Kimsa uru jachʼa tantachäwitak amtäwinaka
Kuna horas qalltani. Kimsürpachaw tantachäwejj 9:20 alwa horasar qalltani. Ukat 8:00 alwa horasaruw punkojj jistʼaratäjjani. Kunapachatï musicajj qalltjjani ukhajja, qontʼasjjañasawa jan ukajj uttʼasjjañasawa ukhamat wakichäwejj sum qalltañapataki. Viernesampi sabadompejj 5:00 jaypʼu horasaruw tukuyani, ukat domingosti 4:00 jaypʼu horasaruw tukuyarakini.
Jehová Diosar qʼochunakampi jachʼañchapjjañäni. Nayra tiemponjja, Diosan markapajj qʼochunakampiw Jehová Diosar jachʼañchapjjerïna. Jichhürunakanjja, qʼochunakampi Diosar jachʼañchañajj askit uñjatakïskiwa (Sal. 28:7). Ukatwa kimsa uru jachʼa tantachäwinakan sapa wakichäwejj musicanak istʼasa qalltasi. Uka musicanakajj janiw aleq istʼañatakïkiti, jan ukasti Jehová Diosar jachʼañchañataki ukat Jupat yateqañatakiwa. Ukatwa tantachäwi sarayir jilatajj music istʼañatak invitʼkani ukhajja, qontʼasjjañasawa ukat sum istʼañasaraki. Ukhamatwa Watchtower orquestan tukir jilat kullakanakan chʼamachasitapar askit uñjatas uñachtʼayañäni. Jupanakajja, pasajenakap pagasisaw walja markanakat Patterson, (Nueva York) markaru suma musicanak tukir maran pay kuti sarapjje, ukhamatwa uka musicanakampejj Diosar yupaychtanjja. Uka suma musicanak istʼañ tukuyatarojja, Jehová Diosaruw qʼochusa jachʼañchañäni.
Auto saytʼayañanaka. Kawki cheqanakantejj auto saytʼayañanakajj jiwasankani ukhajja, janiw qollqejj mayitäkaniti ukatjja purinitarjamaw autonak saytʼayapjjarakini. Niyakejjay auto saytʼayañ cheqajj jiskʼakïchejja, mä autotak waljan sarapjjasma ukhajja wali askipunïspawa.
Qonuñanaka jan ukajj uttʼañanaka. Punkojj jistʼaraskani ukhajja, kawkharutï qontʼañ munktan ukharojj janiw atip atipa tʼijuñasäkiti. Cheqas jiwasan askis thaqañat sipansa, mayninakan askipwa thaqañasa. Ukhamatwa cheqpach cristianötas qhan amuyasini, uñjapkistu ukanakas Jehová Diosar jachʼañchapjjarakini (Juan 13:34, 35; 1 Cor. 13:5; 1 Ped. 2:12). Jiwasamp chika jutirinakataki ukat jiwasamp jakapki ukanakataki jan ukajj Bibliat jiwasamp yateqasipki ukanakatakikiw qonuñanak imsna. Ukat chuyman jilat kullakanakatak jan ukajj usutanakatak utjki uka qonuñanakajj mä qawqhakiwa, ukhamajj janiw taqpach familpach ukan qontʼasiñapäkiti. Mirä amp suma uka qonuñanakajj khitinakatï chuymankipstatäpki, usutäpki ukat jupanakar yanapapki ukanakatakikiwa.
Sum isthaptʼasiñasa. Kimsa uru jachʼa tantachäwir sarañatakejj cristianjamajj sumwa isthaptʼasiñasa, janiw akapachankir jaqenakjam jan wali isinakampi isisiñasäkiti (1 Tim. 2:9). Qorpachasiñ utar qorpachayasiñataki qellqayasir sarkasasa jan ukajj qorpachasiñ utat mistjjasasa, ukat sapa tantachäw tukuyataru kawkhanakar sarkasasa, sumwa isthaptʼasiñasa. Ukhamatwa tarjeta tʼirkattʼata sarnaqañsa ukat Jehová Diosan arunakap yatiyañsa, jan ajjsarayaskañäniti. Ukat kimsa uru jachʼa tantachäwir suma isthaptʼasit sarañäni ukat cristianjamas sum sarnaqañäni ukhajja, suma chuyman jaqenakajj uk uñjasajj jukʼampiw Diosan arunakap yatjjatañ munapjjani, ukat Jehová Diosarus kusisiyarakiñäniwa (Sof. 3:17).
Apnaqañ aparatonaka. Jumatï celular jan ukajj ukar uñtasit yaqha aparato apaña amtasksta ukhajja, janiw mayninakar pantjasiyirjam apnaqañamäkiti. Jumatï foto apsuñataki, video filmañataki jan ukajj yaqha ukham aparatonak apäta ukhajja, janiw mayninakar jamastʼayirjam apnaqañamäkiti. Janirakiw jan wakiskir mensajenaksa mayninakar qellqañamäkiti.
