Хош хәбәрин ҝәтирдији хејир-дуалар

“Тәвазөкарлара мүждәни вә’з етмәк үчүн Рәбб мәни мәсһ етди; үрәји гырыг оланлары сарымаг үчүн... бүтүн јаслылара тәсәлли үчүн” (ИШАЈА 61:1, 2).

1, 2. а) Иса өзү һаггында нәји ачыглады вә неҹә? б) Исанын бәјан етдији хош хәбәр һансы хејир-дуалары ҝәтирирди?

ШӘНБӘ ҝүнү хидмәтинә јениҹә башлајан Иса, Назаретдә јерләшән синагогда иди. Мүгәддәс Китабда сөјләнилдији кими, “Она Јешаја [Ишаја] пејғәмбәрин китабы верилди. Китабы ачыб, бу сөзләр јазылмыш јери тапды: “Рәббин Руһу үзәримдәдир, чүнки... Мүждәни билдирмәк үчүн О Мәни мәсһ етди”. Иса бу пејғәмбәрликдән хејли охуду. Сонра о, әјләшиб, деди: “Ешитдијиниз бу Јазы бу ҝүн иҹра едилди” (Лука 4:16-21).

² Беләликлә, Иса ҝөстәрди ки, пејғәмбәрликдә бәһс едилән һәмин мүждәчи вә тәсәлливерән онун өзүдүр (Матта 4:23). Исанын тәблиғ етдији хош хәбәр неҹә дә ҝөзәл иди! О өз динләјиҹиләринә бу сөзләрлә мүраҹиәт етди: “Мән дүнјанын Нурујам; Мәним ардымҹа ҝәлән гаранлыгда јеримәјәҹәк вә онда һәјат нуру олаҹаг” (Јәһја 8:12). О, һәмчинин деди: “Әҝәр сиз Мәним сөзүмә садиг галсаныз, һәгигәтән Мәним шаҝирдләримсиниз. Сиз һәгигәти дәрк едәҹәксиниз; вә һәгигәт сизи азад едәҹәкдир” (Јәһја 8:31, 32). Бәли, Исада “әбәди һәјатын сөзләри” варды (Јәһја 6:68, 69). Ишыг, һәјат вә азадлыг - гијмәтләндирилмәси ваҹиб олан хејир-дуалардыр!

3. Исанын шаҝирдләри һансы хош хәбәри тәблиғ едирдиләр?

³ Ерамызын 33-ҹү илинин Пентикост ҝүнүндән сонра, Исанын шаҝирдләри Мүждәнин тәблиғини давам етдирдиләр. Онлар “Падшаһлыг һаггында олан бу Мүждә”ни неҹә исраиллиләрә, еләҹә дә башга халгдан олан милләтләрә тәблиғ едирдиләр (Матта 24:14, И-93; Һәвариләрин ишләри 15:7; Ромалылара 1:16). Бу хәбәрә һај верән кәсләр Јеһова һагда билик әлдә едирдиләр. Онлар дини әсарәтдән азад олуб, Рәбб Иса Мәсиһлә ҝөјләрдә әбәди идарә едәҹәк јени руһани халга - “Аллаһын Исраили”нә говушурдулар (Галатијалылара 5:1; 6:16; Ефеслиләрә 3:5-7; Колослулара 1:4, 5; Вәһј 22:5). Неҹә дә бөјүк хејир-дуалардыр!

Мүждәнин бу ҝүн тәблиғ едилмәси

4. Хош хәбәри тәблиғ етмәк тапшырығы бу ҝүн неҹә јеринә јетир?

⁴ Илк дәфә Исаја верилмиш пејғәмбәрликлә бағлы тапшырығы, бу ҝүн “диҝәр гојунлар”дан ибарәт “бөјүк издиһам”ын дәстәкләдији мәсһ едилмиш мәсиһчиләр јеринә јетирмәкдә давам едирләр (Вәһј 7:9; Јәһја 10:16). Бунун сајәсиндә, хош хәбәр мисли ҝөрүнмәмиш мигјасда тәблиғ олунур. Јеһованын Шаһидләри 235 өлкә вә әразидә, “тәвазөкарлара мүждәни вә’з едир... үрәји гырыг оланлары сарымаг үчүн, сүрҝүнләрә һүрријјәти, мәһбус оланлара зинданын ачылдығыны е’лан үчүн Рәббин лүтф илини вә Аллаһымызын гисас ҝүнүнү е’лан үчүн, бүтүн јаслылара тәсәлли” верирләр (Ишаја 61:1, 2). Демәли, мәсиһчиләрин тәблиғ етдији мүждә чохлары үчүн хејир-дуа олмагда давам едир, “һәр ҹүр сыхынты ичиндә оланлара” исә әсл тәсәлли ҝәтирир (2 Коринфлиләрә 1:3, 4).

