“Сүлһ ахтарын вә она ҹан атын”
“Мүмкүнсә, әлиниздән ҝәлдији гәдәр бүтүн адамларла сүлһдә олун” (РОМАЛЫЛАРА 12:18).
1, 2. Инсанлар тәрәфиндән гурулан сүлһ нәјә ҝөрә мүвәггәтидир?
ДАВАМСЫЗ бүнөврәси, тамам чүрүмүш тирләри вә јатмыш дамы олан еви тәсәввүрүнүздә ҹанландырын. Сиз һәмин евә көчмәк истәјәрдинизми? Чәтин. Һәтта белә еви јенидән рәнҝләсәләр дә, бу онун мөһкәм олмасына көмәк етмәјәҹәкдир. Онсуз да әввәл-ахыр учаҹагдыр.
2 Инсанлар тәрәфиндән јарадылан һәр нөв сүлһү, бу ҹүр евлә мүгајисә етмәк олар. Бу ев, “гуртарышы олмајан” инсанын вә’дләр вә һијләләрдән ибарәт давамсыз бүнөврәси үзәриндә гурулур (Мәзмур 146:3). Бәшәријјәтин тарихи — халглар, етник груплар вә гәбиләләр арасында баш верән, арасы кәсилмәјән мүнагишәләр силсиләсидир. Доғрудур ки, гысамүддәтли сүлһ дөврләри дә олмушдур, анҹаг бу неҹә сүлһ олмушдур? Дөјүшән ики халг, јалныз бир тәрәфин мәғлубијјәтә уғрадығыны вә ја һәр ики тәрәф дөјүшмәјин артыг мә’насыз олдуғуну ҝөрдүкдән сонра сүлһ мүгавиләси бағлајырса, бу неҹә сүлһ олаҹагдыр? Нифрәт, шүбһә вә һәсәд онсуз да давам едәҹәкдир. Дүшмәнчилији ҝизләдән өртүк — “јени чәкилмиш боја гаты” кими хидмәт едән сүлһ, узун чәкмәјәҹәкдир (Һезекиел 13:10).
3. Нәјә ҝөрә Аллаһын халгы арасында һөкм сүрән сүлһ, инсанлар тәрәфиндән гурулан сүлһдән фәргләнир?
3 Буна бахмајараг, мүһарибәләрлә парчаланан бу дүнјада һәгиги сүлһ мөвҹуддур. Һарада? Иса Мәсиһин давамчылары — онун сөзләринә гулаг асан вә һәјат тәрзини тәглид етмәјә чалышан мәсиһчиләр арасында (1 Петер 2:21; 1 Коринфлиләрә 11:1). Мүхтәлиф ирги, миллијјәти вә иҹтимаи мөвгеји олан мәсиһчиләр арасында һөкм сүрән сүлһ һәгигидир, чүнки бу сүлһ, һәмин инсанларын Аллаһла олан сүлһү үзәриндә гурулур. Бу мүнасибәтләр исә, өз нөвбәсиндә, онларын Иса Мәсиһин фидијә гурбанлығына ҝәтирдикләри имана әсасланыр. Мәсиһчиләр арасында мөвҹуд олан сүлһ, инсанларын наилијјәти дејил, Аллаһын мүкафатыдыр (Ромалылара 15:33; Ефеслиләрә 6:23, 24). Бу наилијјәтләр, “Сүлһ Рәиси” — Иса Мәсиһә табе олмаларынын вә “мәһәббәт вә сүлһ” Аллаһы Јеговаја ибадәт етмәләринин нәтиҹәсидир (Ишаја 9:6; 2 Коринфлиләрә 13:11).
4. Мәсиһчи сүлһә неҹә “ҹан атыр”?
