Noviembre ¡Despertad! revistampi irnaqtʼañatak wakichtʼasipxañäni
1 Waljaniw Biblia tuqit jukʼampi yatiñatakix taqi chuyma jisktʼasipxi. Amuytʼañataki: “Jaqin qillqatächi ukaxa, ¿kunatarak Diosan Arupaw sapxisti? ¿Kunatsa Bibliarjam sarnaqañajäpacha? ¿Biblia liyiñataki ukat yatxatañataki chʼamachastan ukat tiempo apsustan ukanakax inamayakiti? ¿Kawkïr Biblia liyiñajasa?”. Ukham jisktʼanakaruwa noviembre phaxsitak wakiyat ¡Despertad! revistax qhanañchani, akham satäniwa: “¿Bibliarux atinissnati?”.
2 Noviembre phaxsitak wakiyatäki uka ¡Despertad! revistxa, taqiniruwa lakirañ muntanxa. Mistsurjamästa ukaxa, noviembre phaxsin sapa sábado tamamp chika yatiyir mistsusma ukax wali askipunïspawa. Uka revistxa familiaranakamaru, utam jakʼankirinakaru, irnaqir masinakamaru, yatichirinakaru, yatiqir masinakamaruw churäta ukat Bibliat yatichañatak kuttʼktas ukanakarus churarakïtawa. Ukat alasiri sarkasasa, ukat kawk viajäta ukhasa, janipuniw revistanak apasiñ armasïtati. Irpir chuymaninakaxa sapa phaxsitak revista mayipxirïki ukat sipan jukʼamp jilwa uka revist mayipxi.
3 Bibliat yatichañ qalltañäni. Maynix mä revista katuqasini ukhaxa, janïr parlañ tukuykasaw Bibliat yatiqañapataki arxtʼayäta. Amuytʼañataki, akham sasmawa: “Mayan kuttʼankä ukhaxa, ¿kunas Diosan amtapax aka Uraqitakixa?, uka tuqit Bibliampi qhanañchtʼäma” sasa. Mayan kuttʼkäta ukhaxa Kunsa yatichi sat libro aparapïta ukat 4, 5 jananak uñachtʼayäta jan ukax 3 jaljan 1-3 tʼaqanakapsa uñachtʼayarakismawa. Jan ukax akhamsa saraksnawa: “Kunjamsa Biblian mä qillqatax phuqasiski uka tuqit mayan parltʼañäni” sasa. Ukat kuttʼasaxa, librot 9 jaljan 1-3 tʼaqanakapatwa yatxattʼapxasma. Jan ukax akhamsa sarakismawa: “Waljanitakix Biblian qillqatanakap amuytʼañaxa wali chʼamawa. Yaqha uru jutasawa kunjamsa jumax Biblia liyisaxa sum amuytʼasma uk uñachtʼayäma”. Wasitat kuttʼasaxa, Kunsa yatichi sat libro churäta ukat kunjamas uka librot yatxatañax uk yatichtʼäta.
4 Jehová “Tatitun arunakapax” Biblianakwa utji, uka arunakakiwa yatiñani tukuyasax ‘qhispiñaru irpistaspaʼ (2 Tim. 3:15). Chiqansa, taqiniw noviembre phaxsitaki wakiyatäki uka ¡Despertad! revistxa taqi jaqiru lakirañ muntanxa, ukhamatwa Bibliar atinisiñ yanaptʼanixa.