Jan axsarayasimti
1. ‘Yanaptʼañax amparasankaski ukhax janiw “janiw” sapktanti’, ¿kunatsa ukham sistanxa?
1 ‘Kunapachatix yanaptʼañax amparanakasankaski ukhaxa’, Jehová Diosan Qhanañchirinakapax janiw “janiw” sapktanti, jan ukasti sapüruw Diosan Apnaqäwipar suytʼapxañäni sasax yatiyasktanxa (Pro. 3:27). Chiqansa, Diosan Apnaqäwipax kuntï apankani uk yatiñaxa taqinitak wali askipuniwa. Ukhamaxa, inas jumax walja horanak yatiyir sarsta, sañäni, inas qillqatanaka jaqinakar chursta jan ukax yaqha chiqanakan Diosat yatiysta, ukampis yaqha lurañaw utjaskistaspa: Bibliat yatiqañ munirinakar yatichaña. ¿Janit uk lurañatak amtañax askïkaspa?
2. ¿Kunatsa Bibliat yatiqirisax jan utjki?
2 Awisax Bibliat yatiqañ munirinakarux axsarasinwa jan yatichktanti: janiw sum yatichkiristti, tiempow jan utjkaspati sasaw sistanxa. Ukhamasti jan axsarayasipxañamataki ukat Bibliat yatiqiri jikxatapxañamatakiw aka iwxtʼanakaxa (Mat. 28:19; Hech. 20:20).
3. Bibliat yatichañatakix suma wakichatätanwa, ¿kunatsa ukham sistanxa?
3 Janiw sum yatkti. Janiw Bibliat yatichirjamäkti, janiw yatiqañ jachʼa utarus sarkti, janiw sum yatkti sasin inas sirïsta. Ukampis nayrïr cristianonakax “jan suma yatichata” jaqinakapxänwa, ¿uk amttati? Ukampis chiqa yatichäwinak yatichañatakixa wali yatxatatanakapxänwa. ¿Khititsa yatiqasipxäna? ‘Jesusamp chikaw sarnaqapxirïna’ siw Bibliaxa (Hech. 4:13). Jïsa, Jachʼa Yatichiritwa yatiqasipxäna. Jiwasanakax yatiqasiraksnawa, kunattix yatichatanakapasa ukat kunjamsa yatichirïna ukanakas Qullan Qillqatanakan qillqantatäskiwa. Ukatpï, yatiqañ jachʼa utanakar janis sarkstanxa, uka yatichäwinakat sipansa wali valoran Diosan suma yatichäwinakapwa yatiqasktanxa (Isa. 50:4; 2 Cor. 3:5).
4. ¿Kunsa Amós chachat yatiqtanxa?
4 Awisaxa, jan yäqat familianakan utjasir jaqinakwa Jehová Diosax jachʼa munañani jaqinakaru tuqinuqañatakix khitäna. Maynïrix Amós satänwa, jupax sänwa: “Janiw nayax profetäkti, ni profetan wawapäkaraktsa. Nayax uywa awatirikïtwa, ukhamaraki monte higonak apthapisisa jakasirikirakïtwa” sasa (Amós 7:14). Ukhamäskasinsa, Amós chachax jan axsartʼasawa waka qallunakar yupaychirinakan Amasías sat sacerdoteparuxa juchañchäwi arunak yatiyäna (Amós 7:16, 17). Jiwasanakax ukhamarakiw amtapxañasa, aka luräwixa janiw jiwasankkiti jan ukasti Diosan luräwipawa, ukhamax jupaw yatichaskistani (2 Tim. 3:17).
5. Jan tiemponïkasasa, ¿kunatsa Bibliat yatiqirinïñasatakix chʼamachasiñasa?
5 Janiw tiempox utjkiti. Chiqasa, jumax jan tiemponiw jakaspachätaxa, ukampis ¿sapa kuti yatiyir sarañatakix tiemp janit apstʼaskta? Ukat Bibliat yatiqañ muniriru yatichañataki tiemp apstʼasirakïtaxa, jukʼampi kusisiñ jikxatarakïta. Kunjamsa Diosan Arupax jaqinakan jakäwip sumaptayi uk uñjañax wali askipuniwa (Heb. 4:12). Jaqinakax ‘kunatix chiqäki uk uñtʼapxañapataki’ chʼamachastan uk uñjasaxa Jehová Diosax wal kusisi (1 Tim. 2:4). Kunapachatï mä jaqix Diosar kutkatxi ukat mayitanakarjam sarnaqxi ukhaxa angelanakasa kusisipxarakiwa (Luc. 15:10).
6. ¿Diosan munañapa phuqasiñapatakix kuna aski lurañanïtansa?
6 Diosax “taqinin qhispiyatäñapwa muni, kunatix chiqäki uk uñtʼapxañaparaki” (1 Tim. 2:4). Diosan uka munañapa phuqasiñapatakiw jiwasax yanaptʼtanxa. ¡Wali askipuniw ukham yanaptʼañaxa! Ukhamaxa, ¡Bibliat yatiqañ munirinakaru yatichañxa jan axsarayasimti!