Sarnaqatasamp Diosar jachʼañchañäni
1. ¿Jachʼa tantachäwinakar saratas waljaniw amuyapjje sasajj kunatsa sissna?
1 Kunapachatï jachʼa tantachäwir sarktan ukhajja, jaqenakajj sum amuyapjje. Yaqhep markanakanjja, radionsa, televisionansa ukat periodiconsa jachʼa tantachäwi utjatapat yatiyapjjewa. Ukat Jehová Diosan Qhanañchirinakapajj qorpachasiñ utanakarusa, manqʼa alañ utanakarus sarapjjarakiwa, ukat callenakansa qhanapuniw tarjetamp tʼirkatasit sarnaqapjje. Ukhamajj tantachäwi apaskani uka markan kunjamsa sarnaqäwisampejj Jehová Diosar jachʼañchsna uk mä qhawqha toqet yatjjatañäni (1 Ped. 2:12).
2. Jachʼa tantachäwejj apaskani ukan ¿kunjamsa isisitasampejj Jehová Diosar jachʼañchatas uñachtʼaysna?
2 Sum isthaptʼasiñasa. Tantachäwinkkasajj suma isthaptʼatäñasawa. Ukampis kun alir sarkasasa, manqʼa alir mistkasasa ukat qorpachasiñ utar purktan ukhasa, kunjam isthaptʼatäsktansa uk jaqenakajj sum amuyapjje. Cheqas janiw taqe ukanakar kunjamtï tantachäwir sarktan ukham sarkapuniñäniti, ukhamajj isthapisitasajj Diosar yupaychirïtas qhan uñachtʼayañapa (Rom. 12:2). Ukampisa, wakisirakiw tarjetamp tʼirkattʼatäñajja, ukhamatwa jaqenakarojj jachʼa tantachäw apasitap uñachtʼaysna, ukat jaqenakar yatiyaraksna, ukat jilat kullakanakas uk uñjasin sum amuyapjjestaspa.
3. ¿Kunjamatsa paciencianïtas ukat suma jaqëtas uñachtʼaysna?
3 Paciencianïña ukat suma jaqëña. Jichhürunakan jaqenakajj jupatakik kuns muniri ukat jan yuspärasiri ukhamäpjjewa. Ukampis jiwasajj khitinakatï qorpachasiñ utanakan trabajipki ukanakarusa jan ukajj manqʼa aljañan trabajipki ukanakarusa pacienciampi ukat respetompiw uñjañasa, ukajj jupanakatakejj wali askïniwa (2 Tim. 3:1-5). Ukat ukhamarakiw qonuñanak imasinsa jan ukajj machaq qellqatanak katoqer sarktan ukhas janiw jiwasan askisak thaqhañasäkiti (1 Cor. 10:23, 24). Mä jaqejj jachʼa tantachäwir saratapatjja akham siwa: “Kunanakatï tantachäwin arstʼaskäna ukanakat janiw ni mays amtkti, ukampis Jehová Diosan Qhanañchirinakapan sum sarnaqatapaw janipun armañjamäkiti” sasa.
4. ¿Jachʼa tantachäwin kunatsa yanaptʼañasajj wakisini?
4 Jankʼak yanaptʼasirïña. Cheqpach cristianonakajj jankʼak yanaptʼasirit uñtʼatawa (Sal. 110:3). ¿Jumajj yanaptʼarakismati? Mä kutejj jachʼa tantachäwi wakichañatakejj niya 600 jilat kullakanakaw qʼomachañan yanaptʼapjjäna. Uk uñjasajj local uñjirinakajj akham sapjjänwa: “Wali muspharkañapuniwa, janipuniw ukham uñjapjjerïkti. Kamisarak jan kun mayisak irnaqapjjanisti, janiw cheqaw sañjamäkiti” sasa. Cheqas taqe chuymaw kimsa uru jachʼa tantachäwi 2013 maran apaskani uk suytanjja, ukat janirakiw istʼasaki jan ukajj yateqasaki Diosar jachʼañchksnati, jan ukasti, sarnaqäwisampiw jachʼa yatichir Jehová Diosasar jachʼañchsna.
[3-6 jananakan recuadro]
Kimsa uru jachʼa tantachäwitak amtäwinaka, 2013
◼ Kuna horas qalltani. Kimsürpachaw tantachäwejj 9:20 alwa horasar qalltani. Ukat 8:00 alwa horasaruw punkojj jistʼaratäjjani. Kunapachatï musicajj qalltjjani ukhajja, qontʼasjjañasawa jan ukajj uttʼasjjañasawa ukhamat wakichäwejj sum qalltañapataki. Viernes urumpi sábado urumpejja 4:50 jaypʼu horasaruw tukuyani, ukat domingo urusti 3:35 jaypʼu horasaruw tukuyarakini.
◼ Auto saytʼayañanaka. Kawki cheqanakantejj auto saytʼayañanakajj jiwasankani ukhajja, janiw qollqejj mayitäkaniti ukatjja purinitarjamaw autonak saytʼayapjjarakini. Niyakejjay auto saytʼayañ cheqajj jiskʼakïchejja, mä autotak waljan sarapjjasma ukhajja wali askipunïspawa.
