Даһа чох диггәтли олун

“Биз ешитдикләримизә даһа чох диггәтлә гулаг асмалыјыг ки, ахын бизи онлардан ајырмасын” (ИБРАНИЛӘРӘ 2:1).

1. Диггәтин јајынмасынын фәлакәтә неҹә ҝәтириб чыхара биләҹәјини изаһ един.

ТӘКҸӘ Америка Бирләшмиш Штатларында илдә тәхминән 37 мин инсан автомобил гәзасы нәтиҹәсиндә тәләф олур. Тәдгигатчыларын дедикләринә ҝөрә, сүрүҹүләр һеч олмаса бир аз диггәтли олсајдылар, бу өлүм һадисәләринин чохундан гачынмаг оларды. Бә’зи сүрүҹүләрин диггәтини ишарәләр вә реклам лөвһәләри, башгаларынын диггәтини јол вахты ҹиб телефонундан истифадә етмәк јајындырыр. Даһа башгалары исә јол ҝедәркән јемәк јејирләр. Садаланан бүтүн бу һалларда диггәтин јајынмасы фәлакәтә ҝәтириб чыхара биләр.

2, 3. Павел јәһудиләрдән олан мәсиһчиләрә һансы мәсләһәти верди вә онун мәсләһәти нәјә ҝөрә јериндә иди?

² Автомобил ихтира едилмәмишдән тәхминән 2 000 ил габаг һәвари Павел јәһудиләрдән олан мәсиһчиләрин диггәтини јајындыран амилин вә онларын бә’зиләри үчүн бунун фәлакәтә чеврилдијини јазмышдыр. Әввәлҹә Павел дирилмиш Иса Мәсиһин Аллаһын сағ тәрәфиндә отурдуғуну, бүтүн мәләкләрдән үстүн мөвге тутдуғуну вурғулады. Сонра исә һәвари јазырды: “Буна ҝөрә, биз ешитдикләримизә даһа чох диггәтлә гулаг асмалыјыг ки, ахын бизи онлардан ајырмасын” (Ибраниләрә 2:1).

³ Јәһудиләрдән олан мәсиһчиләр нәјә ҝөрә Иса һаггында ‘ешитдикләринә даһа чох диггәтлә гулаг асмалы’ идиләр? Она ҝөрә ки, Исанын јер үзүнү тәрк етмәсиндән, демәк олар ки, отуз ил кечмишди. Јәһудиләрдән олан мәсиһчиләрин бә’зиләри, Иса јер үзүнү тәрк етдикдән сонра һәгигәтдән узаглашмаға башламышдылар. Бу мәсиһчиләрин диггәтини онларын әввәл мәхсус олдуглары јәһуди дини јајындырырды.

Онлар даһа диггәтли олмалы идиләр

4. Нәјә ҝөрә бә’зи јәһудиләрдән олан мәсиһчиләрдә јәһудилијә гајытмаг фикри јарана биләрди?

⁴ Нәјә ҝөрә мәсиһчидә јәһудилијә гајытмаг фикри јарана биләрди? Өзүнүз нәтиҹә чыхарын: Мусанын ганунунда јазылмыш ибадәт нөвү тамамилә ҝөзә ҝөрүнән шејләрлә бағлы иди. Инсанлар каһинләри ҝөрүр вә јандырылан гурбанларын ијини һисс едирдиләр. Мәсиһчиликдә исә чох шеј фәргләнирди. Онларын Баш каһини Иса Мәсиһ иди, лакин артыг отуз ил иди ки, о, јер үзүнү тәрк етмишди (Ибраниләрә 4:14). Онларын мә’бәди варды, амма бу мә’бәдин мүгәддәс јери ҝөј иди (Ибраниләрә 9:24). Ганунда тәләб олунан һәрфи сүннәтдән фәргли олараг, мәсиһчиләрин сүннәти “руһән, үрәкдә” иди (Ромалылара 2:29). Бу сәбәбләрә ҝөрә дә Исанын јәһудиләрдән олан давамчыларына мәсиһчи иманы бир гәдәр мүҹәррәд ҝөрүнмәјә башлаја биләрди.

5. Павел, Исанын тә’сис етдији ибадәт системинин, Ганундакы ибадәт системиндән даһа үстүн олдуғуну неҹә ҝөстәрди?

