Мәсиһчиләр бир-бирләринә лазымдырлар
“Биз бир-биримизин үзвләријик” (ЕФЕСЛИЛӘРӘ 4:25, И–93).
1. Бир енсиклопедијада инсан бәдәни һаггында нә дејилир?
ИНСАН бәдәни һәгигәтән дә мө’ҹүзәдир! “Уорлд бук” енсиклопедијасында дејилир: “Инсанлар һәрдән инсан бәдәнини бир заман јарадылмыш механизмләрдән ән валеһедиҹиси адландырырлар. Әлбәттә ки, инсан бәдәни механизм дејил. Лакин чох шејдә механизмлә мүгајисә олуна биләр. Мәсәлән, һәм бәдән, һәм дә механизм чохлу һиссәләрдән ибарәтдир вә һиссәләрин һәр бири мүәјјән функсијаны јеринә јетирир. Лакин бүтүн һиссәләр бирликдә фәалијјәт ҝөстәрир, бу исә һәм бәдәнин, һәм дә механизмин ишинин һәмаһәнҝ олмасына сәбәб олур”.
2. Инсан бәдәни вә мәсиһчи јығынҹағы нәдә бәнзәрдир?
2 Бәли, инсан бәдәни бир чох һиссәләрдән, јә’ни үзвләрдән ибарәтдир вә онлардан һәр бири һансыса фајдалы иши ҝөрүр. Һеч бир дәнә дә лазымсыз вена, әзәлә, јахуд бәдәнин башга бир үзвү јохдур. Буну мәсиһчи јығынҹағы һаггында да демәк олар, јығынҹағын һәр бир үзвү онун руһани сағламлығы вә ҝөзәллији үчүн мүәјјән бир иши ҝөрә биләр (1 Коринфлиләрә 12:14-26). Әлбәттә, мәсиһчиләрин һеч бири өзүнүн башгаларындан јахшы олдуғуну дүшүнмәмәли, диҝәр тәрәфдән исә, һеч ким өзүнү лазымсыз һесаб етмәли дејил (Ромалылара 12:3).
3. Ефеслиләрә 4:25 ајәсиндә мәсиһчиләрин бир-бирләринә лазым олдуғу неҹә ҝөстәрилир?
3 Инсан бәдәнинин бир-бириндән асылы олан үзвләри кими, мәсиһчиләр дә бир-бирләринә лазымдырлар. Һәвари Павел руһла мәсһ едилмиш һәмиманлыларына јазырды: “Јаланы атын, һәр бириниз өз гоншусуна һәгигәти сөјләсин; чүнки биз бир-биримизин үзвләријик” (Ефеслиләрә 4:25, И–93). Руһани Исраилин нүмајәндәләри бир-бирләринин, јә’ни “Мәсиһин бәдәнинин” үзвләри олдугларына ҝөрә, бир-бирләринә һәгигәти сөјләјирләр вә онларын давранышлары тамамилә һәмаһәнҝдир. Бәли, онларын һәр бири диҝәринә мәхсусдур (Ефеслиләрә 4:11-13). Јер үзүндә јашамаг үмидинә малик олан вә әмәкдашлыг етмәјә һазыр олан салеһләр бөјүк мәмнунијјәтлә онлара гошулублар.
4. Һәгигәти јени өјрәнәнләрә неҹә көмәк етмәк олар?
