Bibliat yatiqirinakar yatichkasaxa, kunjamatsa “Diosan munasiñapa” sat librompix yanaptʼsna
1. ¿Kuna amtampi luratas “Diosan munasiñapa” sat libroxa?
1 “Qullan ajayumpi irpayasipxañäni” sat Kimsüru Jachʼa Tantachäwin “Diosan munasiñapan jakasipxañäni” sat libro katuqañaxa, ¡wali kusiskañapunïnwa! Kunjamtï yatiyasiwaykixa, Jehová Diosan kamachinakap uñtʼañasataki ukat ukarjam sarnaqañasatak yanaptʼañapatakiw uka librox apsusiwayi, janiw Biblian qallta yatichäwinakap yatichañatakïkiti. Janiw uka librompix utat ut yatiyir sarkañäniti.
2. ¿Kunjamsa yatichañäni aka librompixa, ukat khitinakarusa?
2 Kunsa yatichi libro tukuyasax aka librompiw yatiqirirux yatichaskakiñäni. Chiqas janiw taqinix mä kikpaki yatiqapkiti, ukatwa sapa maynin yatiqataparjam yatichañasa. Ukampisa, yatichäwinakax yatiqirin chuymaparuw purtʼañapa uk sum amuyañamawa. Khitinakatï walja libronakat yatxatawayxapxi ukat janirak tantachäwinakarus sarapkchiti ukat Bibliat yatiqawayapki uka yatichäwinakarjamas janirak jakäwipsa askichañ munapkarakchiti ukanakaruxa, payïri librompix janiw yatichxañäniti.
3. Diosaru yupaychapxañäni sat libromp yatichaskstan ukhaxa, ¿kamachañasäspasa?
3 Diosaru yupaychapxañäni sat librompitï jichhax yatichasksta ukat niya tukuyañampïxaraksta ukhaxa uka libromp tukuyaskakismawa, “Diosan munasiñapa” sat librxa jumaw taqpach liytʼxäta sasaw yatiqirimar sañama. Jan ukhamäkani ukhaxa, machaq librompiw qallta yatichäwipatpach yatichxañama. Kunjamtï Kunsa yatichi sat libromp yatichaskänxa uka kikparakiw machaq libron jukʼamp yatxatañataki siski uka chiqanakax yatxatasinit janich ukxa yatichiriw amuyxañapa.
4. Mä yatiqiritix Kunsa yatichi ukat “Diosan munasiñapa” sat libronak janïr tukuykas bautisasini ukhaxa, ¿kamachañasasa?
4 Paypach librot yatiqañ jan tukuykasatï mä yatiqirix bautisasxchi ukhaxa, “Diosan munasiñapa” sat librot yatiqañxa tukuyaskakiñapawa. Payïri libro janïr tukuykasa bautisasxchi ukhasa, horanakamsa wasitat kutʼkta uksa ukat mä yatiqiritsa jakhuskakismawa. Mayni yatiyiritï jumamp chika sarani ukhaxa horanakapxa jakhuñaparakiwa.
5. Walja tiempo jan yatiyir mistxapxi ukanakarux “Diosan munasiñapa” sat librompixa, ¿kunjamsa yanaptʼsna?
5 Kunapachatï Taman Irpir Chuymaninakat Pʼiqtʼirinakat maynïrix “Diosan munasiñapa” sat librot ajlltʼat yatichäwinak jan yatiyir mistxchi ukar Bibliat yaticham sätam ukhaxa, yatichäwix janiw jaya tiempüñapäkiti. ¡Ukax Diosan suma churäwipapuniwa! Aka machaq libroxa “Diosan munasiñapan” jakasiñasatakiw yanaptʼistani, ukatak waktʼayatawa (Judas 21).