AKAPACHAJJ JUKʼAMP JAN WALINWA UÑJASI

4 | Suytʼaskakiñamawa janiw qarjtañamäkiti

¿KUNATSA UKAJJ WAKISI?

Akapachan jan wali utjatapajja, usuntaña llakisiñwa utjayaspa. Jan walinakan uñjasipkäna ukanakat waljanejja, wiñayaw ukajj ukhamäni sasaw amuyapjje. ¿Ukhamïpan kunsa lurapjje?

Kunas jutïrin pasani uka toqet yaqhepajj janiw lupʼiñ munjjapjjeti.
Yaqhepanakasti, alcohol umasa, drogasisaw llakinakap armtʼasiñ munapjje.
Mä qhawqhanejja, janiw jakañajajj wakisjjaspati sasin amuyasajj “inamayaw chʼamachasiskä” sasaw sapjje.

¿Yatiyätati?

Inas yaqhep problemanakamajj jan wiñayapuni ukhamäkchispati, mä akatjamatwa askichasispa.
Jan askichaskaspa ukhasa, uk aguantañatakejj chʼamachasismawa.
Taqe jan walinakajj wiñayatakiw chhaqtayatäjjani sasaw Bibliajj qhanañchi.

¿Kunsa lurasma?

Bibliajj akham siwa: “Janipun qharürut llakisipjjamti, qharürojj yaqha llakinakaw utjarakini. Sapüruw jan walinakajj utji” sasa (Mateo 6:34).

Janiw yaqha urut llakisiñamäkiti. Kunas jutïr urun pasani ukanakat llakisisajja, janiw kunanaktï sapürojj lurañamäki ukanakat armasiñamäkiti.

Kuna jan walinakas pasaspa ukanakat llakisisajja, jukʼampikiw estresasjjasma, jan walinakajj janipuniw kunapachas askichaskaniti sasaw amuyjjarakisma.

¿KUNAS YANAPTʼISTASPA? Mä qhawqha ewjjtʼanaka

KUNATÏ YANAPTʼKIRISTAM UKA TOQETWA LUPʼIÑAMA

Bibliajj akham siwa: “Tʼaqesir jaqen taqpach urunakapajja jan walikamakiwa, ukampis kusisit chuymani jaqejja sapüruw kusisit jakasi” sasa (Proverbios 15:15). Kuna jan walintï uñjaskta ukatak sapürus lupʼiskäta ukhajja, kunjamsa ukajj askichasispa uk janiw amuykasmati. Ukampis jumatï ukanakat jan sint lupʼkäta ukhajja, kunjamatsa uka jan walirojj saykatasma uk amuytʼasïtawa.

Jan wali noticianakjja, janiw sinti uñchʼukiñamäkiti ni ischʼukiñamäkisa.
Kunanakatsa Diosarojj yuspärasma ukanakat sapa uru tukuyatarojj mä qhawqha amthapim.
Uru jurnälan kunanaksa luräta ukaki mä listar qellqtʼasim. Chʼama lurañanakjja, jan sinti chʼamäñapatakejj waljaruw jaljasma, ukhamatwa chʼamachasitamajj jan inamayätap amuyäta.

MAYNIMP YANAPTʼAYASIM

Bibliajj akham siwa: “Mayninakat jitheqtir jaqejja […], yatiñsa apanukurakiwa” sasa (Proverbios 18:1). Janiw khitis mä pʼiya manqhat sapapaki mistunkaspati, maynin yanaptʼapaw munasi.

Familianakamaru jan ukajj amigonakamaru yanaptʼa mayim.
Jumajj jupanakar yanaptʼarakismawa uk jan armasimti. Mayninakar yanaptʼäta ukhajja, janiw problemanakamar chuym sint uchkätati.
Jumatï llakimpi aynachtʼatäsina, jakañajajj janiw wakisjjaspati sasin amuyjjsta ukhajja, jankʼakiw doctoran ukar sarañama. Maynejj mä kunat usutäjje, llaki usumpi usuntatäjje ukhaw ukham amuyjjaspa. Jilaparte jaqenakajja, tratamiento lurasaw waliptapjje.a

a ¡Sartapjjañäni! sat aka revistajj janiw kunjams qollasiñama uk siskiti.

Bibliaw cheqpach suma suytʼäwi churistu

Salmo qellqeri mä chachajja, Diosar oraskasajj akham sänwa: “Arunakamajja kayujatakejj mä lamparjamawa, thakijatakis mä qhanarakiwa” sasa (Salmo 119:105). ¿Uka arunakajj kamsañsa muni?

Mä wali chʼamaka arumanjja, mä lampar qhanajj kawknamsa sarañasa uk amuyañatakiw yanaptʼistaspa. Biblian ewjjtʼanakapajj ukhamarakiw mä amtar puriñajj wali chʼamäki ukhajja, suma amtar puriñatak yanaptʼistu.

Mä qhanajja, kunas jiwas nayraqatan utji uk sum uñjañatakiw yanaptʼistu. Bibliajj ukhamarakiw kuna suytʼäwis jutïritak utjistu uk amuyañatak yanaptʼistu.

Bibliajj janiw kunjamsa jaqenakajj jakañ qalltawayi ukatak parlkiti. Jan ukasti, jutïritak kuna suma suytʼäwinïtansa uksa qhanañcharakiwa. Aka jisktʼanakaruw qhanañchi:

¿Kunjamsa?

¿Tʼaqesiñajj kunjamsa qalltawayi? Bibliajj akham siwa: “Mä sapa jaqen juchapatwa juchajj aka mundor mantani, uka juchan utjatapatwa jiwañajj mantaniraki, ukhamatwa jiwañajj taqe jaqenakar katunti, taqenin juchachasipjjatap layku” sasa (Romanos 5:12).

¿Kunatsa?

¿Kunatsa jaqenakajj problemanakas jan askichasiñ puedktanjja? Bibliajj akham siwa: “Janirakiw jaqerojj chellqtatanakap amtañas waktʼkiti” sasa (Jeremías 10:23). Akapachan kuna jan walinakatï uñjaski ukaw uka textojj kuntï siski ukajj cheqätap uñachtʼayistu.

¿Kunsa?

¿Jan walinaka askichañatakejj kunsa Diosajj lurani? Bibliajj akham siwa: “Diosajj taqe jachanakapwa nayranakapat picharani, janiw jiwañajj jukʼamp utj-jjaniti, janirakiw llakisiñasa, jachañasa ni usuyasiñasa jukʼamp utj-jjaniti” sasa (Apocalipsis 21:4).