4 Һәр ил, јер үзүндә ҹәннәтдә јашамаг үмидинә малик олан минләрлә инсанлар вәфтиз олунур. Јығынҹағын үзвләри онлара ‘камиллијә доғру тәрәгги етмәкдә’ көмәк ҝөстәрмәјә һазырдырлар (Ибраниләрә 6:1-3). Бу ҹүр көмәјә, онларын Мүгәддәс Китаба даир суалларына ҹаваб вермәк вә ја хидмәт заманы практики јардым ҝөстәрмәк дә дахил ола биләр. Јени ҝәләнләрә, мәсиһчи јығынҹагларында мүнтәзәм иштиракымызла ҝөзәл нүмунә верәрәк көмәк етмиш олуруг. Һәр һансы фәлакәт баш вердикдә, онлары руһландыра вә ја онлара тәсәлли верә биләрик (1 Салониклиләрә 5:14, 15). Башгаларына ‘һәгигәтдә јеримәјә’ көмәк етмәк үчүн имканлар ахтармалыјыг (3 Јәһја 4, И–93). Ҝәнҹ, јахуд јеткин олмамыздан, һәгигәтдә јени вә ја артыг узун илләр јеримәјимиздән асылы олмајараг, һәр биримиз һәмиманлыларымызын руһани рифаһына көмәк едә биләрик. Биз онлара лазымыг.
Онлар һәмиманлыларына јардым едирдиләр
5. Акила вә Прискила Павелә неҹә көмәк етмишдиләр?
5 Мәсиһчи әр-арвадлары да һәмиманлыларына јардым етмәкдән мәмнунлуг дујурлар. Мисал үчүн, Акила вә онун арвады Прискила (Приска) Павелә көмәк етмишдиләр. Онлар Павели евләринә гәбул етмиш, онунла бәрабәр чадырларын һазырланмасында чалышмыш вә Коринф шәһәриндә јаранмыш јени јығынҹағы инкишаф етдирмәкдә она көмәк ҝөстәрмишдиләр (Һәвариләрин ишләри 18:1-4). Һадисәнин неҹә баш вердији бизә мә’лум олмаса да, онлар Павелә ҝөрә һәтта һәјатларыны тәһлүкә алтына атмышдылар. Павел ромалы мәсиһчиләрә мәктуб јазанда Акила вә Прискила Ромада јашајырдылар: “Мәсиһ Иса јолунда мәним әмәкдашларым олан Прискила вә Акилаја салам сөјләјин. Онлар мәним ҹаным уғрунда өзләрини тәһлүкәјә салдылар; онлара, јалныз мән дејил, гејри-јәһудиләрин бүтүн ҹәмијјәтләри дә тәшәккүр едирләр” (Ромалылара 16:3, 4). Акила вә Прискила кими, бу ҝүнкү мәсиһчиләр дә јығынҹаглары инкишаф етдирир вә мүхтәлиф јолларла һәмиманлыларына көмәк едирләр. Бу ҹүр мәсиһчиләр, Аллаһын диҝәр хидмәтчиләри тә’гибчиләр тәрәфиндән гәддарлыға вә ја өлүм тәһлүкәсинә мә’руз галанда, онларын уғрунда, һәтта өз ҹанларындан белә кечмәјә һазырдырлар.
6. Аполлос һансы көмәји алды?
6 Акила вә Прискила, Ефес шәһәринин сакинләрини Иса Мәсиһ һаггында өјрәдән вә натиглик габилијјәти илә сечилән Аполлоса да көмәк етмишдиләр. О заман Аполлос јалныз Ганун әһдинә гаршы едилән ҝүнаһлардан төвбәјә ишарә едән вә Јәһја тәрәфиндән кечирилән вәфтиздән хәбәрдар иди. Аполлоса бир гәдәр көмәк лазым олдуғуну анлајараг, Акила вә Прискила “Рәбб јолуну она даһа дәгиг изаһ етдиләр”. Чох еһтимал ки, онлар вәфтизин суја батырылмагла вә мүгәддәс руһун төкүлмәси илә бағлы олдуғуну анламагда она көмәк етдиләр. Аполлос өјрәндикләрини тәтбиг етди. Даһа сонра Ахајада “Аллаһын лүтфү илә иман етмиш оланлара чох јардым ҝөстәрди. Чүнки Исанын Мәсиһ олдуғуну Мүгәддәс Јазыларла сүбут едәрәк, јәһудиләрин фикирләрини үмумхалг гаршысында вар ҝүҹү илә тәкзиб едирди” (Һәвариләрин ишләри 18:24-28). Мәсиһчи гардашларымызын шәрһләри Аллаһын Кәламына даир бизим дә анлајышымызы ҝенишләндирә биләр. Биз бу ҹәһәтдән дә бир-биримизә лазымыг.
