Janïr naskipanwa Jesusar jachʼañchapjjäna

Gabriel angelajja, María tawaqorojj akham sänwa: ‘Mä yoqall wawa ususïta, Jesús sasaw sutiyäta. Jupajj wiñayatakiw mä Reyjam apnaqani’ sasa. Mariasti akham sasaw angelar jisktʼäna: “Janejjay nayajj chachanïkstejja, ¿kunjamaraki ukajj phoqasispasti?” sasa (Lucas 1:34).

Angelasti sänwa: “Espíritu santow jumjjar jutani, Jachʼa Diosan chʼamapaw jumjjar mä chʼiwir uñtat imjjatätam. Ukatwa naskani uka wawajj santo ukhamarak Diosan Yoqapa satäni” sasa (Lucas 1:35).

Kuntï yatiykäna uk creyiñapatakejj akham sasaw Gabriel angelajj Mariar saskakïna: “Pachpa Elisabet familiaramas usur jaqëjjarakiwa. Jupajj chuymanëjjchisa jan wawachasir warmit uñtʼatäkchisa, sojjta phajjsinak usurëjjewa. Kuntï Diosajj arski ukajj kunjamatsa phoqasipuniniwa” sasa (Lucas 1:36, 37).

Kuntï Gabriel angelajj siskäna ukarojj Mariajj creyïnwa, ukatwa akham säna: “¡Nayajj Jehová Diosan esclavapätwa! Kuntï jumajj siskta ukajj nayan phoqaspan” sasa (Lucas 1:38).

Gabriel angelajj sarjjäna uka qhepatjja, Mariajj Elisabetar visittʼir sarañatakiw wakichtʼasïna. Elisabetajj Zacarías esposopampiw Judean mä qollu jakʼan jakasïna, Jerusalén marka jakʼana. Mariasti Nazaretanwa jakasïna, ukhamajj Elisabetan utaparu puriñatakejj kimsa jan ukajj pusi urunakaw sarpachäna.

Mariajj Zacariasan utapar purisajja, Elisabetaruw arunttʼäna. Elisabetasti espíritu santompi phoqtʼatäsajj akham sänwa: “¡Jumajj warminak taypit bendisitätawa, purakamankki uka wawas bendisitarakiwa! ¿Khitirakït nayasti, Tatitujan mamapajj nayan ukar tumptʼir jutañapatakisti? Kunapachatï jumajj aruntkista ukhajja, wali kusisitapuniw purakajankir wawajj onjjti” sasa (Lucas 1:42-44).

Mariajj wali yuspärasisaw akham säna: “Nayajj Jehová Diosaruw jachʼañchta. Nayar salviri Diosaj laykojj walpun chuymajan kusista. Nayajj jan yäqat esclava warmïkayäta ukhaw jupajj uñtanitu. Jichhat uksarusti taqe jaqenakaw Diosan bendisit warmi sasin sapjjetani. Wali chʼaman Diosaw nayampejj wali musparkañanak luri” sasa. Mariajj suma warmit uñjatäkchïnsa, Diosaruw akham sas jachʼañchäna: “Jupan sutipajj santowa. Khitinakatejj jupar ajjsarapki ukanakarojja, wiñayan wiñayapatakiw khuyaptʼayi” sasa (Lucas 1:46-50).

Mariajj akham sasaw profecía arunakarjamajj Diosar jachʼañchaskakïna: “Jupajj wali chʼamani amparapampiw taqe kuns luri, chuymanakapan jachʼa jachʼa tukupki ukanakarus ananukurakiwa. Jupajj trononakatsa munañan jaqenakarojj apaqewa, jan yäqat jaqenakarus jachʼaruw apti. Jupajj manqʼat awtjatanakarus kunatejj sumäki ukanakampiw sistʼayi, qamirinakarusti chʼusa amparak khitanukuraki. Jupajj khuyapayasiñapat wiñaypach amtañatakiw Israel serviripar yanaptʼir juti, kunjamtï jupajj Abrahán nayra awkisarus wawanakaparus siskäna ukhama” sasa (Lucas 1:51-55).

Mariajj mä kimsa phajjsiw Elisabetampejj quedasïna, Elisabetarojj niya ususiñampëjjän ukhakamaw yanaptʼäna. Diosat jan jitheqtir uka pä warminakan juntuk jakasipjjatapajj wali askïnwa, Jehová Diosaw jupanakar wawanïpjjañapatak yanaptʼäna.

Janiw ukakïkiti, Jesusarojj janïr naskipanwa jachʼañchapjjäna. Amtañäni, Mariajj Zacariasan utapar mantasin Elisabetar arunttʼäna ukhajja, Elisabetajj ‘Tatituja’ sasaw Jesusar säna, purakapankir wawasti ‘wali kusisitaw onjjtarakïna’. Ukampis qhepatjja jaqenakajj Mariampiru Jesusampirojj janiw ukham uñj-jjapjjänti, uka toqetwa jutïrin yatjjataskañäni.