Sojjta millón jaqenakaw COVID usump jiwawayapjje | ¿Bibliajj uka toqet kamsisa?

Organización Mundial de la Salud (OMS) ukarjamajja, 23 de mayo de 2022 urukamajj 6,27 millón jaqenakaw COVID-19 usump jiwawayapjje. Ukampis 5 de mayo de 2022 urojja, “amuyatajj jukʼamp jaqenakaw uka usump jiwawayapjje” sasaw Organización Mundial de la Salud ukankirinakajj yatiyapjjäna. 2020 marana ukhamarak 2021 maranjja, “COVID-19 usu utjatapat niya 14,9 millón jaqenakaw jiwawayapjje” sasaw sapjjarakïna. ¿Uka jan walinakat Bibliajj kamspachasa?

Jan wali usunakaw utjani sasaw Bibliajj nayratpach sisjjäna

• “Qhepa urunakanjja”, ‘jan wali usunakaw utjani’ sasaw Jesusajj säna (2 Timoteo 3:1; Lucas 21:11).

Uka arunakajj jichhürunakanwa phoqasiski, uka toqet jukʼamp yatiñatakejja, “¿Cuál es la señal de ‘los últimos días’ o ‘los tiempos finales’?” sat yatichäwi liytʼasma.

Bibliajj chuymachtʼistuwa

•  ‘Taqe kunan chuymachtʼasiri Diosajja, taqe llakinakasanwa chuymachtʼistu’ (2 Corintios 1:3, 4).

Maynin jiwatapat wali llakitäpki ukanakat waljaniruw Biblian yatichäwinakapajj chuymachtʼawayi. Uka toqet jukʼamp yatiñatakejj aka yatichäwinakwa liytʼasma: “Llakimp jan aynachtʼañatakejja ¿kunanak lurañas yanaptʼiristam?”, “¿Kuna suma yanaptʼas utji?”.

Jichhürunakan utjki uka jan walinakajj kunjamas askichasini uk Bibliaw qhanañchi

• “Reinomajj jutpan. Munañamajj luratäpan, kunjamtï alajjpachan luraski ukhamarak aka oraqens luraspan” (Mateo 6:10).

Akat mä jukʼa tiemporojja, ‘Diosan Reinopan’ “janiw khitis ‘usutätwa’ sisjjaniti” (Marcos 1:14, 15; Isaías 33:24). Diosan Reinopata ukhamarak kunanaksa uka Reinojj lurani uka toqet jukʼamp yatiñatakejja, ¿Kunas Diosan Reinopajja? sat video uñtasma.

Bibliat jukʼamp yatjjatañamatakiw chʼamañchtʼapjjsma, ukhamatwa Biblian yatichäwinakapajj jumarusa familiamarusa, sum jakasiñataki ukhamarak jutir urunak suytʼañatak yanaptʼapjjätam.