Һиссә 11
Јени дүнјанын тәмәли индидән гојулур
1, 2. Мүгәддәс Китаб пејғәмбәрликләри јеринә јетдикҹә, ҝөзләримизин гаршысында нәләр баш верир?
ҺЕЈРӘТЛӘНДИРИҸИ бир шеј дә вар ки, Аллаһын јени дүнјасынын тәмәли елә инди — Шејтанын көһнә дүнјасынын мәһвә уғрамаг үзрә олдуғу бир вахтда гојулур. Ҝөзүмүзүн габағында Аллаһ бүтүн халглардан инсанлары топлајыр вә онлардан буҝүнкү парчаланан дүнјаны тезликлә әвәз едәҹәк јер үзүнүн јени ҹәмијјәтинин тәмәлини гојур. Мүгәддәс Китабда 2 Петер 3:13 ајәсиндә бу јени ҹәмијјәт “јени јер” адланыр.
2 Һәмчинин Мүгәддәс Китаб пејғәмбәрлијиндә дејилир: “Сон ҝүнләрдә [бизим јашадығымыз зәманәдә]... чох халглар ҝедәҹәкләр вә дејәҹәкләр: Ҝәлин вә Рәббин дағына [Онун һәгиги ибадәтинә]... чыхаг; өз јолларыны бизә өјрәдәҹәк вә онун јолларында јеријәҹәјик” (Ишаја 2:2, 3).
3. а) Ишајанын пејғәмбәрлији кимләр арасында јеринә јетир? б) Мүгәддәс Китабын сонунҹу китабы бу барәдә нә дејир?
3 Инди бу пејғәмбәрлик Аллаһын јолларына табе олан вә “онун јолларында” јеријән инсанларын арасында јеринә јетир. Мүгәддәс Китабын ахырынҹы китабында бу сүлһсевәр бејнәлхалг ҹәмијјәт һаггында “һәр милләтдән, бүтүн гәбиләләрдән, халглардан вә дилләрдән олан... бөјүк бир издиһам”, Аллаһа мүтәшәккил сурәтдә хидмәт едән, һәгиги бејнәлхалг гардашлыг кими бәһс едилир. Ејни заманда, Мүгәддәс Китаб дејир: “Бунлар, о бөјүк мәшәггәтдән чыханлардыр”. Бу о демәкдир ки, бу инсанлар индики пис системин сонунда сағ галаҹаглар (Вәһј 7:9, 14; Матта 24:3).
Һәгиги бејнәлхалг гардашлыг
4, 5. Јеһованын Шаһидләринин бејнәлхалг гардашлығынын мөвҹуд олмасы неҹә мүмкүн олмушдур?
4 Милјонларла Јеһованын Шаһидләри сәмими гәлбдән чалышырлар ки, Онун тә’лиматларына вә јолларына ујғун јашасынлар. Аллаһын јени дүнјасы онлар үчүн әбәди һәјата үмид лөвбәридир. Онлар ҝүндәлик һәјатларында Аллаһын ганунларына ујғун давранмагла, Онун идарә етмәк тәрзинә һәм инди, һәм дә јени дүнјада табе олмаға һазыр олдугларыны ҝөстәрирләр. Бу инсанлар миллијјәтиндән вә ја иргиндән асылы олмајараг, һәр јердә ејни тәләбләрә — Аллаһын Мүгәддәс Китабда тә’јин етдији тәләбләрә табе олурлар. Елә буна ҝөрә дә онлар һәгиги бејнәлхалг гардашлыг, Аллаһын тәшкил етдији јени дүнја ҹәмијјәтидирләр (Ишаја 54:13; Матта 22:37, 38; Јәһја 15:9, 14).
5 Јеһованын Шаһидләри надир бејнәлхалг гардашлығын шәрәфини өзләринә аид етмирләр. Онлар е’тираф едирләр ки, бу, Аллаһын ганунларына табе олан инсанлара Онун гүдрәтли руһунун ҝөстәрдији тә’сирин нәтиҹәсидир (Һәвариләрин ишләри 5:29, 32; Галатијалылара 5:22, 23). Бу, Аллаһын ишидир. Исанын дедији кими, “инсанлар үчүн гејри-мүмкүн олан ишләр Аллаһ үчүн мүмкүндүр” (Лука 18:27). Буна ҝөрә дә, сарсылмаз каинаты јаратмаға гадир олан Аллаһ, јени дүнјанын мөһкәм ҹәмијјәтини јаратмаға да гадирдир.