Мадди јардым
7. Һәмиманлылары мадди јардыма еһтијаҹ дујдугда филипилиләр неҹә һај вердиләр?
7 Филипи шәһәриндәки мәсиһчи јығынҹағынын үзвләри Павели чох севирдиләр вә о, Салоник шәһәриндә оланда она мадди јардым ҝөндәрмишдиләр (Филипилиләрә 4:15, 16). Јерусәлимдәки гардашлар еһтијаҹ ичиндә оланда филипилиләр көмәјә һазыр олдугларыны ҝөстәрмиш вә һәтта имканларындан артыг ианә етмишдиләр. Филипи шәһәриндәки баҹы-гардашларын ҝөзәл әһвал-руһијјәси Павелә о гәдәр ҝүҹлү тәәссүрат бағышламышды ки, онлары башга һәмиманлыларына нүмунә ҝәтирирди (2 Коринфлиләрә 8:1-6).
8. Епафродит неҹә руһ тәзаһүр етдирирди?
8 Павел зинданда оланда филипилиләр она нәинки һәдијјәләр ҝөндәрмиш, һәтта көмәк үчүн Епафродити дә ораја јолламышдылар. Павел јазырды: “О, [Епафродит] Мәсиһин иши уғрунда ҹаныны тәһлүкә гаршысында гојараг, өлүмә јахын иди ки, сизин мәнә хидмәтинизин әскиклијини долдурсун” (Филипилиләрә 2:25-30; 4:18). Биз Епафродитин ағсаггал, јахуд хидмәти көмәкчи олуб-олмадығыны билмирик. Бунунла белә, о, фәдакар, гајғыкеш бир мәсиһчи иди вә Павелә олдугҹа лазым иди. Сизин јығынҹагда да Епафродит кими мәсиһчиләр вармы?
Онлар “дајаг” идиләр
9. Аристархдан һансы саһәдә нүмунә ҝөтүрә биләрик?
9 Акила, Прискила вә Епафродит кими севән баҹы-гардашлар һәр бир јығынҹагда јүксәк гијмәтләндирилирләр. Һәмиманлыларымыздан бә’зиләри, биринҹи әсрдә јашамыш мәсиһчи Аристарх кими дә ола биләрләр. О вә башгалары Павел үчүн “дајаг” [ЈД], јә’ни, еһтимал ки, ади, ҝүндәлик ишләрдә она тәсәлли вә көмәк мәнбәји идиләр (Колослулара 4:10, 11). Павелә көмәк етмәклә Аристарх сүбут етди ки, о, һәмишә көмәјә ҝәлмәјә һазыр олан әсл достдур. О, Сүлејманын мәсәлләри 17:17 ајәсиндә хатырланан шәхс кими иди: “Дост һәр вахт севәр; вә сыхынты үчүн гардаш доғулмушдур”. Мәҝәр биз һәмиманлыларымыз үчүн “дајаг” олмаға ҹан атмалы дејиликми? Биз хүсусилә дә ағыр вәзијјәтдә олан баҹы-гардашларымыза көмәк етмәлијик.
10. Петер мәсиһчи ағсаггалларына һансы нүмунәни верди?
10 Хүсусилә мәсиһчи ағсаггаллары өз руһани баҹы-гардашлары үчүн дајаг олмалыдырлар. Иса һәвари Петерә деди: “Гардашларына гүввәт вер” (Лука 22:32). Петер бу ишин өһдәсиндән ҝәлә биләрди, чүнки о, хүсусилә дә Исанын дирилмәсиндән сонра, мәтанәти вә гәтијјәти илә сечилирди. Ағсаггаллар, башгаларыны үрәкдән вә мәһәббәтлә мөһкәмләндирмәјә чалышын, чүнки һәмиманлыларымыз сизин диггәтинизә еһтијаҹ дујурлар (Һәвариләрин ишләри 20:28-30; 1 Петер 5:2, 3).
