“Мүждәчи ишини јеринә јетир”
“Һәр вәзијјәтдә ајыг дур... мүждәчи ишини јеринә јетир” (2 ТИМОТЕЈӘ 4:5).
1. Иса өз давамчыларына һансы тапшырығы верди?
ЈЕҺОВАНЫН ады вә нијјәтләри бүтүн дүнјада бәјан едилир. Бу она ҝөрә баш верир ки, Аллаһа һәср едилмиш халг, Иса Мәсиһин өз давамчыларына вердији нөвбәти тапшырыға ҹидди јанашыр: “Ҝедин, бүтүн халглары шаҝирдим един, онлары Ата, Оғул вә Мүгәддәс Руһ наминә вәфтиз един; сизә әмр етдијим һәр шејә риајәт етмәји онлара өјрәдин” (Матта 28:19, 20).
2. Нәзарәтчи олан Тимотеј һансы нәсиһәти алды вә мәсиһчи ағсаггалларынын бизим ҝүнләрдә өз хидмәтләрини иҹра етмәк үсулларындан бири һансыдыр?
2 Исанын биринҹи әсрдәки шаҝирдләри бу тапшырыға ҹидди јанашырдылар. Мәсәлән, һәвари Павел һәмиманлысыны, мәсиһчи нәзарәтчиси олан Тимотеји тәшвиг едирди: “Мүждәчи ишини јеринә јетир, өз хидмәтини там шәкилдә иҹра ет” (2 Тимотејә 4:5). Бу ҝүн ағсаггалларын өз хидмәтләрини иҹра етмәк үсулларындан бири — Падшаһлыг һаггындакы тәблиғ ишиндә мүнтәзәм сурәтдә вә сә’јлә иштирак етмәкдир. Мәсәлән, јығынҹағын китабөјрәнмә нәзарәтчисинин тәблиғ ишиндә вә башгаларыны өјрәтмәкдә рәһбәрлији өз үзәринә ҝөтүрмәк кими шәрәфли вә хош вәзифәси вар. Павел шәхсән онун өзүнә мәхсус олан вәзифәни — хош хәбәри тәблиғ етмәк вәзифәсини јеринә јетирирди, һәм дә гардашлары хидмәтә һазырлајараг онлара көмәк едирди (Һәвариләрин ишләри 20:20; 1 Коринфлиләрә 9:16, 17).
Кечмишдәки чалышган мүждәчиләр
3, 4. Мүждәчи кими Филипин иши барәдә нә демәк олар?
3 Еркән мәсиһчиләр чалышган мүждәчиләр кими танынмышдылар. Мүждәчи Филип һаггында данышаг. О, Јерусәлимдә јашајан јунанҹа вә ибраниҹә данышан дул мәсиһчи гадынлар арасында гәрәзсиз олараг ҝүндәлик гида пајламаға лајиг ҝөрүлмүш, “мүгәддәс Руһ вә һикмәтлә долу једди нәфәр”дән бири иди (Һәвариләрин ишләри 6:1-6). Хидмәтин бу хүсуси нөвү сона чатанда вә тә’гибләр уҹбатындан һәвариләрдән башга һамы дағыланда Филип Самаријаја ҝетди. Орада о, хош хәбәри бәјан едир, мүгәддәс руһун гүввәси илә ҹинләри говур, топаллары вә ифлиҹ оланлары сағалдырды. Самаријалыларын бир чоху Падшаһлыг һаггындакы хәбәри гәбул едиб, вәфтиз олундулар. Јерусәлимдәки һәвариләр бу барәдә ешидән кими, һәвари Петери вә Јәһјаны Самаријаја ҝөндәрдиләр ки, јени вәфтиз едилән иманлылар мүгәддәс руһ ала билсинләр (Һәвариләрин ишләри 8:4-17).
4 Сонра Аллаһын руһу Филипи Гәззә јолуна, һәбәшистанлы хәдимин гаршысына јоллады. Филип она Ишајанын пејғәмбәрлијини ајдын изаһ етдикдән сонра, “һәбәшләрин мәләкәси Гандагнын вәзири” олан бу адам Иса Мәсиһә иман ҝәтирди вә вәфтиз олунду (Һәвариләрин ишләри 8:26-38). Бундан сонра Филип јолда ‘бүтүн шәһәрләрә Мүждәни јајараг’, Ашдода, сонра исә Гејсәријәјә ҝетди (Һәвариләрин ишләри 8:39, 40). Һәгигәтән дә мүждәчи ишинә даир ҝөзәл нүмунәдир!
