Diosan arunakapat yatiqañ munirinakar thaqhapxañäni
1. ¿Diosan arunakapat yatiyir sarañax wali askïtap kunjamatsa uñachtʼaysna?
1 Jesusax suma yatiyäwinak aski jaqinakar yatiyañatakixa, walpun chʼamachtʼasïna (Isa. 61:1, 2). Jiwasax Jesusan khitatanakapätanwa ukat jupat yatiqasiñax wali askipuniwa, chiqas kawkhantï yatiyañasäki uka chiqanakanxa aski jaqinakaru jan qarjasa thaqhañatakiw chʼamachastanxa ukhamatwa Jesusat yatiqasitassa uñachtʼayaraktanxa (Mat. 10:11; 2 Cor. 5:20).
2. ¿Kunjamsa Pablox mayninakar parltʼirïna ukat kuna askinaksa jikxatäna?
2 Taqinimp parltʼirïñasawa. Apóstol Pablox nayraqat sinagogaruw sarirïna ukhamat judionanakaru ukat judionakan yupaychäwipar mantirinakaru (prosélito) yatiyañataki (Hech. 14:1). Ukampis Filipos markanxa Pablompi Silasampix “kawkharutix oración lurir sarañäki ukkharu[w]” jaqinak thaqhirix sarapxäna. Ukanxa tantachtʼat warminakaruw Diosan Arupat yatiyapxäna, uka warminakat maynïrix Lidia satänwa uka warmix jankʼakiw Diosan arup yatiqäna ukat bautisasirakïna (Hech. 16:12-15).
3. ¿Utat uta yatiyiris sarkstanxa, kawki chiqanakan yatiyañasas wakisirakispa?
3 Utat uta yatiyiris sarkstanxa, ¿kawki chiqanakan yatiyañasas wakisirakispa? Terminalanakana, parquenakana, irnaqäwi jikxatañ oficinanakana, walja jaqinaka sarnaqapki ukhana, qhathunakana, ukat plazanakan yatiyañax wakisirakiwa. Ukat yaqhip chiqanakanxa utanakax wali jarktʼatawa ukat yaqhip edificionakarusa janiw mantañjamäkarakiti porteronakaw ukan uñjapxi, ukampis ukan jakasirinakarux carta qillqtʼasa jan ukax telefonot jawstʼasaw Diosan Arupat yatiyaraksnaxa. Wali amuyump mayninakar parltʼasa ukat yatiyktan uka chiqanakatakjam wakichtʼasiñäni ukhax “jukʼampi jukʼampi Tatitun luräwipanxa” irnaqasipkakiñäniwa (1 Cor. 15:58).
4. ¿Yatiyktan uka chiqax jiskʼakïchi ukhaxa, kunjamanakats yatiyaskaksna?
4 Yaqhip jilat kullakanakax pachpa markapan yaqha tamar sarasa jan ukax yaqha markanakar sarasaw Diosan arunakap yatiyapxi. Ukat yaqha markat jutirinakar yatiyañatakixa, yaqhip jilat kullakanakax yaqha aru parlañwa yatiqapxaraki.
5. Aka ñanqhapachan tukusiñap yatisaxa, ¿kun lurañatakis amtañasäspa?
5 Aka Uraqpachan yatiyañasawa uk amtapuniñäni (Mat. 9:37; 13:38). Aka ñanqhapachan tukusiñapax wali jakʼankxiwa, ukhamax taqiniw wali sum amuytʼasiñasa, tiemposasa ukat kunanak lurañti yatktan ukanakas kunjamsa jukʼamppach Diosar luqtañ yanaptʼistaspa uk amtañataki. Jiwasatï Diosan reinopa nayraqatar uchañäni ukhaxa, Jehová Diosax ukham irnaqatasatxa bendeciskistaniwa (Mat. 6:33).