11. Тимотејин әһвал-руһијјәси үзәриндә дүшүнмәк нәјә ҝөрә фајдалыдыр?
11 Павелин әмәкдашы вә ағсаггал олан Тимотеј һәмиманлылары үчүн чох нараһат олурду. Сағламлығы илә бағлы бә’зи чәтинликләр чәкмәсинә бахмајараг, Тимотеј сарсылмаз иман ҝөстәрир вә Павеллә бирликдә ‘Мүждәни јајмаг ишиндә хидмәт едирди’. Буна ҝөрә дә һәвари Павел филипилиләрә дејә билмишди: “Барәниздә Тимотеј гәдәр һәгигәтән гајғы чәкән һәмфикир башга адамым јохдур” (Филипилиләрә 2:20, 22; 1 Тимотејә 5:23; 2 Тимотејә 1:5). Әҝәр Тимотејин әһвал-руһијјәси кими әһвал-руһијјә тәзаһүр етдиририксә, биз дә һәмиманлыларымыз үчүн хејир-дуа ола биләрик. Әлбәттә ки, биз өз зәифликләримизлә мүбаризә апармалы вә мүхтәлиф сынаглара таб ҝәтирмәли олуруг, лакин биз һәмчинин мөһкәм иман тәзаһүр етдирә вә руһани баҹы-гардашларымыза мәһәббәтлә гајғы ҝөстәрә биләрик. Бу, бизим борҹумуздур. Һәмишә јадда сахламалыјыг ки, биз онлара лазымыг.
Башгаларынын гејдинә галан гадынлар
12. Табитанын нүмунәсиндән нә өјрәнирик?
12 Башгаларынын гејдинә галан вә Аллаһ горхусуна малик олан гадынлардан бири Табита иди. О өләндә шаҝирдләр Петерин далынҹа адам ҝөндәрдиләр вә ону јухары отаға апардылар. Орада “бүтүн дуллар [Петерин] јанында дуруб, Табитанын онларла бирҝә икән тикдији көјнәкләри вә палтарлары ҝөстәрәрәк ағлајырдылар”. Петер Табитаны һәјата гајтарды вә шүбһәсиз ки, о, јенә дә хејирли ишләр ҝөрмәјә вә сәхавәтлә сәдәгәләр вермәјә давам едирди. Мүасир мәсиһчи јығынҹагларында да Табита кими гадынлар вар вә онлар, еһтимал ки, еһтијаҹ ичиндә олан һәмиманлылары үчүн палтар тикир, јахуд башга хејирхаһ ишләр ҝөрүрләр. Әлбәттә ки, онларын хејирли ишләри башлыҹа олараг Падшаһлығын мәнафеји вә шаҝирдләр һазырламаг иши илә бағлыдыр (Һәвариләрин ишләри 9:36-42; Матта 6:33; 28:19, 20).
13. Лидија һәмиманлыларынын гејдинә неҹә галырды?