6. Јеһованын Шаһидләринин гардашлығыны нә үчүн мүасир мө’ҹүзә адландырмаг олар?
6 Беләликлә, Јеһованын јени дүнјада неҹә идарә едәҹәјини, артыг бу ҝүн јени дүнјанын тәмәлини гојаркән ҝөрдүјү ишләрдән анламаг олар. Вә Онун Өз Шаһидләри үчүн ҝөрдүјү тәдбир, әслиндә мүасир мө’ҹүзәдир. Нә үчүн? Чүнки Јеһова Өз Шаһидләриндән мүнагишәләр јарадан милли, ирги вә дини мараглар үзүндән һеч заман парчаланмајаҹаг һәгиги бејнәлхалг гардашлығы тәшкил едиб. Сајларынын милјонлара чатмасына вә 200-дән артыг өлкәдә јашамаларына бахмајараг, Шаһидләр бир-бирләринә ајрылмаз телләрлә бағлыдырлар. Бүтүн тарих боју надир сајылан бу бејнәлхалг гардашлыг, доғрудан да мүасир мө’ҹүзәдир — Аллаһын ишидир (Ишаја 43:10, 11, 21; Һәвариләрин ишләри 10:34, 35; Галатијалылара 3:28).
Аллаһын халгыны мүәјјән едән хүсусијјәтләр
7. Исанын сөзләринә ҝөрә, онун һәгиги давамчылары неҹә мүәјјән едиләҹәкләр?
7 Аллаһын өз јени дүнјасынын тәмәли хүсусунда истифадә етдији инсанларын кимләр олдуғуну даһа неҹә мүәјјән етмәк олар? Мисал үчүн, Јәһја 13:34, 35 ајәләриндә Исанын сөзләрини кимләр јеринә јетирир? Иса демишдир: “Сизә бир-биринизи севәсиниз дејә јени бир әмр верирәм: сизи севдијим кими сиз дә бир-биринизи севин. Әҝәр бир-биринизә гаршы мәһәббәтиниз олса, бундан һәр кәс Мәним шаҝирдләрим олдуғунузу биләҹәк”. Јеһованын Шаһидләри Исанын сөзләринә инаныр вә ујғун шәкилдә давранырлар. Аллаһын Кәламынын өјрәтдији кими, онларын ‘бир-бирләринә ҹошғун мәһәббәтләри’ вар (1 Петер 4:8). Онлар, “камил бирлијин бағы олан мәһәббәти” ҝејинибләр (Колослулара 3:14). Беләликлә, онлары бүтүн дүнјада бирликдә сахлајан “јапышган” — гардашлыг мәһәббәтидир.
8. Аллаһын халгы, 1 Јәһја 3:10-12 ајәләринә әсасән даһа неҹә мүәјјән олунур?
8 Һәмчинин 1 Јәһја 3:10-12 ајәләриндә дејилир: “Кимин Аллаһын өвлады, кимин дә шејтанын өвлады олдуғу бундан бәлли олур: салеһ иш ҝөрмәјән, Аллаһдан дејилдир, өз гардашыны севмәјән дә һәмчинин. Чүнки башланғыҹдан бәри ешитдијиниз тәблиғ будур ки, биз бир-биримизи севәк, Шәрирдән олан, өз гардашыны өлдүрән Габил кими олмајаг”. Буна ҝөрә дә, Аллаһын халгы бејнәлхалг гардашлыг кими зоракылыгда иштирак етмир.
Башга фәргләндириҹи хүсусијјәт
9, 10. а) Ахыр ҝүнләрдә Аллаһын хидмәтчиләрини һансы ишә ҝөрә мүәјјән етмәк олар? б) Јеһованын Шаһидләри Матта 24:14 ајәсини неҹә јеринә јетирирләр?
9 Аллаһын хидмәтчиләрини мүәјјән етмәјин башга бир үсулу да вар. Иса, дүнјанын сону һаггындакы пејғәмбәрлијиндә бу заман кәсијини ахыр ҝүнләр кими таныдаҹаг бир чох хүсусијјәтләр садалады. (9-ҹу һиссәјә бахын.) Һәмин пејғәмбәрлијин тәркиб һиссәсиндән бири Матта 24:14 (И–93) ајәсиндә хатырланыр: “Падшаһлыг һаггында олан бу Мүждә милләтләрин һамысына шәһадәт олараг бүтүн дүнјада тәблиғ олунаҹагдыр; вә сон о заман ҝәләҹәкдир”.
