Мүгәддәс Китабы нәјә ҝөрә өјрәнмәк лазымдыр?
БИЛЛ ҝәнҹ, сағлам, тәһсилли вә мадди тә’минатлы олса да, мәмнунлуг һисс етмирди. Һәјаты мә’насыз кечирди вә бу она чох сыхынты ҝәтирирди. Билл һәјатын мә’насыны ахтарараг чохлу динләрә мүраҹиәт етди, анҹаг ахтардығыны тапмады. 1991-ҹи илдә Јегованын Шаһидләриндән бири она бир китаб верди. Бу китабда һәјатын мә’насы барәдә Мүгәддәс Китабын нөгтеји-нәзәри изаһ олунурду. Билл, Мүгәддәс Китабы өјрәнмәјә разы олду вә бу өјрәнмә заманы һәм ону нараһат едән, һәм дә диҝәр суаллар мүзакирә едилирди.
Билл хатырлајыр: “Биринҹи мәшғәлә баша чатды. Һәр дәфә Мүгәддәс Китаба мүраҹиәт етдијимиз үчүн анладым ки, ахтардығымы тапмышам. Мүгәддәс Китабын көмәјилә мүзакирә едилән суаллар чох мараглы иди. Һәмин мәшғәләдән сонра машынымы дағлара доғру сүрдүм вә машындан чыхыб севинҹимдән уҹадан гышгырдым. Ахыр ки, мәни нараһат едән суалларын ҹавабыны тапмаға башладым!”
Әлбәттә, Мүгәддәс Китаб һәгигәтини тапанларын һамысы севинҹдән һәрфи мә’нада гышгырмыр. Лакин һәјат үчүн ваҹиб олан суаллара ҹаваб тапмаг, доғрудан да бир чохларына бөјүк севинҹ ҝәтирир. Инсанлар өзләрини, Исанын данышдығы мәсәлдәки тарлада ҝизләдилмиш дәфинәни тапан адам кими һисс едирләр. Иса деди: “[Һәмин адам] севинҹлә ҝедиб бүтүн варыны сатыб, о тарланы сатын алды” (Матта 13:44).
Һәјатын мә’насыны ајдынлашдыран ачар
Билли нараһат едән әсас суал бу иди: Һәјатын мә’насы нәдәдир? Бу сирри тапмаг үчүн философлар, алимләр вә илаһијјатчылар мин илләрлә чалышмышлар. Инсанлар бу мөвзунун тәдгигинә сајсыз-һесабсыз китаблар һәср етмишләр. Амма онларын бүтүн ҹәһдләри мүвәффәгијјәтсиз олуб вә чохлары белә гәрара ҝәлибләр ки, бу суалын ҹавабы јохдур. Лакин ҹаваб вар! Бу ҹаваб чох ҝениш олса да чәтин дејил вә Мүгәддәс Китабда изаһ олунур. Хошбәхт, долғун һәјатын мә’насыны ајдынлашдыран ачар, Јараданымыз вә сәмави Атамыз Јегова илә јахын гаршылыглы мүнасибәтә малик олмагдан ибарәтдир. Бу ҹүр мүнасибәти неҹә инкишаф етдирмәк олар?
Аллаһла гаршылыглы мүнасибәт инкишаф етдирмәкдә, санки бир зиддијјәт вар: Аллаһа јахынлашанлар Ондан һәм горхур, һәм дә ејни заманда Ону севирләр. Ҝәлин, Мүгәддәс Јазыларда бу фикри тәсдигләјән ики ајәни нәзәрдән кечирәк. Гәдим заманларда мүдриклијилә шөһрәт тапан Сүлејман падшаһ, инсан һәјатынын мә’насынын нәдән ибарәт олдуғуну дәриндән тәдгиг етмиш вә өз ахтарышынын нәтиҹәсини Мүгәддәс Јазыларын “Ваиз” китабында јазмышдыр. О, тәдгигинә јекун вурараг, демишдир: “Ишин сону будур; һәр шеј ешидилди: Аллаһдан горх вә онун әмрләрини тут; чүнки инсанын бүтүн вәзифәси будур” (Ваиз 12:13). Әсрләр сонра Иса Мәсиһдән сорушанда ки, Мусанын ганунларындан һансы даһа ваҹибдир, о ҹаваб верди: “Аллаһын олан Рәбби бүтүн үрәјинлә, бүтүн ҹанынла вә бүтүн дүшүнҹәнлә сев” (Матта 22:37). Аллаһдан горхмалы, һәм дә Ону севмәли олдуғумуз сизә гәрибә ҝәлирми? Ҝәлин нәзәрдән кечирәк ҝөрәк, горху вә мәһәббәт нә дәрәҹәдә ваҹибдир вә Аллаһла гаршылыглы мүнасибәти инкишаф етдирмәкдә бу ики хүсусијјәт бир-бири илә неҹә бағлыдыр.
“Рәбб горхусу” нәдир?
Әҝәр биз Аллаһа дүзҝүн тәрздә хидмәт етмәк истәјириксә, Онунла мүнасибәтдә еһтирамлы горхуну инкишаф етдирмәк чох ваҹибдир. Мүгәддәс Китабда дејилир: “Һикмәтин башланғыҹы Рәб горхусудур” (Мәзмур 111:10). Һәвари Павел јазмышды: “Сарсылмаз Падшаһлыға наил олдуғумуза ҝөрә, миннәтдар олаг ки, бу јолла Аллаһа мәгбул сурәтдә горху вә ихласкарлыгла Она хидмәт едәк” (Ибраниләрә 12:28, И—93). Һәвари Јәһјаја верилән рө’јада, ҝөјүн ортасында учан мәләк хош хәбәри бу сөзләрлә е’лан едирди: “Аллаһдан горхун! Она иззәт верин!” (Вәһј 14:6, 7).
