Һәгиги дин инсанлары бирләшдирир
ҮМУМИЈЈӘТЛӘ динләр инсанлары бир–бириндән ајырса да, тәк ҝерчәк Аллаһа иман онлары бирләшдирмәк гүввәсинә маликдир. Исраил, Аллаһын сечдији халг оланда, һәгиги дин исраилли олмајан сәмими гәлбли чох инсанлары ҹәлб едирди. Мисал үчүн, Рут өзүнүн Моаб танрыларыны тәрк етди вә Наомијә деди: “Халгын халгым олаҹаг, Аллаһын Аллаһым” (Рут 1:16, МКШ). Ерамызын биринҹи әсринә јахын диҝәр милләтләрин чохсајлы нүмајәндәләри һәгиги Аллаһа ибадәт етмәјә башладылар (Һәвариләрин ишләри 13:48; 17:4). Сонралар, Исанын һәвариләри хош хәбәри тәблиғ етмәк үчүн узаг өлкәләрә јоллананда, сәмими гәлбли башга инсанлар да Аллаһа иман ҝәтирәрәк, Онун хидмәтчиләри олдулар. Һәвари Павел јазырды: “Јашајан вә һәгиги Аллаһа гуллуг етмәк үчүн бүтләрдән Аллаһа” дөндүнүз (1 Салониклиләрә 1:10, И—93). Һәгиги Аллаһа иман бу ҝүн дә инсанлары белә бирләшдирә биләрми?
Скептикләр “һәгиги иман” вә “һәгиги Аллаһ” ифадәләринин әслиндә јалан олдуғуну исрар едирләр. Јәгин ки, онлар һәгигәти һансы мәнбәдән өјрәнмәјин мүмкүн олдуғуну билмәдикләри үчүн белә дүшүнүрләр. Лакин һәгигәти ахтаран инсанлар, һансы өлкәдә јашадыгларындан асылы олмајараг дәрк едирләр ки, Аллаһа ибадәт мәсәләсиндә мәхсус олдуглары динә үстүнлүк вермәк јерсиздир. Ибадәтә јалныз һәр шеји Јарадан — Јегова Аллаһ лајигдир (Вәһј 4:11). Һәгиги Аллаһ јалныз Одур вә инсанларын Она неҹә ибадәт етмәләринә О гәрар верә биләр.
Јегова бизимлә өз Кәламы, јә’ни Мүгәддәс Китаб васитәсилә данышыр вә Онун тәләбләри һаггында биз бу китабдан мә’лумат әлдә едә биләрик. Демәк олар ки, бу ҝүн јер үзүндә јашајан һәр бир инсан ја бүтүн Мүгәддәс Китаба, ја да онун ајры–ајры һиссәләринә маликдир. Бундан әлавә, Аллаһын Оғлу демишдир: “Әҝәр сиз Мәним сөзүмә садиг галсаныз... һәгигәти дәрк едәҹәксиниз” (Јәһја 8:31, 32). Бу о демәкдир ки, һәгигәти дәрк етмәк олар. Вә мүхтәлиф динләри тәрк едән милјонларла сәмими гәлбли инсанлар, һәгигәти ҹәсарәтлә гәбул едир вә һәгиги диндә бирләширләр (Матта 28:19, 20; Вәһј 7:9, 10).
Мүасир үмумдүнја гардашлығы
Мүгәддәс Китабын “Тсефанја” китабында јазылан диггәтә лајиг пејғәмбәрлик мүхтәлиф халглардан олан инсанларын бирләшмәси һаггында сөјләјир: “Бир үрәклә Рәббә гуллуг етмәк үчүн һамысы Рәббин [Јегова Аллаһын] исмини чағырсынлар дејә, халглара о заман тәмиз додаг верәҹәјәм” (Тсефанја 3:9). Неҹә дә ҝөзәл мәнзәрәдир: мүхтәлиф халглардан олан инсанлар, Аллаһа бирликдә хидмәт етмәк үчүн, өз дүшүнҹә тәрзләрини дәјиширләр!
