“Иблисә... гаршы дурун”
“Иблисә... гаршы дурун вә о, сиздән гачаҹагдыр” (ЈАГУБ 4:7).
1. Мүасир дүнја һаггында нә демәк олар вә нәјә ҝөрә мәсһ едилмишләрә вә онларын һәмкарларына ојаг олмаг ҝәрәкдир?
“АЛЛАҺ гејб олмуш, Иблис исә галмышдыр”. Франсыз мүәллифи Андре Малронун бу сөзләри, јашадығымыз дүнјанын вәзијјәтинә тамамилә ујғундур. Инсанларын әмәлләриндә Аллаһын ирадәсиндән чох Иблисин һијләләри тәзаһүр олунур. Шејтан инсанлары “там гүдрәтлә, әламәтләр вә јаланчы харигәләрлә вә һәлак оланлары алдадан һәр нөв писликлә” дүз јолдан чыхарыр (2 Салониклиләрә 2:9, 10). Анҹаг о, бу “ахыр ҝүнләрдә” “Аллаһын әмрләринә риајәт едиб, Исаја олан шәһадәтләринә бағлы галан” мәсһ едилмиш мәсиһчиләрлә вурушараг, бүтүн гүввәсини Аллаһын һәср олунмуш хидмәтчиләринә гаршы јөнәлдир (2 Тимотејә 3:1; Вәһј 12:9, 17). Демәли, Аллаһын бу мәсһ едилмиш хидмәтчиләринә вә онларын јер үзүндә јашамаг үмидинә малик олан һәмкарларына ојаг олмаг ҝәрәкдир.
2. Шејтан Һәвваны неҹә јолдан чыхарды вә һәвари Павел нәдән горхдуғуну билдирди?
2 Шејтан башдан ајаға јаланчыдыр. О, иландан истифадә едәрәк, Һәвваны һијләҝәрликлә инандырды ки, Аллаһдан асылы олмамаг ону даһа хошбәхт едәҹәкдир (Тәквин 3:1-6). Тәхминән дөрд мин ил кечдикдән сонра, Павел Коринфдә јашајан мәсһ едилмиш мәсиһчиләрин Шејтанын һијләҝәрлијинин гурбаны ола биләҹәкләринә даир тәшвишини билдирди. Павел јазырды: “Илан Һәвваны өз һијләҝәрлији илә неҹә алдатдыса, горхурам ки, сизин дүшүнҹәләриниз, неҹә олурса-олсун, Мәсиһә олан садә вә тәмиз сәдагәтиниздән узаглашараг, позулсун” (2 Коринфлиләрә 11:3). Шејтан инсанларын ағлыны корлајыр, онларын дүшүнҹәләрини тәһриф едир. О, Һәвваны јолдан чыхартдығы кими, мәсиһчиләри дә јанлыш нәтиҹәјә ҝәлмәјә тәшвиг едә биләр ки, ҝуја онларын хошбәхтлији Јеһованын вә Оғлунун бәјәнмәдикләри шејдән асылыдыр.
3. Јеһова Иблисдән горунмаг үчүн һансы мүдафиәни тәгдим едир?
3 Шејтаны, һеч нәдән хәбәрсиз олан гурбаны тутмаг үчүн тәләләр гуран овчу илә мүгајисә етмәк олар. Шејтанын тәләләриндән гачынмаг үчүн, биз “Уҹа Оланын өртүјүндә” — Јеһованын һөкмранлыг һүгугуну е’тираф етдикләрини әмәлләриндә ҝөстәрән кәсләрә Онун вердији символик сығынаҹагда јашамалыјыг (Мәзмур 91:1-3). “Иблисин һијләләринә гаршы дура билмәк үчүн” Аллаһын өз Кәламы, мүгәддәс руһу вә тәшкилаты васитәсилә тәгдим етдији һәр ҹүр мүдафиәјә еһтијаҹ дујуруг (Ефеслиләрә 6:11). “Һијлә” кими тәрҹүмә едилмиш јунан сөзү, һәмчинин “фәнд”, “кәләк” мә’наларыны да верә биләр. Шүбһәсиз ки, Јеһованын хидмәтчиләрини тәләјә салмаға чалышараг, Иблис мүхтәлиф фәнд вә кәләкләрдән истифадә едир.
