa. Jehová Diosan nayraqatapan luräwinakam phuqapxañamataki ukhamarak familpach Bibliat yatiqañ jan jaytasa sarantayasipkakiñamatakiw familia pʼiqtʼirinakarux chʼamachtʼanipxsma (Deu. 6:6, 7). Khitinakatï sapäsipki ukhamarak jan familianïpki jupanakax yatxatañataki ukat jukʼamp yatiqañatakiw uka tiempxa apsupxañapa. Ukhamax wali wakiskiriwa sapa mayni jiwasanakatakix yatiqañataki ukat lupʼiñatak ‘tiempo apstʼasiñaxa’. Ukhamatwa aka ‘jan wali urunakanxa’ Diosar luqtäwisan wali chʼamañchtʼata jikxatasiñäni (Efe. 5:15, 16, Machaka Testamento).
3, 4. ¿Kuna qillqatanakatsa yatxatsna, ukat kuna amtampis uk lurañasäspa?
3 Kuna tuqinakats yatxatsna. Índice de las publicaciones Watch Tower ukhamarak CD-ROM Watchtower Library satäkis ukanakax familjam Bibliat kusisita yatxatañatakix mä suma yanaptʼanakapuniwa. Ukat Yatiyañataki sat revistan aka yatichäwinakapat yatxatañaw askirakïspaxa: “Familianakataki”, “Wawanakar yatichañataki” ukat “Wayn tawaqunakataki”. Jan ukax ¡Despertad! sat revistan aka yatichäwinakatwa uñakiptʼaraksnaxa “Los jóvenes preguntan” jan ukax Diosan wali muspharkañ luräwinakapat qillqapki ukanakatsa.
4 Kʼachat kʼachat Biblia liytʼañaxa yatichäwinakapa ukhamaraki Diosan kamachinakap amuyusar ukat chuymasar purtʼañapatakiw yanaptʼistu (Heb. 4:12). Yaqhasti, Jehová Diosan markapan videograbacionanakax utjki ukanak uñchʼukiña ukat uka tuqinakat parltʼañaw wakisirakispa. Ukhamaxa, amuytʼañataki ukat yatxatañatakis waljaw utji. ¿Kuna tuqinakatsa yatxatañ munapxaspa uka tuqit familiasar jisktʼañax janit wakiskaspa?
5. ¿Kunatsa wali wakiskirixa sapa mayni yatxatañasa ukat familpacha yatxañasa?
5 Kunatsa wali wakiskiripunixa. Jehová Diosaru luqtäwisan chʼamachasiñäni ukhaxa, aka arunakar phuqañatakis wakichatäñäniwa: “Thurtʼatäpxam ukat kunjamsa Jehová Diosax qhispiyapxätam uk uñjapxarakma” (Éxo. 14:13, Traducción del Nuevo Mundo). Awk taykanakatakix “jan wali jaqinak taypin” wawanakapar uywapxañapatakix Diosan yanaptʼapaw munasi (Fili. 2:15). Ukat yatiqañ uta jan walinak utjatap laykuxa uka jan waltʼäwinakar saykatapxañapatakix wawanakax yanaptʼxa katuqapxañapawa (Pro. 22:3, 6). Ukhamarakiw chacha warminakax Jehová Diosat jan jithiqtapxañapatakiw chʼamachasipxañapa ukhamat “kimsat kʼanat wiskhax” jan tʼaqasiñapataki (Ecl. 4:12). Ukhamaxa, ‘qullana iyawsäwinakasan’ suma thurtʼatäñatakixa askirjam tiemp apnaqapxañäni (Jud. 20).