Taman tantachasiñatak machaq wakichäwi
1, 2. Jutïr 2009 enero phaxsit uksaruxa, ¿kunjamäxanis chika semanan tantachäwinakaxa?
1 2008 abrilat 21 urunak saraqkäna uka semanaxa, Uraqpachatak mä wali kusiskañ yatiyäwi istʼawaytanxa, akham sasa: “2009 enero 1 urut uksaruxa, Librot Yatiqañataki Taman Tantachäwipaxa, Yatiyañataki Diosan Yatichäwipa sat tantachäwimpi ukat Yatiyañataki Tantachäwimp chikaw apasxani. Ukat janiw Librot Yatiqañataki Taman Tantachäwipa satäxaniti, jan ukasti Taman Bibliat Yatxatañataki satäxaniwa” sasa.
2 Mayachthapit kimsa tantachäwinaka. Qalltat tukuykamax uka wakichäwixa, mä hora 45 minutonakanwa apasiñapa. Akasti qʼuchumpi ukat Diosat mayisïwimpiw qalltasiñapa (5 min.), ukat Taman Bibliat Yatxatañataki tantachäwiw (25 min.) apasini. Ukxarux Yatiyañataki Diosan Yatichäwipa sat tantachäwirakiw (30 min.) apasini. Uk tuktʼayasax mä qʼuchuw qʼuchtʼasirakini (5 min.), ukhamat Yatiyañataki tantachäwir (35 min.) mantañataki. Ukat qʼuchump Diosat mayisïwimpiw tuktʼayasxani (5 min.). Sum wakichtʼasiñatakixa, Taman Bibliat Yatxatañatakisa, Yatiyañataki Diosan Yatichäwipatakisa, Yatiyañataki Tantachäwitakisa aka pachpa (Diosan Apnaqäwipat Yatiyañataki) qillqatanwa sapa phaxsi wakichäwix mistuni.
3. Taman Bibliat Yatxatañataki sat tantachäwixa, ¿kunjamas sarayasini?
3 Taman Bibliat Yatxatañataki. Kunjamatï Yatiyañataki sat revistat yatxatäwix apaski ukhamäniwa. Janiw pasïr yatichäwit amtayañax wakiskaniti, ukhamatwa mä qhawqha arunakampikix qalltasini. Ukhamarakiw taqi tantachasirinakax mä qhawqha arunakamp qhan arstʼanipxani. ¿Khitis sarayani? Tama taypin irpir chuymaninakan pʼiqiñchiripawa sapa semanatakix mä irpir chuymaniru sarayañapatakix uttʼayani.
4. Yatiyañataki Tantachäwinxa, ¿kuna mayjtʼäwinakas utjani?
4 Yatiyañataki Tantachäwi. Kunjamatï apasirïki ukhamäskaniwa, ukampis yatiyäwinakatakix phisqa minutokiw jilapart utjani, ukanxa wali wakiskiri yatiyäwinakamp sucursalat qillqat mä qhawqha cartanakampikiw liytʼasini. Sapa kuti yatiyasiski ukanakaxa, janiw nayraqatat yatiyasxaniti, jan ukasti tableroruw yatiñatakix uchasxani, sañäni, kawkjatsa yatiyir mistusini, khitinakas qʼumachani, qhawqha qullqis utji taqi ukanakasa ukat sucursalat apayat cartanakasa tableroruw uchasxani. Khitinakarutï arstʼañax waktʼkani uka jilat kullakanakax wali sumwa waktʼayasipxañapa ukat kunjam waktʼayapxäta siskitix ukhamarjamaw lurapxañapa ukat janiw tiempotsa jiljapxañapäkiti.
5. Tamanak tumptʼir jilatax visitkani ukhaxa, ¿kunjamänis tantachäwixa?
5 Tamanak tumptʼir jilatax visitkani ukha. Kunjamatï semanpachan apasirïkäna ukhamaw apasiskani. Yatiyañataki Diosan Yatichäwipa sat tantachäwimpi ukat Yatiyañataki Tantachäwimpixa martesaw apasini. Ukxarux mä qʼuchuw utjani ukat tamanak tumptʼir jilatawa 30 minutonak arstʼaskani. Kunjamtï yatitäkix ukhamawa, yaqha urun Taman Bibliat Yatxatañataki sat tantachäwix apasini, uka wakichäwxarux mä qʼuchuw qʼuchtʼasini, ukxarux visittʼir jilatarakiw yatiyañ tuqit arstʼani. Uka tantachäwix mä qʼuchump ukat Diosat mayisïwimpiw tuktʼayxani.
6. Grup uñjirixa, ¿kunanaksa lurani?
6 Yatiyir mistsuñatak tantachäwinaka. Irpir chuymaninakaw grup uñjirinaka uttʼayapxani, gruponakaruw yatiyir mistsupxañapataki irpsupxani ukat uka gruponakankki uka jilat kullakanakaruw uñjapxarakini. Kunapachatï irpir chuymaninakan yanapiriparu uka luräwitak uttʼayaskani ukhaxa, “grup uñjañ yanapiri” satäniwa.
7. Aka machaq wakichtʼäwixa, ¿kunjamsa yanaptʼistani?
7 Kunjamtï uñjktanxa, uka wakichäwix wali sumapunïniwa, uka jaypʼunx wali chʼamachtʼataw jikxatasiñäni ukhamarakiw suma yatichäwinak katuqañäni. Suma yatiyirïñasatakisa, suma yatichirïñasatakisa ukat walja jaqinakar yanaptʼañasatakisa uka tantachäwinakaw yanaptʼistani (Efe. 4:13, 14; 2 Tim. 3:17).
8. Sapa mayni wakichtʼasiniwayañäni ukhaxa, ¿kunjamatsa taqini yanaptʼassna?
8 Uka tantachäwinakataki sum yatxattʼaniwayañäni ukhaxa, kuna tuqinakatsa parlasiski ukxa sumwa istʼawayañäni. Ukat taqiniw uka tantachäwinakanxa arstʼarakiñäni, ukhamatwa maynit maynikam chʼamachtʼasiñäni (Rom. 1:11, 12; Heb. 10:24). ‘Nayraqataru sartatasax taqinin uñjatäñapawa’, ukhamasti ‘chiqaparuw Tatitun arunakap’ apnaqañasa (1 Tim. 4:15; 2 Tim. 2:15).
9. ¿Kunsa taqi chuyma amttanxa, ukat kunatsa?
9 Taman tantachasiñatak mayjtʼayäwinak utjatapax wal kusisiyistu. Ukatwa, ‘amuyasiri chiqap uywatamp’ irpayasiñsa jachʼa Awatirisaru jukʼampi jakʼachasiñsa taqi chuyma amttanxa. Jupawa uka ‘jachʼa tʼaqhisïwir’ saykatapxañasatakix taqinir wakichaskistu, niyakixay wali jakʼankatap amuyaschixa (Mat. 24:21, 45; Heb. 13: 20, 21; Apo. 7:14).