5. Филипин дөрд гызы хүсусилә нә илә танынмышдылар?
5 Тәхминән 20 илдән сонра да Филип Гејсәријәдә сә’јлә хидмәт етмәјә давам едирди. Павел вә Лука Филипин евиндә гонаг галанда, “онун әрә ҝетмәмиш, пејғәмбәрлик едән дөрд гызы вар иди” (Һәвариләрин ишләри 21:8-10). Онлар, шүбһәсиз ки, јахшы руһани тә’лим алмышдылар вә хидмәтә сә’јлә јанашырдылар, һәтта пејғәмбәрлик етмәк шәрәфинә белә лајиг ҝөрүлмүшдүләр. Бизим ҝүнләримиздә валидејнләрин сә’ји ушаглара јахшы тә’сир бағышлаја, онлары һәјатлары боју чалышган мүждәчи олмаға тәшвиг едә биләр.
Буҝүнкү чалышган мүждәчиләр
6. Биринҹи әсрин мүждәчиләри һансы наилијјәтләри әлдә етмишдиләр?
6 Иса Мәсиһ бизим ҝүнләрә вә сонун вахтына ишарә едән пејғәмбәрлијиндә демишдир: “Әввәлҹә бүтүн халгларда Мүждә тәблиғ едилмәлидир” (Марк 13:10). Сон ҝәләнә гәдәр хош хәбәр “бүтүн дүнјада” тәблиғ олунмалыдыр (Матта 24:14). Павелин вә биринҹи әсрин башга мүждәчиләринин тәблиғ фәалијјәти сајәсиндә чохлары имана ҝәлир вә Рома империјасы бојунҹа бир чох јерләрдә јығынҹаглар тәшкил едилирди. Бу јығынҹагларда хидмәт етмәк үчүн тә’јин олунмуш ағсаггаллар, мәсиһчи баҹы вә гардашлары илә мүждәнин тәблиғ ишиндә иштирак едир, һәмчинин јени әразиләрдә тәблиғ фәалијјәтинә башлајырдылар. Һәмин ҝүнләрдә Јеһованын Кәламы гүдрәтлә јајылыб нүфуз газанырды; һәмин вәзијјәт бу ҝүн дә давам едир, чүнки Јеһованын милјонларла Шаһиди мүждәни тәблиғ едир (Һәвариләрин ишләри 19:20). Бәс сән Јеһованы севинҹлә мәдһ едәнләрә гошулмусанмы?
7. Падшаһлығын мүждәчиләри бу ҝүн һансы иши јеринә јетирирләр?
7 Падшаһлығын бир чох мүждәчиләри бизим ҝүнләрдә тәблиғ ишиндә баҹардыгҹа даһа чох иштирак етмәјә чалышырлар. Минләрлә баҹы-гардашлар миссионер олмушлар, јүз минләрлә башгалары исә пионер вә көмәкчи пионер кими тәблиғ фәалијјәтиндә таммүддәтли сурәтдә иштирак едирләр. Падшаһлығын чалышган тәблиғчиләри кими хидмәт едән кишиләр, гадынлар вә ушаглар неҹә дә ҝөзәл иши јеринә јетирирләр! Мәсиһчи мүждәчиләри кими Јеһованын “чијин-чијинә” хидмәт едән бүтүн хидмәтчиләри Онун тәрәфиндән бол хејир-дуа алырлар (Тсефанја 3:9, ЈД).
8. Бу ҝүн инсанларын алынларына һансы ишарә гојулур вә бу ишдә кимләр иштирак едир?
8 Аллаһ Исанын мәсһ едилмиш давамчыларына хош хәбәри бүтүн дүнјада тәблиғ етмәк мәс’улијјәтини һәвалә едиб. Тәблиғ ишиндә онлары Мәсиһин “башга гојунлары”нын артан сајы дәстәкләјир (Јәһја 10:16). Пејғәмбәрлик дили илә десәк, бу хиласедиҹи иш јеринә јетириләркән, бу ҝүн едилән мәкруһ ишләрдән өтрү инләјиб фәған едән кәсләрин алынларына ишарә гојулур. Тезликлә писләри һәлак ҝөзләјир. Һәлә ки, вахт вар, ҝәлин хиласедиҹи һәгигәтләри јерин бүтүн сакинләринә чатдыраг! (Һезекиел 9:4-6, 11).