Шејтанын илк мәсиһчиләр үчүн гурдуғу тәләләр
4. Илк мәсиһчиләр неҹә мүһитдә јашајырдылар?
4 Ерамызын биринҹи вә икинҹи әсринин мәсиһчиләри Рома империјасынын чичәкләнән дөврүндә јашајырдылар. “Пах Романа”, јә’ни Рома дүнјасы тиҹарәтин инкишафы үчүн шәраит јаратмышды. Бу инкишафын сајәсиндә идарә органларынын чохлу бош вахты јаранмышды вә рәһбәрләр үсјанын гаршысыны алмаг мәгсәдилә, халг күтләләринин кифајәт гәдәр әјләнҹәләри олмасынын гејдинә галмышдылар. Бир мүддәт бајрамларын сајы иш ҝүнләринин сајына бәрабәр олмушду. Рәһбәрләр дөвләтин һесабына халгын чөрәјә вә тамашалара олан тәләбатыны өдәјирди, беләликлә, халгын гарны тох, өзү дә һеч нәјин дәрдини чәкмирди.
5, 6. а) Нәјә ҝөрә Романын театр вә амфитеатрларына ҝетмәк мәсиһчиләрә јарашмырды? б) Шејтан һансы тәләјә әл атырды вә мәсиһчиләр ондан неҹә гачына биләрдиләр?
5 Белә бир вәзијјәт илк мәсиһчиләр үчүн тәһлүкә јарадырдымы? Һәвариләрин өлүмүндән сонра јазылан әсәрләрдәки хәбәрдарлыглара ҝөрә (мәсәлән, Тертуллианын әсәрләриндә), о заман асудә вахтларда кечирилән әјләнҹәләрин чоху мәсиһчиләр үчүн әхлаги вә руһани ҹәһәтдән мүхтәлиф тәһлүкәләр јарадырды. Мисал үчүн, бајрам вә ојунларын әксәријјәти бүтләрин шәрәфинә кечирилирди (2 Коринфлиләрә 6:14-18). Театрлара ҝәлдикдә исә, һәтта классик пјесләрин чоху ифрат дәрәҹәсинә чатмыш әхлагсызлыгла, јахуд гәддарлыг вә ган төкүлмәси илә мүшајиәт олунан сәһнәләрлә долу иди. Вахт кечдикҹә классикаја олан тамашачы марағы нәзәрә чарпаҹаг дәрәҹәдә азалды вә классик пјесләр ачыгҹа ҝөстәрилән ијрәнҹ тамашаларла — пантомималарла әвәз олунду. Тарихчи Жером Каркопино “Гәдим Романын ҝүндәлик һәјаты” (“Daily Life in Ancient Rome”) адлы китабында јазыр: “Бу ҹүр пјесләрдә ојнајан актрисалара бүсбүтүн сојунмаға иҹазә верилирди... Ган су јеринә ахырды. [...] Пајтахтын сакинләрини фәтһ едән позғунлуғун [пантомималарда] һәдди-һүдуду јох иди. Амма бүтүн бунлар инсанлар үчүн ијрәнҹ дејилди, чүнки амфитеатрларда ган төкүлмәси илә мүшајиәт олунан дәһшәтли сәһнәләр артыг чохдан онларын һиссләрини дондурмуш вә инсани дујғуларыны өлдүрмүшдү” (Матта 5:27, 28).
