Kunjamsa utjäwip aptʼapxäna

UÑJAM kamachasipkisa. Adanampi Evampiruw Edén huertat alisnukusiski. ¿Kunatäpachas uk yattati?

Jan walpun lurapxatayna, ukatwa Jehová Diosax alisnukuski. ¿Kuns lurapxatayna Adanampi Evampix uk yattati?

Diosax janiw lurapxätati siskän ukpï lurapxataynaxa. Diosaxa huertan taqi quqanakat manqʼasipxasmaw sataynawa. Ukampisa aka quqat janiw manqʼapxätati, manqʼapxäta ukhaxa, jiwapxasmawa sataynawa. Uka quqax Diosatakikïnwa. Yatiraktansä, janiw walïkiti yaqhankiri aptasiñaxa, ¿janich ukhamäki? Ukhamasti, ¿kunas kamachatayna?

Mä uruxa, kunapachatï Evax huertan sapak sarnaqaskäna ukhaxa, mä jachʼa asiruw arxayatayna. ¡Kunjamaksa parlapxpachäna! Kuntï Diosax janiw manqʼapxätati siskatayna, uka achu manqʼaskakim sataynawa uka asiruxa. Jïsa, Jehová Diosax janiwa asirunakxa parlañapataki lurkataynati. Ukhamasti, asirurux yaqhapï parlayataynaxa. ¿Khitipachänsa?

Janiw Adanäkänti. Aka Uraqix janïra luratäkän ukha lurata ajayüpachänwa. Ukanakax angelanakäpxänwa, janiw uñjksnati. Evar arxayiri angelax jachʼa jachʼaw tukutayna. Ukat Diosjam apnaqirïñwa munatayna, Jehová Diosar istʼañat sipansa nayar istʼapxitaspa sasaw lupʼïna. Jupaw asirur parlayatayna.

Uka angelax Evarux iyawsayataynawa. Diosjamäxätaw uka achu manqʼantasinxa sataynawa. Evax chiqäpachaw sasaw manqʼantäna, Adanas manqʼantarakïnwa. Adanampi Evampixa Diosaruw jan istʼapkänti, ukatwa uka huertxa, suma ujtasïwipxa aptʼapxäna.

Ukampisa jutïr urunakanxa, kunjamäkäntï Edén huertax ukhamwa aka Uraqpach Diosax tukuyani. Kunjamsa jumax ukar yanaptʼasma ukxa ukat uñjañäni. Jichhax Adanampi Evampit parlaskakiñäni, kamachapxpachänsa.