9. Јығынҹағын јени үзвләринә хидмәтдә неҹә көмәк етмәк олар?
9 Әҝәр биз мүждәчи иши илә артыг хејли вахт мәшғулугса, чох еһтимал ки, јығынҹағын јени үзвләринә һансыса практики үсулла көмәклик едә биләрик. Бә’зән онлары өзүмүзлә хидмәтә ҝөтүрә биләрик. Ағсаггал кими хидмәт едән гардашлар, һәмиманлыларыны руһән инкишаф етдирмәк үчүн әлләриндән ҝәләни етмәјә тәшвиг олунурлар. Тәвазөкар нәзарәтчиләр сә’ј ҝөстәрәндә, чох ҝүман ки, һәмиманлылар мүждәни сә’јлә тәблиғ едәҹәк вә хидмәтдә јахшы бәһрәләр ҝәтирәҹәкләр (2 Петер 1:5-8).
Евдән-евә шаһидлик етмәјә мүнасибәт
10. Мәсиһ вә онун еркән давамчылары хидмәтә даир һансы нүмунәни вердиләр?
10 Иса Мәсиһ бир мүждәчи кими өз давамчыларына ҝөзәл нүмунә верди. Мәсиһин вә онун һәвариләринин хидмәти барәдә Мүгәддәс Китабда дејилир: “Иса Оникиләрлә бәрабәр шәһәрләри вә кәндләри долашыб тәблиғ едәрәк Аллаһын Сәлтәнәтини [Падшаһлығыны] мүждәләјирди” (Лука 8:1). Бәс һәвариләр барәдә нә демәк олар? Ерамызын 33-ҹү илинин Пентикост ҝүнүндә мүгәддәс руһун төкүлмәсиндән сонра онлар “һәр ҝүн мә’бәддә вә евдән-евә тә’лим вермәкдән вә Исанын Мәсиһ олдуғуну мүждәләмәкдән ваз кечмирдиләр” (Һәвариләрин ишләри 5:42).
11. Һәвариләрин ишләри 20:20, 21 ајәләринә әсасән Павелин хидмәтинә нә дахил иди?
11 Чалышган мүждәчи олан һәвари Павел Ефес шәһәриндән олан ағсаггаллара дејә билмишди: “Сизә фајдалы олан һеч бир шеји бәјан етмәкдән, истәр ачыгҹа, истәрсә дә евдән-евә сизә тә’лим етмәкдән чәкинмәдим”. Павел “евдән-евә” тә’лим едәркән артыг Јеһоваја хидмәт едән һәмиманлыларынын евләринә онлара чобанлыг зијарәти етмәк мәгсәди иләми ҝәлирди? Јох. Ардыны о өзү изаһ едир: “Аллаһа төвбә вә Рәббимиз Иса Мәсиһә иман етмәји јәһудиләрә вә јунанлара ҹидди тапшырдым [“әсаслы сурәтдә өјрәтдим”, ЈД]” (Һәвариләрин ишләри 20:20, 21). Үмумијјәтлә, артыг Јеһоваја һәср олунмуш кәсләрә “Аллаһа төвбә вә Рәббимиз Иса Мәсиһә иман етмәји” өјрәтмәк лазым дејил. Павел иманда олмајан инсанлара төвбә вә иман етмәји өјрәдәрәк, Ефес ағсаггалларына евдән-евә тәблиғ етмәји өјрәдирди. Бу үсулдан истифадә етмәклә, Павел Исаны тәглид едирди.
12, 13. Јеһованын хидмәтчиләри Филипилиләрә 1:7 ајәсини рәһбәр тутараг, тәблиғ етмәк һүгуглары илә әлагәдар нә етмишләр?