6 Амфитеатрларда гладиаторлар ја бир-бирләри илә, ја да һејванларла өлүнҹәјә гәдәр вурушурдулар. Мәһкум едилмиш ҹинајәткарлары јыртыҹы һејванларын ағзына атырдылар, сонралар бир чох мәсиһчиләр дә буна мә’руз галмышлар. Артыг кечмишдә Шејтанын тәләси ондан ибарәт иди ки, инсанларын әхлагсызлыға вә зоракылыға нифрәтини о дәрәҹәдә күтләшдирсин ки, ҝениш тамашачы күтләси үчүн бүтүн бунлар ади вә арзу олунан һал олсун. Бу тәләдән гачынмағын јеҝанә јолу, үмумијјәтлә театр вә амфитеатрлара ҝетмәмәк иди (1 Коринфлиләрә 15:32, 33).
7, 8. а) Араба јарышларына ҝетмәк нәјә ҝөрә мәсиһчиләр үчүн ағылсызлыг оларды? б) Шејтан Рома һамамларындан мәсиһчиләр үчүн тәлә кими неҹә истифадә едә биләрди?
7 Сирк адланан бөјүк узунсов мејданларда кечирилән араба јарышлары, шүбһәсиз ки, олдугҹа мараглы иди, анҹаг бу әјләнҹәләр мәсиһчиләр үчүн мүнасиб дејилди, чүнки тамашачылар әксәр һалларда өзләриндән чыхырдылар. ЫЫЫ әсрдә јашамыш бир мүәллифин јаздығына ҝөрә тамашачылар арасында дава дүшүрдү. Тарихчи Каркопинонун тәсдиг етдијинә ҝөрә исә, сиркин пәрдәси алтында “мүнәҹҹимләр вә фаһишәләр өз хидмәтләрини тәклиф едирдиләр”. Ајдындыр мәсәләдир ки, Рома сиркләри мәсиһчиләрин јери дејилди (1 Коринфлиләрә 6:9, 10).
8 Бәс мәшһур Рома һамамлары һаггында нә демәк олар? Әлбәттә ки, јујунмағын өзү һеч дә пис дејилди. Лакин нәзәрә алмаг лазымдыр ки, Рома һамамларынын чоху өзүнә масаж отаглары, идман заллары, гумарханалар вә ашханалар дахил едән бөјүк мәркәзләр иди. Бахмајараг ки, нәзәри олараг гадынлар вә кишиләр үчүн мүхтәлиф вахтлар тә’јин едилмишди, чох вахт киши вә гадынларын бирликдә чиммәкләринә дә јол верилирди. Искәндәријјәли Климент јазырды: “Һамамларын гапысы һәм кишиләрин, һәм дә гадынларын үзүнә ачыг иди; орада онлар чылпаг ҝәзир вә әхлагсызлыгла мәшғул олурдулар”. Беләликлә, Шејтан ләјагәтли јерләри Аллаһын хидмәтчиләри үчүн асанлыгла тәләјә дөндәрирди. Мүдрик мәсиһчиләр бу ҹүр јерләрә ҝетмирдиләр.
9. Илк мәсиһчиләр һансы тәләләрдән гачынмалы идиләр?
9 Рома империјасынын чичәкләнән дөврүндә ромалыларын ән севимли әјләнҹәләриндән бири гумар ојунлары иди. Илк мәсиһчиләр араба јарышларында ортаја пул гојмагдан гачынмаг үчүн садәҹә олараг сиркләрә ҝетмәли дејилдиләр. Ашхана вә мејханаларда ганунсуз гумар ојунлары үчүн нәзәрә чарпмајан отаглар мөвҹуд иди. Ојунчулар, ојунун иштиракчыларындан биринин әлиндә тутдуғу дашларын вә ја ашыгларын ҹүт вә тәк сајлары үчүн ортаја пул гојурдулар. Гумар ојунлары асан ҝәлир вә’д етдији үчүн һәјата дад верирди (Ефеслиләрә 5:5). Бундан әлавә, белә мејханаларда ишләјән гадынлар әксәрән фаһишәләр олурду; јә’ни һәр шеј гыраға, белә јерләр өзүнә ҹинси әхлагсызлыг тәһлүкәсини дә дахил едирди. Бүтүн бунлар, Рома империјасынын шәһәрләриндә јашајан мәсиһчиләр үчүн Шејтанын гурдуғу бә’зи тәләләрдир. Демәк олармы ки, бизим ҝүнләрдә һәр шеј тамам башга ҹүрдүр?
