Los testigos de Jehová: organizados para predicar las buenas nuevas
Patak maranak jilaw Jehová Diosan Qhanañchirinakapax Diosan arunakap yatiyasipktan, ukatakix wali suma wakichtʼata ukat mayachtʼatarakïtanwa. Ukatwa suma yatiyäwinakax uraqpachan walja arunakata ukat 230 jila markanakan yatiyasiski (Mat. 24:14). ¿Kunatsa yatiyañax wal wakispacha? ¿Kunjamatsa uraqpachan yatiyasiski? Uka jisktʼanakaruxa, Los testigos de Jehová: organizados para predicar las buenas nuevas sat videow qhanañchistani. Uka video uñjasax aka jisktʼanakaruw qhanañchtʼäta.
¿Kunjamsa aka videox 1) kuntï Jehová Diosan markapax uraqpachan yatiyañatak chʼamachasisipki uk wali askirjam uñjañ yanaptʼawaytamxa? (2 Tim. 4:2.) 2) Betel utanakan irnaqtʼir jilat kullakanakar wali askirjam uñjañ yanaptʼawaytamxa? 3) misioneronakana ukat tamanak tumptʼir jilatanakan suma wakichtʼatäpxañapatak wakichäwinakax utjki uk wali askirjam uñjañ yanaptʼawaytamxa? (2 Tim. 2:2, NM.) 4) Bibliat apstʼat jiskʼa tʼaqanak sapa alwa yatxatañasa ukat sapa tantachäwinakatak wakichtʼasiñas wali askïtap uñjañatak yanaptʼawaytamxa? (Hech. 17:11.) 5) tantachäwinakar sarañax wali askïtap uñjañatak yanaptʼawaytamxa? (Heb. 10:24, 25.) 6) kuna bendicionanaktï paraison katuqkañäni uk wali askirjam uñjañatak yanaptʼawaytamxa? (Isa. 11:9.) 7) jichhürunakan jukʼamp yatiyir sarañax wali askïtap amuyañatak yanaptʼawaytamxa? (Juan 4:35.)
Kunjamsa Jehová Diosan Qhanañchirinakapax uraqpachan yatiyasipki uk sum amuytʼañxa, aka videow Bibliat yatiqañ munapki jupanakarux wal yanaptʼawayi. 8) Bibliat yatiqirinakasarusa, familiaranakasarusa ukat uñtʼktan jupanakarusa, ¿kuna pachas uka video uñtayañax wakisispa? 9) ¿Khitinakatï uka video uñjapki jupanakax kamsapxisa?
Kunanaktï Jehová Diosax jichhürunakan luraski ukanakat amuytʼasaxa, salmonak qillqirjamarakiw sistanxa, jupax akham sänwa: “[Jehová] Dios Tatay, muspharkañ luratanakamax waljawa, nanakat khuyapayasitamas waljarakiwa: janiw khitis jumjamax utjkiti” sasa (Sal. 40:5). Ukhamasti, uka video wali askirjampun apnaqañäni, ukhamatwa jaqinakarux Jehová Diosaru ukat markapar wali respetomp uñjapxañapatak yanaptʼañäni.