Јахшылыг едәркән руһдан дүшмәјин
“Јахшылыг едәркән руһдан дүшмәјәк; чүнки әҝәр зәиф дүшмәсәк, вахтында бичәрик” (ГАЛАТИЈАЛЫЛАРА 6:9).
1, 2. а) Аллаһа хидмәт етмәкдә нә үчүн сәбир лазымдыр? б) Ибраһим неҹә сәбир ҝөстәрди вә сәбирли олмагда она нә көмәк едирди?
ЈЕГОВАНЫН Шаһидләри олараг, биз, Онун ирадәсини јеринә јетирмәкдән севинҹ тапырыг. Һәмчинин шаҝирдлик “бојундуруғундан” да тәравәт алырыг (Матта 11:29). Лакин Мәсиһлә бирликдә Јеговаја хидмәт етмәк һәмишә асан олмур. Һәвари Павел һәмиманлыларыны тәшвиг едәрәк буну ајдын шәкилдә ҝөстәрди: “Сизин тәһәммүлә еһтијаҹыныз вар ки, Аллаһын ирадәсини јеринә јетириб вә’д олунмуш шејә наил оласыныз” (Ибраниләрә 10:36). Тәһәммүл — сәбир, Аллаһа хидмәтин бә’зән чәтинликләрлә бағлы олдуғуна ҝөрә лазымдыр.
2 Ибраһимин һәјаты буна сүбутдур. О, дәфәләрлә чәтин сечимләр вә гејри-ади вәзијјәтләрлә гаршылашмышдыр. Јашајыш үчүн һәр ҹүр шәраити олан Ур дијарындан чыхмаг ҝөстәриши јалныз башланғыҹ иди. Чох кечмәмиш Ибраһим аҹлыгла, гоншу халгын дүшмәнҹәсинә мүнасибәтилә гаршылашды, арвадыны итирмәк үзрә иди, гоһумлары илә ихтилафы башлады, мүһарибәдә иштирак етмәли олду. Сынаглар һеч дә бунунла битмәди. Амма Ибраһим јахшылыг едәркән һеч вахт руһдан дүшмүрдү. Нәзәрә алсаг ки, Ибраһим, бу ҝүн бизим кими, Аллаһын бүтөв Кәламына малик дејилди, бу чох диггәтәлајигдир. Шүбһә јохдур ки, Ибраһим илк пејғәмбәрлији билирди. Аллаһ һәмин пејғәмбәрликдә дејирди: “Сәнинлә гадын арасына вә сәнин зүрријјәтинлә онун зүрријјәти арасына дүшмәнчилик гојаҹағам” (Тәквин 3:15). Бу Зүрријјәт Ибраһимин нәслиндән чыхмалы иди. Буна ҝөрә дә тәбиидир ки, Ибраһим, Шејтанын дүшмәнҹәсинә һүҹумларына һәдәф олмушдур. Буну анламаг, бүтүн сынаглара севинҹлә таб ҝәтирмәкдә Ибраһимә, сөзсүз ки, көмәк едирди.
3. а) Јегованын мүасир халгы нә үчүн изтирабларла гаршылашыр? б) Галатијалылара 6:9-ҹу ајәси бизә һансы руһ јүксәклијини верир?
3 Јегованын мүасир халгы да изтирабларла гаршылашаҹағыны билир (1 Петер 1:6, 7). Ахы Вәһј 12:17 ајәсиндә, Шејтанын мүгәддәс руһла мәсһ едилмишләрин галығы илә “вурушдуғу” барәдә хәбәрдарлыг јазылыб. Мәсһ едилмишләрлә чох јахын олдугларына ҝөрә, “башга гојунлар” да Шејтанын шиддәтли һүҹумларына һәдәф олурлар (Јәһја 10:16). Мәсиһчиләр јалныз тәблиғ фәалијјәтләринә гаршы мүгавимәтлә дејил, һәмчинин шәхси һәјатларында да чәтинликләрлә тоггуша биләрләр. Павел бизи дә’вәт едир: “Јахшылыг едәркән руһдан дүшмәјәк; чүнки әҝәр зәиф дүшмәсәк, вахтында бичәрик” (Галатијалылара 6:9). Шејтан вар гүввәсилә бизим иманымызы пуч етмәјә чалышса да, мөһкәм иманла она мүгавимәт ҝөстәрмәлијик (1 Петер 5:8, 9). Садиглијимиз һансы сәмәрәләри ҝәтирә биләр? Бу суалын ҹавабы Јагуб 1:2, 3 ајәләриндә јазылыб: “Еј гардашларым, мүхтәлиф имтаһанлара дүшәндә, буну бөјүк бир севинҹлә гәбул един. Билин ки, иманынызын сынанмасы тәһәммүл һасил едир”.