Шејтанын мүасир тәләләри
10. Буҝүнкү шәраит Рома империјасы дөврүндә јаранмыш вәзијјәти неҹә хатырладыр?
10 Јүзилликләр өтмүш, лакин Шејтанын кәләкләри үмумиликдә дәјишмәмишдир. Шејтан Коринф шәһәриндә јашајан мәсиһчиләрә “үстүн ҝәлмәсин” дејә, һәвари Павел онлара, дүшүнмәјә вадар едән нөвбәти сөзләрлә мүраҹиәт едиб деди: “Онун [Шејтанын] фитнәләриндән хәбәрсиз дејилик” (2 Коринфлиләрә 2:11). Бу ҝүн бир чох инкишаф етмиш өлкәләрин вәзијјәти, Рома империјасынын чичәкләнән дөврүндә јаранан вәзијјәтә охшајыр. Бир чох инсанларын һәмишә олдуғундан даһа чох бош вахтлары вар. Дөвләт лотерејалары, һәтта касыблара белә аз да олса үмид верир. Инсанларын бејни дәјәрсиз әјләнҹәләрлә мәшғулдур. Стадионлар ағзына кими долудур, ҹамаат гумар ојунларына гуршаныб. Һәрдән тамашачылар, чох вахт исә ојунчулар да өзләриндән чыхырлар. Һәр тәрәфдән тәһгиредиҹи мусиги ешидилир, театр сәһнәләриндән, телевизија екранлардан вә кинотеатрлардан ијрәнҹ тамашалар әскик олмур. Һәлә чылпаглар үчүн чимәрликләр бир јана, бә’зи өлкәләрдә үмуми сауналар вә гајнар чешмәләрдә ҹиммәк ҝениш јајылыб. Биринҹи әсрин мәсиһчилик дөврүндә олдуғу кими, Шејтан бу дүнјада гәбул едилән истираһәт нөвләринин васитәсилә Аллаһын хидмәтчиләрини јолдан чыхармаға чалышыр.
11. Истираһәт етмәк истәји өзүнә һансы тәләләри дахил едир?
11 Стрессин ади һал олдуғу бир дүнјада јашајаркән, истираһәтә, ҝүндәлик гајғылардан узаглашмаға тәләбат дујмаг тамамилә тәбиидир. Анҹаг илк мәсиһчиләр үчүн тәһлүкә јарадан Рома һамамлары кими, бә’зи истираһәт вә курорт јерләри дә тәләјә чеврилиб, белә ки, бу ҹүр јерләрдә Шејтан мүасир мәсиһчиләри әхлагсызлыға вә спиртли ичкиләрдән суи-истифадә етмәјә вадар едир. Павел Коринфдәки мәсиһчиләрә јазырды: “Алданмајын: пис достлуг јахшы әхлагы позар. Неҹә лазымса, ајылын вә ҝүнаһ ишләтмәјин... бә’зиләри Аллаһы һеч танымыр” (1 Коринфлиләрә 15:33, 34).
12. Јеһованын хидмәтчиләрини тәләјә салмаг үчүн бу ҝүн Шејтан һансы кәләкләрә әл атыр?
