Octubre phaxsinx Bibliat yatichañ qalltañatak chʼamachasipxañäni
1. ¿Kunampis octubre phaxsin yatiyaskañäni?
1 Octubre phaxsinxa, Yatiyañataki ukat ¡Despertad! sat revistanakampiw yatiyaskañäni. Yatiykañäni uka jaqitï jukʼamp yatxatañ munanixa, Bibliat yatichañ qalltañatakix ¿Kunatï chiqäki uk yatiñ munasmati? sat tratadompiw kuttʼañasa. Kunjamsa uk lursna uk jichhax amuytʼañäni.
2. Revistanak katuqasiwayapki ukanakar wasitat visittʼasaxa, ¿Kunatï chiqäki uk yatiñ munasmati? sat tratadompix ¿kunjamsa Bibliat yatichañ qalltsna?
2 Kunjamsa uka tratadomp kuttʼañasa. Inas akham sischisma: “Churawayksma uka revistaxa, taqiniruw Bibliat yatxatapxañapatakix chʼamañchtʼaski. [¿Kunatï chiqäki uk yatiñ munasmati? sat tratado churäta, ukat nayrïr janan jikxataski uka jisktʼanak uñachtʼayäta.] Aka jisktʼanakarux Bibliaw qhanañchi. ¿Kawkïrits yatxatañ munasma?” sasa. Kamsanis uk sumwa istʼañama. Ukatxa tratadon uka jisktʼar qhanañchki ukwa liytʼarapiñama, ukat Bibliat apstʼat jiskʼa tʼaqanakax ukan uñstki ukwa Bibliat thaqtañama. ‘Bibliax janiw uka tuqitak qhanañchkiti, jan ukasti jukʼampinakatwa qhanañchtʼi’ sasaw säta. Ukatxa Kunsa yatichi sat libro churäta. Kunjamsa uka librompi Bibliat yatichañ qalltasma, uk pä tuqit amuytʼañäni: 1) Akanakaniwa siski uka janat mä yatichäw ajlliñapatak uñachtʼayäta ukat nayrïr tʼaqanakat yatxatapxäta. 2) Tratadotx kuna tuqitsa parlasipkayäta uka tuqit jukʼamp qhanañchtʼañatakiw librot thaqtasma. Ukatakix librot aka chiqanak thaqtañaw yanaptʼiristamxa:
● ¿Chiqapunit Diosax sum jakasiñas munpacha? (9-11 jananaka 6 tʼaqat 10 tʼaqakama)
● ¿Nuwasïwinakasa tʼaqhisiñanakasa tukusxpachäniti? (12 jana 12, 13 tʼaqanaka)
● Jiwatatxa, ¿jakañax utjaskakpachati? (59, 60 jananaka 7, 8 tʼaqanaka)
● ¿Jiwatanakatak mä suytʼäwix utjpachati? (71 jana 13 tʼaqat 15 tʼaqakama)
● ¿Diosan istʼatäñatakix kunjamsa Jupat mayisiristxa? (166, 167 jananaka 5 tʼaqat 8 tʼaqakama)
● ¿Kunjamsa kusisit jakasiristxa? (9 jana 4, 5 tʼaqanaka)
3. ¿Kunjamanakatsa Bibliat yatichañ qalltsna?
3 Nayraqat kutʼkañäni ukhax Kunsa yatichi sat librompi Bibliat yatichañ jan qalltañjamäkani ukhaxa, jukʼamp parltʼaskakiñatakix mayan kuttʼanï sasaw sañama. Utanitï jukʼamp yatxatañ munaskakini ukhaxa, kutʼkasinx janïr libro churkasax tratadon utjki uka jisktʼanakat qhanañchtʼaskakismawa. Ukhamasti, octubre phaxsin Bibliat yatichañ qalltañatakix uka suma tratadomp irnaqtʼapxañäni, ukhamatwa chiqa chuyman jaqinakarux kunatï chiqäki uk yatiqapxañapatak yanaptʼañäni (Juan 8:31, 32).