¿Kunatsa jiwasatakejj Diosan sutipajj wali importantejja?

1, 2. Jesusatakejj taqe kunat sipans Diosan sutipaw wali importantejja sasajj ¿kunatsa sissna?

JESUSATAKEJJ taqe kunat sipans Diosan sutipaw wali importantejja. Juparakiw taqenit sipans Awkipan sutip jukʼamp arjjati. Kunjamtï pasïr yatichäwin yatjjatawayktanjja, Diosan sutip layku jiwañ janiw ajjsarkänti, ukhamatwa suma Diosätap uñachtʼayäna (Mar. 14:36; Heb. 10:7-9). Waranqa Maranak Apnaqañ tukuyjjani ukhajja, Diosan sutip jachʼañchañatak katoqki uka autoridad kuttʼayañatakejj dispuestokïniwa (1 Cor. 15:26-28). Taqe kunanaktï Jesusajj Diosan sutip layku lurawayki lurkarakini ukanakajja, qhawqsa Awkipar munasi ukwa uñachtʼayi.

² Jesusajj Awkipan sutipjjaruw aka oraqer jutäna (Juan 5:43; 12:13). Discipulonakaparojj Awkipan sutipwa uñtʼayäna (Juan 17:6, 26). Jehová Diosan sutipjjaruw yatichäna, milagronaksa lurarakïna (Juan 10:25). Mä oracionanjja, discipulonakapat parlkasajj akham sasaw Jehová Diosar mayïna: “Nayar churkista uka sutim laykuy jupanakar uñjam” sasa (Juan 17:11). Ukhamajj Jesusatakitï Diosan sutipajj wali importantëchïna ukhajj ¿kunjamarak maynejj cristianötwa sasajj Diosan sutip jan uñtʼaspasti, ni aytkarakispasti?

3. ¿Kunsa aka yatichäwin yatjjataskañäni?

³ Cheqpach cristianonakajj Jesusan kayup arkañatakiw chʼamachastanjja, ukatwa Awkipan sutipajj jiwasatak wali importantejja (1 Ped. 2:21). Khitinakatï ‘Reinon suma yatiyäwinakap’ yatiyapki ukanakajj Diosan sutipwa apapjje, ukwa aka yatichäwin yatjjataskañäni (Mat. 24:14). Ukat sapa mayni jiwasatakejj Diosan sutipajj kunja importantëñapasa ukwa yatjjataskarakiñäni.

‘SUTIPATAKEJJ MÄ MARKA AJLLISI’

4. 1) Jesusajj janïr alajjpachar kuttʼkäna ukhajj ¿discipulonakapar kamsänsa? 2) ¿Kuna jisktʼarus qhanañchaskañäni?

⁴ Alajjpachar janïr kuttʼkasajja, Jesusajj akham sasaw discipulonakapar säna: “Espíritu santojj jumanakjjar jutkani ukhaw chʼam katoqapjjäta, Jerusalén markanwa nayat qhanañchapjjarakïta, taqe Judeana, Samariana ukhamarak taqe aka oraqpachana” sasa (Hech. 1:8). Ukhamajj suma yatiyäwinakajj janiw Israel markanak yatiyasiñapäkänti, jan ukasti tiempompejj taqe markankir jaqenakaw Jesusan discipulopar tukupjjaspäna (Mat. 28:19, 20). Ukampis Jesusajj ‘nayat qhanañchapjjäta’ sasaw säna. Ukhamajj ¿Jesusatakti machaq discipulonakajj qhanañchapjjañapäna, jan ukajj Diosan sutip uñtʼapjjañapajj wakisirakïncha? Hechos capítulo 15 qellqataw uk yatiñatakejj yanaptʼistani.

5. Apostolonakasa Jerusalenankir ancianonakas ¿kunjamsa Diosan sutip uñtʼañajj wali importantëtap uñachtʼayapjjäna? (Dibujo uñjjattʼarakïta).

⁵ Apostolonakampi Jerusalenankir ancianonakampejja, 49 maranwa tantachasipjjäna, ukhamat jan judiöpki ukanakajj kunsa cristianöñatakejj lurapjjañapa uka toqet parlañataki. Tantachäw tukuyatarojja, Jesusan Santiago jilapajj akham sänwa: “Kunjamsa Diosajj yaqha markanakar jichhajj katoqe, kunjamsa sutipatakejj uka markanak taypit mä marka ajllisi ukwa [Pedrojj] phoqatpach qhanañchi” sasa. ¿Khitin sutipas qhanañchasiñapäna? Amós profetan arunakap aytasajja, Santiagojj akham sarakïnwa: “Ukhamat jiltʼirinakajj taqe markanakankir jaqenakamp chik Jehová Diosar taqe chuym thaqapjjañapataki. Jupanakaw nayan sutij apapjje sasaw ukanak lurir Jehová Diosajj saraki” sasa (Hech. 15:14-18). Ukhamajj janiw machaq discipulonakajj Jehová Diosatak yateqapjjañapäkänti, jan ukasti Diosan sutip apapjjañaparakïnwa. Mä arunjja, Diosan sutipampi uñtʼatäpjjañapänwa, uka sut uñtʼayapjjañaparakïnwa.

