‘Diosar jan uñtʼir jaqenak taypinsti sum sarnaqapjjam’

1. Jachʼa tantachäwinakanjja, ¿kunatsa cristianjam sum sarnaqañajj wali wakiskirejja?

¹ Kimsa uru jachʼa tantachäwin kunjamsa tantachastan ukjja, sapa maraw jaqenakajj uñjapjjestu. Ukhamajja, cristianjam sum sarnaqatasampiw Jehová Diosar jachʼañchañasa (Lev. 20:26). Jaqenakar respetasirïtas uñachtʼayasa ukat sum isthaptʼasitasampiw Criston cheqpach arkiripätas uñachtʼayañasa. Kimsa uru jachʼa tantachäwiru jan ukajj walja markanakat jachʼa tantachäwir sarkañäni ukhajja, ¿kunjamsa ‘Diosar jan uñtʼir jaqenak taypin sum sarnaqsna’?, ukat ukajj ¿kunjamsa Jehová Diosar jachʼañchaspa? (1 Ped. 2:12.)

2. Kimsa uru jachʼa tantachäwir sarasajj ¿kunanakansa cristianjam sum sarnaqatas uñachtʼaysna?

² Cristianjamajj sum sarnaqañasa. Jiwaskamasa ukat “jan iyawsirïpki ukanaka[rus]” munasiñampiw uñjtanjja, ukampis akapachankir jaqenakajja janiw ukham munasiñanïpkiti (Col. 3:10; 4:5; 2 Tim. 3:1-5). Ukhamajja, qorpachasiñ utanakana, manqʼa aljañ utanakan kunas jan yäpar luraskani ukhajja, trabajirinakampejj paciencianïñasawa ukat suma chuymampiw uñjañasa. Sum irnaqtʼapjjatap layku qollqe wajjtʼañ wakischi ukhajja, wajjtʼañasarakiwa.

3. ¿Kunsa awk taykanakajj lurapjjañapa ukat kunatsa?

³ Tantachäwinsa, manqʼa aljañ utanakansa ukat qorpachasiñ utanakansa awk taykanakajj janiw wawanakaparojj sapaki jaytapjjañapäkiti (Pro. 29:15). Manqʼa aljañ utan irnaqerinakar uñjiri mä warmejja, Jehová Diosan Qhanañchirinakapat parlkasajj akham sasaw mä chacha warmirojj satayna: “Jumanakar uñjañajj wali askiwa. Wawanakamajj respetasiri ukat suma wawanakäpjjewa. Akan irnaqerinakajj taqeniw jumanakat sum parlapjje. Sapa seman tukuyanak jutapjjasma ukajj wali askipunïspawa” sasa.

4. Kimsa uru jachʼa tantachäwir sarañatakejj ¿kunatsa isisiñ toqet sum amuytʼasiñasa?

⁴ Sum isthaptʼasiñasa. Kimsa uru jachʼa tantachäwir sarañatakejj cristianjamajj sumwa isthaptʼasiñasa, janiw akapachankir jaqenakjam jan wali isinakampi isisiñasäkiti (1 Tim. 2:9). Qorpachasiñ utar qorpachayasiñataki qellqayasir sarkasasa jan ukajj qorpachasiñ utat mistjjasasa, ukat sapa tantachäw tukuyataru kawkhar sarkasasa sumwa isthaptʼasiñasa. Ukhamatwa tarjeta tʼirkattʼata sarnaqañsa ukat Jehová Diosan arunakap yatiyañ wakiskani ukhas jan ajjsarayaskañäniti. Ukat kimsa uru jachʼa tantachäwir jan ukajj walja markanakat jachʼa tantachäwi utjki uka tantachäwirus suma isthaptʼasit sarañäni ukat cristianjamas sum sarnaqañäni ukhajja, suma chuyman jaqenakajj uk uñjasajj jukʼampiw Diosan arunakap yatjjatañ munapjjani, ukat Jehová Diosarus kusisiyarakiñäniwa (Sof. 3:17).

Kimsa uru jachʼa tantachäwitak amtäwinaka, 2014

◼ Kuna horas qalltani. Kimsürpachaw tantachäwejj 9:20 alwa horasar qalltani. Ukat 8:00 alwa horasaruw punkojj jistʼaratäjjani. Kunapachatï musicajj qalltjjani ukhajja, qontʼasjjañasawa jan ukajj uttʼasjjañasawa ukhamat wakichäwejj sum qalltañapataki. Viernes urumpi sábado urumpejja 4:55 jaypʼu horasaruw tukuyani, ukat domingo urusti 3:50 jaypʼu horasaruw tukuyarakini.

◼ Auto saytʼayañanaka. Kawki cheqanakantejj auto saytʼayañanakajj jiwasankani ukhajja, janiw qollqejj mayitäkaniti ukatjja purinitarjamaw autonak saytʼayapjjarakini. Niyakejjay auto saytʼayañ cheqajj jiskʼakïchejja, mä autotak waljan sarapjjasma ukhajja wali askipunïspawa.

