Yatiykasax churapxapuniñäni
1. ¿Kunatï chiqäki uk yatiñ munasmati? sat tratadoxa, ¿kunatakis yanaptʼistani?
1 ¿Kunatï chiqäki uk yatiñ munasmati? sat tratadox Bibliat yatichañ qalltañatak wakichatawa. Ukat Diosan chiqa arunakap taqinir yatiyañatakiw yanaptʼarakistu (Ecl. 11:6). Kunjamsa uka qillqatampix yatiysna uk mä qhawqha uñjañäni.
2. ¿Kunjamsa uka tratadompix parlañ qalltsna?
2 Kunjamsa parlañ qalltsna: Nayraqatxa utaniruw uka tratado churasma ukat nayrïr janan utjki uka suxta jisktʼanak uñachtʼayasax akham sasaw jisktʼasma: “Akan utjki uka jisktʼanakatxa, ¿kawkïrsa jumax jisktʼasirïta?” sasa. Kuntï siskani uk istʼasaxa, tratadompiw qhanañchtʼäta ukat Bibliat mä jiskʼa tʼaqa liytʼarapïta. Ukatxa, qhipa janan jikxataski uk liytʼarapïta jan ukax mä qhawqha arunakamp qhanañchtʼäta, ukat Kunsa yatichi sat libro churäta. Janisay uka libro katuqaskchinixa, tratado katuqasisax inas liytʼasax Diosan chiqa yatichäwinakapax chuymapar purtʼchispa (Mat. 13:23).
3. Utanitï jan tiemponïkani ukhaxa, ¿kuns lursna?
3 Jan tiemponïpkani ukha: Akham sasaw parlañ qalltasma: “Janjamakiw tiemponïktati ukampis aka tratado jaytawayäma. Ukanxa suxta jisktʼanakaw utji ukat sapa jisktʼarux Bibliampiw qhanañchaskaraki. Ukxa niya taqiniw jisktʼastanxa. Mayan kuttʼankä ukhaw kunsa amuyta uk yatiñ munirista” sasa.
4. Callenakan yatiykasax uka tratado churañatakixa, ¿kamsnasa?
4 Callenakan yatiykasa: Akham sasmawa: “Kamisaki, ¿akham jisktʼanak jisktʼasirïtati? [Kamsanis uk istʼäta.] Aka tratadow uka jisktʼanakarux Bibliarjam qhana ukat amuytʼkaya qhanañchtʼaski” sasa. Tiemponïskani ukhaxa, inas mä jisktʼar tratadomp qhanañchtʼchisma ukat Kunsa yatichi sat librsa churarakismawa.
5. Jan utapankapkani ukanakatakixa, ¿kunjamsa awisax uka tratado jaytsna?
5 Jan utankapkani ukha: Utanir jan jikxatapki ukhaxa, yaqhip chiqanxa Bibliat apstʼat qillqatanakxa, kawkhantï yaqha jaqinakax jan uñjapkaspa ukharuw punkur jaytawayapxi. Tamamantï ukham lurañ yatitäpxstaxa, ¿Kunatï chiqäki uk yatiñ munasmati? sat tratado awisax ukham jaytapxarakismawa. Ukat kuttʼasax akham sasmawa: “Pasïrin jutapxta ukhax janiw jikxatapksmati ukatwa aka tratado punkumar jaytawayapxsma. Akan jikxataski uka jisktʼanakatxa, ¿janit kawkïrits yatxatañ munkasma?” sasa.
6. ¿Kunatsa uka tratadompi yatiyañax jan chʼamäki?
6 ¿Kunatï chiqäki uk yatiñ munasmati? sat tratadox qhana ukat amuykañwa Biblian yatichäwinakap qhanañchi. Kuna yupaychäwinkasipkchisa ukat yaqha markankirïpkchisa uk liytʼasax yatxatañ munapxarakispawa. Ukat waynitüpki jan ukax tawaqitäpki ukat jichhak yatiyir mistusipki ukanakatakixa, uka tratadompi yatiyañax janiw chʼamäkiti. ¿Kawkin yatiykasas jumax uka tratado churapuntati?