6, 7. 1) ¿Kuna razonatsa Jesusajj aka oraqer jutäna? 2) ¿Kunas Jesusatak jukʼamp importantënjja?

⁶ Amtañäni, Jesusan sutipajj “Jehová Diosaw Salvacionajja” sañwa muni. Ukhamïpanwa Jehová Diosajj jupar confiyiri taqe jaqenakarojj Jesús toq salvi. Jesusajj taqe jaqenak layku jiwañatakiw aka oraqer jutäna (Mat. 20:28). Ukhamat jupanakajj taqe juchanakapat perdonatäpjjañapataki, wiñay jakañanïpjjañapataki (Juan 3:16).

⁷ Kunatï Edén jardinan paskäna uka razonatwa jaqenakajj juchampit jiwañampit kutsuyatäpjjañapäna. Kunjamtï pasïr yatichäwin uñjaniwayktanjja, Adanamp Evamp nayrïr awk taykasajj Jehová Dios contraw saytʼapjjäna, ukhamatwa wiñay jakañ aptʼasipjjäna (Gén. 3:6, 24). Ukampis Jesusajj Adanampin Evampin wawanakapar salvañatakis aka oraqer jutkchïnjja, janiw ukajj jukʼamp importantëkänti, jan ukasti Diosan sutip jachʼañchañaw jukʼamp importantënjja (Gén. 3:4, 5). Jesusajj ak sum yatïna: Diosan sutipatï jachʼañchatäspänjja, taqe jaqenakaw salvatäpjjaspäna. Niyakejjay Jesusajj Jehová Diosan representantepächïnjja, sutips aparakchïnjja, jupaw taqenit sipans Jehová Diosan sutip jachʼañchasiñapatak yanaptʼaspäna.

8. Jesusan taqe arkirinakapajj ¿kunsa sum amuyapjjañapäna?

⁸ Jesusan taqe arkirinakapajja, judiöpas jan judiöpas ak sum amuyapjjañapänwa: Jesusan Jehová Dios Awkipaw taqe jaqenakar salvawayi (Juan 17:3). Jesusjamarakiw Diosan sutipat uñtʼatäpjjañapäna. Diosan sutip jachʼañchañajj kunja wakiskirisa uks amuyapjjañaparakïnwa. Ukhamatakwa salvasipjjaspäna (Hech. 2:21, 22). Ukhamajj Jesusat jan jitheqtiri discipulonakapajja, Jehová Diosampita Jesusampitwa yateqapjjañapäna. Ukatwa Juan 17 qellqatarjamajj Jesusajj aka arunakampi oracionap tuktʼayäna: “Nayaw sutim jupanakar uñtʼayta, sutim uñtʼayaskakïwa, ukhamat munaskista uka munasiñajj jupanakan utjañapataki, nayas jupanakamp mayakïñajataki” sasa (Juan 17:26).

“JUMANAKAW NAYAN TESTIGONAKAJÄPJJTAJJA”

9. Diosan sutipajj jiwasatak wali importantëtap uñachtʼayañatakejj ¿kunsa lursna?

⁹ Kunjamtï yateqawaytanjja, cheqpach cristianonakatakejj Diosan sutip jachʼañchañaw jukʼamp importantëñapa (Mat. 6:9, 10). Jiwasatakejj Diosan sutipaw taqe sutinakat sipans wali importantejja. Uksti luratanakasampiw uñachtʼayañasa. Ukhamajj ¿kunsa Diosan sutip jachʼañchañatakejj lursna? Kunanaktï Supayajj Jehová Dios contra parlkäna ukanakan kʼarïtap uñachtʼayañatakejj ¿kunsa luraraksna?

10. Isaías 42 al 44 capitulonakan ¿kuna juiciotsa parli? (Isaías 43:9; 44:7-9; fotonakampi dibujonakampi uñjjattʼarakïta).

¹⁰ Isaías 42 al 44 capitulonakanjja, Jehová Diosan sutip jachʼañchañatakejj kunsa lursna ukaw qhanañchasi. Uka capitulonakanjja, Jehová Diosajj mä jucionkkaspas ukhamawa. Khitis cheqpach Diosajja ukaw juzgasiñapa, ukanjja diosäpjjtwa sirinakarojj cheqpach diosäpjjatap uñachtʼayapjjañapatakiw Jehová Diosajj mayi. Cheq parlapjjatap uñachtʼayapjjañapatakejj testigonak mayiraki. Ukampis janiw khitis uk uñachtʼayañ puedkiti (Isaías 43:9; 44:7-9 liytʼäta).