⁵ Јәһудиләрдән олан мәсиһчиләрә, Мәсиһин тә’сис етдији ибадәт системи илә бағлы ваҹиб бир шеји ајдын баша дүшмәк лазым иди. Бу ибадәт системи, ҝөрүнән шејләрдән даһа чох имана әсасланмыш олса да, Муса пејғәмбәрин васитәсилә верилән Ганундан үстүн иди. Павел јазырды: “Әҝәр кечиләрин вә буғаларын ганы вә дүјәнин күлү мурдар оланларын үстүнә сәпиләндә, онлар тәгдис олунуб, бәдәнләри тәмиз олурса, демәли, әбәди Руһ васитәсилә Өзүнү гүсурсуз олараг Аллаһа тәгдим етмиш Мәсиһин ганы, јашајан Аллаһа ибадәт едә билмәниз үчүн виҹданынызы өлүм ҝәтирән ишләрдән нә гәдәр артыг тәмизләјәҹәкдир!” (Ибраниләрә 9:13, 14). Бәли, Иса Мәсиһин фидијә гурбанлығына иман сајәсиндә әлдә едилән бағышланма, Мусанын ганунуна әсасән ҝәтирилән гурбанлар васитәсилә бағышланмадан чох саһәдә үстүндүр (Ибраниләрә 7:26-28).

6, 7. а) Нәјә ҝөрә јәһудиләрдән олан мәсиһчиләр ешитдикләринә даһа диггәтли олмалы идиләр? б) Павелин Ибраниләрә мәктуб јаздығы вахт Јерусәлимин мәһвинә нә гәдәр галмышды? (Һашијәјә бахын.)

⁶ Иса һаггында ешитдикләринә хүсусилә диггәтли олмаг үчүн јәһудиләрдән олан мәсиһчиләрин даһа бир сәбәби варды. Мәсәлә ондадыр ки, Јерусәлимин мәһв олаҹағыны Иса әввәлҹәдән демишди. Будур онун сөзләри: “Сәни елә ҝүнләр ҝөзләјир ки, дүшмәнләрин сәни сәнҝәрләрлә әһатә едәҹәк, сәни мүһасирәјә алаҹаг вә һәр јердән сыхышдыраҹаглар, сәни вә ичиндәки ушагларыны јерлә јексан едәҹәкләр, сәнин ичиндә дашы даш үстә гојмајаҹаглар; чүнки сән Аллаһын сәнин јардымына ҝәлдији заманы дәрк етмәдин” (Лука 19:43, 44).

⁷ Бу нә заман баш вермәли иди? Иса нә ҝүн, нә дә саат һаггында һеч бир шеј демәди. Бунун әвәзинә белә бир ҝөстәриш верди: “Гошунларын Јерусәлими мүһасирә етдијини ҝөрдүјүнүз заман билин ки, онун виранәлијинин вахты јахынлашмышдыр. О заман Јәһудејада оланлар дағлара гачсынлар; шәһәрдә оланлар орадан чыхсынлар вә әтрафда оланлар ораја ҝирмәсинләр” (Лука 21:20, 21). Исанын бу сөзләриндән сонракы 30 ил әрзиндә Јерусәлимдә јашајан бә’зи мәсиһчиләр, ҝөрүнүр, ајыг олмамыш вә бу хәбәрдарлыға диггәт јетирмәмишдиләр. Онлар јола диггәт јетирмәјән сүрүҹүјә бәнзәјирдиләр. Әҝәр дүшүнҹә тәрзләрини дәјишмәсәјдиләр, бу, мүәјјән дәрәҹәдә фәлакәтә ҝәтириб чыхарарды. Онларын буну дәрк едиб-етмәмәләриндән асылы олмајараг, Јерусәлимин мәһви гачылмаз иди!a Үмид етмәк олар ки, Павелин мәсләһәти Јерусәлимдә руһән мүрҝүләјән һәмин мәсиһчиләри ојатмышды.

Даһа чох диггәтли олмаг — бу ҝүн нә демәкдир?

8. Аллаһ Кәламынын һәгигәтләринә нәјә ҝөрә даһа чох диггәтли олмалыјыг?

