Chʼeqat kupiru: Marcelo, Yomara ukat Hiver. Sapa maynejj Braillet mistkäna uka Biblian mä partep kattʼatäsipkiwa, ukajj Machaq Mundon Jakirinakataki español arut luratawa.
Kunja munasirïpjjesa ukwa uñjapjjäna
YOMARA, Marcelo ukat Hiver jila sullkanakat parltʼañäni, jupanakajj Guatemala markankïr mä jiskʼa markanwa jakasipjje, juykhüpjjarakiwa. Nayraqatjja, Yomaraw Testigonakamp Bibliat yateqañ qalltäna, ukatjja jilanakapajj Bibliat yateqañ qalltapjjarakïnwa. Ukampis janiw braille liyiñ yatipkänti. Ukhamajj Bibliat yatichiripaw parrafonaksa textonaksa jupanakatak liytʼarapiñapäna.
Tantachäwinakar sarañajj janiw jupanakatakejj faciläkänti. Utap jakʼankir Tantachasiñ Utajja, 40 minutunak sarañankänwa, janiw jupanak sapakejj ukakam viajiñ puedipkarakïnti. Ukatwa congregacionankir jilat kullakanakajj tantachäwinakar irpañatakejj turnasipjjäna. Semanan apaski uka tantachäwinakan asignacionanakanëjjapjjäna ukhajja, arstʼapjjañapäkäna uk pʼeqer yatsupjjañapatakiw jilat kullakanakajj yanaptʼapjjäna.
Mayo de 2019 maranjja, jupanakan markapanwa Testigonakajj tantachäwinak apañ qalltapjjäna, precursor regularat serviri mä chacha warmiw uka markan yanaptʼañatakejj sarapjjarakïna. Uka chacha warmejj janis braille liyiñsa qellqañsa yatipkchïnjja, uka kimsa jila sullkar braille liyiña qellqaña yatichañatakiw chʼamachasipjjäna. Ukatakejj braille toqet yatjjatañatakiw mä bibliotecar sarapjjäna, ukhamat kunjamsa braillejj yaqhanakar yatichasispa uk yateqañataki.
Marcelojj mä comentario tantachäwin arstʼaski.
Mä qhawqha phajjsinakatjja, kimspachanejj facilakiw braille liytʼapjjäna, ukaw Jehová Diosamp jukʼamp sum apasipjjañapatakejj yanaptʼäna.a Jichhajja, Yomarasa, Marcelosa, Hiveras precursor regularäjjapjjewa, Marcelojj siervo ministerialatwa serviski. Sapa semanaw Jehová Diosar serviñatakejj tiempo apstʼasipjjaraki. Jehová Diosar ukham taqe chuyma servipjjatapajja, yaqhanakatakejj wali yateqaskañawa.
Congregacionankirinakajj munasiñampi jupanakar yanaptʼapjjatapatjja, uka kimsa jila sullkajj walpun yuspärapjje. Yomara kullakajj akham siwa: “Jilat kullakanakajja, uñtʼkayäta ukhatpachaw munasiñamp uñjapjjetäna” sasa. Marcelojj akham sarakiwa: “Congregacionajanjja wali suma amigonakanïpjjtwa, oraqpachankir mä familia taypinkapjjtwa, jupanakajj munasirïpjjatapat mayachtʼatäpjjarakiwa” sasa. Yomarampi jilanakapampejja, aka oraqejj mä paraisor tukuyatäjjani uk uñjañ taqe chuymapuniw suytʼasipki (Sal. 37:10, 11; Is. 35:5).
a Aprenda a leer braille sat folletojja, khitinakatï juykhüpki jan ukajj jan sum uñjapki ukanakar braille liyiña qellqaña yatichañatak luratawa.