Падшаһлыг һаггындакы һәгигәт тохумуну сәпирик
“Тохумуну сәһәр сәп вә ахшама гәдәр әлинә раһатлыг вермә” (ВАИЗ 11:6).
1. Бу ҝүн мәсиһчиләр һансы мә’нада тохум сәпирләр?
КӘНД тәсәррүфаты гәдим Јәһуди ҹәмијјәтиндә ваҹиб рол ојнајырды. Елә буна ҝөрә дә, бүтүн инсан һәјатыны Вә’д едилән дијарда јашамыш Иса, кәнд тәсәррүфаты илә бағлы олан әјани мисаллар чәкирди. Мәсәлән, о, Аллаһын Падшаһлығы һаггындакы хош хәбәрин тәблиғини тохумун сәпилмәсинә бәнзәдирди (Матта 13:1—9, 18—23; Лука 8:5—15). Кәнд тәсәррүфаты әразисиндә јашајыб јашамадығымыздан асылы олмајараг, руһани тохумлары сәпмәк мәсиһчиләр үчүн бу ҝүн дә ән ваҹиб ишдир.
2. Тәблиғ ишимиз нә дәрәҹәдә ваҹибдир вә бу ишин апарылмасы үчүн бу ҝүн нә едилир?
2 Бу ахыр заманларда Мүгәддәс Китабын һәгигәт тохумуну сәпмәк ишиндә иштирак етмәк, бөјүк шәрәфдир. Бу ишин ваҹиблији, Ромалылара 10:14, 15 ајәләриндә јахшы ҝөстәрилир: “Вә’з едән јохдурса, неҹә ешидәҹәкләр? Вә әҝәр ҝөндәрилмәзләрсә, неҹә вә’з едәҹәкләр? Неҹә ки, јазылмышдыр: Сүлһ мүждәләјәнләрин, јахшы шејләр мүждәләјәнләрин ајаглары нә ҝөзәлдир!” Мүсбәт мүнасибәт ҝөстәрәрәк, Аллаһын вердији бу тапшырығы сә’јлә јеринә јетирмәк инди мисилсиз дәрәҹәдә ваҹибдир. Буна ҝөрә дә Јегованын Шаһидләри дурмадан чалышараг, Мүгәддәс Китабы вә онун өјрәнилмәси үчүн әдәбијјатлары 340 дилдә нәшр едир вә пајлајырлар. Бу материалын һазырланмасында, Јегованын Шаһидләринин мәркәзи идарәсиндә, еләҹә дә мүхтәлиф өлкәләрдәки филиалларында 18 000-дән артыг көнүллү ишчи иштирак едир. Тәхминән алты милјон Шаһид, Мүгәддәс Китабын бу әдәбијјатларыны дүнјанын һәр јериндә јајыр.
3. Падшаһлыг һаггындакы һәгигәт тохумунун сәпилмәси сајәсиндә нәјә наил олунур?
3 Бу зәһмәтли иш һансы сәмәрәләри верир? Мәсиһчилијин јарандығы илк ҝүнләрдә олдуғу кими, бу ҝүн дә чохлары һәгигәти гәбул едирләр (Һәвариләрин ишләри 2:41, 46, 47). Лакин даһа ваҹиб иш, Падшаһлығын јени вәфтиз олунмуш тәблиғчиләринин сајы јох, бу ҝениш шәһадәтлијин нә дәрәҹәдә Јегованын адына иззәт ҝәтирмәси вә Она, јеҝанә һәгиги Аллаһ олараг һагг газандырмасыдыр (Матта 6:9). Бундан әлавә, Аллаһын Кәламы илә таныш олараг, чохлары өз һәјатыны јахшылашдырыр вә хиласа үмид газанырлар (Һәвариләрин ишләри 13:47).
4. Һәвариләр, тәблиғ етдикләри адамлар үчүн нә дәрәҹәдә нараһат олурдулар?