Ачыг һүҹум
4. Аллаһын халгынын нөгсансызлығыны сындырмаға чалышараг, Шејтан ачыг һүҹумлара неҹә әл атыр?
4 Ибраһимин һәјаты, бу ҝүн мәсиһчинин гаршылаша биләҹәји “мүхтәлиф имтаһанларын” әјани нүмунәсидир. Мәсәлән, Ибраһим Шинар торпағындан ҝәлән ишғалчыларын һүҹумуну дәф етмәли олду (Јарадылыш 14:11—16, МКШ). Тәәҹҹүблү дејил ки, Шејтан тә’гибләри гызышдырараг, буҝүнә гәдәр дә ачыг һүҹумлара әл атыр. Икинҹи дүнја мүһарибәсиндән сонра, Јегованын Шаһидләринин мәсиһчи маарифләндирмә фәалијјәтинә бир чох өлкәләрдә һакимијјәт тәрәфиндән гадаға гојулмушдур. 2001-ҹи ил үчүн “Јегованын Шаһидләринин салнамәси”ндә, дүшмәнләрин Анголада мәсиһчиләрлә амансыз давранышындан бәһс олунур. Јеговаја ҝүвәнәрәк, иман гардашларымыз бу ҹүр өлкәләрдә сарсылмазлығы горудулар. Онлар зоракылыға зоракылыг вә мүгавимәтлә дејил, еһтијатлы давраныб тәблиғи давам етмәклә ҹаваб вердиләр (Матта 24:14).
5. Ҝәнҹ мәсиһчиләр мәктәбдә тә’гибләрә неҹә мә’руз гала биләрләр?
5 Амма тә’гибләр һәмишә зоракылыгла бағлы олмур. Ибраһимин нәһајәтдә Исмаил вә Исһаг адлы ики оғлу олду. Јарадылыш 21:8—12 ајәләриндә дејилир ки, бир дәфә Исмаил Исһага “ҝүлдү” (МКШ). Павел, Галатијалылара мәктубунда ҝөстәрир ки, бу ҝүлүш садәҹә ушаг дәҹәллији дејилди. О, јазырды ки, Исмаил Исһагы “тә’гиб етди” (Галатијалылара 4:29). Демәли, синиф јолдашлары тәрәфиндән лаға гојулмағы вә әлејһдарларымызын тәһгирини һаглы олараг тә’гиб адландырмаг олар. Рајан адлы ҝәнҹ мәсиһчи, синиф јолдашларынын ону неҹә масгараја гојдугларыны хатырлајыр: “Мәктәбә ҝедәркән вә ҝери гајыдаркән автобусдакы 15 дәгигәлик јол мәнә әбәдијјәт кими ҝөрүнүрдү, чүнки мәни тәһгир едирдиләр. Синиф јолдашларым дәфтәрхана санҹагларыны алышганла гыздырыб, онларла мәни јандырырдылар”. Бунун сәбәби нә иди? Рајан дејир: “Мән, мәсиһчијә хас олан әхлаг нормаларына өјрәдилдијим үчүн, мәктәбдә ушаглардан фәргләнирдим”. Валидејнләринин көмәклији сајәсиндә Рајан бүтүн бу сынаглара таб ҝәтирди. Ҝәнҹ мәсиһчиләр, һәмјашыдларынызын истеһзалары сизи мә’јус едирми? Руһдан дүшмәјин! Садиг галын вә Исанын сөзләринин сизин үзәриниздә неҹә јеринә јетдијини ҝөрәҹәксиниз. О дејирди: “Мәнә ҝөрә инсанлар сизи тәһгир вә тә’гиб едәҹәкләри, јалан сөјләјиб сизә һәр ҹүр бөһтан атаҹаглары заман, сиз нә бәхтијарсыныз!” (Матта 5:11).
Ҝүндәлик хошаҝәлмәз һадисәләр
6. Бу ҝүн мәсиһчиләр арасындакы мүнасибәти нә поза биләр?