13 Аллаһ горхусуна малик олан Лидија адлы гадын да башгаларынын гејдинә галырды. Тијатира сакини олан бу гадын, ерамызын тәхминән 50-ҹи илләриндә Павелин тәблиғ етдији Филипи шәһәриндә јашајырды. Еһтимал ки, Лидија јәһудилији гәбул етмиш прозелит иди. Лакин, ҝөрүндүјү кими, Филипидә јәһудиләр аз иди вә ола билсин, орада синагог јох иди. Бу сәбәбдән дә Лидија вә Аллаһ горхусуна малик олан башга гадынлар чајын саһилинә топлашырдылар. Һәвари Павел хош хәбәри онлара мәһз орада бәјан етмишди. Мүгәддәс Китабда дејилир: “Рәбб онун [Лидијанын] үрәјини ачды ки, Павелин сөјләдикләринә диггәт јетирсин. Аиләси илә бәрабәр вәфтиз олундугдан сонра, Лидија јалварыб деди: “Әҝәр мәни Рәббә садиг сајдынызса, евимә ҝәлин вә орада галын”. Вә бизим разылығымызы алды” (Һәвариләрин ишләри 16:12-15). Лидија башгаларына хејирхаһлыг етмәк арзусунда олдуғуна ҝөрә, Павели вә онун һәмкарларыны евиндә гонаг галмаға разы сала билди. Бу ҝүн дә хејирхаһ вә гајғыкеш мәсиһчиләрин бу ҹүр гонагпәрвәрлик ҝөстәрмәләри неҹә дә хошдур! (Ромалылара 12:13; 1 Петер 4:9).
Ушаглар, сиз дә бизә лазымсыныз
14. Иса ушагларла неҹә давранырды?
14 Мәсиһчи јығынҹағы өз башланғыҹыны, Аллаһын хејирхаһ вә һәссас Оғлу Иса Мәсиһдән ҝөтүрмүшдүр. Инсанлар онун јанында өзләрини раһат һисс едирдиләр, чүнки о, гајғыкеш вә шәфгәтли иди. Бир дәфә ҹамаат Исанын јанына көрпә ушагларыны ҝәтирдикдә, шаҝирдләр буна мүгавимәт ҝөстәрмәјә чалышдылар. Лакин Иса деди: “Бурахын ушаглары Мәним јаныма ҝәлсинләр! Онлара мане олмајын! Чүнки, Аллаһын Падшаһлығы бунлар кимиләриндир. Доғрусун сизә дејирәм: Ким Аллаһын Падшаһлығыны көрпә бир ушаг кими гәбул етмәзсә, ораја әсла ҝирә билмәз” (Марк 10:13-15, И–93). Падшаһлығын хејир-дуаларыны алмаг үчүн ҝәрәк биз дә балаҹа ушаглар кими тәвазөкар вә өјрәнмәјә һазыр олаг. Иса ушаглары гуҹаглајыб, онлара хејир-дуа верәрәк өз мәһәббәтини ифадә едирди (Марк 10:16). Бәс буҝүнкү ушаглар һаггында нә демәк олар? Ушаглар, әмин олун ки, сиз јығынҹагда севилирсиниз вә бизә лазымсыныз.
15. Лука 2:40-52 ајәләриндә Исанын һәјатында баш верән һансы һадисәләр нәгл олунур вә Иса ушаглара һансы ҝөзәл нүмунәни верди?
15 Иса ушаглыгдан Аллаһа вә Мүгәддәс Јазылара дәрин һөрмәт бәсләјирди. О, 12 јашында икән валидејнләри Јусиф вә Мәрјәм илә доғма шәһәри Назаретдән Јерусәлимә Пасха бајрамына јола дүшдү. Гајыдаркән Исанын валидејнләри ону јол јолдашларынын арасында ҝөрмәдиләр. Нәһајәтдә Исаны мә’бәддә тапдылар. О, јәһуди мүәллимләринин арасында отуруб онлары динләјир вә суаллар верирди. Иса, Јусифлә Мәрјәмин ону һарада ахтармаг лазым ҝәлдијини билмәдикләринә ҝөрә тәәҹҹүбләнәрәк сорушду: “Билмирдинизми ки, Мән Атамын евиндә олмалыјам?” Сонра Иса валидејнләри илә бирликдә евә гајытды. О, онлара табе олур, һикмәтдә вә бој-бухунда тәрәгги едирди (Лука 2:40-52). Иса ушаглара неҹә дә ҝөзәл нүмунә верди! Онлар да валидејнләринә табе олмалы вә руһани шејләрлә марагланмалыдырлар (Тәснијә 5:16; Ефеслиләрә 6:1-3).