4 Инсанларын һәјатынын хош хәбәрдән асылы олдуғуну ајдын дәрк едәрәк, һәвариләр тәблиғ етдикләри кәсләр үчүн чох нараһат олурдулар. Бу, һәвари Павелин јаздығы сөзләрдән ачыг ҝөрүнүр: “Үрәкдән сизин һәсрәтинизи чәкән бизләр, сизә јалныз Аллаһын Мүждәсини дејил, өз ҹанларымызы да вермәк истәдик. Чүнки сиз бизим үчүн чох әзиз олдунуз” (1 Салониклиләрә 2:8). Павел вә диҝәр һәвариләр, инсанлара бу ҹүр гајғы ҝөстәрмәклә, бу хиласедиҹи ишдә фәал иштирак едән Исадан вә мәләкләрдән нүмунә ҝөтүрүрдүләр. Ҝәлин, Аллаһын бу сәмави хидмәтчиләринин, Падшаһлыг һаггындакы һәгигәт тохумунун сәпилмәсиндә ојнадыглары ваҹиб рола диггәт јетирәк вә ҝөрәк вәзифәмизи јеринә јетирмәкдә онларын нүмунәси бизә неҹә көмәк едәр.
Иса - Падшаһлыг һаггындакы һәгигәтин Сәпиҹиси
5. Иса јер үзүндә әсасән һансы ишлә мәшғул иди?
5 Камил инсан олан Иса, өз мүасирләринә мадди ҹәһәтдән әһәмијјәтли дәрәҹәдә көмәк етмәк үчүн лазыми гүввәјә саһиб иди. Мәсәлән, Иса, һәмин вахт хәстәликләр барәдә мөвҹуд олан бир чох јанлыш тәсәввүрләри гәти сурәтдә пуч едә биләрди вә ја билијин башга саһәләриндә ирәли аддымламаға инсанлара көмәк едә биләрди. Лакин Иса, артыг хидмәтинин башланғыҹында ајдын изаһ етди ки, алдығы тапшырыг хош хәбәри тәблиғ етмәкдән ибарәтдир (Лука 4:17—21). Хидмәти сона чатана јахын исә, о деди: “Мән бунун үчүн доғулмушам вә бунун үчүн дүнјаја ҝәлмишәм ки, һәгигәтә шәһадәт едим” (Јәһја 18:37). Буна ҝөрә дә Иса, Падшаһлыг һаггындакы тохуму сәпмәклә мәшғул иди. Иса өз мүасирләринә Аллаһ вә Онун нијјәтләри барәдә өјрәдәрәк, онлара һәр һансы башга биликдән ваҹиб олан билији верирди (Ромалылара 11:33—36).
6, 7. а) Иса, ҝөјә галхмаздан әввәл, һансы ҝөзәл вә’ди верди вә о, буну неҹә јеринә јетирир? б) Исанын тәблиғ ишинә олан мүнасибәти шәхсән сизә неҹә тә’сир едир?
6 Иса өзү барәдә Падшаһлыг һаггындакы һәгигәт тохумунун Сәпиҹиси кими данышырды (Јәһја 4:35—38). О, һәр бир имкандан истифадә едиб хош хәбәрин тохумуну сәпирди. Иса, һәтта дирәк үзәриндә өләркән дә, ҝәләҹәкдә јер үзүндә олаҹаг ҹәннәт һаггында данышырды (Лука 23:43). Анҹаг ишҝәнҹә дирәји үзәриндә өлмәси, онун, хош хәбәрин тәблиғинә олан дәрин марағына сон гојмады. Ҝөјә галхмаздан әввәл, Иса өз һәвариләринә әмр етди ки, Падшаһлыг һаггындакы һәгигәт тохумуну сәпмәјә вә шаҝирдләр һазырламаға давам етсинләр. Сонра Иса ҝөзәл бир вә’д верди. О, деди: “Будур, Мән, дөврүн сонуна гәдәр һәр ҝүн сизинләјәм” (Матта 28:19, 20).