◼ Qonuñanaka jan ukajj uttʼañanaka. Punkojj jistʼaraskani ukhajja, kawkharutï qontʼañ munktan ukharojj janiw atip atipa tʼijuñasäkiti. Cheqas jiwasan askis thaqañat sipansa, mayninakan askipwa thaqañasa. Ukhamatwa cheqpach cristianötas qhan amuyasini, ukat uñjapkistu ukanakas Jehová Diosar jachʼañchapjjarakini (Juan 13:34, 35; 1 Cor. 13:4, 5; 1 Ped. 2:12). Jiwasamp chika jutirinakataki ukat jiwasamp chika pachpa utan jakasirinakataki jan ukajj Bibliat jumamp yateqapki ukanakatakikiw qonuñanak imsna. Ukat chuyman jilat kullakanakatak jan ukajj usutanakatak utjki uka qonuñanakajj mä qawqhakiwa, ukhamajj janiw taqpach familpach ukan qontʼasiñapäkiti. Mirä amp suma uka qonuñanakajj khitinakatï chuymankipstatäpki, usutäpki ukat jupanakan yanapapki ukanakatakikiwa.

◼ Manqʼañ toqeta. Chikürojj manqʼa alasir anqar mistuñat sipansa, manqʼa apasiñajj wali askiwa. Ukampisa, manqʼjja janiw jachʼa qʼepi apañasäkiti janirakiw manqʼa apañatak vidriot luratajj utjki ukarus apañasäkiti.

◼ Qollqempi yanaptʼañataki. Kunjamtï chuymasan amtawayktan ukhamarjamaw oraqpachan yatiyasiski ukar qollqemp yanaptʼsna, ukhamatwa yuspäratas uñachtʼaysna, uksti Tantachasiñ Utanwa jan ukajj jachʼa tantachäwinwa irantarakisma.

◼ Medicamentonaka. Medicamentonak umsta ukhajja, mirä amp suma qhawqtï wakisirjamäni ukjwa apasiñama, kunattejj jachʼa tantachäwinjja janiw uka medicamentonak jikjjatkätati.

◼ Chijir jan puriñataki. Sapa maraw kay usuchjasipjje jan ukajj qʼewsusipjje. Ukatwa ukürunakatak jan usuchjirjamäki uka zapato uchtʼasiñajj wakisi, ukhamat gradanakansa rejillanakansa ukat yaqha cheqanakansa sum sarnaqañataki.

◼ Jan sum istʼapki ukanakataki. Pachpa jachʼa tantachäwinjja wakichäwejj FM radiot istʼasini. Istʼañatakejj mä jiskʼa radio ukat jiñchur usktʼasis mä ischʼukiñampiw munasini.

◼ Wawa nuknaqañ cochenaka ukat apthapiñ sillanaka. Jachʼa tantachäwirojj wawa nuknaqañ cochenakasa apthapiñ jachʼa sillanakasa janiw apasiñapäkiti. Jiskʼa wawanakar qontʼayañ sillanakjja apasisipkasmawa, ukampis uka sillanakajj janiw mä qonuñat jiläñapäkiti.

◼ Sírvase visitar sat formulario. Jachʼa tantachäwinkkasin Diosat yatjjatañ munirinakampi parltʼäta ukhajja, jupanakajj kawkhans jakapjje uk qellqtʼañatakejja Sírvase visitar (S-43) sat formularioruw qellqtʼasiñama. Jachʼa tantachäwinjja Departamento de Publicaciones sat uñjiri jilatanakaruw uka formulario jaytasma jan ukajj tamankir secretario jilataruw tamamar kutʼjjasajj churarakisma.

◼ Manqʼa aljañ utanaka. Uka utanakar sarasin jilat kullakanakasajj respetomp sarnaqapjje ukhajja, Jehová Diosaruw jachʼañchapjje.

◼ Qorpachasiñ utanaka. Aka amtäwinakajja, janiw taqe cheqanakatakïkiti:

Janiw inamayak utanak mayïtati, janirakiw yaqhanakarus uka utar qorpachañatak jawstʼätati.
Ukat uka qorpachasiñ utanjja, kawkhantï phayasiñapäki uka cheqanakwa phayasma.
Juntʼümas chhullunkhayas inakiw qorpachasirinakarojj churapjje, ukhamajj janiw jilpach apsusiñamäkiti.
Qorpachasiñ utan irnaqerinakarojj munasiñampi ukat respetompiw uñjañasa. Jupanakajj waljaniruw yanaptʼasipki, ukhamajj jiwasan amuytʼasirïtasatsa suytʼirïtasatsa ukat jupanakar yanaptʼirïtasatsa wal yuspärapjje.

◼ Yanaptʼañataki. Jachʼa tantachäwinakar sarañajj wali kusiskañapuniwa, ukampis kunanakantï ukan yanaptʼañajj wakisini ukar yanaptʼäta ukhajja, jukʼamp kusisitaw jikjjatasïta. Taqe khitinakatï yanaptʼañ munapjjani ukanakajja, Departamento de Servicio Voluntario ukaruw sarapjjañapa. Ukat khitinakatï janïr 16 maranïpki ukanakas yanaptʼapjjarakispawa, ukampis awk taykapan uñjatäpjjañapawa.