Jesusajj Nazaret markanwa jilsüna

Jesusajj Nazaret markanwa jilsüna, uka markajj jiskʼakïnwa, janirakiw wali uñtʼatäkänsa. Uka markajj Judeat alay toqenkänwa, Galilea cheqana. Nazaret markajja Galilea Qotat inti jalanta toqenkänwa, qollunak taypina.

Jesusajj niya pä maranïkän ukhaw awkip taykapajj Nazaretar apapjjäna. Amuyatajja, ukhakamajj Joseampina Mariampin wawapajj Jesusakïnwa. Tiempompejja, Santiago, José, Simón, Judas jilanakapaw nasirakïna. Joseampi Mariampejj phuchanakanirakïnwa. Ukhamajj Jesusajja sojjta jilanaka kullakanakanïpachänwa.

Jesusan yaqha familiaranakapajj utjarakïnwa. Elisabetampiru Juan wawapampirojj niy uñtʼjjtanwa, jupanakajj Judea aynach jaya toqenwa jakasipjjäna. Salomé warmisti jakʼanwa jakasirakïna, Galilea cheqana, jupajj inas Marian kullakapächïna, ukhamäspajja, Jesusan tiapäspänwa. Salomean esposopajj Zebedeo satänwa, jupanakan Santiago ukhamarak Juan wawanakapajj Jesusan dueño primonakapäspänwa. Jiskʼäkasinjja, inas Jesusajj primonakapampi sarnaqerïchïna, ukampis tiempompejj uka primonakapajja, apostolonakjamaw servipjjäna, Jesusampejj wali sum apasipjjäna.

Joseampi Mariampejj walja wawanakanïpjjänwa, ukatwa Joseajj familiapar yanaptʼañatak wal trabajiñapäna. Jupajj carpinterönwa, Jesusarusti wawaparjamaw uywasïna, ukatwa jaqenakajj Jesusat akham sapjjäna: “¿Janit aka jaqejj carpinteron yoqapäki?” sasa (Mateo 13:55). Joseajj carpinteröñwa Jesusar yatichäna, Jesusasti uk wali sum yateqäna. Ukatwa jaqenakajj jupat sapjjäna: “¿Janit jupajj carpinteröki?” sasa (Marcos 6:3).

Joseatakisa familiapatakis Jehová Diosar serviñaw nayrankäna. Joseampi Mariampejj Diosan Leyiparjamaw wawanakaparojj ‘utankkasina, thakinkkasina, ikintkasina, sartkasina’ Diosat yatichapjjäna (Deuteronomio 6:6-9). Nazaretanjja mä sinagogaw Diosar adorañatak utjäna, Joseajj familiapampi ukar sarapunirïpachänwa. Ukatwa Jesusat akham sas qellqasïna: “Kunjamtï sábado urun lurirïkäna ukarjamaw sinagogar mantäna” sasa (Lucas 4:16). Jerusalenan utjkäna uka templor sarañajj Joseampitaki familiapampitakejj wali kusiskañänwa.