Janipuniw ukham wakiskir luräwix utjkiti
1. Diosan Arup yatiyañarutï wali askirjam uñjañänixa, ¿kuns lurañäni?
1 Tiempossa, chʼamassa, ukat kunatï utjkistu ukanaksa Diosat yatiyañatakiw churañasa sasaxa, ¿kunatsa sapa kuti amtayapxistu? Kunattix janipuniw kuna luräwis uka irnaqäwjamax utjkiti. Diosan Arup istʼasinxa kuna askinaks jaqinakax jikxatapxaspa uk lupʼiñaw taqi chuyma yatiyañatakix yanaptʼistani, janipuniw ukham yatiyañax utjxaniti (Hech. 20:24).
2. ¿Kunjamsa yatiyir saratasax Jehová Diosan suma sutipa qʼumachañatakix yanaptʼi?
2 Jehová Diosan sutipwa qʼumachi. Diosan Apnaqäwipaw Cristo tuqnäm jaqinakan apnaqäwinakaparux tʼunjani ukat wiñayatakiw kunanakatï jaqinakar jan waltʼayki uk tukjarakini, ukwa yatiyasax jukʼamp qhanañchtanxa (Mat. 6:9, 10). Jehová Diosakiw usuñatsa, jiwañatsa qhispiyistaspa uks qhanañcharaktanwa (Isa. 25:8; 33:24). Maysa tuqitsti, niyakixay Jehová Diosan Qhanañchiripästanxa, sarnaqäwisa ukat taqi chuyma yatiyatas uñjasaw jaqinakax Jehová Diosar yupaychapxani (1 Ped. 2:12). ¡Taqi kunxaru munañani Jehová Diosan sutipa aka Uraqpachan yatiyañax wali kusiskañapuniwa! (Sal. 83:18, NM.)
3. ¿Suma yatiyäwinakar istʼapki ukanakaxa kuna askinaksa jikxatapxi
3 Jaqinakaruw qhispiyi. Jehová Diosax “janiw munkiti khitin chhaqañapsa, jan ukasti muniwa taqininsa Diosar [arrepentisiñapa]” (2 Ped. 3:9). Ukampis jan khitis yatichkani ukhasti, ¿kunjamatsa Diosatakix kunatï askïki ukat jan askïkaraki uk yatipxaspasti? (Jon. 4:11, NM; Rom. 10:13-15.) Kunapachatï maynix suma yatiyäwinakaru istʼi ukat jan wali luräwinakapsa apanukxi ukhaxa, janiw wiñay jakañ suytʼäwik jikxatkiti jan ukasti jichhürunakansa sumaw jakasxaraki (Miq. 4:1-4). Chiqpachansa, suma yatiyäwinak yatiyaskakiñaxa, jiwasarusa ukat istʼapkistu ukanakurus qhispiyarakiwa (1 Tim. 4:16). Ukham wali wakiskir luräwin irnaqtʼañax wali askipuniwa.
4. ¿Kunatsa Diosan Apnaqäwipat yatiyaskakiñasa ukat arkirinaks tukuyaskakiñasa?
4 Niyaw aka ñanqha pachax jachʼa tʼaqhisïwin tukjatäni, ukampis Jehová Dios tuqit saytʼasirinakax qhispipxaniwa. Ukatwa, Diosan Apnäwipat yatiyaña, ukat arkirinak tukuyañ luräwix jankʼakïñapa, wakiskirïñapa ukat yanaptʼkirirakïñapa. Uka luräwix jakäwisanx nayrakañapapuniwa (Mat. 6:33.)