11. Isaías 43:10-12 texton ¿kamsis Jehová Diosajj servirinakaparojja?

¹¹ (Isaías 43:10-12 liytʼäta). Jehová Diosajj servirinakapar akham siwa: “Jumanakaw nayan testigonakajäpjjtajja [...], nayaw Diosätjja” sasa. Aka jisktʼar qhanañchapjjañapwa mayiraki: “¿Nayat sipansa yaqha Diosajj utjiti?” sasa (Is. 44:8). Jiwasatakejj uka jisktʼar qhanañchañajj mä privilegiowa. Arunakasampi luratanakasampiw Jehová Diosan cheqpach Diosätap uñachtʼaytanjja, sutipajj yaqha sutinakat sipans wali importantëtapwa uñachtʼayaraktanjja. Ukat jakäwisampiw jupar taqe chuym munasitas uñachtʼaytanjja. Supayajj kunayman toqets Jehová Diosat jitheqtayañ munkchistojja, janiw kunäkipans jupat jitheqtktanti. Ukhamatwa Diosan sutip jachʼañchasiñapatak yanaptʼasktanjja.

12. Isaías 40:3, 5 textonkki uka profeciajj ¿kunjamsa phoqasiwayi?

¹² Isaías profetajj arskäna uka profeciarjamajja, mayniw ‘Jehová Diosan thakip wakichañapäna’ (Is. 40:3). ¿Kunjamsa uka profeciajj phoqasïna? Bautisir Juanaw Jesusatakejj thak wakichäna, jupajj Jehová Diosan sutipjjaruw jutäna, sutipjjaruw parlarakïna (Mat. 3:3; Mar. 1:2-4; Luc. 3:3-6). Isaiasajj aka profecía arsurakïna: “Jehová Diosajj kunja kʼajkirisa ukajj qhanstayatäniwa” sasa (Is. 40:5). ¿Kunjamsa uka arunakajj phoqasïna? Jesusajj aka oraqer jutkäna ukhajja, wali sumwa Awkipar representäna, Jehová Dios pachpas aka oraqer jutkaspäna ukhamarakïnwa (Juan 12:45).

13. ¿Kunsa Jesusat yateqasisajj lursna?

¹³ Diosan sutip arjjatktan ukhajja, Jesusat yateqasitaswa uñachtʼaytanjja. Jesusjamarakiw Jehová Diosan Testigopäpjjtanjja. Diosan sutipwa aptanjja, ukat musparkañ luratanakapwa jaqenakar parlaraktanjja. Jehová Diosan Testigopjam luräwisamp sum phoqañatakejja, Jesusajj Diosan sutip jachʼañchañatakejj kunanaksa luräna, kunanaksa lurani, taqe ukanakatwa jaqenakar parlañasaraki (Hech. 1:8). Jehová Diosan taqe Testigonakapatjja, Jesusaw nayranki, jiwasajj jupatwa yateqasiraktanjja (Apoc. 1:5). Ukhamajj ¿kunjamsa Diosan sutipajj jiwasatak wali importantëtap uñachtʼaysna?

¿KUNJAMANAKATSA DIOSAN SUTIPAJJ JIWASATAK IMPORTANTËTAP UÑACHTʼAYTANJJA?

14. Salmo 105:3 textorjamajj ¿kunjamsa Diosan sutipar uñjtanjja?

¹⁴ Diosan sutipat jachʼañchastanwa (Salmo 105:3 liytʼäta). Diosan sutipat jachʼañchasis parltan, jupats jachʼañchasiraktan ukhajja, jupajj wal kusisi (Jer. 9:23, 24; 1 Cor. 1:31; 2 Cor. 10:17). Jupat jachʼañchasiñajja, jiwasan Diosasätapat jachʼañchasiña sañ muni. Diosan sutip respetomp uñjañasa arjjatañas jiwasatakejj mä jachʼa privilegiowa. Trabajonkkasasa, escuelankkasasa, vecinonakampïsasa, kawkinkkasasa, janipuniw Jehová Diosan Testigopätasat phenqʼasiñasäkaspati. Supayajj Diosan sutipat mayninakar jan parljjsna ukwa muni (Jer. 11:21; Apoc. 12:17). Janiw ukakïkiti, Supayasa kʼari profetanakapas Diosan sutipat jaqenakajj armasjjapjjaspa ukwa munapjje (Jer. 23:26, 27). Ukampis jiwasajj Diosan sutipar wal munastanjja, ukatwa jupar ‘jurnälpach’ jachʼañchañ muntanjja (Sal. 5:11; 89:16).

