Bibliat yateqañ munapki ukanakarojj jankʼakiw visittʼañasa

Internetan utjkistu uka cheqajj jukʼamp sum askichasjje ukhatjja, jukʼampiw Bibliat yatichayasiñ munirinakajj Internet toqe mayjjapjje. Walja jaqenak utjki uka cheqanakan yatiyañatak wakichäwinak utjki ukasa, yanaptʼarakiwa. Uka mayitanak katoqasajja, sucursalajj jankʼakiw tamanakar apayasjje. Sañäni, sucursalatï jw.org toqnam solicitud katoqchejja, kawkïr taman territoriopankkitï ukaruw mä pä urut uka tamankir irpir chuymaninakar yatiyjje. Ukampis awisajja, mä qawqha semananakatwa Bibliat yateqañ munirirojj visittʼasipki sasaw sucursalar yatiyanipjje. Yateqañ munasipkakiñapatakejj ¿kuns lursna? (Mar. 4:14, 15.)

Bibliat yateqañ muniritï, jan territoriosankchi ukhajj Sírvase visitar (S-43) sat qellqataruw jankʼaki phoqantañasa, ukat secretario jilataruw tantachäwin ratuk churjjañasa. Ukat uka jilatajj janïr pä uru paskipan jankʼakirakiw kawkïr tamarutï waktʼki ukar pasayjjañapa, jan ukajj sucursalaruw jw.org sat cheqan Congregación siski uka toqnam apayjjañapa. Irpir chuymaninakajj jw.org sat cheqar mantapjjañapapuniwa. Maynin Bibliat yateqañ munatap yatiyapjjani ukhajja, jankʼakiw visittʼapjjañapa. Ukat kawkïr jilatarutï jan ukajj kullakarutï visittʼañapatak churapkani ukasa, jankʼakirakiw visittʼañapa. Ukampis yateqañ muniriru jan jikjjatkani ukhajja, khitisa ukat kunjamatsa jikisipjjaspa ukanakwa mä papilar qellqtʼat jaytawayaspa.