◼ Qonuñanaka jan ukajj uttʼañanaka. Jiwasamp chika jutirinakataki ukat jiwasamp chika pachpa utan jakasirinakataki jan ukajj Bibliat jumamp yateqapki ukanakatakikiw qonuñanak imsnajja. Ukat chuyman jilat kullakanakatak jan ukajj usutanakatak utjki uka qonuñanakajj mä qhawqhakiwa, ukhamajj janiw taqpach familpach ukan qontʼasiñapäkiti. Mirä amp suma uka qonuñanakajj khitinakatï chuymankipstatäpki, usutäpki ukat jupanakan yanapapki ukanakatakikiwa (1 Cor. 13:5).
◼ Manqʼañ toqeta. Chikürojj manqʼa alasir anqar mistuñat sipansa manqʼa apasiñajj wali askiwa. Ukampisa, manqʼjja janiw jachʼa qʼepi apañasäkiti janirakiw manqʼa apañatak vidriot luratajj utjki ukarus apañasäkiti.
◼ Qollqempi yanaptʼañataki. Kunjamtï chuymasan amtawayktan ukhamarjamaw Oraqpachan yatiyasiski ukar qollqemp yanaptʼsna, ukhamatwa yuspäratas uñachtʼaysna, uksti Tantachasiñ Utanwa jan ukajj jachʼa tantachäwinwa irantarakisma.
◼ Medicamentonaka. Jumatï medicamentonak umsta ukhajja, mirä amp suma qhawqtï wakisirjamäni ukjwa apasiñama, kunattejj jachʼa tantachäwinjja janiw uka medicamentonak jikjjatkätati.
◼ Zapatonaka. Sapa maraw kay usuchjasipjje jan ukajj qʼewsusipjje. Ukatwa ukürunakatak jan usuchjirjamäki uka zapato uchtʼasiñajj wakisi, ukhamat gradanakansa rejillanakansa ukat yaqha cheqanakansa sum sarnaqañataki.
◼ Jan sum istʼapki ukanakataki. Pachpa jachʼa tantachäwinjja wakichäwejj FM radiot istʼasini. Istʼañatakejj mä jiskʼa radio ukat jiñchur usktʼasis mä ischʼukiñampiw munasini.
◼ Wawa nuknaqañ cochenaka ukat apthapiñ sillanaka. Jachʼa tantachäwirojj janiw wawa nuknaqañ cochenakasa apthapiñ jachʼa sillanakasa apasiñapäkiti. Jiskʼa wawanakar qontʼayañ sillanakjja apasisipkasmawa, ukampis uka sillanakajj janiw mä qonuñat jiläñapäkiti.
◼ Sírvase visitar sat formulario. Jachʼa tantachäwinkkasin Diosat yatjjatañ munirinakampi parltʼäta ukhajja, jupanakajj kawkjans jakapjje uk qellqtʼañatakejja Sírvase visitar (S-43) sat formularioruw qellqtʼasiñama. Jachʼa tantachäwinjja Departamento de Publicaciones sat uñjiri jilatanakaruw uka formulario jaytasma jan ukajj tamankir secretario jilataruw tamamar kutʼjjasajj churarakisma.
◼ Manqʼa aljañ utanaka. Uka utanakar sarasin jilat kullakanakasajj respetomp sarnaqapjje ukhajja, Jehová Diosaruw jachʼañchapjje.
◼ Qorpachasiñ utanaka. Aka amtäwinakajja, janiw taqe cheqanakatakïkiti:
1) Janiw inamayak utanak mayïtati, janirakiw yaqhanakarus uka utar qorpachañatak jawstʼätati.
2) Uka qorpachasiñ utanjja, kawkhantï phayasiñapäki uka cheqanakwa phayasma.
3) Juntʼümas chhullunkhayas inakiw qorpachasirinakarojj churapjje, ukhamajj janiw jilpach apsusiñamäkiti.
4) Qorpachasiñ utan irnaqerinakarojj munasiñampi ukat respetompiw uñjañasa. Jupanakajj waljaniruw yanaptʼasipki, ukhamajj jiwasan amuytʼasirïtasatsa suytʼirïtasatsa ukat jupanakar yanaptʼirïtasatsa wal yuspärapjje.
◼ Yanaptʼañataki. Jachʼa tantachäwinakar sarañajj wali kusiskañapuniwa, ukampis kunanakantï ukan yanaptʼañajj wakisini ukar yanaptʼäta ukhajja, jukʼamp kusisitaw jikjjatasïta (Hech. 20:35). Taqe khitinakatï yanaptʼañ munapjjani ukanakajja, Departamento de Servicio Voluntario ukaruw sarapjjañapa. Ukat khitinakatï janïr 16 maranïpki ukanakas yanaptʼapjjarakispawa, ukampis awk taykapan uñjatäpjjañapawa.