Yan Zabolotnyi/stock.adobe.com
¡AMUYASIPJJAPUNIM!
Jan walinak lurir jaqenakajj aka oraqpachanwa jiljjattaski | ¿Bibliajj uka toqet kamsisa?
Haití markan jan wali jaqenakajj kunayman jan walinakwa lurasipki. México markansa, Sudáfrica, Latinoamérica sat cheqankir yaqha markanakansa, ukhamarakiw jan wali jaqenakajj utji. Yaqhep markanakan jan walinak lurir jaqenakajj janis nayrjamäjjchejja, walja jaqenakaw lunthatanakata jan walinak lurir jaqenakat istʼasajj wal ajjsarayasipjje, wali llakitaw jakapjjaraki.
¿Aka oraqpachan jan walinak lurir jaqenakan jiljjattatapat Bibliajj kamsisa?
Jan walinak lurir jaqenakajj jiljjattaniwa sasaw Bibliajj nayratpach sisjjäna
“Akapachajj niya tukusiñampïskani” ukhaw qhoru jaqenakasa jan walinak lurir jaqenakas utjani sasaw Bibliajj nayratpach sisjjäna (Mateo 24:3). Jesucristojj uka toqet parlkasajj akham sarakïnwa:
“Jan wali luräwinakan jiljjattatap laykojja, niya taqe jaqenakan munasiñapaw thayarani” sasa (Mateo 24:12).
“Qhepa urunakan” jaqenakajj kunjamäpjjanisa uka toqet parlkasajj Bibliajj akham sarakiwa: “Jaqenakajj akhamäpjjaniwa: [...] munañapampi apnaqayasirinaka, qhorunaka, kunatï walïki uk uñisirinaka” sasa (2 Timoteo 3:1-5). Jupanakan askipak thaqeri jaqenakajja, janiw markanakan leyinakap respetapkiti.
Ukampis mä suytʼäwiw utji. Akat mä jukʼa tiemporojja, jan walinak lurir jaqenakajj janiw utj-jjaniti sasaw Bibliajj yatichi.
“Mä jukʼa tiempotjja jan wali jaqenakajj janiw utj-jjaniti, kawkjantï jupanakajj jakapkäna uka lugarar uñtkäta ukhajja, janiw jupanakajj ukankjjapjjaniti. Ukampis llampʼu chuymaninakajj oraqwa katoqapjjani, jan tukuskir sumankañampiw jupanakajj wal kusisipjjarakini” (Salmo 37:10, 11).
¿Bibliajj jutir urunakat kamsarakisa? Kunatï jichhürunakan pasaski ukajja, Biblian qellqatäjjäna ukarjamaw phoqasiski, ¿kunatsa ukham sistanjja? Uk yatiñatakejj aka yatichäwinak liytʼasma:
La esperanza real de un mañana mejor
¿Cuál es la señal de “los últimos días” o “los tiempos finales”?