¿Mä guerra mundialan utjañapajj jakʼankpachati? | ¿Bibliajj uka toqet kamsisa?

Aka qhepa 30 maranakajja, “oraqpachan utjki uka markanakajj janiw chʼajjwapkiti, sumaw jakasjjapjje” sasin amuyañjamänwa. Ukampis jichhajja, jilaparte jaqenakajj janiw ukham amuyjjapjjeti, ukaw aka noticianakan uñjasi:

“Israel markampi Hizbulá markampi Líbano fronteran mä guerran chʼajjwapjjatap laykojja, Gaza cheqan utjki uka guerrajj jukʼampiw jiltani sasaw walja jaqenakajj llakisipjje” (Reuters, 6 de enero de 2024).
“Irán sat markamp apnaqata armantat gruponakajj walja cheqanakwa atacasipki, Irán markas mä akatjamatarakwa armas nucleares ukanak wasitamp lurañ qalltawayi. Jichhajj Rusia markampi China markampejj Irán markampiw mayachtʼasiwayapjje. Jupanakajj Occidente cheqankir markanak contraw nuwasiñ amtapjje” (The New York Times, 7 de enero de 2024).
“Rusia markajj Ucrania markar atacasajj kunayman jan walinakwa utjayaski” (UN News, 11 de enero de 2024).
“China markajj qollqe toqet wal jiltaski, jukʼamp armanakanïpjjarakiwa, Taiwán markankirinakajj sapürutjamaw markapat jukʼamp jachʼañchasisipki, Pekín markampi Washington markampejj jukʼampiw uñisisipjjaraki, taqe ukanak pasatapatjja mä akatjamatwa guerrajj qalltaspa” (The Japan Times, 9 de enero de 2024).

Uka jan waltʼäwinakat ¿Bibliajj kamspachasa? ¿Mä guerra mundialajj utjpachäniti?

Kunatï jichhürunakan pasaski ukajj Biblian qellqatäjjänwa

Cheqansa, kawknïr markanakas jichhürunakan guerran nuwasipjjañapäna ukajj janiw Biblian qellqatäkänti. Ukampis walja guerranakaw utjani sasaw Bibliajj nayratpach sisjjäna, uka guerranakaw ‘oraqen sumankañap apaqapjjañapäna’ (Apocalipsis 6:4).

Bibliankir Daniel libronjja, ‘tukuy tiempon’ enemigöpki uka potencianakajj ‘mä jan waltʼäwinwa uñjasipjjani’ sasaw sisjjäna. Uka jan waltʼäwinjja, kawkïr potencias jukʼamp armanakani ukaw uñachtʼayasiñapäna, walja qollqwa gastasiñaparakïna (Daniel 11:40, 42, 43).

Mä jachʼa guerraw jakʼachasisinki

Bibliarjamajja, janïr taqe kunas aka oraqen askichaskipanjja jan waltʼäwinakajj jiljjattañapänwa. Jesucristojj akham sänwa: “Jachʼa tʼaqesiñ tiempow jutani, aka mundon qalltapat jichhakamajj janipuniw ukham tʼaqesiñajj utjkänti” sasa (Mateo 24:21). Uka ‘jachʼa tʼaqesiñ tiempojj’ Armagedón sat guerrampiw tukuyani, uka guerrajj ‘Taqe Chʼamani Diosan jachʼa urupan guerrapawa’ (Apocalipsis 16:14, 16).

Ukampis Armagedón guerrajj janiw jaqenakar tukjkaniti, jan ukasti salvaniwa. Uka guerranjja, Diosajj jaqenakan apnaqata gobiernonakwa chhaqtayani, uka gobiernonakaw jan waltʼayiri guerranak utjañapatak juchanïpjje. Armagedón guerrajj kunjamsa aka oraqen sumankañ utjañapatak yanaptʼani uka toqet jukʼamp yatiñatakejja, aka qellqatanakwa liytʼasma: