Munasitanakanïñatakixa, munasirïpxañasawa

Munasirïsaw munasitanïsna. Jehová Diosata jukʼampi yatiqaskakïta ukhaxa, Diosaru munasiñamasa, juparu luqtañ munañamasa jilxataniwa. Ukaw Jesucriston arkiripäñamataki yanaptʼätamxa (Mateo 28:19). Jehová Diosan kusisita qhanañchirinakapampi mayachasïta ukhaxa, Diosan munasitapäsinwa wiñayan wiñayapataki kusisïta. ¿Kunsa jupanakampïñatakixa lurañama?

Diosaru munasitamxa kamachinakaparu jaysasa uñachtʼayma. “Diosar muna[si]ñaxa mandamientonakar phuqhañawa; mandamientonakapasti janirakiw jan phuqhañjamäkiti” (1 Juan 5:3).

Yatiqatarjamaw sarnaqäta. Jesusaxa ak yatichañatakixa, mä uñtasïwita arsutayna. Amuytʼan mä chachasti qarqa patxaruwa utap luratayna, ukat jan amuytʼani mayni chachasti chʼalla patxaruwa utachasirakitayna. Kunapachatix thayampi jallumpi walpun purintäna ukhaxa, qarqa patxaru lurat utasti sayaskakïnwa, ukampisa chʼalla patxaru lurat utaxa llakkañaw allthaptatayna. Jesusax sänwa, yatichäwinakaja istʼiri jaqinakasti, qarqa patxaru utachiri amuytʼan jaqjamäpxiwa sasa. Ukat sarakitaynawa, yatichäwinakaja istʼasa jan phuqhañ muniri jaqinakasti, chʼalla patxaru utachiri jan amuytʼan jaqjamäpxiwa. Aka paninitxa, ¿kawkïr jaqïñjamsa munasma? (Mateo 7:24-27.)

Diosaru jakäwim katuyasxañamawa. Wiñayatakiw munañama lurañ muntha sasaw Jehová Diosarux mayisïwiman säta. Diosan munañapa lurañäni ukhaxa, Jesucriston arkirinakapätaswa uñachtʼayañäni (Mateo 11:29).

Bautisasiñamawa. ‘Bautisasirakim, Diosan sutipar iyawsasa, taqi juchanakamat jariqatäñamataki’ (Hechos 22:16).

Taqi chuyma Jehová Diosaru luqtañamawa. “Kuntix lurapxät ukxa lurapxam taqi chuymampi, [Jehová] Tatitutakis lurapkasma ukhama, jan jaqinakatakjamaxa.” (Colosenses 3:23.)