7 Иса бу сөзләрлә ҝөстәрди ки, хош хәбәрин тәблиғ ишинә “дөврүн сонуна гәдәр һәр ҝүн” һөкмән көмәк едәҹәк, истигамәт верәҹәк вә ону мүдафиә едәҹәкдир. Иса, тәблиғ ишинә бу ҝүнә гәдәр шәхсән гајғы ҝөстәрир. О, бизим “Башчымыздыр” Падшаһлыг һаггындакы һәгигәт тохумунун сәпилмәсинә о, башчылыг едир (Матта 23:10, ЈД). О, мәсиһчи јығынҹағынын Башчысы кими, бүтүн дүнјада ҝөрүлән бу ишә ҝөрә Јегованын гаршысында мәс’улијјәт дашыјыр (Ефеслиләрә 1:22, 23; Колослулара 1:18).
Мәләкләр хош хәбәри е’лан едирләр
8, 9. а) Мәләкләр инсанларын ишләринә сәмими марағы неҹә ҝөстәрирләр? б) Биз һансы мә’нада мәләкләр үчүн театр тамашасыјыг?
8 Јегова Аллаһ Јер күрәсини јараданда, мәләкләр “тәрәннүм” едир вә “севинҹлә чағырышыр”дылар (Ејуб 38:4—7). О вахтдан бәри ҝөјләрдәки һәмин варлыглар, инсанларын ишинә бөјүк мараг ҝөстәрирләр. Јегова онларын васитәсилә инсанлара өз фикирләрини е’лан едирди (Мәзмур 103:20). Бу, хош хәбәрин бизим ҝүнләримиздә тәблиғ олунмасына мүнасибәтдә хүсусилә әдаләтлидир. Һәвари Јәһја алдығы вәһјдә “ҝөјүн ортасында учан башга бир” мәләји ҝөрдү. “Онун әбәди бир Мүждәси вар иди ки, јер үзүндә јашајанлара, һәр милләтә, һәр гәбиләјә, һәр дилә вә һәр халга тәблиғ етсин. Вә о, јүксәк сәслә дејирди: Аллаһдан горхун! Она иззәт верин! Чүнки Онун һөкмүнүн вахты ҝәлди” (Вәһј 14:6, 7).
9 Мүгәддәс Китаб мәләкләри, “гуртулушу мирас алаҹаг оланлара јардым етмәк үчүн ҝөндәрилән хидмәтчи руһлар” адландырыр (Ибраниләрә 1:14). Мәләкләр, өзләринә тапшырылан вәзифәни јеринә јетирәрәк, бизә вә бизим фәалијјәтимизә нәзарәт етмәк имканына маликдирләр. Биз, театр сәһнәсиндә ҝөз габағында олдуғу кими, өз ишимизи сәмави тамашачыларын гаршысында јеринә јетиририк (1 Коринфлиләрә 4:9). Биз, Падшаһлыг һаггындакы һәгигәт тохумуну тәк сәпмәдијимизи биләрәк, неҹә дә раһатлыг вә хош һәјәҹан һисси дујуруг!
Өз вәзифәмизи чалышганлыгла јеринә јетиририк
10. Ваиз 11:6 олан практики мәсләһәт бизим тәблиғ ишимизә неҹә тәтбиг едилә биләр?
10 Нәјә ҝөрә Иса вә мәләкләр бизим ишимизә бу гәдәр мараг ҝөстәрирләр? Иса, бунун сәбәбләриндән бирини бу сөзләрлә ҝөстәрди: “Сизә дејирәм ки, төвбә едән бир ҝүнаһкар үчүн дә Аллаһын мәләкләри һүзурунда севинҹ олур” (Лука 15:10). Биз дә инсанлара һәгиги мараг ҝөстәририк. Биз, Падшаһлыг һаггындакы һәгигәт тохумуну һәр јердә виҹданла сәпирик. Ваиз 11:6 олан сөзләри бизим фәалијјәтимизә аид етмәк олар. Мүгәддәс Китаб бизә мәсләһәт едир: “Тохумуну сәһәр сәп вә ахшама гәдәр әлинә раһатлыг вермә; чүнки һансынын, бунун, јахуд о бирисинин... јохса икисинин дә ејни дәрәҹәдәми јахшы олаҹағыны билмәзсән”. Бәли, хош хәбәри гәбул едәнләрин һәр биринә јүзләрлә, бәлкә дә минләрлә бу хәбәри рәдд едән адам дүшүр. Амма хилас һаггындакы мүждәни “бир ҝүнаһкар” гәбул едәндә, мәләкләр кими, биз дә севинирик.
