Bibliat yatichañ qalltañatak mä machaq yanapa
1. Yatiyañataki (yatiyir sarañataki) revistanxa, ¿kuna wakichäwis mistuni, ukat kuna amtamp wakichatasa?
1 Yatiyañataki (yatiyir sarañataki) revistanxa, “Biblian yatichäwinakapa” sat mä machaq wakichäwiw mistuni. Ukaxa, abril-junio, 2011 uka revistat uksaruw mistuskani. Ukax Bibliat yatichañ qalltañatakiw yanaptʼistani. Ukat uka wakichäwi liytʼasax jaqinakax wali askitsa uñjapxchinixa, ukan uñstkani uka yatichäwinakaxa, khitinakarutï yatiykañäni ukanakampi yatxatañatak wakichatawa.
2. ¿Kunjamänisa uka wakichäwixa?
2 Kunjamänisa: Pʼiqiñchäwisa ukat jiskʼa pʼiqiñchäwinakas jisktʼanakawa, ukhamat jaqinakar uka jisktʼanakat qhanañchtʼañataki. Ukat jaqinakax Diosan Arupat chiqaki liytʼapxañapatakixa, Bibliat apstʼat wakiskir jiskʼa tʼaqanakax janiw copiaqatäkiti. Yatichäwin tʼaqanakapax janirakiw jachʼäkiti, ukhamat yatiykasax uta punkupan yatichañataki. Ukhamarusa sapa yatichäwixa, Kunsa yatichi sat libroruw apistu, ukhamatwa kunapachatï wakiskani ukhax uka librompi Bibliat yatichañax jan chʼamäkaniti.
3. Utat utat yatiyir sarkasax revistan mistkani uka yatichäwimpixa, ¿kunjamsa uta punkupan Bibliat yatichañ qalltasma?
3 Kunjamsa uka yatichäwimpix yatiysna: Janïr revista uñachtʼaykasaxa, kuna tuqitsa wakichäwin pʼiqiñchäwipax parli, uka tuqitwa yatxatañ munañapatak mä suma jisktʼa jisktʼañama. Amuytʼañataki, abril-junio revistanxa, kunja wakiskiris Bibliat yatxatañax uka tuqitwa qhanañchasiskani. Ukhamasti inas akham jisktʼchisma: “¿Bibliax jumatakix Diosan Arupjamati jan ukax mä suma librokicha? [Kamsanis uka istʼäta.] Uka tuqitwa aka revistax qhanañchaski” sasa. Ukatxa nayrïr jisktʼa ukat nayrïr tʼaqa liytʼarapïta, ukxaruxa Bibliat apstʼat jiskʼa tʼaqanakwa thaqtañamaraki. Ukat wasitatwa uka jisktʼa liytʼañama ukat jupan arstʼaniñapatakiw mayïta. Qhawqha tiempoy utjirjamächi ukarjamaw ukan utjki uka jisktʼanakarjam qhanañchtʼäta. Janïr sarxasaxa, ukxanki uka jisktʼwa liytʼarapïta ukat uk qhanañchañatakix kunürus kuttʼäta ukwa jupamp amtapxäta. Uka yatichäwit jukʼampi yatxataskakiñatakixa, sapa semana kuttʼañatakiw chʼamachasïta machaq revista puriniñapkama. Yatiykasaxa, chiqakwa akham sarakisma “¿Bibliat yatxatañ munasmati?” yatxatañ munani ukhaxa, revistan utjki uka yatichäwimpiw kunjamsa Bibliat yatichtan uk uñachtʼayasma.
4. Wasitat visittʼkasaxa, ¿kunjamsa uka yatichäwinakampix jaqinakar yanaptʼsna?
4 Ukat machaq revistanak sapa kuti churiri sartan jan ukax wasitat visittʼir sarktan ukanakampi yatxatañatakix askirakïspawa. Akhamwa sasma: “Yatiyañataki revistanxa mä machaq wakichäwiw mistu. Kuna amtampis wakichtʼata uk uñachtʼayirismati” sasa. Uka wakichäwixa, walja jaqinakar “kunatix chiqäki uk uñtʼapxañapa[ta]ki” yanaptʼaspa ukatakiw Diosar wal mayipxta (1 Tim. 2:4).