12 Шејтанын Һәвванын дүшүнҹәсини һијләҝәрликлә поздуғуну ҝөрдүк (2 Коринфлиләрә 11:3). Бу ҝүн Иблис даһа бир тәләдән истифадә едир. О, мәсиһчиләри инандырмаға чалышыр ки, инсанларын һәгигәти гәбул етмәләри үчүн, онлар Јеһованын Шаһидләринин башгаларындан фәргләнмәдијини ҝөстәрмәјә чалышмалыдырлар. Бә’зән бу ҹүр мәсиһчиләр һәддиндән артыг сә’ј ҝөстәрир вә һәр шеј әксинә алыныр (Һаггај 2:12-14). Шејтанын даһа бир тәләси, Аллаһа һәср едилмиш һәм ҝәнҹ, һәм дә јашлы мәсиһчиләри икили һәјат сүрмәјә вә бунунла да ‘Аллаһын Мүгәддәс Руһуну кәдәрләндирмәјә’ тәһрик етмәкдир (Ефеслиләрә 4:30). Бә’зиләри Интернетдән суи-истифадә едәрәк бу тәләјә дүшүбләр.
13. Иблисин кәләкләринә даһа һансы маскаланмыш тәлә дахилдир вә “Сүлејманын мәсәлләри” китабында буна аид һансы мәсләһәт вар?
13 Шејтанын даһа бир тәләси — маскаланмыш оккултизмдир. Әлбәттә, Исанын һәгиги давамчыларындан һеч ким билә-билә Сатанизмлә, јахуд спиритизмлә мәшғул олмајаҹагдыр. Лакин бә’зиләри һеч өзләри дә дәрк етмәдән, филмләрдә, сериалларда, видео ојунларында вә һәтта ушаглар үчүн китабларда вә комик журналларда әкс олунан зоракылыға вә сеһирбазлыға ҝәлдикдә еһтијаты әлдән бурахырлар. Оккултизм “гохусу” верән һәр шејдән узаг дурмаг ҝәрәкдир. Мүдрик бир мәсәл белә сәсләнир: “Шәр јол тиканлыдыр, орада тәлә вар, ҹаныны горујан бундан узаглашар” (Сүлејманын мәсәлләри 22:5, МКШ). Шејтан “бу әсрин танрысы” олдуғу үчүн, чох популјар олан һәр бир шејин архасында әслиндә онун тәләләриндән бири дура биләр (2 Коринфлиләрә 4:4; 1 Јәһја 2:15, 16).
Иса Иблисә гаршы дурду
14. Иса Иблисин илк имтаһанына неҹә гаршы дурду?
14 Иса Иблисә гаршы дурмаға вә ону гачмаға мәҹбур етмәјә даир ҝөзәл нүмунә верди. Иса вәфтиз олунуб 40 ҝүн әрзиндә оруҹ тутдугдан сонра Шејтан ону имтаһан етди (Матта 4:1-11). Илк имтаһан Исанын оруҹдан сонра дујдуғу тәбии аҹлыг һисси үчүн нәзәрдә тутулмушду. Шејтан Исаја физики тәләбатыны өдәмәк үчүн илк мө’ҹүзәсини ҝөстәрмәји тәклиф етди. Анҹаг Иса Тәснијә 8:3 ајәсини ситат ҝәтирәрәк, имканларындан шәхси мәгсәдләриндә истифадә етмәкдән имтина етди вә руһани гиданын физики гидадан ваҹиб олдуғуну ҝөстәрди.
15. а) Шејтан Исаны имтаһана чәкән заман онун һансы тәбии һиссләри илә ојнајырды? б) Шејтанын бу ҝүн Аллаһын хидмәтчиләринә гаршы ән чох тәтбиг етдији әсас һијләҝәр үсуллардан бири һансыдыр, лакин биз она неҹә гаршы дура биләрик?