12 Евдән-евә хидмәт бизим үчүн чәтинлик тәшкил едә биләр. Мәсәлән, бә’зиләрини, бизим онларын гапыларына Мүгәддәс Китаб хәбәри илә ҝәлмәјимиз әсәбиләшдирир. Сөзсүз ки, биз инсанлары әсәбиләшдирмәк истәмирик. Лакин бизим евдән-евә хидмәтимиз Мүгәддәс Китаба әсасланыр вә һәм Аллаһа, һәм дә јахынларымыза мәһәббәтимиз бизи бу үсулла тәблиғ етмәјә тәшвиг едир (Марк 12:28-31). Евдән-евә тәблиғ етмәк һүгугумузу ‘мүдафиә вә тәсдиг етмәк’ үчүн биз дәфәләрлә мәһкәмәләрә, о ҹүмләдән АБШ-ын Али Мәһкәмәсинә мүраҹиәт етмишик (Филипилиләрә 1:7). Бу мәһкәмә, демәк олар ки, һәмишә бизим хејримизә гәрар чыхармышдыр. Нөвбәти һөкм сәҹијјәвидир:
13 “Дини әдәбијјатлары јајмаг миссионер мүждәчи ишинин чохәсрлик үсулудур. Бу үсул да китаб чапы кими гәдими тарихә маликдир. Мүхтәлиф дини һәрәкатлар, узун илләр әрзиндә бу үсулдан истифадә етмишләр. Бу ҝүн мүждәни јајмаг үчүн истифадә олунан бу үсул, нүмајәндәләри мүждәни минләрлә евләрә чатдыран вә бирбаша үнсијјәт васитәсилә иманларына шәрик олаҹаг јени мәсләкдашлар ахтаран мүхтәлиф тәригәтләр тәрәфиндән ҝениш мигјасда истифадә олунур. [...] Дини фәалијјәтин бу үсулу, [АБШ-ын Конститусијасына] дахил едилән Биринҹи дәјишиклик нөгтеји-нәзәриндән килсәдә кечирилән ибадәт вә кафедрада сөјләнилән тәблиғ кими јүксәк статуса маликдир” (“Мердок Пенсилванија штатына гаршы” әмәлијјаты, 1943-ҹү ил).
Нәјә ҝөрә тәблиғ етмәјә давам едирик?
14. Бизим мүштәрәк сә’јләримиз һансы нәтиҹәләрә ҝәтириб чыхара биләр?
14 Евдән-евә шаһидлик етмәјимизә чох сәбәбләр вар. Биз һәр дәфә киминсә јанына ҝәләндә, һәгигәт тохумларыны сәпмәјә чалышырыг. Әкиләни суламаг мәгсәди илә инсана тәкрар баш чәкирик. Бизим мүштәрәк сә’јләримиз, Павелин јаздығы кими, ҝөзәл нәтиҹәләрә ҝәтириб чыхара биләр: “Мән әкдим, Аполлос суварды, амма Аллаһ бөјүтдү” (1 Коринфлиләрә 3:6). Буна ҝөрә дә, ҝәлин, Јеһованын ‘бөјүдәҹәјинә’ үмид едәрәк ‘әкәк’ вә ‘сувараг’.
15, 16. Инсанларын евинә нәјә ҝөрә тәкрар-тәкрар ҝәлирик?
15 Сөһбәт инсанларын һәјатындан ҝетдији үчүн биз мүждәчи ишини иҹра едирик. Тәблиғ васитәсилә биз һәм өзүмүзү, һәм дә бизә гулаг асанлары хилас едә биләрик (1 Тимотејә 4:16). Әҝәр инсанын һәјатынын тәһлүкәдә олдуғуну билсәјдик, она көмәк етмәк үчүн јалныз зәиф бир ҹәһдлә кифајәтләнәрдикми? Чәтин ки! Сөһбәт инсанларын һәјатындан ҝетдији үчүн, биз инсанларын јанына тәкрар-тәкрар ҝәлирик. Шәраитләр даима дәјишилир. Бизи бу ҝүн динләмәк үчүн башлары һәддиндән артыг гарышыг оланлар, еһтимал ки, Мүгәддәс Китаб хәбәрини ҝәлән дәфә динләмәјә мејлли олаҹаглар. Бәлкә дә гапыја аиләнин башга үзвү чыхаҹаг вә онунла Мүгәддәс Китаб мөвзусунда данышмаг мүмкүн олаҹаг.
16 Инсанларын јалныз шәраитләри дејил, һәм дә мүнасибәтләри дәјишилир. Мәсәлән, Падшаһлыг һаггындакы хәбәри динләмәјә кими исә әзиз адамынын өлүмү тәшвиг едә биләр. Биз изтираб чәкән адама тәсәлли вермәк, она руһани тәләбатларыны анламаға көмәк етмәк вә бу тәләбатлары тә’мин етмәк үмидиндәјик (Матта 5:3, 4).