4 Сүлһ, гејри-камил инсанлар арасында автоматик олараг һөкмранлыг сүрмүр. Петер мәһз буна ҝөрә дејирди ки, һәр бир мәсиһчи “сүлһ ахтармалы вә она ҹан атмалыдыр” (1 Петер 3:11, ЈД). Буну неҹә етмәк олар? Бу суала, гәдимдә јазылмыш пејғәмбәрлик ҹаваб верир. Ишаја пејғәмбәрин васитәсилә Јегова деди: “Бүтүн оғулларын Рәбб тәрәфиндән өјрәдилмиш олаҹаг; вә оғулларынын әмин-аманлығы чох олаҹаг” (Ишаја 54:13; Филипилиләрә 4:9). Бәли, һәгиги сүлһү, јалныз Јегованын өјүдләринә гулаг асанлар әлдә едирләр. Бундан әлавә “мәһәббәт, севинҹ... сәбир, лүтфкарлыг, јахшылыг, сәдагәт, һәлимлик, өзүнә һаким олмагла” јанашы, сүлһ дә Аллаһын мүгәддәс руһунун сәмәрәсидир (Галатијалылара 5:22, 23). Белә сүлһ, севмәјән, севинмәјән, сәбирсиз, бәдхаһ, аҹыглы, вәфасыз, гәддар вә ја өзүнү сахлаја билмәјән инсанларда ола билмәз.
“Бүтүн адамларла сүлһдә олмаг”
5, 6. а) “Сүлһпәрвәр” вә “сүлһ јарадан” олмаг ифадәләри арасындакы фәрг нәдәдир? б) Мәсиһчиләр кимләрлә сүлһдә олмаға ҹан атырлар?
5 “Сүлһ” сөзү “әмин-аманлыг, динҹлик” кими мүәјјән олунур. Бу тә’рифи, зиддијјәт олмајан чох шәраитләрә аид етмәк олар. Һәтта өләнләр һаггында да: “Јери раһат олсун”, дејирләр. Лакин әсл сүлһә наил олмаг үчүн инсанын сүлһпәрвәр олмасы кифајәт етмир. Иса Дағүстү тәблиғиндә деди: “Сүлһ јараданлар нә бәхтијардырлар! Чүнки онлар “Аллаһын оғуллары” адланаҹаглар” (Матта 5:9, ЈД). Иса, сонрадан Аллаһын руһани оғуллары олаҹаг вә ҝөјләрдә өлмәз һәјаты алаҹаг инсанлара мүраҹиәт едирди (Јәһја 1:12; Ромалылара 8:14—17). Нәтиҹәдә, ҝөјләр үмиди олмајан, Аллаһа садиг олан инсанларын һамысы “Аллаһын өвладларынын иззәтли азадлығына” говушаҹаглар (Ромалылара 8:21). Бу ҹүр үмиди јалныз сүлһ јараданлар бәсләјә биләрләр. Сүлһпәрвәр вә сүлһ јарадан олмаг ејни мә’на дашымыр. Мүгәддәс Китаб анлајышында сүлһ јарадан сөзү, сүлһүн јаранмасына фәал тәрздә көмәк едән, бә’зән исә, әввәлләр сүлһүн мөвҹуд олмадығы јерләрдә сүлһү бәрпа едән шәхси билдирир.
6 Буну јадда сахлајараг, ҝәлин һәвари Павелин ромалылара вердији мәсләһәти нәзәрдән кечирәк: “Мүмкүнсә, әлиниздән ҝәлдији гәдәр бүтүн адамларла сүлһдә олун” (Ромалылара 12:18). Сакитлији горумаг фајдалы олса да, Павел ромалылары јалныз буна тәшвиг етмирди. О, сүлһә ҹан атмаға чағырырды. Киминлә? “Бүтүн адамларла” — аилә үзвләри, һәмиманлылар, һәтта онларын иманларына шәрик олмајан кәсләрлә. Павел ромалылары, “әлләриндән ҝәлдији гәдәр” башгалары илә сүлһдә олмаға тәшвиг едирди. Павел һеч дә истәмирди ки, сүлһә наил олмаг үчүн ромалылар өз әгидәләриндә ҝүзәштә ҝетсинләр. Лакин онлар, өзләринә гаршы дүшмәнҹәсинә мүнасибәт јаранмасына әсас вермәдән, инсанларла сәмими әлагә үсулу тапмалы идиләр. Мәсиһчиләр бу мәсләһәтә неҹә јығынҹагда, еләҹә дә јығынҹагдан кәнарда риајәт етмәли идиләр (Галатијалылара 6:10). Буна мүвафиг олараг, Павел јазырды: “Һәмишә бир-биринизә вә һамыја јахшылыг етмәјә чалышын” (1 Салониклиләрә 5:15).