Һәјатын мә’насыны ашкар едән Аллаһа гаршы дујулан горху, инсанлары сарсыдан горхудан фәрглидир. Белә горху инсаны, мисал үчүн она гәддар, тәһлүкәли ҹинајәткар һүҹум едән заман бүрүјә биләр. Амма Аллаһдан горхмаг, јә’ни “Рәбб горхусу” еһтирамлы горхудур вә Јарадана дәрин һөрмәт һисси илә долудур. Бу һәмчинин Аллаһы наразы салмаг горхусудур, чүнки О, итаәтсиз адамлары ҹәзаландырмаға ихтијары вә сәлаһијјәти олан Гадир вә Али Һакимдир.
“Рәбб горхусу” мәһәббәтлә сых бағлыдыр
Лакин Јегова истәмир ки, инсанлар јалныз Онун гүввәси вә гүдрәти гаршысында еһтирамлы горху һисси дујдуглары үчүн Она хидмәт етсинләр. Јегова, һәр шејдән әввәл, мәһәббәт Аллаһыдыр. Һәвари Павел: “Аллаһ мәһәббәтдир” демәјә тәшвиг олмушдур (1 Јәһја 4:8). Јегова Аллаһ бәшәријјәтә гаршы мәһәббәтлә давраныр вә инсанларын да Ону севмәләрини истәјир. Бәс мәһәббәтлә еһтирамлы горхуну неҹә ујғунлашдырмаг олар? Әслиндә бу ики хүсусијјәт бир-бирилә сых бағлыдыр. Мәзмурчу јазмышды: “Рәббин сирри ондан горханларындыр” (Мәзмур 25:14).
Ҝүҹлү вә һикмәтли атанын ушагда ојатдығы һөрмәт вә горху һиссини тәсәввүр един. Буна бахмајараг, ушаг атасынын мәһәббәтинә гаршылыглы ҹаваб верәҹәк. О, атасына е’тибар едәҹәк вә рәһбәрлик үчүн она мүраҹиәт едиб, бу рәһбәрлијин она фајда ҝәтирәҹәјинә әмин олаҹагдыр. Бунун кими, әҝәр биз Јегованы севир вә Ондан горхуругса, Онун ҝөстәришләринә риајәт едәҹәјик, бу да бизә фајда верәҹәкдир. Јегова исраиллиләр һаггында деди: “Каш ки, онларда белә бир үрәк олајды, та ки, өзләринә вә әбәдијјән оғулларына јахшылыг олсун дејә мәндән горхсунлар вә даима әмрләримин һамысыны тутсунлар!” (Тәснијә 5:29).
Аллаһа мәгбул горху көлә һалына салмыр, әксинә, азад едир, кәдәр дејил, севинҹ ҝәтирир. Иса Мәсиһ һаггында Ишаја белә пејғәмбәрлик етмишдир: “Онун зөвгү Рәбб горхусунда олаҹаг” (Ишаја 11:3). Мәзмурчу охујурду: “Рәбдән горхан, онун әмрләриндән бөјүк зөвг алан нә бәхтијардыр!” (Мәзмур 112:1).
Шүбһәсиз ки, Аллаһы танымадығымыз бир һалда Ону севиб, Ондан горха билмәрик. Елә буна ҝөрә дә, Мүгәддәс Китабы өјрәнмәк ваҹибдир. Бу ҹүр өјрәнмә, Аллаһын шәхсијјәтини танымаға вә Онун ҝөстәришләринә риајәт етмәјин мүдриклик олдуғуну анламаға көмәк едир. Биз Аллаһа нә гәдәр чох јахынлашырыгса, Онун ирадәсини јеринә јетирмәк вә әмрләринә табе олмаг истәјимиз бир о гәдәр дә артыр, чүнки бунун бизә фајда ҝәтирәҹәјини билирик (1 Јәһја 5:3).
Дүзҝүн һәјат јолунда олдуғумуза әмин олмаг бөјүк хошбәхтликдир. Мәгаләнин әввәлиндә хатырланан Билл буна наил ола билди. О, бу јахынларда деди: “Мүгәддәс Китабы өјрәнмәјә башладығым ҝүндән сонракы доггуз ил әрзиндә Јегова илә олан мүнасибәтим мөһкәмләнди. Севинҹимин илк ҹошғунлуғу һәјатда долғунлуг вә хошбәхтлик һиссилә әвәз олунду. Һәр шејә мүсбәт нәзәрлә бахмаға чалышырам. Мәгсәдсиз кеф-сәфа ахтармаг әвәзинә, һәр ҝүн фајдалы фәалијјәтлә мәшғулам. Јегова мәним үчүн реал шәхсијјәтә чеврилди вә билирәм ки, О, сәмимијјәтлә гејдимә галыр”.
Нөвбәти мәгаләләрдә, Јегова һаггында олан билијин, ону һәјатда тәтбиг едән инсанлара неҹә севинҹ вә фајда ҝәтирдијини мүзакирә едәҹәјик.
[5-ҹи сәһифәдәки шәрһ]
Јеговаја јахынлашмаг, Оу севмәк вә Ондан горхмаг мә’насыны дашыјыр.
[6-ҹы сәһифәдәки шәкил]
Иса Мәсиһ Јеговаја дујдуғу горхудан севинирди.