11. Мүгәддәс Китаба әсасланан нәшрләри истифадә етмәк нә дәрәҹәдә еффектли ола биләр?
11 Хош хәбәрин тәблиғ едилмәси бир чох амилләрлә бағлыдыр. Бу ишдә ваҹиб вәсаитләрдән бири, Јегованын Шаһидләринин истифадә етдикләри Мүгәддәс Китаб әсасында дәрҹ олунмуш әдәбијјатлардыр. Бу нәшрләр дә мүәјјән ҹәһәтдән, һәр јерә сәпилән тохумлара бәнзәјир. Биз, һәмин әдәбијјатларын һарада сәмәрә верәҹәјини билмирик. Бә’зән әдәбијјатлар, онлары бир кимсә охумаздан әввәл әлдән әлә кечир. Бә’зи һалларда Иса вә мәләкләр һадисәјә елә истигамәт верирләр ки, бу нәшријјатлар дүзүрәкли адамлара чатсын. Ашағыда ҝөстәрилән бир нечә һадисә, Јегованын рәһбәрлији сајәсиндә вә инсанлара верилән әдәбијјатларын көмәји илә һансы ҝөзләнилмәз вә тәәҹҹүб доғуран нәтиҹәләрин әлдә едилдијини ҝөстәрир.
Һәгиги Аллаһын иши
12. Көһнә журнал, Јегованы танымагда бир аиләјә неҹә көмәк етди?
12 Роберт, Лајла вә онларын ушаглары, 1953-ҹү илдә бөјүк шәһәрдән, Пенсилванија штатында олан бир кәндә көчдүләр вә көһнә ферма евиндә јерләшдиләр. Роберт гыса вахтдан сонра пилләкәнин алтында һамам гурашдырмаг гәрарына ҝәлди. О, бир нечә тахтаны сөкәркән ҝөрдү ки, сичанлар диварын о бири тәрәфинә кағыз парчалары, гоз габыглары вә башга зибилләр јығыблар. Бүтүн бунларын арасында “Гызыл әср” журналынын бир нүсхәси дә варды. Ушагларын тәрбијәси һаггында олан мөвзу Роберти хүсусилә марагландырды. Бундан әлавә, о, Мүгәддәс Китаба әсасланмыш ајдын рәһбәрлијә һејран галараг, өзләринин “„Гызыл әсрин“ дининә” гошулаҹагларыны Лајлаја билдирди. Бир нечә һәфтәдән сонра онларын гапыларына Јегованын Шаһидләри ҝәлдиләр, анҹаг Роберт деди ки, онларын аиләсини јалныз “„Гызыл әсрин“ дини” марагландырыр. Јегованын Шаһидләри изаһ етдиләр ки, инди “Гызыл әср” журналы “Ојанын!” адланыр. Роберт вә Лајла, Јегованын Шаһидләри илә Мүгәддәс Китабы мүнтәзәм олараг өјрәнмәјә башладылар вә нәтиҹәдә вәфтиз олундулар. Онлар, өз нөвбәләриндә, һәгигәт тохумуну ушагларына әкдиләр вә бол мәһсул топладылар. Бу ҝүн һәмин аиләнин 20-дән артыг үзвү, о ҹүмләдән Робертлә Лајланын једди ушаглары Јегова Аллаһын вәфтиз олунмуш хидмәтчиләридиләр.
13. Пуерто-Рикодан олан әр-арвады, Мүгәддәс Китаба мараг ҝөстәрмәјә нә тәшвиг етди?
