Bibliat yatichañ qalltañatak chʼamachasiñäni
1. ¿Kunjamatsa Mateo 28:19, 20 qillqatarjamax phuqsna?
1 Jaqinakarux “nayar arkir tukuyapxam [...] yatichapxarakim” sasaw Jesusax mä kamach churawayistu (Mat. 28:19, 20). Ukhamax Bibliat yatichañ qalltañatakix wakichtʼatapunïñasawa, janiw seman tukuy urunakakix Bibliat yatichañ qalltañatak chʼamachasiñasäkiti. Akxar uñstki uka iwxtʼanakaw yanaptʼistani.
2. ¿Khitinakarus Bibliat yatichsna?
2 Bibliat yatichañatak chʼamachasim. Bibliat yatichañ qalltañatak chʼamachasiñänixa, maynirukis yatichañ qalltañäniwa (Ecl. 11:6). ¿Chiqak yatichañ qalltañatak yantʼtati? Estados Unidos markanxa, mä tamanx taqiniw mä phaxspach ukham yatichañatak chʼamachasipxatayna. Ukat ¡42 jaqinakaruw yatichañ qalltapxatayna! Maysa tuqitxa, yatiqañ munirinakar visitktan ukanakas utjaskarakiwa; jupanakax Bibliat yatichañ munatas yatipkaspas ukham janiw amuyañasäkiti. Wasitat kuttʼasaxa, ¿janit Bibliat yatichañ qalltañatak chʼamachasksna? Ukat jan munapkani ukhas Bibliat parlxaytʼaskakiñasawa. Jan ukax vecinonakasaru, parientenakasaru, irnaqir masinakasaru ukat yatiqir masinakasarus Bibliat yatiqañ munasmat sasin jisktʼaraksnawa. Bibliat yatiqasipki ukanakan ¿khiti amigopach jan ukax familiarapach yatiqañ munaskaraki?
3. ¿Bibliat yatichañ qalltañatakix kuna yanaptʼas utji, ukat kunapachas ukamp yatiysna?
3 Yatiyañatak mä yanaptʼa. ¿Kunatï chiqäki uk yatiñ munasmati? siski uka tratadow Bibliat yatichañ qalltañatakix mä suma yanaptʼaxa. Bibliat apstʼat qillqatanak katuqasirinakarusa jan katuqasirinakarusa churaraksnawa. Uka tratadxa negocionakax utjki uka chiqanakan yatiyañataki, callenakansa, carta tuqnämsa jan ukax utat uta yatiykas jan khitir jikxatkañäni ukanakar jaytañatakis askipuniwa. Autot sarkasasa, kun altʼaskasasa jan ukax irnaqir sarkas yatiyañatakis ¿janit uka tratad apaskasma? Qhip qhipa janapanwa kunjamsa Bibliat yatichtan uk qhanañchtʼi ukat Kunsa yatichi sat libro uñachtʼayaraki.
4. ¿Kunjamsa ¿Kunatï chiqäki uk yatiñ munasmati? siski uka tratadomp Bibliat yatichañ qalltsna?
4 Jaqinakar uka tratad churasaxa, nayrïr janankki uka jisktʼanak uñachtʼayasax akham jisktʼañasa: “¿Kawkïrits yatxatañ munasma?” sasa. Ukxarusti kunjamsa tratadox uka jisktʼar qhanañchtʼi uk qhanañchtʼañasa, ukat Bibliat yatiqañatak qhip qhipa janan qhanañchtʼaski uk liytʼarapiñasa jan ukax qhanañchtʼañasasa. Ukatsti Kunsa yatichi sat libronx kawkïr chiqansa uka jisktʼar jukʼamp qhanañchtʼaski uk uñachtʼayañasa, ukxarux uka libro jaytañasaraki, ukat kunapachas wasitamp parltʼañatak kuttʼañäni uk amtawayañasaraki.
5. ¿Kunatsa Bibliat yatichañ qalltañatak chʼamachasiñasapuni?
5 Yatiyktan uka chiqanakanxa Bibliax kuntï chiqpachapun yatichki uk yatiqañ munirinakax utjaskakiwa. Jupanakar wiñay jakañar irpir thak jikxatapxañapatak yanaptʼañax kusiskañapuniwa, ukat Bibliat yatichañ qalltañatak chʼamachasiskakiñänixa, jukʼamp kusisitaw jikxatasiñäni.