7, 8. Мәсиһчиләр, онларын әгидәләринә шәрик олмајан инсанларла сүлһдә олмаға неҹә ҹан атырлар вә буну нә үчүн едирләр?
7 Бизим иманымыза шәрик олмајан, бәлкә дә она гаршы дуран инсанларла сүлһдә неҹә ола биләрик, даһа доғрусу, онларла сүлһ јаратмаға неҹә ҹан ата биләрик? Илк нөвбәдә, үстүн олдуғумузу ҝөстәрмәмәлијик. Мисал үчүн, киминсә һаггында сајмазјана тонда данышырыгса, онунла сүлһдә олмаға ҹан атдығымызы сөјләмәк чәтиндир. Јегова тәшкилатлара вә мүәјјән груп инсанлара һөкм чыхармышдыр, лакин бизим ихтијарымыз јохдур ки, киминсә һаггында, артыг мәһкум едилмиш шәхс кими данышаг. Биз инсанлары, һәтта дүшмәнләримизи белә мүһакимә етмирик. Һакимијјәтлә давранышларында өзләрини апармаға даир Крит мәсиһчиләринә мәсләһәт вермәји Титуса тапшырдыгдан сонра, Павел Титусдан онлара хатырлатмасыны хаһиш етди ки, “һеч кимә ифтира атмасынлар, гејри-давакар, мүлајим олуб, бүтүн инсанлара там һәлимлик ҝөстәрсинләр” (Титуса 3:1, 2).
8 Иманымыза шәрик олмајан инсанларла сүлһдә олмаға ҹан атмаг, һәгигәтин онлар үчүн дә ҹәлбедиҹи олмасына ҝөзәл имкан јарадыр. Әлбәттә биз, “јахшы әхлагы позан” кәсләрлә достлуг јаратмырыг (1 Коринфлиләрә 15:33). Буна бахмајараг, биз нәзакәтли олмалы, һамыја һөрмәтлә вә хејирхаһлыгла јанашмалыјыг. Петер јазырды: “Иман ҝәтирмәјәнләр арасында мүсбәт һәјат сүрүн ки, писликедәнләрмишсиниз кими сизә ифтира атсалар да, хејирли ишләринизи ҝөрүб, Аллаһын онлара јахынлашдығы ҝүндә, Она иззәт версинләр” (1 Петер 2:12).
Хидмәтдә сүлһә ҹан атырыг
9, 10. Ејни имана шәрик олмајан инсанларла сүлһдә олмаға сә’ј ҝөстәрмәјә даир Павел һансы нүмунәни верди?
9 Биринҹи әсрдә мәсиһчиләр ҹәсарәтләри илә танынмышдылар. Онлар чәтинликләрә ҝөрә хош хәбәрин тәблиғини дајандырмаг фикриндә дејилдиләр вә мүгавимәтләрлә гаршылашанда инсанлара дејил, һөкмдарлары кими Аллаһа табе олмаға гәти гәрарлы идиләр (Һәвариләрин ишләри 4:29; 5:29). Буна бахмајараг, онлар ҹәсарәти кобудлугла гарышыг салмырдылар. Падшаһ Һирод II Агриппанын гаршысында иманыны мүдафиә едәркән, Павелин неҹә даврандығына диггәт јетирәк. Һирод Агриппа өз баҹысы Берники илә ҹинси әлагәдә олурду. Лакин Павел Агриппаја әхлаги ҹәһәтдән өјүд вермәди. О, Агриппаны јәһуди адәтләрини билдијинә вә пејғәмбәрләрә е’тибар етдијинә ҝөрә тә’рифләјәрәк, диггәти онлары бирләшдирән фикирләрә јетирди (Һәвариләрин ишләри 26:2, 3, 27).