17. Биз һансы әсас сәбәбә ҝөрә тәблиғ едирик?
17 Евдән-евә тәблиғ етмәјимизин вә мәсиһчи хидмәтинин диҝәр нөвләри илә мәшғул олмағымызын әсас сәбәби — Јеһованын адыны е’лан етмәк ишиндә иштирак етмәк арзусудур (Чыхыш 9:16; Мәзмур 83:18). Һәгигәти вә салеһлији севән инсанларын тәблиғимиз сајәсиндә Јеһоваја иззәт вермәјә башладыгларыны ҝөрмәк неҹә дә хошдур! Мәзмурчу охујурду: “Ҝәнҹ иҝидләр вә гызлар; ихтијарлар вә көрпәләр; Рәббин исминә һәмд етсинләр; чүнки јалныз онун исми јүксәлмишдир; онун ҹалалы јерин вә ҝөјләрин үстүндәдир” (Мәзмур 148:12, 13).
Мүждәчи иши шәхсән бизә дә фајда ҝәтирир
18. Мүждәчи иши бизә һансы фајданы ҝәтирир?
18 Мүждәчи иши бизә мүхтәлиф саһәләрдә фајда ҝәтирир. Хош хәбәрлә евдән-евә ҝедәндә, хүсусән дә бизи меһрибанчылыгла гаршыламајанда өзүмүздә һәлимлији јетишдиририк. Мүвәффәгијјәтли мүждәчиләр олмаг үчүн, ‘һәр неҹә олурса-олсун бә’зиләрини хилас етмәкдән өтрү һәр кәс үчүн һәр шеј олан’ Павелдән нүмунә ҝөтүрмәлијик (1 Коринфлиләрә 9:19-23). Хидмәт бизә һәм дә нәзакәтли олмаға көмәк едир. Јеһоваја бел бағлајараг вә мүнасиб сөзләр сечәрәк, биз һәвари Павелин нәсиһәтинә риајәт едирик: “Гој сөзүнүз һәмишә нәвазишли олсун вә она дуз гатылмыш кими олсун ки, сиз һәр адама неҹә ҹаваб вермәк лазым олдуғуну биләсиниз” (Колослулара 4:6).
19. Мүгәддәс руһ мүждәчиләрә неҹә көмәк едир?
19 Мүждәчи иши һәм дә бизи Аллаһын мүгәддәс руһуна бел бағламаға тәшвиг едир (Зәкарја 4:6). Нәтиҹәдә бизим хидмәтимиздә руһун “мәһәббәт, севинҹ, сүлһ, сәбир, лүтфкарлыг, јахшылыг, сәдагәт, һәлимлик, өзүнә һаким олмаг” кими сәмәрәси бәлли олур (Галатијалылара 5:22, 23). Мүгәддәс руһ бизим инсанларла мүнасибәтләримизә тә’сир едир, белә ки, биз өзүмүзү онун тә’сиринә тәслим едәндә мәһәббәтимизи тәзаһүр етдирмәк, севинҹли вә сүлһпәрвәр, сәбирли вә лүтфкар олмаг, јахшылыг етмәк вә сәдагәт ҝөстәрмәк, һәмчинин хош хәбәрин тәблиғиндә һәлимлик ҝөстәрмәк вә өзүнә һаким олмаг бизим үчүн асан олур.
20, 21. Мүждәчи иши илә мәшғул оланлар һансы хејир-дуалары әлдә едирләр?
20 Мүждәчи ишимиздән әлдә етдијимиз даһа бир хејир-дуа ондан ибарәтдир ки, биз даһа мәрһәмәтли олуруг. Инсанлар бизә өз проблемләри — хәстәликләр, ишсизлик, аиләдәки чәтинликләр барәдә данышанда, биз мәсләһәтчиләр ролунда иштирак етмирик, лакин Мүгәддәс Јазылардан руһландырыҹы вә тәсәлливериҹи ајәләр охујуруг. Биз руһән кор едилмиш, лакин салеһлијә мәһәббәт әламәтләри ҝөстәрән инсанлар үчүн нараһат олуруг (2 Коринфлиләрә 4:4). Бәс “әбәди һәјата тә’јин олунан”, јә’ни мејлли олан инсанлара руһани көмәклик ҝөстәрмәк неҹә дә бөјүк хејир-дуадыр! (Һәвариләрин ишләри 13:48).