5. Хош хәбәрин тәблиғиндә Јеһованын Шаһидләри, Христиан дүнјасынын килсә үзвләриндән нә илә фәргләнирләр?

⁵ Доғрудур ки, Христиан дүнјасынын килсәләри мүждәни јајмаг ишинин мүхтәлиф нөвләри үчүн вәсаит ајырыр. Онлардан чоху башга өлкәләрә, прозелитизмлә мәшғул олан миссионерләр ҝөндәрир. Мисал үчүн, Православ нәшрләриндән бириндә Мадагаскарда, Африканын ҹәнубунда, Танзанијада вә Зимбабведә фәалијјәт ҝөстәрән Православ миссионерләриндән данышылыр (“The Orthodox Christian Mission Center Magazine”). Анҹаг Христиан дүнјасынын башга килсәләриндә олдуғу кими, Православ килсәсинин әксәр үзвләри белә фәалијјәтлә мәшғул олмурлар. Лакин Јеһованын бүтүн садиг Шаһидләри хош хәбәри тәблиғ етмәјә чалышырлар. Онлар баша дүшүрләр ки, хош хәбәри бәјан етмәклә, иманларынын һәгигилијини сүбут етмиш олурлар. Павел демишдир: “Инсан үрәкдән иман едәрәк бәраәт газаныр, иманыны ағзы илә играр едәрәк дә хилас олунур”. Һәрәкәтә тәшвиг етмәјән иман, демәк олар ки, өлүдүр (Ромалылара 10:10; Јагуб 2:17).

Әбәди хејир-дуалар ҝәтирән хош хәбәр

6. Бу ҝүн һансы хош хәбәр тәблиғ олунур?

⁶ Јеһованын Шаһидләри ән јахшы хәбәри тәблиғ едирләр. Онлар Мүгәддәс Китабы ачыр вә һәссас инсанлара ҝөстәрирләр ки, бәшәријјәтин Аллаһа јахынлашмасы, ҝүнаһларынын бағышланмасы вә әбәди һәјаты ала билмәси үчүн Иса өз һәјатыны гурбан вериб (Јәһја 3:16; 2 Коринфлиләрә 5:18, 19). Онлар, мәсһ едилмиш Падшаһ, Иса Мәсиһ тәрәфиндән идарә олунан Аллаһын Падшаһлығынын ҝөјдә гурулдуғуну, бир аздан әзијјәтләрә сон гојаҹағыны, Онун рәһбәрлији алтында јерин ҹәннәтә чевриләҹәјини е’лан едирләр (Вәһј 11:15; 21:3, 4). Онлар Ишајанын пејғәмбәрлијини јеринә јетирәрәк, јахынларына е’лан едирләр ки, инди “Рәббин лүтф или”дир, белә ки, бәшәријјәтин хош хәбәрә һај вермәјә һәлә вахты вар. Онлар һәм дә “Аллаһымызын гисас ҝүнү”нү, Јеһованын төвбә етмәјән ганунсузлары мәһв едәҹәјини хәбәр верирләр (Мәзмур 37:9-11).

7. Јеһованын Шаһидләринин бирлијини һансы һадисә ҝөстәрир вә бу бирлик нә илә изаһ олунур?