6 Гаршылашдығымыз сынагларын әксәријјәти ҝүндәлик хошаҝәлмәз һадисәләрлә бағлыдыр. Ибраһим өзүнүн вә гардашы оғлу Лутун чобанлары арасындакы ихтилафа сәбир етмәли олду (Тәквин 13:5—7). Һәмчинин бу ҝүн дә фикир ајрылығы вә әһәмијјәтсиз һәсәд инсанлар арасындакы мүнасибәти поза биләр, һәтта јығынҹагдакы әмин-аманлыға тәһлүкә јарадар. “Һәсәд вә худбин еһтирас һарада варса, орада гарышыглыг вә һәр ҹүр пис иш вардыр” (Јагуб 3:16). Руһдан дүшмәмәк, Ибраһим кими, әмин-аманлығы мәғрурлугдан үстүн тутмаг вә башгаларынын мәнафејини дүшүнмәк бизим үчүн неҹә дә ваҹибдир! (Јагуб 3:17; 1 Коринфлиләрә 13:5).
7. а) Һәмиманлысы тәрәфиндән инҹидилән кәс нә етмәлидир? б) Башгалары илә јахшы гаршылыглы мүнасибәти горумагда Ибраһим һансы ҝөзәл нүмунәни верди?
7 Һәмиманлымызын бизимлә һагсыз даврандығыны дүшүнүрүксә, сүлһсевәр олмаг чәтиндир. Сүлејманын мәсәлләри 12:18 ајәсиндә дејилир: “Дүшүнмәдән данышанын дили гылынҹ кими јаралар” (МКШ). Дүшүнүлмәмиш сөзләр, һәтта пис нијјәтлә дејилмәсә дә, ағыр јара вура биләр. Бизә бөһтан атдыгларыны вә ја адымыздан пис шаијәләр сөјләдикләрини зәнн едириксә, дәрдимиз даһа да артар (Мәзмур 6:6, 7). Анҹаг мәсиһчи јол вермәли дејил ки, тәһгир олунмуш һиссләри ону руһдан салсын! Белә вәзијјәтә дүшүбсүнүзсә, хәтринизә дәјән кәслә сәмими сөһбәт едиб, һәр шеји өз јолуна гојмагда тәшәббүс ҝөстәрин (Матта 5:23, 24; Ефеслиләрә 4:26). Бағышламаға һазыр олун (Колослулара 3:13). Әҝәр өзүмүздә кин сахламарыгса, раһатлашар вә гардашымызла гаршылыглы мүнасибәтимизи гајдаја саларыг. Ибраһим Лута гаршы кин сахламады. Әксинә, Луту вә аиләсини мүдафиә етмәк үчүн мүбаризә апарды! (Тәквин 14:12—16).
Тәгсиркары өзүмүз олан сынаглар
8. а) Мәсиһчиләр неҹә өзләринә бир чох әзаблары чәкдирә биләрләр? б) Ибраһим нәјә ҝөрә мадди фираванлыға гаршы таразлығы горуја билди?
8 Е’тираф етмәк лазымдыр ки, бә’зи сынагларын тәгсиркары өзүмүз олуруг. Мәсәлән, Иса өз давамчыларына бујурду: “Јер үзүндә өзүнүзә хәзинәләр јығмајын; орада ҝүвә вә пас онлары мәһв едәр; вә ораја оғрулар ҝирәр вә оғурларлар” (Матта 6:19). Лакин гардашлардан бә’зиләри әсас диггәти Падшаһлығын мәнафејинә дејил, мадди фираванлыгларына јөнәлтмәклә, “өзләринә бир чох әзаблар чәкдирдиләр” (1 Тимотејә 6:9, 10). Аллаһы разы салмаг үчүн, Ибраһим раһатлығыны гурбан вермәјә һазыр иди. “О, иман васитәсилә вә’д едилмиш өлкәдә јад вә гәриб кими мәскән салды вә ејни вә’дин һәмварисләри олан Исһаг вә Јагубла бирликдә чадырларда јашады; чүнки о, ме’мары вә баниси Аллаһ олан, мөһкәм тәмәлләрә малик шәһәри ҝөзләјирди” (Ибраниләрә 11:9, 10). Ибраһимин ҝәләҹәк “шәһәрә”, јә’ни Аллаһын һакимијјәтинә олан иманы, зәнҝинлијә бел бағламамагда она көмәк едирди. Мәҝәр ејни тәрздә давранмаг бизим үчүн дә мүдриклик олмазмы?
9, 10. а) Шөһрәтә наил олмаға ҹан атмаг проблемә неҹә чеврилә биләр? б) Бизим ҝүнләрдә гардашлар “кичикләр” кими неҹә даврана биләрләр?