10 Бу пејғәмбәрлијин јеринә јетдијини ҝөрүрүкмү? Бәли. Ахыр ҝүнләрин башландығы 1914-ҹү илдән бәри, Јеһованын Шаһидләри Исанын бујурдуғу тәрздә, јә’ни инсанларын евләринә ҝедәрәк, бүтүн дүнјада Аллаһын Падшаһлығы һаггында тәблиғ едирләр (Матта 10:7, 12; Һәвариләрин ишләри 20:20). Милјонларла Шаһидләр јени дүнја һаггында данышмаг үчүн бүтүн милләтләрдән олан инсанлара баш чәкирләр. Сиз дә бу брошүраны елә бунун сајәсиндә әлдә етмисиниз, белә ки, Јеһованын Шаһидләринин ишинә, Аллаһын Падшаһлығы һаггындакы милјардларла әдәбијјат нәшр етмәк вә пајламаг да дахилдир. Дүнја мигјасында евдән-евә тәблиғ едән даһа кимләри таныјырсыныз? Марк 13:10 ајәси ҝөстәрир ки, ахыр ҝәлмәздән “әввәл” тәблиғ етмәк вә тә’лим вермәк иши кечирилмәлидир.
Икинҹи бөјүк мүбаһисәли суалын ҹавабы
11. Аллаһын рәһбәрлијинә табе олараг, Јеһованын Шаһидләри даһа нәјә наил олурлар?
11 Аллаһын ганун вә принсипләринә табе олмагла Јеһованын Шаһидләри башга бир шејә дә наил олурлар. Онлар — инсанларын сынаглар заманы Аллаһа садиг галмајаҹагларыны иддиа едән Шејтанын јаланчы олдуғуну ҝөстәрир вә бунунла да, инсанларын нөгсансызлығына даир икинҹи бөјүк мүбаһисәли суала ҹаваб верирләр (Ејуб 2:1-5). Шаһидләр бүтүн милләтләрдән олан милјонларла инсанлардан бир ҹәмијјәт тәшкил едәрәк, ваһид бир халг кими, Аллаһын рәһбәрлијинә сәдагәт ҝөстәрирләр. Гејри-камил олмаларына вә Шејтанын тәзјиг ҝөстәрмәсинә бахмајараг, али һөкмранлыг һүгугу барәдә суал јарананда онлар Аллаһын тәрәфини тутурлар.
12. Шаһидләр өз иманларында кими тәглид едирләр?
12 Бу ҝүн милјонларла Јеһованын Шаһидләри өз шәһадәтләрини, кечмиш зәманәдә Аллаһа сәдагәтли олан диҝәр шаһидләрин узун сијаһысына дахил едирләр. Әҝәр онлардан јалныз бә’зиләрини хатырласаг, Һабилин, Нуһун, Ејубун, Ибраһимин, Саранын, Исһагын, Јагубун, Деборанын, Рутун, Давудун вә Даниелин адларыны чәкмәк олар (Ибраниләрә, 11-ҹи фәсил). Мүгәддәс Китабын дедији кими, онлар “бөјүк шаһидләр булуду”дурлар (Ибраниләрә 12:1). Исанын шаҝирдләри дә дахил олмагла, онлар вә башгалары Аллаһа мүнасибәтдә нөгсансызлыгларыны горудулар. Исанын өзү дә мүкәммәл нөгсансызлығы горујараг, бөјүк нүмунә верди.
13. Исанын Шејтан һаггында дедији һансы сөзләри тәсдиг олунур?
13 Буну, Исанын дин рәһбәрләринә Шејтан һаггында дедији сөзләри тәсдиг едир: “Лакин Мәни, Аллаһдан ешитдији һәгигәти сизә сөјләјән Адамы инди өлдүрмәјә чалышырсыныз... Сизин атаныз иблисдир; вә өз атанызын еһтирасларыны иҹра етмәк истәјирсиниз. О, башланғыҹдан инсан гатили иди вә һәгигәтә бағлы галмады; чүнки онда һәгигәт јохдур. Јалан сөјләдији заман, өзүндән сөјләр; чүнки о, јаланчыдыр вә јаланын атасыдыр” (Јәһја 8:40, 44).
Сиз нәји сечәҹәксиниз?
14. Јени дүнјанын тәмәли инди һансы вәзијјәтдәдир?
14 Аллаһын һазырда Јеһованын Шаһидләринин бејнәлхалг ҹәмијјәтиндә тәшкил етдији јени дүнјанын тәмәли ҝет-ҝедә мөһкәмләнир. Һәр ил јүз минләрлә адам, дәгиг билијә әсасланан ирадә азадлығындан истифадә едәрәк Аллаһын рәһбәрлијини гәбул едир. Онлар јени дүнја ҹәмијјәтинин бир һиссәсини тәшкил едирләр, али һөкмранлыг һүгугу барәсиндәки мүбаһисәли суалда Аллаһын тәрәфини тутур вә Шејтанын јаланчы олдуғуну сүбут едирләр.