16. а) Иса мә’бәддә шаһидлик едәркән ушаглар нә нида едирдиләр? б) Ҝәнҹ мәсиһчиләрин бу ҝүн һансы имканлары вар?
16 Сиз ҝәнҹ мәсиһчиләр, ола билсин ки, мәктәбдә Јеһова һаггында шаһидлик едир вә валидејнләринизлә бирликдә евдән-евә тәблиғ едирсиниз (Ишаја 43:10-12; Һәвариләрин ишләри 20:20, 21). Иса өлүмүндән бир аз габаг мә’бәддә шаһидлик едән вә хәстәләри сағалдан заман ушаглар нида едирдиләр: “Давуд Оғлуна һосанна!” Бундан гәзәбләнән баш каһинләр вә дин алимләри сорушдулар: “Бунларын нә сөјләдијини ешидирсәнми?” Иса деди: “Бәли: “Кичик ушагларын вә әмзикли оланларын ағзындан камил һәмд алдын” сөзүнү һеч охумамысынызмы?” (Матта 21:15-17). Һәмин ушаглар кими, јығынҹағын ҝәнҹ үзвләри олан сизләрин дә, Аллаһа вә Онун Оғлуна һәмд етмәк кими ҝөзәл имканыныз вар. Сиз бизә лазымсыныз вә истәјирик ки, сиз бизимлә бәрабәр Падшаһлығын тәблиғчиләри кими хидмәт едәсиниз.
Фәлакәтләр заманы
17, 18. а) Нәјә ҝөрә Павел Јәһудејада јашајан мәсиһчиләр үчүн ианә јығымыны тәшкил етди? б) Јәһудејадакы һәмиманлылар үчүн јығылан көнүллү ианәләр һәм јәһуди, һәм дә гејри-јәһуди олан мәсиһчиләрә неҹә тәәссүрат бағышлады?
17 Мәһәббәт бизи тәшвиг едир ки, шәраитимиздән асылы олмајараг, еһтијаҹы олан һәмиманлыларымыза көмәк едәк (Јәһја 13:34, 35; Јагуб 2:14-17). Мәсәлән, Јәһудејада јашајан баҹы-гардашлара олан мәһәббәти Павели тәшвиг етди ки, Ахаја, Галатија, Македонија јығынҹагларында вә Асија вилајәтиндә ианә јығымыны тәшкил етсин. Јерусәлимдәки шаҝирдләрин тә’гибләрә, ҹәмијјәтдәки гарышыглыглара вә аҹлыглара мә’руз галмаларынын сәбәби, Павелин јаздығы кими, еһтимал ки, онларын ‘ситәм, әзаб чәкмәләри вә мүлкләринин талан едилмәси’ илә әлагәдар иди (Ибраниләрә 10:32-34; Һәвариләрин ишләри 11:27-12:1). Буна ҝөрә дә һәвари Павел Јәһудејада јашајан касыб мәсиһчиләр үчүн ианә јығымыны тәшкил етди (1 Коринфлиләрә 16:1-3; 2 Коринфлиләрә 8:1-4, 13-15; 9:1, 2, 7).