⁸ Биринҹи әсрин мәсиһчиләри кими, биз дә Аллаһ Кәламынын һәгигәтләринә даһа чох диггәтли олмалыјыг. Нәјә ҝөрә? Она ҝөрә ки, һансыса бир халгын дејил, бүтүн индики системин мәһви јахынлашыр (Вәһј 11:18; 16:14, 16). Әлбәттә, Јеһованын һансы ҝүндә вә саатда фәалијјәтә башлајаҹағындан бихәбәрик (Матта 24:36). Лакин ҝөзүмүзүн гаршысында “ахыр ҝүнләрдә” јашадығымызы ајдын шәкилдә сүбут едән Мүгәддәс Китаб пејғәмбәрликләри јеринә јетир (2 Тимотејә 3:1-5). Буна ҝөрә дә, диггәтимизи јајындыра биләҹәк һәр шејдән гачынмалыјыг. Аллаһын Кәламына диггәтли олмалы вә һансы зәманәдә јашадығымызы там дәрк етмәлијик. Јалныз о заман “бүтүн баш верәҹәк бу фәлакәтләрдән” гачына биләрик (Лука 21:36).

9, 10. а) Руһани шејләрә неҹә диггәт ҝөстәрә биләрик? б) Аллаһын Кәламы һансы мә’нада ‘јолумуза ишыг’ вә ‘аддымларымыза чырагдыр’?

⁹ Јашадығымыз бу сон дәрәҹә ваҹиб дөврдә руһани шејләрә неҹә даһа чох диггәт ајыра биләрик? Мәсәлән, мәсиһчи јығынҹагларында вә конгресләрдә мүнтәзәм сурәтдә иштирак етмәклә. Бундан әлавә, биз Мүгәддәс Китабы онун Мүәллифи олан Јеһоваја јахынлашмаг мәгсәдилә диггәтлә арашдырмалыјыг (Јагуб 4:8). Шәхси өјрәнмәнин вә јығынҹагларын васитәсилә Јеһова һаггында билик әлдә едириксә, мәзмурчу кими, биз дә Аллаһа дејә биләрик: “Сөзүн аддымларым үчүн чыраг вә јолум үчүн ишыгдыр” (Мәзмур 119:105).

¹⁰ Мүгәддәс Китаб, Аллаһын ҝәләҹәјә аид нијјәтләрини ачараг ‘јолумуза ишыг’ кими хидмәт едир. О, һәмчинин ‘аддымларымыза чырагдыр’, јә’ни чәтин вәзијјәтләрә дүшән заман нөвбәти аддымы атмагда бизә көмәк едир. Буна ҝөрә дә, тә’лим алмаг үчүн һәмиманлыларымызла бир јерә топлашанда, јахуд Мүгәддәс Китабы шәхсән охујан заман бизә даһа чох диггәтли олмаг ҝәрәкдир. Әлдә етдијимиз биликләр, мүдрик вә Аллаһа мәгбул гәрарлар гәбул етмәкдә бизә көмәк едәҹәкдир, бу да бизә фајда ҝәтирәҹәк, Аллаһы исә разы салаҹагдыр (Сүлејманын мәсәлләри 27:11; Ишаја 48:17). Бәс јығынҹаг ҝөрүшләри вә шәхси өјрәнмә заманы Аллаһын тә’лими бизә даһа чох фајда ҝәтирсин дејә, диггәтимизи неҹә артыра биләрик?

Јығынҹаг ҝөрүшләриндә даһа чох диггәтли олмаг

11. Нәјә ҝөрә мәсиһчи ҝөрүшләриндә диггәтлә гулаг асмаг бә’зән асан олмур?

¹¹ Мәсиһчи ҝөрүшләриндә диггәтлә гулаг асмаг бә’зән асан олмур. Мәсәлән, ағлајан ушаг, јахуд ҝөрүшә ҝеҹикән вә өзү үчүн јер ахтаран адам диггәтимизи асанлыгла јајындыра биләр. Узун иш ҝүнүндән сонра, јәгин ки, биз садәҹә олараг јорулмушуг. Ола билсин, сәһнәдә, натиглији илә сечилмәјән гардаш чыхыш едир вә будур, өзүмүз дә һисс етмәдән нә исә дүшүнмәјә, һәтта ола билсин мүрҝүләмәјә башлајырыг! Биз јығынҹаг ҝөрүшләриндә һәјати ваҹиб мә’луматын верилдијини нәзәрә алараг, програм вахты даһа диггәтли олмаға чалышмалыјыг. Бу саһәдә бизә нә көмәк едә биләр?

12. Ҝөрүшләрдә диггәтлә гулаг асмаға нә көмәк едә биләр?

