¿Taqpach wakichäwinakapatxa askinak apsusktati?
1 “¡Aka revistampi Diosan arunakapat yatiyañxa walpun muntxa!”, sasaw mä kullakax La Atalaya 1 de enero 2008 liytʼasax säna. Chiqas taqinitaki wakichatäki uka revistaxa kunayman tuqit suma wakichäwinakaniwa. ¿Ukanak uñakipxtati? ¿Kunjamatsa yatiyir sarasax uka revistampi jaqinakar parltʼsna uk amuytanti?
2 “Jesusan yatichäwinakapa.” Aka wakichäwixa jaqinakamp Bibliat yatichañ qalltañatakiw yanapistaspa. Janïr ukham lurkstaxa, lurasmawa: uka yatichäwin pʼiqiñchäwipatwa liytʼarapisma ukat Jesusax kamsänsa uk uñxattʼayasma uka arunakapax nayrïr tʼaqankiwa. Uka jaqitï istʼanixa, pʼiqiñchanakatwa parltʼaskakisma, ukanakax suma amuytʼayañatak jisktʼanakaniwa. Kamsis uka tuqitxa uk arstʼañapatakiw mayiñama, kuna tuqitsa parlaskta uka dibujonakat mä jukʼa qhanañchasmawa ukatxa jutïr tʼaqaruw pasañama. Uka yatichäwitxa qalltan chikat yatxatasmaxa ukat qhipat kuttʼasaw tukuyxarakisma. Wakichtʼataw sarañama Kunsa yatichi sat librompi Bibliat yatichañ qalltañatakixa.
3 “Familianakataki.” Aka wakichäwixa kunjams chacha warminakasa, awk taykanakasa familian jan waltʼäwinakax utjki ukhax Biblian iwxanakaparjam askichapxaspa uk qhanañchaski. Uka yatichäwinakax khitinakatï jan Qhanañchirinakäpki ukanakar yanaptʼarakispawa Biblian jikxataski uka iwxanakax wali sumätap amuyapxañapataki (2 Tim. 3:16, 17).
4 Wayn tawaqunakataki wakichäwi. “Wayn tawaqunakataki” siski uka wakichäwixa janiw wayn tawaqunakarux Biblian qillqatäki uk yatxatapxañapatakik qillqaskiti, jan ukasti kuns amuyapxi uk arstʼapxañapatakirakiwa. Ukhamasti yatiyir sarasax kunatsa Diosan Arupat yatxatañax wayn tawaqunakatakix askïspa uk uñachtʼayañatakiw yanapistaspa (Sal. 119:9, 105). Ukhamaraki, awk taykanakampi parltʼasaxa uñachtʼayarakismaw aka wakichäwi, “Wawanakar yatichañataki”, ukaxa Biblian qillqatäki uka nayra jaqinakat kuna askinaksa sarnaqäwinakapat apssna uk wawanakar yatichañatakiwa. Chiqasa, ¿uka wakichäwinakat wawanakamampi yatxatañatakix amtxtati?
5 Yaqha wakichäwinakampi. “Kunsa liytʼirinakax yatiñ munapxi” sat wakichäwixa mä jisktʼaniwa, khititï Diosan jan Qhanañchiripäki ukanakaw ukham jisktʼasispaxa. Utat uta yatiyasaw uka tuqit parltʼaraksnaxa. “...qillqata” siski uka wakichäwinxa misioneronakan jan ukax yaqha jilat kullakanakan qillqatanakapaw uñstaraki. Ukaxa Bibliat yatiqañ munirinakaruw amuytʼayaspa kunjamsa jichhürunakanxa, aka Uraqpachan suma yatiyäwinakax yatiyasiski, Cristox apnaqäwipankxasin jiwasampïxi uka chimpurjama (Mat. 24:3, 14).
6 Suma chuyman jaqinakarux chʼamañchtʼasirakiwa Jehová Diosat jukʼampi yatxatapxañapataki “Diosar jakʼachasipxam” sat wakichäwimpi, ukax semanan Bibliat liyiñatakix utjki Yatiyañataki Diosan Yatichäwipa sat tantachäwinxa, ukarjam wakichatawa. “Jupjam iyawsänïpxañäni” siski uka wakichäwixa Biblian qillqatäki uka jaqinakan sarnaqäwinakapatwa parli, sañäni amtanakapata, jan waltʼäwinakapata, iyawsäwipata, ukasti jichha tiempon liytʼirinakax jupanakar uñjapkaspas ukham liytʼapxañapatakiw waktʼayata.
7 ¡Kunja kusiskañasa sapa kimsa phaxsi mistsunki uka Yatiyañataki sat revistampi yatiyir sarañaxa! Ukatwa sapa maynix uka revistan kuna yatichäwinakas utji uk yatiñasaxa ukhamat yatiyir sarasax wali askinak apsuraksnaxa.