18 Јәһудејадакы мүгәддәсләр үчүн јығылан көнүллү ианәләр, јәһуди вә гејри-јәһуди олан мәсиһчиләр арасында гардашлыг бағларынын олдуғуна сүбут иди. Ианәләрин јығылмасы һәмчинин гејри-јәһуди олан мәсиһчиләрә имкан верирди ки, Јәһудејада јашајан һәмиманлыларындан алдыглары руһани сәрвәт үчүн онлара өз миннәтдарлыгларыны билдирсинләр. Беләликлә, мәсиһчиләр һәм мадди, һәм дә руһани ҹәһәтдән бөлүшүрдүләр (Ромалылара 15:26, 27). Еһтијаҹы олан баҹы-гардашлар үчүн јығылан ианәләр бу ҝүн дә көнүллү сурәтдә вә мәһәббәтлә едилир (Марк 12:28-31). Биз бу ҹәһәтдән дә бир-биримизә лазымыг. Дүзҝүн пајланманын сајәсиндә, “аз јығанын... әскији” олмур (2 Коринфлиләрә 8:15)
19, 20. Тәбии фәлакәтләр заманы зәрәр чәкмиш инсанлара Јеһованын халгынын неҹә көмәк ҝөстәрдијинә даир нүмунә ҝәтирин.
19 Мәсиһчиләрин бир-бирләринә лазым олдугларыны анлајараг, иман баҹы-гардашларымызын көмәјинә ҝәлмәјә мәмнунијјәтлә һазырыг. Мәсәлән, 2001-ҹи илин әввәлиндә Ел Салвадорда дағыдыҹы зәлзәлә вә јер сүрүшмәси заманы баш верән һадисәјә нәзәр салаг. Орадан верилән мә’луматда дејилирди: “Гардашлар тәрәфиндән Ел Салвадорун һәр бир һиссәсинә јардым тәдбири ҝөрүлдү. Гватемаладан, Бирләшмиш Штатлардан вә Канададан гардашлардан ибарәт груплар көмәјимизә ҝәлдиләр. [...] Тезликлә 500-дән чох ев вә 3 ҝөзәл Падшаһлыг Залы бина едилди. Бу фәдакар гардашларын ағыр зәһмәти вә әмәкдашлыг руһу ҝөзәл шаһидлик олду”.
20 Ҹәнуби Африка Республикасындан белә бир мә’лумат алынды: “Мозамбикин чох һиссәсини виран едән дәһшәтли дашгын мәсиһчи гардашларымызын чохуна өз тә’сирини ҝөстәрмишди. Мозамбикдәки филиал онларын әсас тәләбатларынын гејдинә галмышды. Биздән исә еһтијаҹ ичиндә олан гардашлар үчүн ҝејмәјә јарарлы палтарлар ҝөндәрмәји хаһиш етдиләр. Һәмин гардашларымыз үчүн о гәдәр палтар јығдыг ки, палтарла долу 12 метрлик контејнер ҝөндәрә билдик”. Бу саһәдә дә биз бир-биримизә лазымыг.
21. Нөвбәти мәгаләдә нә мүзакирә олунаҹагдыр?
21 Јухарыда гејд едилдији кими, инсан бәдәнинин бүтүн һиссәләри ваҹибдир. Бу, сөзсүз ки, мәсиһчи јығынҹағына да аиддир. Онун бүтүн үзвләри бир-бирләринә лазымдыр. Онлар һәмчинин бирликдә, чијин-чијинә Аллаһа хидмәт етмәлидирләр. Нөвбәти мәгаләдә бунун неҹә мүмкүн олдуғуна даир бә’зи амилләр мүзакирә олунаҹагдыр.
Сиз неҹә ҹаваб верәрдиниз?
• Инсан бәдәни илә мәсиһчи јығынҹағы арасында һансы бәнзәрлик вар?
• Һәмиманлылары көмәјә еһтијаҹ дујанда, илк мәсиһчиләр буна неҹә һај вердиләр?
• Мүгәддәс Китабдакы һансы нүмунәләр тәсдиг едир ки, мәсиһчиләр бир-бирләринә лазымдырлар вә онлар бир-бирләринә гаршылыглы көмәк едирләр?
[10-ҹу сәһифәдәки шәкил]
Акила вә Прискила башгаларынын гејдинә галырдылар.
[12-ҹи сәһифәдәки шәкилләр]
Јеһованын хидмәтчиләри фәлакәт заманы бир-бирләринә вә башга инсанлара јардым едирләр.