13 Тәхминән 40 ил әввәл, Пуерто-Рикодан олан Уилјамы вә онун арвады Ејдуну, Мүгәддәс Китабы өјрәнмәк һеч марагландырмырды. Һәр дәфә, Јегованын Шаһидләри онларын гапыларыны дөјәндә, бу әр-арвад өзләрини елә апарырдылар ки, ҝуја евдә јохдурлар. Бир дәфә Уилјам, евдә тә’мир иши үчүн лазыми шејләри алмаг мәгсәдилә, истифадәјә јарарлы олан туллантыларын сатылдығы јерә ҝетди. О, гајытмаг истәјәркән, тулланты олан бөјүк габда јашылачалар сары ҹилдли бир китаб ҝөрдү. Китаб “Дин” адланырды вә 1940-ҹы илдә Јегованын Шаһидләри тәрәфиндән нәшр едилмишдир. Уилјам китабы евинә ҝәтирди вә јалан динлә һәгиги дин арасындакы фәрг барәдә охудуғу мөвзу ону чох марагландырды. Нөвбәти дәфә Јегованын Шаһидләри ҝәләндә, Уилјам вә Ејду онлары севинҹлә динләдиләр вә онларла бәрабәр Мүгәддәс Китабы өјрәнмәјә башладылар. Онлар, бир нечә ајдан сонра, 1958-ҹи илдә “Аллаһын ирадәси” адлы бејнәлхалг конгресдә вәфтиз олундулар. О вахтдан бәри, онларын көмәклији сајәсиндә 50-дән артыг адам мәсиһчи гардашлығына гошулубдур.
14. Бир һадисәнин ҝөстәрдији кими, Мүгәддәс Китаба әсасланан әдәбијјатларымызын сајәсиндә нәјә наил олмаг мүмкүндүр?
14 Карлын ҹәми 11 јашы варды вә о, чох дәҹәл иди. О, һәмишә хошҝәлмәз һадисәләрә дүшүрдү. Онун атасы Алман методист килсәсиндә тәблиғчи иди вә Карла дејирди ки, пис адамлар өләндән сонра ҹәһәннәм атәшиндә јанырлар. Буна ҝөрә дә, Карл ҹәһәннәмдән чох горхурду. Бир ҝүн, 1917-ҹи илдә, Карл күчәдә үзәриндә мә’лумат олан кағыз парчасы ҝөрдү вә ону ҝөтүрдү. Охујан кими, “Ҹәһәннәм нәдир?” суалы онун диггәтини ҹәлб етди. Бу, ҹәһәннәм һаггында мүһазирәјә дә’вәт иди. Бу мүһазирәни, һазырда Јегованын Шаһидләри адланан, Мүгәддәс Китабын Тәдгигатчылары тәшкил етмишдиләр. Тәхминән бир ил кечди, Мүгәддәс Китабын өјрәнилмәсинә һәср едилән бир нечә мәшғәләдән сонра Карл вәфтиз олунду вә беләликлә дә, Мүгәддәс Китабын Тәдгигатчыларындан бири олду. Ону 1925-ҹи илдә Јегованын Шаһидләринин үмумдүнја мәркәзи идарәсиндә ишләмәјә дә’вәт етдиләр вә о, бу ҝүнә гәдәр дә орада хидмәт едир. Бунунла да, күчәдән ҝөтүрүлмүш кағыз парчасынын охунмасы илә, сәксән илдән артыг давам едән мәсиһчи һәјаты башлады.
15. Јегова, өз гәрарына әсасән, нә едә биләр?
15 Доғрусу, бу һадисәләрдә мәләкләрин иштирак едиб етмәдикләрини вә әҝәр едибләрсә, нә дәрәҹәдә иштирак етдикләрини өјрәнмәк баҹарығы инсанлара верилмәјиб. Буна бахмајараг биз, Иса илә мәләкләрин тәблиғдә фәал иштирак етмәләринә вә Јегованын ишә өз гәрарына әсасән истигамәт вермәсинә шүбһә етмәмәлијик. Бу вә бир чох диҝәр һадисәләр ҝөстәрир ки, бизим әдәбијјатлар, биз онлары инсанлара вердикдән сонра, чох хејирли ишләр едә билир.
Бизә сәрвәт е’тибар едилиб
16. Биз, 2 Коринфлиләрә 4:7 ајәсиндән нә өјрәнирик?