10 Бәлкә Павел, она азадлыг вермәк игтидарында олан адама ријакарҹасына јалтагланырды? Хејр. Павел шәхси мәсләһәтинә риајәт едир вә һәгигәти сөјләјирди. О, Һирод Агриппаја һеч бир јалан сөз демәди (Ефеслиләрә 4:15). Амма Павел сүлһ јарадан иди вә “һәр кәс үчүн һәр шеј” олмағы баҹарырды (1 Коринфлиләрә 9:22). О, башгаларына Иса һаггында данышмаг һүгугуну мүдафиә етмәк истәјирди. Јахшы мүәллим кими, Павел, Агриппа илә ону үмуми бир фикрә ҝәтирән шејләрдән данышмаға башлады. Бунунла да Павел, әхлагсыз падшаһда мәсиһчилик һаггында хош тәәссүратын јаранмасына көмәк етди (Һәвариләрин ишләри 26:28—31).
11. Биз хидмәтдә сүлһ јараданлар неҹә ола биләрик?
11 Биз хидмәт заманы сүлһ јараданлар неҹә ола биләрик? Павел кими, мүбаһисәләрдән гачына биләрик. Әлбәттә, бә’зән иманыны мүдафиә едәрәк, “Аллаһын кәламыны горхусуз бәјан етмәли” олурсан (Филипилиләрә 1:14). Лакин әксәр һалларда, биз инсанлара садәҹә олараг хош хәбәри тәблиғ едирик (Матта 24:14). Аллаһын нијјәтләри һаггындакы һәгигәти анлајараг, инсан јәгин ки, өзүнүн дүзҝүн олмајан дини тәсәввүрләрини кәнара гојмағы вә бир даһа натәмиз ишләрлә мәшғул олмамағы гәрара алаҹагдыр. Буна ҝөрә дә јахшы оларды ки, имкан дахилиндә, динләјиҹиләримизин диггәтини онлары марагландыран шејләрә јөнәлдәрәк, онларла разылашаҹағымыз шејләр һаггында сөһбәтә башлајаг. Нәзакәтлә даврананда сөјләдијимиз хош хәбәрә гулаг асаҹаг шәхси, сәрт давранараг өзүмүздән узаглашдырмаг јахшы олмазды (2 Коринфлиләрә 6:3).
Аиләдә сүлһ јараданлар
12. Биз аиләдә сүлһ јараданлар неҹә ола биләрик?
12 Павел дејирди ки, аилә гуранларын “һәјатда әзијјәти олаҹаг” (1 Коринфлиләрә 7:28). Чәтинликләр мүхтәлиф ола биләр. Мәсәлән, бә’зән әр-арвад арасында фикир ајрылығы јарана биләр. Белә һалларда неҹә олмалы? Сүлһә ҹан атмаг лазымдыр. Сүлһ јарадан кәс чалышаҹагдыр ки, мүбаһисә бөјүмәсин. Буну неҹә едәҹәк? Өз дилини сахлајаҹагдыр. Бу балаҹа үзв кинајәли вә аҹы төһмәтләр сөјләмәк үчүн истифадә олунанда, һәгигәтән дә “гаршысы алынмаз бәла вә өлдүрүҹү зәһәрлә долу” ола биләр (Јагуб 3:8). Сүлһ јарадан инсан өз дилини дағытмаг үчүн дејил, гурмаг үчүн истифадә едир (Сүлејманын мәсәлләри 12:18).
