Diosan arunakap yatiyañataki yanaptʼa
1. “Jehová Diosan Qhanañchiripampiw parltʼaski” sat yatichäwejja, ¿kuna pä amtampis wakichasiwayi?
1 Yatiyañataki sat revistanjja, “Jehová Diosan Qhanañchiripampiw parltʼaski” sat yatichäwiw awisajj mistu. Uka yatichäwejja, Biblian yatichäwinakap jaqenakan yateqañ munapjjañapataki ukat wali amuyumpi yatichañatakiw wakichtʼasiwayi (1 Ped. 3:15). Kunjamsa uka yatichäwinakampejj yanaptʼassna uk yatjjatañäni.
2. ¿Kunjamsa yatiykasajj uka yatichäwinakampi yanaptʼassna?
2 Yatiyañatakejj wali askiwa. Uka yatichäwejj Yatiyañataki revistan mistkani ukhajja, imasiñajj wali askïspawa. Awisajj Bibliat yatichkasasa jan ukajj Bibliat yateqañ munirinakampi parlkasasa, kunjamtï Yatiyañataki revistan jisktʼaski ukhamwa jisktʼapjjestaspa. Ukhamänejja, uka yatichäwi churañaw wakisispa jan ukajj jupampiw munchi ukhajj yatjjataraksna. Uka revistatï jan utjkchistojja, Internetan jw.org/ay cheqatwa apaqsna.
3. ¿Kunjamsa uka yatichäwimpejj jaqenakar yanaptʼasispa?
3 ¿Kunjamsa utanir uka yatichäwimpejj yanaptʼsna? Yaqhep jilat kullakanakajja, kuntï uka yatichäwin jilatajj jan ukajj kullakajj siski uk liytʼapjje, ukat utaniruw kuntï utanejj siski uk liytʼayapjjaraki. Biblian yatichäwinakap ukham qhanañchtʼañajj wali askiwa, kunattejj utanejj janiw aynachtʼayatjam amuyaskiti (Deu. 32:2).
4. ¿Kunsa uka yatichäwinakat yateqsna?
4 Yateqañatakisa yatichañatakisa wali askiwa. Uka yatichäwi liytʼkasajja, Bibliat apstʼat jiskʼa tʼaqanaka, uñachtʼäwinaka ukat yatiyirejj kunjamsa ukat kuna arunakampis qhanañchtʼi ukwa sum amuyañasa. Ukat yatiykasajja, ukham qhanañchtʼañatakiw chʼamachasiñasaraki (Pro. 1:5; 9:9). Mä kullakajj akham siwa: “Uka yatichäwinak liytʼasajja, suma wakichtʼat mä precursorarus utanir wali sum qhanañchtʼkir uñjkirista ukhamwa amuyta” sasa.
5. ¿Kunjamsa uka yatichäwinakampejj Bibliat yateqerinakar yatiyir sarapjjañapatak yanaptʼsna?
5 Uka yatichäwinakajja, Bibliat yatichktan ukanakar yatiyir sarapjjañapatak wakichtʼañatakis yanaptʼarakistuwa. Jupanakampiw uka yatichäwi liytʼsna, ukat kuntï yatiyirejj siski ukwa jupanakar liytʼaysna. Ukhamatwa jupanakajj kunja wakiskiris jaqenakar respetompi ukat wali amuyumpi qhanañchtʼañajj uk amuyapjjani (Col. 4:6). Cheqas uka yatichäwinakajja, kuna yanaptʼanaktï Jehová Diosajj arunakap sum yatiyañatak apayankistu ukanakat maynïriwa (2 Tim. 4:5).