15. Jehová Diosan sutip artʼañajj ¿kamsañsa muni?

¹⁵ Diosan sutip artʼasipkaktanwa (Joel 2:32; Rom. 10:13, 14). Diosan sutip artʼañajj janiw sutip uñtʼañakïkiti, ni arsuñakïkisa. Jupajj kunjam Diosasa ukwa uñtʼañasa, juparuw confiyañasa, yanaptʼaps thaqañasarakiwa (Sal. 20:7; 99:6; 116:4; 145:18). Sutipatsa suma chuymanïtapats jaqenakar parlañasawa. Jupanakan Jehová Diosamp sumat uñjatäpjjañapatakejja, arrepentisipjjañapataki cambionak lurapjjañapatakiw chʼamañchtʼañasa (Is. 12:4; Hech. 2:21, 38).

16. ¿Kunjamatsa Supayan kʼarïtap uñachtʼaysna?

¹⁶ Diosan sutip layku tʼaqesiñatakejj jankʼakïtanwa (Sant. 5:10, 11). Kunayman jan walinakan tʼaqesisas Jehová Diosat jan jitheqtas aguanttan ukhajja, Supayan kʼarïtapwa uñachtʼaytanjja. Job chachajj jakkäna uka urunakanjja, Supayajj Jehová Diosan taqe servirinakap contrajj akham sänwa: “Maynejj [...] vidap salvasiñatakejj kunanakatï jupan utjki taqe ukanakwa churaspa” sasa (Job 2:4). Mä arunjja, taqe kunas walikïski ukhakis jaqenakajj Jehová Diosar servipjjaspa, jan walinakan uñjasisajj jupat jitheqtjjapjjaspasa ukham sañwa munaskäna. Ukampis Job chachajja, Jehová Diosat jan jitheqtasajj ukan kʼarïtapwa uñachtʼayäna. Jiwasajj ukwa uñachtʼayaraksna, Supayajj kunayman toqets yantʼkchistanejja, janipuniw kunäkipans Jehová Diosat jitheqtkañäniti. Jehová Diosajj sutip laykojj jiwasar cuidaskakistaniwa, janiw ukat payachasktanti (Juan 17:11).

17. 1 Pedro 2:12 textorjamajj ¿kunjamatsa Diosan sutip jachʼañcharaksna?

¹⁷ Diosan sutiparojj respettanwa (Prov. 30:9; Jer. 7:8-11). Niyakejjay Diosan representantepästanjja, sutip aparakstanjja, sarnaqatasampejj sutip jachʼañchsnawa, jan ukajj jan walitwa uñjayaraksna (1 Pedro 2:12 liytʼäta). Ukatwa arunakasampisa luratanakasampis Diosan sutip jachʼañchañatak chʼamachastanjja. Ukham lurasajja, pantjasir jaqëkasas Diosan sutip jachʼañchañatakiw yanaptʼasktanjja.

18. Diosan sutipajj jiwasatak wali importantëtap ¿kunjamatsa uñachtʼayaraksna? (Nota liytʼarakïta).

¹⁸ Jiwasat kamsapjjesa ukat llakisiñat sipansa, Diosan sutipwa nayrar uchtanjja (Sal. 138:2). ¿Kunatsa uk sistanjja? Kuna laykutejj Jehová Diosar kusisiyki ukanak lurtan ukhajja, awisajj janiw jaqenakar ukajj gustkiti, jiwasats jan walinak parlapjjaraki.a Jesusajj Diosan sutip jachʼañchañatakejja, mä lunthatjam jiwañatakisa jaqenakamp jiskʼachatäñatakis dispuestokïnwa. Kunjamtï Hebreos 12:2-4 texton siskejja, ‘jiskʼachatäñ janiw yäqkänti’, mä arunjja kuntï jaqenakajj jupat amuyapkäna ukat janiw sint llakiskänti. Juparojj Awkipan munañap lurañaw jukʼamp llakisiyäna (Mat. 26:39).

19. ¿Kunsa jumajj Diosan sutipat amuyta, ukat kunatsa ukham amuyta?

¹⁹ Diosan Jehová sutipat jachʼañchastanwa, Testigopjam uñtʼatäñajj jiwasatak mä jachʼa privilegiorakiwa. Ukatwa mayninakamp jiskʼachatäñsa phenqʼachatäñs jan ajjsarktanti. Jaqenakajj jiwasat kamsapjjanisa ukat llakisiñat sipansa, jiwasatakejj Diosan sutipaw jukʼamp importantejja. Supayajj aynachtʼayañs munkchistanejja, Jehová Diosar jachʼañchañatak chʼamachasiskakiñäni. Ukhamtï lurañänejja, Jesusjamarakiw Diosan sutipajj jiwasatak wali importantëtap uñachtʼayañäni.