¹² Јығынҹаглара јахшы һазырлашмаг ҝөрүш заманы диггәти ҹәмләшдирмәји адәтән асанлашдырыр. Бу сәбәбдән, нә үчүн мүзакирә олунаҹаг материалын үзәриндә дүшүнмәк үчүн әввәлҹәдән бир аз вахт ајырмајасан? Мәсәлән, һәр һәфтә үчүн Мүгәддәс Китабдан ајрылан фәсилләри охумаг вә үзәриндә дүшүнмәк үчүн һәр ҝүн ҹәми бир нечә дәгигә ајырмаг кифајәтдир. Бир аз да мүтәшәккил олсаг, һәм јығынҹағын китабөјрәнмәсинә, һәм дә “Ҝөзәтчи Гүлләси”нин өјрәнмәсинә һазырлашмаг үчүн дә вахт тапаҹағыг. Һансы графикә риајәт етсәк дә әмин ола биләрик ки, һазырлашмаг јығынҹаг ҝөрүшләри заманы диггәтлә гулаг асмаға көмәк едәҹәк.

13. Диггәтимизи, јығынҹагларда мүзакирә олунан материала ҹәмләшдирмәјә нә көмәк едә биләр?

¹³ Јахшы һазырлыгдан савајы, бә’зиләринин дедији кими, Падшаһлыг Залында сәһнәјә јахын әјләшмәк дә ҝөрүшләрдә диггәтли олмаға көмәк едир. Мә’рузәчијә бахмаг, охунан ајәләри Мүгәддәс Китабдан изләмәк вә гејдләр етмәк дә диггәтимизи топламаға көмәк едәҹәкдир. Лакин диггәти ҹәмләшдирмәјин нә гәдәр үсуллары олса да, ән ваҹиби дүзҝүн әһвал-руһијјәли үрәјә малик олмагдыр. Биз бирҝә кечирилән ҝөрүшләрин мәгсәдини анламалыјыг. Һәмиманлыларымызла бир јерә илк нөвбәдә Јеһоваја ибадәт етмәк үчүн топлашырыг (Мәзмур 26:12; Лука 2:36, 37). Јығынҹаглар бизим руһани ҹәһәтдән гидаланмағымызда да ваҹиб рол ојнајыр (Матта 24:45-47). Бундан әлавә, јығынҹагларын сајәсиндә “бир-биримизи мәһәббәтә вә хејирли ишләрә” тәшвиг етмәк имканымыз јараныр (Ибраниләрә 10:24, 25).

14. Әслиндә ҝөрүшләрин мәгсәди нәдән ибарәтдир?

¹⁴ Бә’зиләри ҝөрүшләрин кејфијјәтини чыхыш едәнләрин мүәллимлик баҹарығына ҝөрә гијмәтләндирмәјә мејлли ола биләрләр. Әҝәр сәһнәдә баҹарыглы натигләр чыхыш едирсә, онда ҝөрүшләр “мараглы” һесаб олунур. Амма, бизим нөгтеји-нәзәримизә ҝөрә, мә’рузәчиләрин тәҹрүбәси јохдурса, онда әкс фикир јараныр. Шүбһәсиз ки, чыхыш едәнләр өјрәтмәк баҹарығыны тәтбиг етмәли вә хүсусилә дә динләјиҹиләрин үрәјинә јол тапмаға чалышмалыдырлар (1 Тимотејә 4:16). Лакин бир динләјиҹи кими биз һәддиндән артыг тәнгиди јанашмалы дејилик. Чыхыш едәнләрин өјрәтмәк баҹарығы ваҹибдир, анҹаг ҝөрүшләрин мәгсәди јалныз бундан ибарәт дејил. Мәҝәр разы дејилсинизми ки, бизи илк нөвбәдә натигин өз мә’рузәсини нә дәрәҹәдә јахшы тәгдим етмәси дејил, һәмин мә’рузәни бизим нә дәрәҹәдә јахшы динләмәјимиз марагландырмалыдыр? Ҝөрүшә ҝәлмәклә вә орада тәгдим едиләнләри диггәтлә динләмәклә, биз Аллаһа Онун ирадәсинә мүвафиг тәрздә ибадәт етмиш олуруг. Ҝөрүшләрин дә мәгсәди мәһз бундан ибарәтдир. Әҝәр биз Аллаһ һаггында билик әлдә етмәјә ҹан атырыгса, мә’рузәчидән асылы олмајараг, һәр ҝөрүшдән фајда әлдә едәҹәјик (Сүлејманын мәсәлләри 2:1-5). Ҝәлин ҝөрүшләримиздә даһа чох диггәтлә гулаг асмаға чалышаг.

