Profetanakat yateqasipjjañäni: Amós
1. ¿Kunjamatsa Amós profetan sarnaqäwipajj chʼamañchtʼistaspa?
1 Inas pisinkirïtwa jan ukajj yateqañ utanakarus janiw sarawaykti, janjamakiw Diosan arunakapat yatiykiristi sasin amuyirïsta, ukham amuysta ukhajja, Amós profetan sarnaqäwipaw chʼamañchtʼiristam. Jupajj oveja awatiri ukhamaraki achunak tiempopar apthapis jakasir llampʼu chuyman chachänwa, ukampis Jehová Diosajj mä wakiskir yatiyäwi yatiyañapatakiw ajllïna (Amós 1:1; 7:14, 15). Ukhamarakiw jichha tiempon Jehová Diosajj llampʼu chuyman jaqenakar ajlli aski yatiyäwinak yatiyapjjañapataki (1 Cor. 1:27-29). Amós profetan sarnaqäwipajj ¿kuna yaqha toqenakatsa Diosan arunakap yatiyañan yanaptʼistaspa?
2. ¿Diosan arunakap yatiyañat jarkʼat uñjasiñäni ukhajja, kunatsa wali chʼollqhe saytʼatäskaksna?
2 Jarkʼatas uñjaskchïnjja, janiw aynachtʼkänti. Israel markan alay toqenkir tunka tribunakar Amós profetajj profecía arskäna ukhajja, waka qallunakar yupaychir Amasías chachajj Amós profetaruw ‘sarjjam ukat jan akan yatiyjjamti, aka markan taqeniw mä religionanëjjapjje’ sasin säna (Amós 7:12, 13). Ukat Amós profetan jan yatiyaskakiñapatakejja, Amasías chachajj Jeroboam reyimp jarkʼayañatakejj profetan arunakap qʼal mayjtʼayäna (Amós 7:7-11). Ukham luratpachas Amós profetajj yatiyaskakïnwa, janiw ajjsarayaskänti. Jichha tiemponjja, yaqhep religionanakankirinakajj ukhamarakiw marka apnaqerinakamp yanaptʼayasisajj Jehová Diosan markapar jan waltʼayañ munapjje. Ukampis janiw jumanakar tukjañatakejj kuna armas utjkiti sasaw Jehová Diosajj chʼamañchtʼistu (Isa. 54:17).
3. Jichhürunakan Diosan Reinopat yatiyktan ukajj ¿kuna pä toqetsa yatiyasi?
3 Diosan juiciopata ukat jutïr urunakan bendicionanakapat yatiyäna. Amós profetajj Israel markan tunka tribunakajj Diosan juiciopamp tukjatäniw sasins yatiykchïnjja, Biblian sutip apki uka libronjja, kunjamsa wasitat markapar kuttʼayanini ukhamarak bendicini ukaw Amós profetan qellqatapan qhanañchasi (Amós 9:13-15). Jichhürunakanjja, Diosan ‘taripäwi jan ukajj juicio urupat’ yatiyaraktänwa, ukampis ukajj ‘Diosan Reinopat suma yatiyäwin’ mä yatiyäwipawa, ukat uk yatiyañasarakiwa (2 Ped. 3:7; Mat. 24:14). Kunapachatï Jehová Diosajj jan wali jaqenakar Armagedón jachʼa chʼajjwäwin tukjkani ukhajja, janiw khiti ñanqha luriris utjjaniti, ukhaw aka Oraqejj mä suma paraisor tukuyatäni (Sal. 37:34).
4. Jehová Diosan munañap phoqkasajj ¿kunatsa Diosaw yanaptʼitani sasin sissna?
4 Diosan Reinopat aka ñanqha pachan yatiykasajj Jehová Diosar katuyasitasasa ukat Jupan munañap lurañ munatasas yantʼataw uñjasi (Juan 15:19). Ukhamäkchi ukhasa, Jehová Diosajj munañap lurañatakejj yanaptʼapunistaniwa, kunjamatï Amós profetar yanaptʼkäna ukhama (2 Cor. 3:5).