13, 14. Сөздә сәһвә јол верәндә вә ја емосијаларымызы сахлаја билмәјәндә сүлһү неҹә горумаг олар?
13 Биз һамымыз гејри-камилик вә һәрдән елә сөзләр ишләдирик ки, нәтиҹәдә һејфсиләнирик. Белә һал баш верәндә јубанмадан сәһвинизи дүзәлдин — тезликлә сүлһү бәрпа един (Сүлејманын мәсәлләри 19:11; Колослулара 3:13). “Ҹөз давасы хәстәлијинә тутулмагдан” вә “бош мүбаһисәләрдән” гачынын (1 Тимотејә 6:4, 5). Баш верәнләрин мәғзини вә һәјат јолдашынызын һиссләрини баша дүшмәјә чалышын. Кобудлуға кобудлугла ҹаваб вермәјин. Јадда сахлајын ки, “һәлим ҹаваб һирси јатырар” (Сүлејманын мәсәлләри 15:1, МКШ).
14 Еһтимал ки, бә’зән Сүлејманын мәсәлләри 17:14-ҹү ајәсиндә јазылан “даваја атылмадан чәкишмәни бурах” мәсләһәти үзәриндә дүшүнмәк лазымдыр. Дајанын вә баш верәнләрә кәнардан бахын. Сакитләшдикдән сонра, јә’гин ки, сиз һәр шеји сүлһ јолу илә һәлл едә биләҹәксиниз. Бә’зи һалларда руһән јеткин нәзарәтчијә мүраҹиәт етмәк даһа мүнасиб ола биләр. Бу тәҹрүбәли вә шәфгәтли мәсиһчиләр аиләдә сүлһү горумаға көмәк едә биләрләр (Ишаја 32:1, 2).
Јығынҹагда сүлһ јараданлар
15. Јагубун сөзләринә ҝөрә, бә’зи мәсиһчиләр арасында һансы пис руһ инкишаф етмишди вә нәјә ҝөрә бу руһ “дүнјәви”, “нәфсани” вә “шејтанидир”?
15 Әфсуслар олсун ки, I әсрдә бә’зи мәсиһчиләр сүлһ руһу дејил, әксинә, һәсәд вә худбин еһтирас руһу әкс етдирирдиләр. Јагуб дејирди: “Бу, јухарыдан назил олан һикмәт дејилдир. Бу, дүнјәви, нәфсани вә шејтани һикмәтдир. Чүнки һәсәд вә худбин еһтирас һарада варса, орада гарышыглыг вә һәр ҹүр пис иш вардыр” (Јагуб 3:14—16). Белә бир фикир мөвҹуддур ки, “худбин еһтирас” кими тәрҹүмә олунмуш јунан сөзү, һәмчинин шөһрәтпәрәст, һәр ҹүр һәгигәт вә јаланларла ҝөркәмли јери тутмаға сә’ј ҝөстәрмәк мә’насыны да дашыјыр. Јагуб худбин еһтирасы әсассыз олараг “дүнјәви, нәфсани вә шејтани” адландырмыр. Бүтүн тарих боју дүнја һөкмдарлары, вәһши һејванлар кими бир-биринә гаршы мүбаризә апарараг, худбин еһтирас руһу әкс етдирмишләр. Худбин еһтирас һәгигәтән дә “дүнјәви” вә “нәфсанидир”. Бу руһ һәм дә “шејтанидир”. Илк дәфә бу мәкрли руһу, һакимијјәт һәсрәти чәкән мәләк әкс етдирди. Бу мәләк Јегова Аллаһа гаршы үсјан галдырды вә Шејтан — ҹинләрин һөкмдары олду.
16. Биринҹи әсрдә бә’зи мәсиһчиләр, Шејтанын руһуна бәнзәр руһу неҹә әкс етдирирдиләр?
