Yatiyañataki Tantachäwin arstʼirinakataki
Diosan Apnaqäwipat Yatiyañataki sat aka qillqatat uksarux Yatiyañataki Tantachäwin arstʼäwinakax kunjamas lurasiñapa ukanakax mä jukʼ mayjtʼayatäniwa. 2009, mayo phaxsitaki aka pachpa qillqatan “Yatiyañataki Tantachäwir sarañatak wakichasiñäni” siski uka yatichäwin qhanañchtʼaskänxa, ukanakaw mä jukʼamp qhanañchtʼasini ukat mä juk’ mayjtʼayatarakini.
◼ Arstʼäwi. Kunanakatï arstʼañatakix wayktʼayatäki ukarjamaw arstʼasiñapa. Tantachasirinakax janiw arstʼanipxañapäkiti. Tamatakix jukʼamp askïki ukanakatwa arstʼirix qhanañchtʼañapa.
◼ Tantachasirinakan arstʼanipxañapatakiw jisktʼäta. Kunjamtï Yatiyañataki revistat Yatxataña sat tantachäwin sapa tʼaqxar jisktʼaskixa, niya ukhamarakiw lurasiñapa. Qalltañatakis tukuyañatakis mä qhawqha arunakampikiw arstʼirix arstʼañapa. Janiw jupak jisktʼanakar qhanañchañapäkiti. Tiempo utjirjamäskchixa, Bibliat apstʼat wakiskir jiskʼa tʼaqanakats liytʼasirakispawa. Janiw yatichäwin tʼaqanakapax liytʼasiñapäkiti, liytʼasiñapawa sas qhanañchtʼasini ukhakiw liytʼasiñapa.
◼ Tantachasirinakax arstʼanipxarakispawa. Aka arstʼäwinxa, tantachasirinakax mä qhawqha arstʼanipxarakispawa. Arstʼäwi ukat tantachasirinakan arstʼanipxañapatakiw jisktʼäta siski uka pä arstʼäwis mayachtʼatäkaspa ukhamawa.
◼ Demostracionanakampi entrevistanakampi. Mä demostracionampiw uñachtʼayasiñapa sasin qhanañchtʼaskani ukhaxa, janis pachpa arstʼirin uka demostración lurañapax wakiskchinixa, jupaw ukhamarjam lurasiñapatak uñjañapa. Tama taypin yatiqaskañ irnaqtʼasipki ukat uka demostración sum uñachtʼayapkaspa uka jilat kullakanakaruw ajllisiñapa. Ukat tiempompipuniw ukanakax waktʼayasiñapa. Demostracionanakxa, janiw machaq yatiyirinakan uñachtʼayapxañapax wakiskaspati; jupanakan arstʼapxañap munstanxa, yaqhipax yanapirinakäpxaspawa. Demostracionan arstʼirinakax tantachasirinakar uñtasapuniw arstʼapxañapa. Maysa tuqitsti, entrevistatäpkani ukanakax plataformarupuniw makatapxañapa. Arstʼiritix tiempomp taqxatasyaschixa, janipuniw entrevistanaksa demostracionanaksa chhaqtayañapäkiti, jan ukasti jupaw jukʼak arstʼxañapa. Entrevistanakas demostracionanakas sumwa yatsusiñapa. Arstʼapkani ukanakar janïr ajllkasax irpir chuymaninakan yanapirinakapax irpir chuymaninakat sarayiriparu jan ukax mayni irpir chuymaninakaruw jisktʼasipxañapa.
Qhanañchtʼawayktan uka chiqanakantï mayj lurasiñapatak jukʼamp qhanañchtʼasinixa, ukarjamapuniw lurasiñapa. Aka yatichäwin yatxatawayktan uka qhanañchtʼäwinakaw Yatiñataki Tantachäwin “taqi kunsa sum lura[siñapatak]” yanaptʼapxätam (1 Cor. 14:40).