Manqʼañ toqeta. Chikürojj manqʼa alasir anqar mistuñat sipansa, manqʼa apasiñasawa. Ukampisa, manqʼjja janiw jachʼa qʼepi apañasäkiti janirakiw manqʼa apañatak vidriot luratajj utjki ukarus apañasäkiti.
Qollqempi yanaptʼañataki. Chuymasan kunjamjjay amtawayktan ukarjamaw oraqpachan yatiyasiski ukar qollqemp yanaptʼsna, ukhamatwa yuspäratas uñachtʼaysna, uksti Tantachasiñ Utanwa jan ukajj jachʼa tantachäwinwa irantaraksna.
Medicamentonaka. Medicamentonak umsta ukhajja, mirä amp suma qawqhatï wakisirjamäni ukjwa apasiñama, kunattejj jachʼa tantachäwinjja janiw uka medicamentonak jikjjatkätati. Diabetes usunïstajja, inyección uchañatak agujanaksa jan ukajj jeringuillanaksa janiw ukhamak jaqtätati, mayninakaruw jan waltʼayaspa. Janirakiw qorpachasiñ utarusa, ni jachʼa tantachäwin utjki uka basurerorusa jaqtañamäkiti, kawkharutï jaqtasiñapäki ukawjaruw jaqtäta.
Chijir jan puriñataki. Sapa maraw kay usuchjasipjje jan ukajj qʼewsusipjje. Ukatwa chijir jan puriyirjam zapatonak uchasiñajj wakisi, ukhamatwa gradanakansa rejillanakansa ukat yaqha cheqanakansa jan usuchjaskañäniti.
Jan sum istʼapki ukanakataki. Pachpa jachʼa tantachäwinjja, wakichäwejj FM radiot istʼasini. Istʼañatakejj mä jiskʼa radio ukat jiñchur uchasiñ mä audifonompiw munasini.
Wawa nuknaqañ cochenaka ukat apthapiñ sillanaka. Jachʼa tantachäwirojj wawa nuknaqañ cochenakasa apthapiñ jachʼa sillanakasa janiw apasiñapäkiti. Jiskʼa wawanakar qontʼayañ sillanakjja apasisipkasmawa, ukampis uka sillanakajj janiw mä qonuñat jiläñapäkiti.
Perfumenaka. Niyakejjay jachʼa tantachäwin waljani tantachastanjja, sum jareqtʼasiwayañasa, kunattejj mayninakaruw jan waltʼaysna. Perfumenaksa janiw sinti uchasiñasäkiti, khitinakatï alergianïpki ukanakaruw jan waltʼaysna (1 Cor. 10:24).
Persona que mostró interés (S-43) sat formulario. Jachʼa tantachäwinkkasin Diosat yatjjatañ munirinakampi parltʼäta ukhajja, uka formularioruw kawkhans jakapjje uk qellqtʼañama. Jachʼa tantachäwinjja Departamento de Publicaciones sat uñjiri jilatanakaruw uka formulario jaytasma jan ukajj tamamankir secretario jilataruw jankʼaki churarakisma.
Manqʼa aljañ utanaka. Uka utanakar sarasajja, respetompiw sarnaqañasa, ukhamatwa Jehová Diosar jachʼañchañäni.
Qorpachasiñ utanaka. Aka amtayäwinakajja, janiw taqe cheqanakatakïkiti:
Janiw inamayak utanak mayïtati, janirakiw yaqhanakarus uka utar qorpachañatak jawsätati.
Uka qorpachasiñ utanjja, kawkhantï phayasiñapäki uka cheqanakwa phayasma.
Yaqhep qorpachasiñ utanakanjja, juntʼüm inakiw qorpachasirinakarojj churapjje, ukhamajj janiw jilpach apsusiñamäkiti.
Qorpachasiñ utan irnaqerinakarojj munasiñampi ukat respetompiw uñjañasa. Jupanakajj waljaniruw yanaptʼasipki, ukhamajj wakiski ukakwa mayiñasa, paciencianïñasawa ukat khuyaptʼayasirïñasarakiwa.
Awk taykanakajj qorpachasiñ utanjja, sum wawanakaparojj uñjapjjañapa, janiw ukhamak jaytapjjañapäkiti.
Qorpachasiñ utan jan waltʼäwinak utjanejja, Departamento de Alojamiento siski ukaruw yatiyañama.
Yanaptʼañataki. Yanaptʼañ munirinakajja, Departamento de Servicio Voluntario siski ukaruw sarapjjañapa. Ukat janïr 16 maranïpki ukanakas yanaptʼapjjarakispawa, ukampis awk taykapan uñjatäpjjañapawa.