16 Јагуб мәсиһчиләри, худбин еһтирас руһуну өзләриндә инкишаф етдирмәмәјә чағырырды, чүнки бу руһ сүлһ ҝәтирмир. Јагуб јазырды: “Аранызда мүбаризәләр вә ихтилафлар һарадандыр? Үзвләриниздә дөјүшән еһтирасларыныздан дејилми?” (Јагуб 4:1). Бу ајәдә “үзвләриниздә дөјүшән еһтираслар” ифадәси алтында, мадди рифаһа ҝөстәрилән гаршысыалынмаз ҹәһдләр вә ја мәшһурлуг, һакимијјәт, нүфуз һәсрәти нәзәрдә тутула биләр. Еһтимал ки, јығынҹагда олан бә’зиләри, Шејтана бәнзәр тәрздә, ҝөркәмли јер тутмаға ҹәһд ҝөстәрирдиләр. Онлар Исанын сөзләринә гулаг асмаг истәмирдиләр. Иса демишди ки, онун һәгиги давамчылары өзләрини “кичикләр” кими апармалыдырлар (Лука 9:48). Бу ҹүр руһ, јығынҹағы сүлһдән мәһрум едә биләр.
17. Мүасир мәсиһчиләр јығынҹагда сүлһ јарадан неҹә ола биләрләр?
17 Бу ҝүн биз дә материализмә, пахыллыға, шөһрәтпәрәстлијә олан мејллә мүбаризә апармалыјыг. Әҝәр биз һәгигәтән дә сүлһә ҹан атырыгса, јығынҹагда киминсә бир иши биздән јахшы ҝөрдүјүнә ҝөрә мүтәәссир олмајаҹаг вә онларын нијјәтләринә шүбһә ҝөстәрәрәк, белә инсанлары башгаларынын ҝөзүндә алчалтмајаҹағыг. Әҝәр биз һәр һансы бир исте’дада маликиксә, бу габилијјәти башгалары үзәриндәки үстүнлүјүмүзү ҝөстәрмәк үчүн истифадә етмәјәҹәјик, һәмчинин јығынҹағын јалныз бизим тәҹрүбәмиз вә билијимиз сајәсиндә чичәкләндијини зәнн етмәјәҹәјик. Бу ҹүр руһ сүлһүн јаранмасына дејил, парчаланмасына сәбәб ола биләр. Сүлһ јараданлар, өз габилијјәтләрини нүмајиш етдирмир, амма гардашларына хидмәт етмәк вә Јеговаја иззәт ҝәтирмәк үчүн бу габилијјәтләри тәвазөкарлыгла истифадә едирләр. Онлар анлајырлар ки, мәсиһчиләр нәтиҹәдә габилијјәтә ҝөрә дејил, мәһәббәтә ҝөрә танынырлар (Јәһја 13:35; 1 Коринфлиләрә 13:1—3).
“Сүлһү сәнин нәзарәтчиләрин кими тә’јин едәҹәјәм”
18. Ағсаггаллар өз араларында сүлһүн јаранмасына неҹә көмәк едирләр?