Шәхси өјрәнмәдән даһа чох фајда әлдә етмәк

15. Өјрәнмә вә өјрәндикләримизин үзәриндә дүшүнмә бизә нә заман фајда ҝәтирә биләр?

¹⁵ Әҝәр биз шәхси өјрәнмә вә өјрәндикләримизин үзәриндә дүшүнән заман даһа диггәтли оларыгса, бу мәшғулијјәтләр даһа чох фајда ҝәтирәр. Мүгәддәс Китабы вә она әсасланан нәшрләри диггәтлә охумағын сајәсиндә Аллаһ Кәламынын һәгигәтләри үрәјимизә һәкк олунаҹагдыр. Бу исә өз нөвбәсиндә давранышымыза вә дүшүнҹә тәрзимизә дәрин тә’сир ҝөстәрәҹәк. Биздә Јеһованын ирадәсини јерини јетирмәјә истәк ојанаҹагдыр (Мәзмур 1:2; 40:8). Буна ҝөрә дә, әҝәр өјрәнмәдән фајда әлдә етмәк истәјириксә, диггәтимизи ҹәмләшдирмәји өјрәнмәлијик, чүнки диггәтимиз асанлыгла јајына биләр. Телефон зәнҝ чалдыгда, сәс олдугда фикримиз дәрһал јајыныр. Һәтта бизә һеч нә мане олмаса да, ола билсин, фикримизи топламаг чәтиндир. Өјрәнмәјә руһани гиданы мәнимсәмәк нијјәтилә башласаг да, бир аз кечмәмиш фикримиз башга јерләрдә долаша биләр. Белә исә, Аллаһын Кәламыны шәхсән өјрәнән заман неҹә даһа чох диггәтли ола биләрик?

16. а) Шәхси өјрәнмә үчүн ҹәдвәл тутмаг нә үчүн ваҹибдир? б) Аллаһын Кәламыны өјрәнмәк үчүн сиз неҹә вахт тапырсыныз?

¹⁶ Шәхси ҹәдвәл тәртиб етмәк вә өјрәнмә үчүн даһа әлверишли јер сечмәк фајдалы оларды. Чохларымыз үчүн өзүнә вахт ајырмаг чәтиндир. Ҝүндәлик гајғылар уҹбатындан биз өзүмүзү шиддәтли селин апардығы балаҹа будаг кими һисс едә биләрик. Буна ҝөрә дә, мәҹази мә’нада десәк, биз ахынла мүбаризә апармалы вә сәссизлијин һөкм сүрдүјү балаҹа бир ада тапмалыјыг. Өјрәнмәк үчүн имканын өз-өзүнә јаранаҹағыны ҝөзләмәли дејилик. Бунун әвәзинә өјрәнмәјә вахт ајырараг вәзијјәтә галиб ҝәлмәлијик (Ефеслиләрә 5:15, 16). Бә’зиләри өјрәнмәјә сәһәрләр вахт ајырырлар, чүнки онда диггәтләрини аз шеј јајындара биләр. Башгалары үчүн ахшам вахтлары даһа мүнасибдир. Неҹә олурса-олсун, биз Аллаһ вә Онун Оғлу һаггында дәгиг билик әлдә етмәк тәләбатына е’тинасыз јанашмалы дејилик (Јәһја 17:3). Буна ҝөрә дә, ҝәлин шәхси өјрәнмә үчүн ҹәдвәл тутаг вә сонра да она риајәт едәк.

17. Дүшүнмәк нә демәкдир вә онун һансы фајдасы вар?

¹⁷ Дүшүнмә, јә’ни өјрәндикләримизин үзәриндә әтрафлы ҝөтүр-гој етмәк олдугҹа гијмәтлидир. Бунун сајәсиндә Аллаһын фикирләри јазылы сәһифәләрдән үрәкләримизә көчүрүлүр. Өјрәндикләримизин үзәриндә дүшүнмәк Мүгәддәс Китабын нәсиһәтләрини һәјатымызда неҹә тәтбиг етмәјә вә Аллаһ Кәламынын садәҹә динләјиҹиләри дејил, иҹрачылары да олмағымыза көмәк едир (Јагуб 1:22-25). Бу, һәмчинин Јеһоваја јахынлашмаға көмәк едир, чүнки Онун хүсусијјәтләри вә өјрәндијимиз мөвзуда һәмин хүсусијјәтләрин неҹә тәзаһүр олунмасы дүшүнмәнин әсас өзәјидир.