15 Бу имтаһанла бағлы мараглы олан одур ки, Иблис Исаны ҹинси әхлагсызлыға тәһрик етмәјә чалышмады. Бу вәзијјәтдә гидаја олан ән зәрури еһтијаҹ, јә’ни аҹлыг һисси, Шејтана Исаны имтаһан етмәк үчүн истифадә едилән ән ҝүҹлү истәк ҝөрүндү. Бәс Иблис бу ҝүн Аллаһын халгыны тәләјә салмаг үчүн һансы имтаһанлардан истифадә едир? Онлар чохлу вә мүхтәлифдир, лакин Јеһованын хидмәтчиләринин нөгсансызлығыны позмаг үчүн онун истифадә етдији әсас сынаглардан бири ҹинси әхлагсызлыгдыр. Исаны тәглид едәрәк, биз Иблисә гаршы дурар вә сынаглара мүгавимәт ҝөстәрә биләрик. Мүгәддәс Јазылардан мүвафиг ајәләри хатырлајараг Шејтанын тәклифини рәдд едән вә онун сүбутларыны јалана чыхаран Иса кими, имтаһанларла гаршылашан заман биз дә Тәквин 39:9 вә 1 Коринфлиләрә 6:18 ајәләрини хатырлаја биләрик.
16. а) Шејтан икинҹи дәфә Исаны неҹә имтаһана чәкди? б) Јеһованы сынамаға тәшвиг едәрәк, Шејтан бизи неҹә имтаһан едә биләр?
16 Сонра Иблис Исаны тәшвиг етди ки, Аллаһын ону мәләкләр васитәсилә мүдафиә едиб-етмәјәҹәјини сынамаг үчүн өзүнү мә’бәдин гүлләсиндән атсын. Иса Тәснијә 6:16 ајәсини ситат ҝәтирәрәк Атасыны сынамагдан имтина етди. Чәтин ки, Шејтан бизи мә’бәдин гүлләсиндән атылмаға тәһрик етсин, лакин о, бизи Јеһованы башга јолларла сынамаға тәшвиг едә биләр. Һеч бир мәсләһәт алмадан ҝејим вә хариҹи ҝөрүнүшдә дүнјанын кечиҹи дәбинә ујғунлашмаға һәвәс дујуругму? Јохса шүбһәли әјләнҹәләрә алудә олмаға мејллијик? Бу заман, ола билсин, Јеһованы сынајырыг. Әҝәр биздә бу ҹүр һәвәсләр варса, Шејтан биздән узаглашмаг әвәзинә, бизимлә галаҹаг вә дурмадан бизи өз тәрәфинә әјмәјә чалышаҹагдыр.
17. а) Иблис Исаны үчүнҹү дәфә неҹә имтаһан етди? б) Бизимлә әлагәдар Јагуб 4:7 ајәси өзүнү неҹә доғрулда биләр?
17 Шејтан Исаја јеҝанә ибадәти дүнјанын бүтүн падшаһлығына дәјишмәји тәклиф етдикдә, Иса Мүгәддәс Јазылары ситат ҝәтириб, јалныз вә јалныз өз Атасына ибадәт етмәјә гәтијјәтли олдуғуну ҝөстәрәрәк јенидән она гаршы дурду (Тәснијә 5:9; 6:13; 10:20). Чәтин ки, Шејтан дүнјанын бүтүн падшаһлығыны бизә тәклиф етсин, лакин мадди рифаһын парлаглығы илә, санки кичик падшаһлығымызы ҝөстәрәрәк, бизи һәмишә имтаһан едир. Биз Јеһоваја сонсуз сәдагәт ҝөстәрәрәк Иса кими давранырыгмы? Әҝәр еләдирсә, онда Исанын јашадығыны биз дә јашајаҹағыг. Маттанын Мүждәсиндә дејилир: “О вахт иблис Ону тәрк етди” (Матта 4:11). Бу вә ја диҝәр һадисәдә Мүгәддәс Китабдан мүвафиг принсипләри јадымыза салыб, һәјатда онлара риајәт едәрәк Шејтана гәтијјәтлә гаршы дурсаг, о, бизи тәрк едәҹәкдир. Шаҝирд Јагуб јазырды: “Иблисә... гаршы дурун вә о, сиздән гачаҹагдыр” (Јагуб 4:7). Бир мәсиһчи Франсада Јеһованын Шаһидләринин филиалына јазмышды: “Шејтан һәгигәтән дә һијләҝәрдир. Ҝөзәл нијјәтләрим олса да, һиссләрими вә истәкләрими ҹиловламаг мәнә чох чәтиндир. Бунунла белә, ҹәсарәтлилијин, сәбрин, башлыҹасы исә Јеһованын көмәјинин сајәсиндә һәр шејә таб ҝәтирмәк вә һәгигәтдән мөһкәм јапышмаг мәнә мүјәссәр олур”.