9 Башга мәгамы нәзәрдән кечирәк. Мүгәддәс Китабда ашкар сурәтдә белә сөзләр јазылыб: “Әҝәр кимсә, һеч олдуғу һалда, өзүнү әһәмијјәтли санырса, өз-өзүнү алдадыр” (Галатијалылара 6:3). Ејни заманда бизә мәсләһәт едилир: “Рәгабәт вә ја шөһрәтпәрәстликлә һеч бир шеј етмәјин, амма тәвазөкарлыгла [един]” (Филипилиләрә 2:3). Бә’зиләри бу мәсләһәтә риајәт етмәдикләриндән өзләринә проблемләр јарадырлар. Онлар, “хејирли бир иш” ҝөрмәјә ҹәһд етмәк әвәзинә, шөһрәт газанмаға ҹан атыр вә јығынҹагда, хәјалында олдуглары тә’јинаты алмадыгда пәрт олуб, гәзәбләнирләр (1 Тимотејә 3:1).
10 Ибраһим өзүнә “лүзумундан чох әһәмијјәт” вермәмәкдә ҝөзәл нүмунә олду (Ромалылара 12:3). Ибраһим, Мәлкиседеглә гаршылашанда елә давранмады ки, ҝуја Аллаһын ҝөзүндә тапдығы лүтф, она өзүнү үстүн тутмаға сәлаһијјәт верирди. Әксинә, онда бир һиссәни вермәклә, Мәлкиседегин каһин кими тутдуғу даһа јүксәк мөвгеји гәбул етди (Ибраниләрә 7:4—7). Бу ҝүн мәсиһчиләр дә көнүллү сурәтдә “кичикләр” кими давранмалы вә һамынын диггәтини өзләринә ҹәлб етмәјә чалышмалы дејилләр (Лука 9:48). Әҝәр јығынҹагда рәһбәрлик тапшырылан кәсләрин сизә мүәјјән бир тә’јинаты вермәкдән јан кечдикләрини зәнн едирсинизсә, онда өзүнүзү виҹданла јохлајын вә һансы саһәдә кејфијјәтиниз, јахуд давранышыныз үзәриндә чалышмаг лазым олдуғу барәдә дүшүнүн. Малик олмадығыныз тә’јинатын һәсрәтини чәкмәк әвәзинә, малик олдуғунуз вәзифәни јеринә јетирмәк үчүн әлиниздән ҝәләни един — башгаларына Јегова илә таныш олмагда көмәк един. “Аллаһын ҝүҹлү әлинин һимајәси алтында тәвазөкар олун ки, О Өз вахтында сизи уҹалтсын” (1 Петер 5:6).
Ҝөзлә ҝөрүнмәјән шејләрә иман
11, 12. а) Нәјә ҝөрә јығынҹагда бә’зиләри сарсыла вә тә’хирәсалынмазлыг һиссләрини итирә биләрләр? б) Һәјатыны Аллаһын нијјәтләринә етдији иман әсасында гурараг, Ибраһим бизә нәдә ҝөзәл нүмунә верди?
11 Диҝәр сынаг исә, бу пис әшјалар системинин сона чатмасынын ләнҝијән кими ҝөрүнмәси ола биләр. 2 Петер 3:11 ајәсиндә јазылан сөзләрдән ајдын олдуғу кими, мәсиһчиләр “Аллаһын зүһуруну ҝөзләмәли вә шиддәтлә арзуламалыдырлар” (КМ). Лакин бир чохлары һәмин “ҝүнү” илләрлә, диҝәрләри исә онилләрлә ҝөзләјир. Бунун нәтиҹәсиндә исә, бә’зиләри сарсыла вә тә’хирәсалынмазлыг һиссләрини итирә биләрләр.
12 Ҝәлин јенидән Ибраһимин нүмунәсинә диггәт јетирәк. Ибраһим, Аллаһын вә’дләринин онун јашадығы дөврдә һәјата кечмәјәҹәјини билмиш олса да, бүтүн һәјатыны һәмин вә’дләрә бәсләдији иман әсасында гурмушду. Дүздүр, Ибраһим узун өмүр јашады вә оғлу Исһагын јеткин јаша чатдығыны ҝөрдү. Анҹаг Ибраһимин нәслини “ҝөјдәки улдузлар” вә “дәниз кәнарындакы гум” илә мүгајисә етмәк үчүн әсрләр кечмәлијди (Јарадылыш 22:17, МКШ). Буна бахмајараг, бу вәзијјәт Ибраһими һирсләндириб, руһдан салмады. Буна ҝөрә дә, һәвари Павел Ибраһим вә диҝәр тајфа башчылары һаггында дејирди: “Онларын һамысы вә’д едилмиш шејләри алмадан иманлы кими өлдү, амма бу шејләри узагдан ҝөрүб гане олуб, хош гаршыладылар вә е’тираф етдиләр ки, онлар јер үзүндә јад вә гәрибдирләр” (Ибраниләрә 11:13).