18 Сүлһә ҹан атмагда јығынҹағын ағсаггаллары нүмунә ҝөстәрирләр. Јегова өз халгы һаггында габагҹадан демишди: “Сүлһү сәнин нәзарәтчиләрин, әдаләти тапшырыг верәнләрин кими тә’јин едәҹәјәм” (Ишаја 60:17, ЈД). Бу пејғәмбәрлик сөзләринә әсасән, јығынҹагда мәсиһчи чобанлары кими хидмәт едәнләр, өз араларында вә сүрүдә сүлһүн јаранмасына көмәк едирләр. Ағсаггаллар, “јухарыдан назил олан” сүлһпәрвәр вә ағыллы “һикмәти” тәзаһүр етдирәрәк, араларында сүлһ јарада биләрләр (Јагуб 3:17). Јығынҹагдакы ағсаггаллар мүхтәлиф мәншәјә мәхсус вә мүхтәлиф һәјат тәҹрүбәсинә малик олдугларына ҝөрә бә’зи суалларда онларын фикирләри фәргләнә биләр. Бу, онлар арасында сүлһүн олмадығынымы ҝөстәрир? Белә һалда онлар дүзҝүн давранырларса, һеч дә о мә’наны дашымыр. Сүлһ јарадан кәс өз фикрини тәвазөкарлыгла сөјләјәҹәк, сонра исә һөрмәтҹил тәрздә башгаларынын фикрини динләјәҹәк. О өз дедијинин үстүндә дурмајаҹаг, башгаларынын фикрини диггәтлә ҝөтүр-гој едәҹәк. Әҝәр Мүгәддәс Китабын һеч бир принсипи позулмурса, онда мүхтәлиф нөгтеји-нәзәрләрә јол верилә биләр. Буна ҝөрә дә, фикирләр бир-бириндән фәргләнирсә, сүлһ јарадан ҝүзәштә ҝедәҹәк вә чохлуғун гәрарына шәрик олаҹаг. Бунунла да мүлајим олдуғуну ҝөстәрәҹәкдир (1 Тимотејә 3:2, 3). Тәҹрүбәли нәзарәтчиләр билирләр ки, сүлһү горумаг, өз дедијинин үстүндә дурмагдан даһа ваҹибдир.
19. Ағсаггаллар јығынҹагларда сүлһ јараданлар кими неҹә хидмәт едирләр?
19 Ағсаггаллар, јығынҹағын үзвләринә көмәк етмәклә вә онларын ишләрини әсассыз тәнгид етмәмәклә, сүрү арасында сүлһүн јаранмасына сәбәб олурлар. Әлбәттә, бә’зән кимин исә дүзәлишә еһтијаҹы ола биләр (Галатијалылара 6:1). Лакин мәсиһчи нәзарәтчисинин вәзифәси әсас е’тибары илә өјүд вермәкдән ибарәт дејил, о һәмдә тез-тез тә’рифләјир. Севән ағсаггаллар, башгаларында јахшы ҹәһәтләри ҝөрмәјә чалышырлар. Нәзарәтчиләр һәмиманлыларынын сә’јлә чәкдикләри зәһмәти гијмәтләндирир вә әминдирләр ки, онлар әлләриндән ҝәләни едирләр (2 Коринфлиләрә 2:3, 4).
20. Һәр биримизин сүлһә ҹан атмағымыз јығынҹаға һансы фајданы ҝәтирир?
20 Беләликлә, биз аиләдә, јығынҹагда вә иманымыза шәрик олмајан инсанларла мүнасибәтдә сүлһү горумаға ҹан атырыг. Бизләрдән һәр биримиз сүлһү сәмими гәлбдән горумаға чалышанда, јығынҹагда севинҹ һөкм сүрүр. Бундан әлавә, нөвбәти мәгаләдән ҝөрәҹәјимиз кими, белә сүлһ бизи һәм горујур, һәм дә мөһкәмләндирир.
Хатырлајырсынызмы?
• Сүлһ јарадан олмаг нә демәкдир?
• Биз, Јегованын Шаһиди олмајан кәсләрлә сүлһдә олмаға неҹә ҹан ата биләрик?
• Аиләдә сүлһү неҹә горуја биләрик?
• Ағсаггаллар јығынҹагда сүлһүн јаранмасына неҹә көмәк едә биләрләр?
[23-ҹү сәһифәдәки шәкил]
Сүлһ јараданлар, өзләрини үстүн тутмаға чалышмырлар.
[24-ҹү сәһифәдәки шәкилләр]
Мәсиһчиләр хидмәтдә, аиләдә вә јығынҹагда сүлһә ҹан атырлар.