Иблисә гаршы дурмаг үчүн там тәҹһиз едилмишләр
18. Иблисә гаршы дурмаг үчүн һансы руһани зиреһләр бизә көмәк едир?
18 Јеһова, “Иблисин һијләләринә гаршы” дура билмәмиз үчүн бизә бүтүн руһани зиреһләри верир (Ефеслиләрә 6:11-18). Һәгигәтә олан мәһәббәтимиз белимизә гуршагдыр. Белә мәһәббәт бизи мәсиһчи фәалијјәтинә һазырлајыр. Јеһованын тә’јин етдији әдаләт нормаларына риајәт етмәјә олан гәтијјәтимиз үрәјимизи горујан зиреһ олаҹагдыр. Әҝәр ајагларымыз сүлһ Мүждәсини ҝејәрсә, бизи руһән мөһкәмләндирән вә мүдафиә едән тәблиғ ишиндә мүнтәзәм олараг иштирак едәҹәјик. Мөһкәм иманымыз ‘шејтанын гызмар охларындан’, јә’ни онун һијләҝәр һүҹум вә имтаһанларындан мүдафиә едән бөјүк галхана бәнзәр олаҹаг. Јеһованын вә’дләринин јеринә јетәҹәјинә олан мөһкәм үмидимиз, дүшүнҹәмизи горујан вә бизә көнүл раһатлығы ҝәтирән дәбилгә кими олаҹагдыр (Филипилиләрә 4:7). Әҝәр биз Мүгәддәс Китабы усталыгла истифадә етмәји өјрәнсәк, Аллаһын Кәламы, инсанларын Шејтанын руһани көләлијиндән азад олмаларына көмәк етмәк үчүн гылынҹа чевриләҹәкдир. Иса имтаһанла гаршылашанда етдији кими, биз дә бу гылынҹдан өзүмүзү мүдафиә етмәк үчүн истифадә едә биләрик.
19. ‘Иблисә гаршы дурмагдан’ савајы даһа нә лазымдыр?
19 Әҝәр һәмишә ‘Аллаһын бүтүн зиреһләрини ҝејинириксә’ вә даима дуа едириксә, Шејтан бизә һүҹум етдикдә, Јеһованын мүдафиәсинә әмин ола биләрик (Јәһја 17:15; 1 Коринфлиләрә 10:13). Лакин Јагуб ҝөстәрир ки, ‘Иблисә гаршы дурмагла’ һәр шеј битмир. Биз, һәмчинин гајғымыза галан ‘Аллаһа табе олмалыјыг’ (Јагуб 4:7, 8). Буну неҹә едә биләҹәјимиз һаггында сөһбәт нөвбәти мәгаләдә ҝедәҹәкдир.
Сиз неҹә ҹаваб верәрдиниз?
• Илк мәсиһчиләр Шејтанын һансы тәләләриндән гачынмалы идиләр?
• Јеһованын хидмәтчиләрини тәләјә салмаг үчүн Шејтан бу ҝүн һансы кәләкләрдән истифадә едир?
• Иса Иблисин имтаһанларына неҹә гаршы дурду?
• Иблисә гаршы дурмаг үчүн һансы руһани зиреһләр бизә көмәк едир?
[8 вә 9-ҹу сәһифәләрдәки шәкил]
Иса гәтијјәтлә Иблисә гаршы дурду.
[10-ҹу сәһифәдәки шәкилләр]
Биринҹи әсрин мәсиһчиләри гәддарлыгла долу, әхлагсыз әјләнҹәләри рәдд едирдиләр.
[Иҹазә илә]
The Complete Encyclopedia of Illustration/J. G. Heck