13. а) Бу ҝүн мәсиһчиләр нәдә “гәрибләрә” бәнзәјирләр? б) Јегова индики әшјалар системини нәјә ҝөрә мәһв едәҹәкдир?
13 Әҝәр Ибраһим өз һәјатыны, јеринә јетмәсини јалныз “узагдан” ҝөрдүјү вә’дләр әсасында гурмағы баҹардыса, һәмин вә’дләрин һәјата кечмәси зәманәмизә белә јахын олдуғу бир һалда, биз онлара даһа чох диггәт јетирмәлијик! Ибраһим кими, биз дә өзүмүзү Шејтанын әшјалар системиндә “гәрибләр” санмалы вә раһат һәјат шәраитинә алышмағы рәдд етмәлијик. Әлбәттә, биз истәјәрдик ки, “һәр шејин ахыры” јалныз бу ҝүнләрдә дејил, елә инди олсун (1 Петер 4:7). Ола билсин, сағламлыг ҹәһәтдән ҹидди проблемләримиз вар. Јахуд, игтисади чәтинликләрин ағыр јүкүнү дашыјырыг. Лакин јадда сахламалыјыг ки, Јегова јалныз бизи белә аҹынаҹаглы вәзијјәтдән гуртармаг үчүн јох, һәмчинин өз исмини мүгәддәс етмәк үчүн писликләрә сон гојаҹагдыр (Һезекиел 36:23; Матта 6:9, 10). Сон, бизә мүнасиб олан вахтда дејил, Јегованын нијјәтләринин јеринә јетмәсинә даһа мүнасиб олан вахтда ҝәләҹәкдир.
14. Аллаһын сәбир етмәси мүасир мәсиһчиләрә нәдә фајдалыдыр?
14 Һәмчинин јаддан чыхармајаг: “Рәбб бә’зиләринин зәнн етдији кими Өз вә’дини јеринә јетирмәкдә ҝеҹикмир. Әксинә, О бизә сәбир едир вә истәјир ки, һамы төвбәјә ҝәлсин вә кимсә һәлак олмасын” (2 Петер 3:9). Гејд едәк ки, Аллаһ “бизә” — мәсиһчи јығынҹағынын үзвләринә “сәбир едир”. Ҝөрүнүр, “Онун һүзурунда нөгсансыз, ләкәсиз вә сүлһ ичиндә тапылмаг” үчүн, бизләрдән бә’зиләринә өз үзәрләриндә чалышмаға даһа чох вахт лазымдыр (2 Петер 3:14). Беләликлә, сәбир етдији үчүн Аллаһа миннәтдар олмалы дејиликми?
Чәтинликләрә бахмајараг севинмәк
15. Нә үчүн Иса сынагларда өз севинҹини итирмирди вә ону тәглид етмәк бу ҝүн мәсиһчиләрә неҹә фајда ҝәтирәр?
15 Ибраһимин һәјаты мүасир мәсиһчиләрә чох шеј өјрәдир. О, јалныз иманы дејил, һәмчинин сәбир, фәрасәт, ҹәсарәт вә тәмәннасыз мәһәббәти тәзаһүр етдирирди. Јеговаја ибадәт онун һәјатында ән ваҹиб јери тутурду. Буна бахмајараг јадда сахламалыјыг ки, тәглид етмәк үчүн бизә ән бөјүк нүмунәни Иса Мәсиһ гојуб. О да бир чох чәтинлик вә сынагларла гаршылашырды, амма бунунла јанашы, һеч заман севинҹини итирмирди. Нә үчүн? Чүнки өз үмидини јадында мөһкәм сахлајырды (Ибраниләрә 12:2, 3). Мәһз буна ҝөрә дә Павел дуа едирди: “Гој сарсылмазлыг вә тәсәлли верән Аллаһын сајәсиндә, Иса Мәсиһин малик олдуғу ејни дүшүнҹә тәрзи сиздә дә олсун” (Ромалылара 15:5, ЈД). Әҝәр биздә дүзҝүн “дүшүнҹә тәрзи” варса, Шејтанын гаршымызда төрәтдији бүтүн чәтинликләрә бахмајараг, севинә биләҹәјик.