21 Мүждәчи ишиндә мүнтәзәм олараг иштирак етмәк бизә ағлымызы руһани шејләрә ҹәмләмәјә көмәк едир (Лука 11:34). Бу, шүбһәсиз ки, бизә фајда ҝәтирир, чүнки әкс һалда биз бу дүнја үчүн сәҹијјәви олан вар-дөвләтә һәрис олмаг мејлинә тәслим ола биләрик. Һәвари Јәһја мәсиһчиләрә өјүд верирди: “Дүнјаны вә дүнјада олан шејләри севмәјин. Ким дүнјаны севәрсә, онда Атанын мәһәббәти јохдур. Чүнки дүнјада олан һәр шеј, јә’ни ҹисмани еһтирас, ҝөзләрин еһтирасы вә һәјатын тәкәббүрү Атадан дејил, дүнјадандыр. Дүнја вә онун еһтирасы кечиб ҝедир, амма Аллаһын ирадәсини јеринә јетирән әбәди јашајыр” (1 Јәһја 2:15-17). Тәблиғ иши илә мәшғул олан вә Рәббин ишиндә тәрәгги едән кәсә бу дүнјаны севмәмәк асан олур (1 Коринфлиләрә 15:58).
Ҝөјдә хәзинәләр јығын
22, 23. а) Мәсиһчи мүждәчиләри һансы хәзинәләри топлајырлар? б) Нөвбәти мәгалә бизә нәдә көмәк едәҹәк?
22 Падшаһлыг һаггындакы тәблиғ ишиндә сә’јлә иштирак етмәк әбәди фајда ҝәтирир. Иса буну нөвбәти сөзләри дејәркән ҝөстәрди: “Јер үзүндә өзүнүзә хәзинәләр јығмајын; орада ҝүвә вә пас онлары мәһв едәр; вә ораја оғрулар ҝирәр вә оғурларлар. Лакин өзүнүзә ҝөјдә хәзинәләр јығын ки, орада нә ҝүвә, нә пас мәһв едәр вә нә оғрулар ораја ҝирәрләр, нә дә оғурларлар. Чүнки хәзинәниз һарадаса, үрәјиниз дә орада олаҹагдыр” (Матта 6:19-21).
23 Һөкмдар Аллаһ Јеһованы Онун Шаһидләри кими тәмсил етмәк шәрәфиндән јүксәк бир шејин ола билмәјәҹәјини јадда сахлајараг, ҝәлин бундан сонра да ҝөјдә хәзинәләр топлајаг (Ишаја 43:10-12). Аллаһын хидмәтчиләри олмаг тапшырығымызы јеринә јетирәрәк, биз, еһтимал ки, артыг 90-дан чох јашы олан вә Аллаһа узун мүддәт етдији хидмәт һаггында нөвбәти сөзләри дејән мәсиһчи баҹымызын һиссләринә шәрик олаҹағыг: “Бүтүн бу илләр әрзиндә мәнә сәбирлә јанашдығы үчүн Јеһоваја миннәтдарам вә үрәкдән дуа едирәм ки, О, бүтүн әбәдијјәт боју мәним севән Атам олсун”. Әҝәр Аллаһла олан мүнасибәтләримизи биз дә бу ҹүр гијмәтләндиририксә, сөзсүз ки, мүждәчи ишини әсаслы сурәтдә јеринә јетирмәји арзу едәҹәјик. Нөвбәти мәгалә, хидмәтимизи там шәкилдә неҹә иҹра едә биләҹәјимизи ҝөрмәкдә бизә көмәк едәҹәк.
Неҹә ҹаваб верәрдиниз?
• Биз нәјә ҝөрә мүждәчи иши илә мәшғул олмалыјыг?
• Кечмишдә вә һазыркы заманда мүждәчиләрин фәалијјәти барәдә нә демәк олар?
• Биз нәјә ҝөрә евдән-евә шаһидлик едирик?
• Мүждәчи иши һансы тәрздә бизим һәр биримизә фајда ҝәтирир?
[8-ҹи сәһифәдәки шәкилләр]
Бу ҝүн дә Филип вә онун гызлары кими мүждәчиләр вар.
[12-ҹи сәһифәдәки шәкил]
Хош хәбәри башгалары илә бөлүшәркән һансы фајданы әлдә едирсән?