Бәс бу нә заман баш верәҹәкдир? Тсефанја 3:8 ајәсиндә дејилир: “Бундан өтрү ова галхаҹағым ҝүнә гәдәр мәни ҝөзләјин, Рәббин сөзү; чүнки һөкмүм милләтләри топламагдыр, та ки, өлкәләр үзәринә гәзәбими, гызғын һиддәтимин һамысыны төкмәк үчүн онлары бир араја ҝәтирим; чүнки бүтүн дүнја гысганҹлығымын атәшилә удулаҹагдыр”. Јегова, халглар үзәринә гызғын һиддәтини төкмәздән әввәл, һәлим инсанлара тәмиз дили өјрәнмәк имканы верир. Јегова артыг индидән бүтүн халглары Һар–Меҝидона — Күлл–Ихтијар Аллаһын бөјүк ҝүнүнә топлајыр (Вәһј 16:14, 16).
Өз халгыны бирләшдирмәк үчүн, Јегова она тәмиз дил верир. Бу тәмиз дил өзүнә, Аллаһ вә Онун нијјәтләри һаггында Мүгәддәс Китабын дәгиг анлајышыны дахил едир. Тәмиз дилдә данышмаг һәгигәтә инанмаг, ону башгаларына өјрәтмәк, һәмчинин Аллаһын ганунларына вә принсипләринә мүвафиг јашамаг мә’насыны дашыјыр. Бунун үчүн, дүшмәнчилик тохуму сәпән сијасәтдән узаг дурмалы вә бу дүнјаја хас олан иргчилик, о ҹүмләдән миллијјәтчилик кими худбин нәзәрләри үрәјимиздән чыхарыб атмалыјыг (Јәһја 17:14; Һәвариләрин ишләри 10:34, 35). Һәгигәти севән сәмими гәлбли инсанларын һамысы бу дили мәнимсәјә биләрләр. Әввәлки мәгаләдә һагларында бәһс едилән вә дини нөгтеји–нәзәрләринә ҝөрә габаглар бир–бириндән фәргләнән беш адам, һазырда јеҝанә һәгиги Јегова Аллаһа бирликдә ибадәт едирләр.
Онлары һәгиги ибадәт бирләшдирди
Өз католик дининә садиг олан Фиделија, мәктәб мәшғәләләри үчүн гызына Мүгәддәс Китаб аланда, онун өлән беш ушағынын башына ҝәләнләри Мүгәддәс Јазыларын әсасында изаһ етмәсини кешишдән хаһиш етди. Гадын е’тираф едир: “Үмидим үзүлдү!” Буна ҝөрә дә јанына Јегованын Шаһидләри ҝәләндә, Фиделија һәмән суалы онлара да верди. Өләнләрин һансы вәзијјәтдә олдугларыны Мүгәддәс Китабдан өјрәндикдә, килсәдә ону неҹә дә алдатдыгларыны анлады! О, инди билди ки, өлүләр шүурсуз вәзијјәтдәдир вә һеч јердә әзијјәт чәкмирләр (Мәзмур 146:4; Ваиз 9:5). Фиделија өзүнә мәхсус олан бүтүн ибадәт әшјаларыны атды вә килсәни тәрк едиб, Мүгәддәс Китабы өјрәнмәјә башлады (1 Јәһја 5:21). О, артыг он илдир ки, Мүгәддәс Китаб һәгигәтини өјрәнмәкдә башгаларына көмәк едир.
Тара, Катманду шәһәриндән һиндуист мә’бәдләринин аз олдуғу өлкәјә көчдү. Буна ҝөрә дә руһани аҹлығыны тә’мин етмәк үмидилә методист килсәсини зијарәт етмәјә башлады. Лакин о, “инсанлар нәјә ҝөрә бу гәдәр әзаб чәкирләр” суалына ҹаваб тапа билмирди. Сонра о, Јегованын Шаһидләри илә таныш олду вә она Мүгәддәс Китабы өјрәнмәји тәклиф етдиләр. Тара дејир: “Анладым ки, севән Аллаһ, дүнјада баш верән бүтүн изтирабларын сәбәбкары ола билмәз... Гаршыдан ҝәләҹәк, сүлһ вә һармонијанын һөкм сүрәҹәји јени дүнја һаггында билмәјә шад идим” (Вәһј 21:3, 4). Тара она мәхсус олан һиндуист бүтләрини атыб, вәтәниндә гәбул олунмуш дини ән’әнәләрә риајәт етмәјә сон гојду вә Јегованын Шаһиди олуб, башгаларына руһани еһтијаҹларыны тә’мин етмәјә көмәк едәрәк һәгиги хошбәхтлик әлдә етди.