16 Һәвари Павел, “сахсы габларда” олан “сәрвәт” һаггында данышырды. Сәрвәт, Аллаһын вердији тапшырығы, сахсы габлар исә, Јегованын бу сәрвәти вердији инсанлары тәгдим едир. Бу инсанлар гејри-камилдирләр вә имканлары мәһдуддур, буна ҝөрә дә, әҝәр онлара белә бир тапшырыг верилибсә, Павелин дедији кими, “ән үстүн гүдрәт бизә јох, Аллаһа аид” олмалыдыр (2 Коринфлиләрә 4:7). Бәли, биз үмид едә биләрик ки, тапшырылан иши јеринә јетирмәјимиз үчүн бизә лазым олан гүввәни Јегова верәҹәкдир.
17. Биз, Падшаһлыг һаггындакы һәгигәт тохумуну сәпәркән нә илә гаршылашаҹағыг вә буна бахмајараг, биз нә үчүн мүсбәт әһвал-руһијјәни горујуб сахламалыјыг?
17 Чох вахт биз фәдакарлыг етмәли олуруг. Бә’зи әразиләрдә нараһатчылыгларла әлагәдар тәблиғ етмәк чәтин олур. Белә јерләрдә инсанларын әксәријјәти хош хәбәрә тамамилә лагејд јанашырлар, һәтта дүшмәнҹәсинә мүнасибәт ҝөстәрирләр. Ола билсин ки, белә әразиләрдә чох гүввә сәрф едилир, лакин елә ҝәлир ки, һәр шеј әбәсдир. Амма, әҝәр бизим хидмәтимиздән бу гәдәр чох шеј асылыдырса, гүввә әсирҝәмәјә дәјмәз. Унутмајын ки, сәпдијиниз тохумлар инсанлара инди хошбәхтлик ҝәтирәр, ҝәләҹәкдә исә әбәди һәјат верә биләр. Мәзмур 126:6 олан: “Сәпәҹәји тохуму дашыјыб ағлајараг ҝедән, әлбәттә, тајларыны дашыјараг севинҹлә ҝәләҹәкдир” сөзләри дәфәләрлә тәсдиг олунуб.
18. Мүнтәзәм олараг хидмәтимизә неҹә диггәт јетирә биләрик вә биз буну нә үчүн етмәлијик?
18 Ҝәлин һәр бир мүнасиб фүрсәтдән истифадә едәк ки, Падшаһлыг һаггындакы һәгигәт тохумуну бол-бол сәпәк. Ҝәлин һеч вахт унутмајаг ки, тохумлары сәпән вә сулајан биз олсаг да, онлары бөјүдән Јеговадыр (1 Коринфлиләрә 3:6, 7). Лакин Јегова ҝөзләјир ки, Иса вә мәләкләр бу ишдә өз борҹларыны јеринә јетирдикләри кими, биз дә өз хидмәтимизи там сурәтдә иҹра едәк (2 Тимотејә 4:5). Ҝәлин неҹә өјрәтдијимизә, нөгтеји-нәзәримизә вә хидмәтдәки сә’јимизә мүнтәзәм олараг диггәт јетирәк. Нә үчүн? Павел ҹаваб верир: “Буну етмәклә сән, һәм өзүнү, һәм дә сәнә гулаг асанлары хилас едәрсән” (1 Тимотејә 4:16).
Биз нә өјрәндик?
• Бизим сәпин ишимиз һансы јахшы сәмәрәләри верир?
• Иса Мәсиһ вә мәләкләр тәблиғ ишиндә бу ҝүн неҹә иштирак едирләр?
• Падшаһлыг һаггындакы һәгигәт тохумунун сәпиҹиләри кими, биз нә үчүн сәхавәтли олмалыјыг?
• Е’тинасызлыг вә ја әдавәтлә гаршылашанда, хидмәтимизи давам етдирмәјә бизи нә тәшвиг етмәлидир?
[25-ҹи сәһифәдәки шәкил]
Гәдим исраилдәки әкинчиләр кими, буҝүнкү мәсиһчиләр дә падшаһлыг һаггындакы һәгигәт тохумуну бол-бол сәпирләр
[26 вә 27-ҹи сәһифәләрдәки шәкил]
Јегованын шаһидләри мүгәддәс китаба әсасланан мүхтәлиф әдәбијјатлары 340 дилдә нәшр едир вә пајлајырлар