Jesusan arkiripar tukuyañatak chʼamachasisipkakiñäni
1. ¿Kunjamatsa jaqenakajj qhespiyasipjjaspa?
1 Kunjamsa Diosan markapajj 2013 mara septiembre phajjsit 2014 mara agosto phajjsikamajj irnaqtʼawayi, ukaw Diosan Reinopat suma yatiyäwinak taqe chuyma yatiyañ munatas uñachtʼayi (Mat. 24:14). Utat uta yatiyasa, tratadonaka, invitacionanak lakirasa ukat walja jaqenaka utjki ukawjanakan yatiyasajja, waljaniruw Diosan arunakap yatiyasktanjja. Ukampis qhespiyasipjjañapatakejja, jiwasaw Bibliat yatichañasa, ukhamatwa Jesusan arkirinakapar tukupjjani (1 Tim. 2:4).
2. Bibliat yatichaña qalltañ toqetjja, ¿kunanaksa jisktʼassna?
2 Bibliat yatichañ qalltañataki chʼamachasipjjañäni. Kunapachatï maynejj sum istʼkistu ukhajja, ¿kawkhansa jakasi uk jisktʼtanti, ukat jankʼakit Bibliat yatichañ qalltañataki kutʼtanjja? Nayrïr kut visitʼkasajja, ¿kunjamsa Bibliat yatichtan uk qhanañchtʼtanti? Revistanak sapa kut jaytktan ukanakarojj ‘Bibliat yatichayasiñ munasmati’ sasin jisktʼktan ukhat ¿qawqha tiempos pasawayjje? ¿Kunatsa Bibliat yatjjatañama?, ¿Kunjamsa Bibliat yatichasi? sat videonak trabajir masisarusa, escuelankir masisarusa, vecinonakarusa, familiaranakasarusa, ukat yaqhanakarus ¿uñtayjjtanti? Nuknaqañ carritonakampi, jan ukajj mesanakampi yatiyktan ukhajj revistanak apasipki ukanakarojj ¿kunjams Bibliat yatichtan uk qhanañchtʼaraktanti?
3. ¿Kunas Biblian cheqa yatichäwinakap sum yatichañatakejj munasi?
3 Jehová Diosampi Jesusampiw yanaptʼistani. ‘Arkirijar tukuyapjjam’ siskäna ukhajja, Jesusajj yatiyir “sarapjjam” sasaw qalltäna. Ukampejja, jiwasaw jaqenakar parlir sarañatak chʼamachasiñasa sasaw saskäna. Ukampis janiw sapak jaytkistuti, jan ukasti sapüruw jumanakampïskä sasaw sarakistu (Mat. 28:19, 20). Jaqenakar yatichañatakejja, Jehová Diosajj qollan ajayupampiw yanaptʼistu, janiw ukakïkiti, kunayman yanaptʼanak churistu, yatichañatakis sum wakichtʼarakistu (Zac. 4:6; 2 Cor. 4:7). Ukhamajj “uka lurañanak phoqhañanjja jupan munañaparjama” lurañatak Diosaruw mayisiñasa (Fili. 2:13).
4. ¿Kunatsa Jesusan arkiripar tukuyañatak chʼamachasiñasa?
4 Suma yatiyäwinak yatiyañajj wal kusisiyistu. Ukampis cheqa yatichäwinak maynir yatichañäni, ukat jiwasamp chika ‘jakañar irpir thakinjam’ sarapjjani ukhajja, jukʼampiw kusisiñäni (Mat. 7:14; 1 Tes. 2:19, 20). Yamas Jesusan arkiripar tukupjjañapatak yanaptʼktan ukhajj Jehová Diosarus kusisiyaraktanwa, Jupajj “janiw munkiti khitin chhaqañapsa, jan ukasti muniwa taqeninsa Diosar kutkatañapa” (2 Ped. 3:9).