Панја адлы буддист фалчылыгла мәшғул олурду. Бангкокда Јегованын Шаһидләри она баш чәкдиләр. Мүгәддәс Китабын пејғәмбәрликләри Панјаны чох марагландырды. О хатырлајыр: “Мән, мөвҹуд олан шәраитләрин Јараданын илк нијјәтиндән нә үчүн фәргләндијини өјрәндим. Һәмчинин Онун һөкмранлығыны гәбул етмәк истәмәјәнләр тәрәфиндән бәшәријјәтә тохунулан бүтүн зәрәрләри неҹә арадан галдыраҹағы һаггында мә’лумат әлдә етдим. О заман, санки ҝөзләрим ачылды. Мүгәддәс Китабдакы бүтүн хәбәрләр неҹә дә һәмаһәнҝдир! Мән Јегованы бир шәхсијјәт кими таныдым вә севдим. Бу исә мәни, һәр шејдә дүзҝүн давранмаға тәшвиг етди. Инсан мүдриклији илә Аллаһын мүдриклији арасындакы фәрги ҝөрмәләри үчүн башга инсанлара көмәк етмәк истәјирдим. Һәгиги мүдриклик мәним һәјатымы дәјишдирди”.
Вирҹилдә тәдриҹән өз дининә даир ҹидди шүбһәләр јаранмаға башлады. О, артыг Аллаһа зәнҹиләрә вә онун баша дүшдүјү кими, ағ адамлара гаршы нифрәти гызышдыран иргчи бир тәшкилата көмәк етмәси һаггында дуа етмирди. О, Аллаһа дуа едирди ки, һарада вә неҹә олмасындан асылы олмајараг, һәгигәти тапмагда она көмәк етсин. «Ахшамүстү үрәкдән дуа етдим, сәһәр јухудан ојананда исә евдә “Ҝөзәтчи Гүлләси” журналы тапдым... Јәгин ки, ону гапынын арасындан салмышдылар». О, тезликлә Јегованын Шаһидләри илә Мүгәддәс Китабы сә’јлә өјрәнмәјә башлады. Вирҹил давам едир: “Һәјатымда илк дәфә мәмнунлуг һисси дујдум... Үрәјимдә үмид ишығы парылдады”. Гыса бир вахтдан сонра Вирҹил, инсанлара Аллаһын Кәламы олан Мүгәддәс Китабдакы јеҝанә үмид барәдә данышан адамлара гошулду.
Латын Америкасындан олан Чаро ушаглары илә базара ҝедәркән јолда әзијјәт чәкирди. Бу заман она өз көмәјини ҝөстәриб, машыны илә ону базара апаран Гледисин — Јегованын Шаһидинин — сәхавәтинә мат галды. Чаро тезликлә пулсуз Мүгәддәс Китаб өјрәнмәсинә разылыг верди. Јахшы адамларын һамысынын ҝөјә галхмајаҹағыны, Јегованын чох инсанлары јер үзүндә әбәди һәјатла мүкафатландыраҹағыны өз шәхси Мүгәддәс Китабындан өјрәнәндә, тәәҹҹүбләнди (Мәзмур 37:11, 29). Инди артыг 15 илдир ки, Чаро бу үмиди башгалары илә бөлүшүр.
Тәсәввүр един ки, бүтүн Јер күрәси јеҝанә, һәгиги Аллаһа иманда бирләшән сәмими гәлбли инсанларла долаҹаг! Бу исә садәҹә олараг арзу дејил! Буну Јегова вә’д етмишдир. Пејғәмбәри Тсефанја васитәсилә Аллаһ е’лан етди: “Сәнин ичиндә тәвазөкар вә фағыр бир халг сахлајаҹағам вә онлар Рәббин исминә сығынаҹаглар. [...] Һагсызлыг етмәјәҹәк; вә јалан сөјләмәјәҹәкләр; вә ағызларында һијләли дил олмајаҹаг... вә [онлары] горхудан олмајаҹаг” (Тсефанја 3:12, 13). Бу вә’д сизи севиндирирсә, Мүгәддәс Китабын дә’вәтинә гулаг асын: “Рәббин һөкмләрини иҹра етмиш олан дүнјанын бүтүн тәвазөкарлары, Рәбби арајын; салеһлији арајын, тәвазөкарлығы арајын; Рәббин гәзәб ҝүнүндә бәлкә ҝизләнә биләрсиниз” (Тсефанја 2:3).