Diosan Reinoparojj jichhaw apoyañasa
Mä jachʼa thayas markamar jakʼachasinkaspa ukham amuytʼañäni. Autoridadanakajj akham sasaw yatiyapjje: “¡MISTJJAPJJAM JANKʼAK IMANTASIÑ THAQTAPJJAM!” sasa. ¿Kunsa jumajj lurasma? ¿Kawkjantï jan kunas paskiristam ukar jankʼakejjay sarasmajja?
Jichha tiemponjja mä “jachʼa thayaw” jiwas toqer jutaski. Jesusan arsutaparjamajja, uka jachʼa thayajj ‘wali tʼaqesiñ tiempo’ satawa (Mateo 24:21). Uka jachʼa thayat janiw escapksnati, ukampis imantassnawa. ¿Kunsa ukatakejj lursna?
Jesusajj Olivos Qollun yatichkäna ukhajja, akham sasaw ewjjtʼäna: “Nayraqatajj Diosan Reinopa, kunatï Dios nayraqatan cheqapäki ukanak thaqasipkakim” sasa (Mateo 6:33). ¿Kamsañsa uka arunakajj muni?
“Nayraqatajj Diosan Reinopa” thaqasipkakim. Diosan Reinopaw taqe kunat sipan jiwasatak wali importantëñapa, ukwa uka arunakajj sañ muni (Mateo 6:25, 32, 33). ¿Kunatsa ukhamäñapa? Jaqenakajj kuna jan walinakatï aka mundon utjki ukanak janiw askichañ puedksnati. Diosan Reinopakiw ukanak askichaspa.
“Kunatï Dios nayraqatan cheqapäki ukanak thaqasipkakim”. Diosan leyinakaparu ukat wiñay yatichäwinakapar istʼañatakiw chʼamachasiñasa, ukwa uka arunakajj sañ muni. ¿Kunatsa? Jiwasatï Diosar jan istʼasisa amtasarjamak kunatï walïki, kunatï jan walïkaraki uk amtañäni ukhajja, jan waliruw purtʼasiñäni (Proverbios 16:25). Ukampis jiwasatï Diosan leyinakaparjam sarnaqañäni ukhajja Diosaruw kusisiyañäni, jan walinakatsa jarkʼaqasirakiñäniwa (Isaías 48:17, 18).
¿Kunatsa “nayraqatajj Diosan Reinopa, kunatï Dios nayraqatan cheqapäki ukanak thaqasipkakim” sasin Jesusajj sispachäna? Waljanejj kunatï importantëki uk thaqañat sipansa qollqe thaqañarukiw uchasjjapjjaspäna, yaqhepasti kuna jan walinakatï utjki ukanakat sinti llakisisaw Diosan Reinopat armasjjapjjaspäna, ukatwa Jesusajj ukham ewjjtʼäna (Mateo 6:19-21, 25-32).
Ukampis Jesusajja, khitinakatï Diosan Reinopar yanaptʼapkani ukanakajj taqe kunatï wakiski ukanak katoqapjjaniwa, jutïrinjja jukʼamp bendicionanakwa katoqapjjani sasaw säna (Mateo 6:33).
Jesusan nayra discipulonakapajj Diosan Reinopa, kunatï Dios nayraqatan cheqapäki ukanak nayrarus uchawayapkchïnjja, kunjamsa tʼaqesiñajj tukusini uk janiw uñjawayapkänti. Ukampis ukanakar saykatañatakejj yanaptʼwa katoqawayapjjäna. ¿Kunatsa ukham sistanjja?
Jupanakajj Diosan leyinakaparjamaw sarnaqapjjäna, ukaw kuna jan walinakantï Diosar jan istʼirinakajj uñjasipkäna ukanakat jupanakar jarkʼaqäna. Diosan Reinopar taqe chuyma confiyapjjatapaw wali jan waltʼäwinakar saykatañatakejj yanaptʼäna. Ukanak aguantapjjañapatakejja, Diosarakiw “jaqen chʼamapat jilankki uka chʼama” churäna (2 Corintios 4:7-9).
¿JUMAJJ DIOSAN REINOP THAQÄTATI?
Nayrïr patak maranakan jakir cristianonakajja, Jesusan ewjjtʼaparojj taqe chuymaw istʼapjjäna. Ukatwa jakapkäna uka cheqanakan Diosan Reinopat taqe jaqenakar yatiyapjjäna (Colosenses 1:23). ¿Jichhürunakan khitinakas uka pachpa lurasipki?
Diosan Reinopajj Supayan apnaqat akapacharojj niyaw tukjani, ukwa Jehová Diosan Testigonakapajj yatipjje. Ukatwa Jesusan aka ewjjtʼapar istʼañataki chʼamachasipjje, jupajj akham sänwa: “Reinon aka suma yatiyäwinakapajja aka oraqpachanwa yatiyasini, ukhamat taqe markanakan yatipjjañapataki. Ukjjaruw akapachan tukusiñapajj jutani” sasa (Mateo 24:14).
Diosan Reinopat suma yatiyäwinak istʼäta ukhajj ¿kunsa jumajj luräta? Berea (Macedonia) markan jakiri nayrïr cristianonakat yateqasiñamatakiw chʼamañchtʼapjjsma. Diosan Reinopat suma yatiyäwinak apóstol Pablot istʼapjjäna ukhajja, “taqe chuymaw Diosan arunakap katoqasipjjäna, wali amuyumpiw Qellqatanakat sapüru yatjjatapjjäna” ukhamat kunanaktï istʼapkäna ukanakajj cheqäskapuniti janicha uk yatiñataki. Ukatjja kuntï yateqapkäna ukarjamaw lurapjjarakïna (Hechos 17:11, 12).
Jumajj jupanakjamarakiw lurasma. Jumatï nayraqat Diosan Reinopa, kunatï Dios nayraqatan cheqapäki ukanak thaqäta ukhajja, jichha tiemponsa jan walinakar saykatañatakejj yanaptʼa katoqätawa. Jutïrinsa sumankañana jan kun ajjsarasaw wiñayataki jakasïta.