18. Фајдалы шәкилдә дүшүнмәк үчүн һансы шәраит тәләб олунур?

¹⁸ Өјрәнмә вә дүшүнмә даһа чох фајда ҝәтирсин дејә, нәјин исә диггәтимизи јајындырмасына јол вермәли дејилик. Дүшүнмә заманы јени мә’луматы мәнимсәјә биләк дејә, ҝүндәлик гајғыларын фикрини чәкмәкдән өзүмүзү бир аз узаглашдыраг. Әлбәттә, бунун үчүн вахт вә сакитлик тәләб олунур, анҹаг руһани гида вә Аллаһын Кәламында олан һәгигәт сују доғрудан да тәравәт ҝәтирир!

19. а) Бә’зиләринә шәхси өјрәнмә заманы диггәтләрини топламағы инкишаф етдирмәјә нә көмәк етмишдир? б) Биз өјрәнмәјә неҹә јанашмалыјыг вә бу ваҹиб мәшғулијјәт һансы фајданы ҝәтирир?

¹⁹ Бәс диггәтимизи бир јерә топламаг чәтиндирсә вә өјрәнмәјә башлајандан сонра диггәтимиз јајынырса неҹә? Диггәтли олмаг баҹарығыны инкишаф етдирмәк мүмкүндүр, мәсәлән, бә’зиләри өјрәнмә апармаг үчүн әввәлҹә аз вахт һәср етмәјин, сонра ҝет-ҝедә вахты артырараг мәшғулијјәти ҝенишләндирмәјин фајдалы олдуғуна әмин олублар. Мәгсәдимиз тәләсмәдән, диггәтлә өјрәнмәкдир. Өјрәндијимиз мөвзуја гаршы ҝүҹлү мараг инкишаф етдирмәлијик. Сонракы тәдгигат үчүн исә биз садиг вә ағыллы гулун тәгдим етдији чохсајлы материаллардан истифадә едә биләрик. “Аллаһын дәрин дүшүнҹәләринә” нәзәр јетирмәкдә бөјүк фајда вар (1 Коринфлиләрә 2:10). Беләликлә, Аллаһ һаггында билијимизи артыраҹаг вә дәркетмә габилијјәтимизи инкишаф етдирәҹәјик (Ибраниләрә 5:14). Әҝәр Аллаһын Кәламыны лајигинҹә өјрәнириксә, башгаларыны да “өјрәтмәјә габил ола биләҹәјик” (2 Тимотејә 2:2).

20. Јеһова Аллаһла сых мүнасибәти неҹә инкишаф етдириб, горуја биләрик?

²⁰ Мәсиһчи ҝөрүшләри вә шәхси өјрәнмә, Јеһова илә сых мүнасибәт инкишаф етдириб, ону горумагда бизә чох көмәк едәҹәкдир. Аллаһа “шәриәтини нә гәдәр севирәм! Бүтүн ҝүн дүшүнҹәм одур” дејә охујан мәзмурчу да, ҝөрүнүр, бу ҹүр мүнасибәтә малик иди (Мәзмур 119:97). Буна ҝөрә дә ҝәлин, мүнтәзәм олараг јығынҹаг ҝөрүшләриндә вә конгресләрдә иштирак едәк. Бундан әлавә, Мүгәддәс Китабы охумаг вә үзәриндә дүшүнмәк үчүн дә вахт ајыраг. Буну етмәклә, биз Аллаһын Кәламына даһа чох диггәтли олаҹаг вә бол-бол не’мәтләр әлдә едәҹәјик.

[Һашијә]

Хатырлајырсынызмы?

• Нәјә ҝөрә јәһудиләрдән олан мәсиһ­чиләр һәгиги имандан узаглашмаға башламышдылар?

• Мәсиһчи ҝөрүшләри заманы неҹә диггәтли ола биләрик?

• Мүгәддәс Китабы шәхси өјрәнмәкдән вә үзәриндә дүшүнмәкдән фајда әлдә етмәкдә бизә нә көмәк едәҹәк?

[9-ҹу сәһифәдәки шәкил]

Јәһуди мәсиһчиләринә Јерусәлимин гачылмаз мәһвини ҝөзләјәрәк ајыг олмаг лазым иди.

[11-ҹи сәһифәдәки шәкил]

Валидејнләр ушагларына мәсиһчи ҝөрүшләриндән фајда әлдә етмәјә көмәк едә биләрләр.