16. Чәтинликләрлә мүбаризә апармаг үчүн гүввәмизин түкәндијини зәнн етдикдә нә едә биләрик?
16 Чәтинликләрлә мүбаризә апармагда гүввәнизин түкәндијини зәнн едән заман, Јегованын Ибраһими севдији кими, сизи дә севдијини хатырлајын. Јегова бүтүн ишләринизин мүвәффәгијјәтли олмасыны истәјир (Филипилиләрә 1:6). Бүсбүтүн Јеговаја ҝүвәнин вә әмин олун ки, “О, ҝүҹүнүздән артыг имтаһан олунманыза разылыг вермәз, лакин имтаһан илә јанашы, гуртулушу да тә’мин едәҹәкдир ки, таб ҝәтирә биләсиниз” (1 Коринфлиләрә 10:13). Өзүнүзә Аллаһын Кәламыны һәр ҝүн охумаг вәрдишини ашылајын (Мәзмур 1:2). Һәр шејә таб ҝәтирмәкдә Јеговадан һәмишә дуа васитәсилә көмәк диләјин (Филипилиләрә 4:6). Јегова “Ондан диләјәнләрә Мүгәддәс Руһу” верәҹәкдир (Лука 11:13). Руһән мөһкәм олманыз үчүн Јегованын сизә тәгдим етдији һәр вәсаитдән, мәсәлән, Мүгәддәс Китаба әсасланан нәшрләрдән истифадә един. Көмәк үчүн гардашлара мүраҹиәт един (1 Петер 2:17). Мәсиһчи ҝөрүшләриндә мүнтәзәм иштирак един, чүнки һәр шејә таб ҝәтирмәк үчүн лазым олан руһ јүксәклијини мәһз орада алаҹагсыныз (Ибраниләрә 10:24, 25). Әминликлә севинин ки, тәһәммүлүнүз Аллаһын ҝөзүндә јахшы ад газанмағыныза көмәк едир, садиглијиниз исә Онун гәлбини севиндирир (Сүлејманын мәсәлләри 27:11; Ромалылара 5:3—5).
17. Мәсиһчиләр нәјә ҝөрә руһдан дүшмүрләр?
17 Аллаһ Ибраһими “досту” кими севирди (Јагуб 2:23). Буна бахмајараг, Ибраһимин һәјаты чәтинлик вә сынагла долу иди. Буна ҝөрә дә мәсиһчиләр билирләр ки, бу пис “ахыр ҝүнләрдә” јахшы бир шеј ҝөзләмәјә дәјмәз. Ахы Мүгәддәс Китаб бизи хәбәрдар едир ки, “пис адамлар вә сахтакарлар... алдадыб алданараг, писликдә инкишаф едәҹәкләр” (2 Тимотејә 3:1, 13). Руһдан дүшмәк әвәзинә, фикирләшин ки, гаршылашдығымыз чәтинликләр, Шејтанын пис системинин сонунун артыг јахын олдуғуну сүбут едир. Иса деди: “Ахыра гәдәр сәбир едән хилас олаҹагдыр” (Матта 24:13). Елә буна ҝөрә дә, јахшылыг едәркән руһдан дүшмәјин! Ибраһимдән нүмунә ҝөтүрүн вә “вә’д олунанлары иман вә сәбрлиликлә мирас аланлар” сырасында олун (Ибраниләрә 6:12).
Диггәт јетирдинизми?
• Нә үчүн Јегованын мүасир халгы әзаблар вә сынагларла гаршылашыр?
• Шејтан ачыг һүҹумлара неҹә әл ата биләр?
• Мәсиһчиләр арасындакы шәхси фикир ајрылығыны өз јолуна неҹә гојмаг олар?
• Мәғрурлуг вә егоизм неҹә проблем јарада биләр?
• Аллаһын вә’дләринин јеринә јетмәсини ҝөзләмәкдә, Ибраһим неҹә ҝөзәл нүмунә олду?
[18-ҹи сәһифәдәки шәкил]
Ҝәнҹ мәсиһчиләрин бир чоху һәмјашыдларынын тәһгиринә мә’руз галараг, тә’гибләрлә гаршылашырлар.
[21-ҹи сәһифәдәки шәкил]
Ибраһим Аллаһын вә’дләринин јеринә јетмәсини јалныз “узагдан” ҝөрдү, буна бахмајараг һәјаты һәмин вә’дләрлә бағлы иди.