Jehová Diosan Testigonakapajj wawanakar yatichañat kamsapjjesa
Awk taykanakajj wawanakapat llakisipjjapuniwa, Jehová Diosan Testigonakapajj ukhamarakiw wawanakapat llakisipjje. Ukatwa Testigonakatakejj escuelar sarañajj wali askejja. “Maynir yatichañajj nayrar sartañapatakiw yanaptʼañapa, ukhamat jaqe masiparusa, markaparus yanaptʼañapataki ukat sum jakasiñapataki”.
KUNJAMTÏ The World Book Encyclopedia qellqatajj siskejja, wawanakarojj aka amtampiw escuelar khitasi: jakañ vidan wakichtʼatäpjjañapataki ukat jilirëjjasajj familiapar sum uñjapjjañapataki. Ukajj Jehová Diosan Testigonakapatakejj wali importantewa. Uka toqet Bibliajj akham siwa: “Maynitejj jupankirinakat jan llakiskchi, jukʼampis familiapat jan llakiskchejja, kuna yatichäwinakarutï jiwasajj creyktan ukjja apanukjjewa, Diosar jan confiyiri jaqet sipansa jukʼampëjjarakiwa” sasa (1 Timoteo 5:8). Escuelar sarañajja, wawanakarojj kunayman responsabilidadanakamp phoqañatakiw yanaptʼi. Ukatwa Jehová Diosan Testigonakapatakejj escuelar sarañajj wali importantejja.
“Maynir yatichañajj nayrar sartañapatakiw yanaptʼañapa, ukhamat jaqe masiparusa, markaparus yanaptʼañapataki, ukat sum jakasiñapataki”. (The World Book Encyclopedia)
Jehová Diosan Testigonakapajj aka ewjjtʼarjam sarnaqañatakiw chʼamachasipjje: “Kun lurkasasa, janiw jaqetakis lurapkasma ukham lurapjjañamäkiti, jan ukasti Jehová Diosatakis lurapkasma ukhamwa taqe chuymampi taqe chʼamampi lurapjjañama” sasa (Colosenses 3:23). Uka ewjjtʼajja jakäwisatakisa, escuelankapki ukanakatakis wali importantewa. Ukatwa Testigonakajj wawanakapar escuelan sum yateqapjjañapataki tareanak phoqapjjañapatak chʼamañchtʼapjje.
“Kun lurkasasa, [...] Jehová Diosatakis lurapkasma ukhamwa taqe chuymampi taqe chʼamampi lurapjjañama” (Colosenses 3:23).
Mä cristianojj jakaski uka markan leyinakap istʼañapawa sasaw Bibliajj yatichi. Ukhamasti leyirjamajj qhawqha maras wawanakajj escuelar sarapjjañapa ukarjamaw phoqapjjaraki (Romanos 13:1-7).
Wawanakar sum yatichañatakejja, anattʼañasa, música tuktʼañasa, ejercicionak lurañasa, bibliotecanakaru, museonakar sarañasa ukat yaqhanakamp lurañas wali importantewa
Jakañ vidan kunanakas jakasiñatak wakisi uka toqet llakisiñajj walikïskiwa, ukampis janiw uka toqet sint llakisipjjañapatak wawanakar chʼamañchañajj wakiskiti sasaw Bibliajj yatichi. Wawanakarojj kusisit jakasipjjañapataki, jaqenak taypin sum amuytʼasis jakasipjjañapatakiw yanaptʼañasa. Ukatwa Testigonakatakejj anattʼañasa, música tuktʼañasa, ejercicionak lurañasa, bibliotecanakaru, museonakar sarañasa ukat yaqhanakamp lurañas wali importantejja. Janiw ukakïkiti, wawanakaparojj jilïr jaqenakar yanaptʼapjjañapataki, respetomp uñjapjjañapatakis yatichapjjarakiwa.
¿Jukʼamp estudiañajj wakisispati?
Jichhürunakan tecnología toqet kunayman maquinanak uñstatap laykuw trabajonakajj urut urutjam mayjtʼaski. Ukatwa walja wayn tawaqonakajj ukham trabajonakan jan sum wakichtʼatpachas trabajipjjañapa. Jupanakatakejj sum trabajtʼirïñasa, wakichtʼatäñasa, machaq trabajor yatinoqtañas wali importantëñapawa. Ukatwa Montaigne sat chachajj yateqerinakat akham säna: ‘Pʼeqer aleq yatichäwinakamp phoqantañat sipansa, yateqatarjam sum amuytʼasis kuns lurtʼirïpjjañapawa’ sasa.
Qamir markanakansa, pisin jakasir markanakansa, trabajo jikjjatañajj janiw faciläkiti, ukatwa jan sum wakichtʼatäpki uka wayn tawaqonakatak trabajo jikjjatañajj chʼamaki. Ukhamajj mä trabajo jikjjatañatak jukʼamp wakichtʼatäñajj wakischi ukhajja, awk taykanakaw wawanakapan jukʼamp estudiapjjañapajj wakisispati janicha ukat cheqpachapunit yanaptʼani janicha uka toqet mä suma amtar puripjjañapatak yanaptʼapjjañapa.
Maynejj janiw qollqenïsakejj sum jakaskaspati, inas jumajj ukham amuyaraksta. Aka qhepa maranakanjja, waljaniw kunayman estudiañatak wal chʼamachasipjje, ukampis qhepatjja jan trabajoni jan kunaniw uñjasjjapjje. Yaqhep awk taykanakajj familiap apanukusaw wal trabajipjje, janiw wawanakar yatichañatakisa yanaptʼañatakis tiemponïpkiti, ukatwa wawanakapajj jiskʼatpach sum yatichatäñapäkan ukhasa jan khitin yatichat uñjasipjjaraki.
Walja qollqe jikjjatañ amtamp wawanakar estudiayayañat sipansa, jupanakar sum yatichañaw jukʼamp importantëñapa, ukhamatwa cheqpach kusisit jakasipjjani. Jesusajj akham sänwa: “Qellqatawa: ‘Jaqejj janiw tʼantʼa sapampikejj jakañapäkiti, jan ukasti Jehová Diosan lakapat mistki taqe uka arunakampi jakañapawa’ sasa” (Mateo 4:4). Jehová Diosan Testigonakapatakejja, qʼom sarnaqaña, Diosamp sum apasiña, ukhamarak jakañ vidatakejj kunas munasi ukatak wakichtʼasiñajj wali importantewa.