15. Иса һансы ајырыҹы иши иҹра едәҹәкдир?
15 Онлар Аллаһын рәһбәрлијини сечмәклә, Мәсиһ “гојунлары кечиләрдән” ајыраҹағы заман онун “сағында” дурмаға лајиг олаҹаглар. Ахыр ҝүнләр һаггындакы пејғәмбәрлијиндә Иса демишдир: “Бүтүн халглар Онун өнүндә топлашаҹаглар, О да чобан гојунлары кечиләрдән ајырдығы кими, онлары бир-бириндән ајыраҹагдыр. Гојунлары сағына, кечиләри исә солуна гојаҹагдыр”. Гојунлар, Аллаһын рәһбәрлијинә табе олараг Мәсиһин гардашларына гошулан вә онлара көмәк едән тәвазөкар инсанлардыр. Кечиләр исә, Мәсиһин гардашларыны рәдд едән вә Аллаһын рәһбәрлијинә гаршы дуран инадкар инсанлардыр. Бәс бунун нәтиҹәси нә олаҹаг? Иса демишдир: “Бунлар [кечиләр] әбәди әзаба, салеһләр [гојунлар] исә әбәди һәјата дүчар олаҹаглар” (Матта 25:31-46).
16. Әҝәр јахынлашмагда олан Ҹәннәтдә јашамаг истәјирсинизсә, сиз нә етмәлисиниз?
16 Аллаһ доғрудан да гејдимизә галыр! О, чох тезликлә јер үзүнү валеһедиҹи бир Ҹәннәтә чевирәҹәк. Сиз бу Ҹәннәтдә јашамаг истәјирсинизми? Әҝәр истәјирсинизсә, Аллаһ һаггында билик әлдә етмәклә вә өјрәндикләринизә мүвафиг давранмагла, Онун ҝөрдүјү тәдбирләрә ҝөрә өз миннәтдарлығынызы билдирин. “Рәбби тапыла биләркән арајын; јахын икән Ону чағырын; пис адам өз јолуну вә фәсадчы өз дүшүнҹәләрини бурахсын вә Рәббә дөнсүн вә она мәрһәмәт едәр” (Ишаја 55:6, 7).
17. Кимә хидмәт етмәји сечәркән нәјә ҝөрә вахты итирмәк олмаз?
17 Вахты итирмәк олмаз. Бу көһнә системин сону чох јахындыр. Аллаһын Кәламы мәсләһәт верир: “Дүнјаны вә дүнјада олан шејләри севмәјин. Ким дүнјаны севәрсә, онда Атанын мәһәббәти јохдур... Дүнја вә онун еһтирасы кечиб ҝедир, амма Аллаһын ирадәсини јеринә јетирән әбәди јашајыр” (1 Јәһја 2:15-17).
18. Һансы давранышыныз, Аллаһын валеһедиҹи јени дүнјасындакы һәјаты әминликлә ҝөзләмәјинизи мүмкүн едәҹәк?
18 Аллаһын халгы јени дүнјада әбәди јашамаг үчүн индидән тә’лим алыр. Онлар Ҹәннәтин гурулмасы үчүн лазым олан руһани вә диҝәр ихтисаслара јијәләнирләр. Биз сизи, бир Һөкмдар кими Аллаһы сечмәјә вә бу ҝүн бүтүн дүнја үзрә кечирилән хиласедиҹи иши дәстәкләмәјә тә’кидлә тәшвиг едирик. Мүгәддәс Китабы Јеһованын Шаһидләри илә өјрәнин вә һәгигәтән дә бизим гајғымыза галан вә изтираблара сон гојаҹаг Аллаһ һаггында билик әлдә един. Белә етмәклә, сиз өзүнүз јени дүнјанын тәмәлинин бир һиссәси ола биләрсиниз. Онда сиз, Аллаһын лүтфүнү вә валеһедиҹи јени дүнјада һәјат алмағы әминликлә ҝөзләјә биләрсиниз!
[31-ҹи сәһифәдә олан шәкил]
Јеһованын Шаһидләри һәгиги бејнәлхалг гардашлығы тәшкил едирләр.
[32-ҹи сәһифәдә олан шәкил]
Аллаһын јени дүнјасынын тәмәли индидән гојулур.