⁷ Фаҹиә вә бәдбәхтликләрдән усанмыш дүнјада, бу, өз дәјәрини һеч заман итирмәјән јеҝанә хош хәбәрдир. Ону гәбул едәнләр, милли, тајфа вә игтисади фәргләрин онлар арасына сәдд чәкмәсинә јол вермәдән, мәсиһчиләрин бирләшмиш үмумдүнја гардашлығына говушурлар. Онлар “камил бирлијин бағы олан мәһәббәти” ҝејинибләр (Колослулара 3:14; Јәһја 15:12). Кечән ил Африка өлкәләринин бириндә баш вермиш һадисә буна сүбутдур. Бир сәһәр, шәһәрин сакинләри ҝүллә сәсинә ојандылар. Дөвләт чеврилиши етмәјә ҹәһд ҝөстәрилирди. Мүбаризә етник характер алан заман, Шаһидләрдән биринин аиләсини, диҝәр етник групдан олан Шаһидләри ҝизләтдији үчүн мүһакимә етмишләр. Бу заман аилә ҹаваб вермишди: “Биздә, анҹаг Јеһованын Шаһидләри јашајыр”. Бу аилә үчүн етник фәрг һеч бир мә’на кәсб етмирди, онлар үчүн, тәсәллијә еһтијаҹы оланлара мәсиһчи мәһәббәти тәзаһүр етдирмәк ваҹиб иди. Һәмин аиләнин, Јеһованын Шаһиди олмајан бир гоһуму гејд етмишди: “Бүтүн динләрин үзвләри өз һәмиманлыларыны әлә верирдиләр, јалныз Јеһованын Шаһидләри белә етмирдиләр”. Вәтәндаш мүһарибәсинин парчаладығы өлкәләрдә баш верән буна бәнзәр чох һадисәләр ҝөстәрир ки, Јеһованын Шаһидләри һәгигәтән дә “гардашлығы севир”ләр (1 Петер 2:17).

Хош хәбәр инсанлары дәјишир

8, 9. а) Хош хәбәри гәбул едән кәсләр неҹә дәјишилирләр? б) Хош хәбәрин ҝүҹүнү һансы һадисәләр нүмајиш етдирир?

⁸ Хош хәбәр, Павелин “индики вә ҝәләҹәк һәјат” адландырдығына тә’сир едир (1 Тимотејә 4:8). Хош хәбәр нәинки ҝәләҹәк һәјата ҝөзәл, мөһкәм үмид верир, һәмчинин “индики... һәјаты” јахшылашдырмаға да көмәк едир. Һәјаты Аллаһын ирадәсинә мүвафиг олсун дејә, Јеһованын һәр бир Шаһиди Аллаһын Кәламы олан Мүгәддәс Китабы әлдә рәһбәр тутур (Мәзмур 119:101). Онлар өзләриндә, салеһлик вә һәдсиз сәдагәт кими кејфијјәтләри инкишаф етдирирләр ки, бунун да сајәсиндә јени мәнлик ҝејмиш олурлар (Ефеслиләрә 4:24).

⁹ Франконун нүмунәсини нәзәрдән кечирәк. О, гәзәбини ҹиловламағы баҹармырды. Һәр дәфә ишләр гајдасында ҝетмәјәндә өзүндән чыхыр, әтрафында нә варса сындырарды. Онун һәјат јолдашы Јеһованын Шаһидләри илә Мүгәддәс Китабы өјрәнирди. Онларын мәсиһчи давранышыны ҝөрән Франко вахтилә баша дүшдү ки, она да дәјишилмәк лазымдыр. О, Шаһидләрлә Мүгәддәс Китабы өјрәнмәјә разылашды вә нәтиҹәдә мүгәддәс руһун сәмәрәләринә аид олан сүлһ вә өзүнә һаким олмаг кими кејфијјәтләри инкишаф етдирмәјә башлады (Галатијалылара 5:22, 23). О, 2001-ҹи хидмәт илиндә Белчикада вәфтиз олунан 492 нәфәрдән бири иди. Алеһандро илә баш вермиш һадисәјә нәзәр салын. Бу ҹаван оғлан, наркотик маддәләрә алудә олмуш вә елә бир вәзијјәтә дүшмүшдү ки, зибилликдә јашајырды. О, зибилликдән, наркотик маддәләр алмаг үчүн сатылмасы мүмкүн олан мүхтәлиф шејләр ахтарырды. Алеһандро 22 јашында икән Јеһованын Шаһидләри она Мүгәддәс Китабы өјрәнмәји тәклиф етдиләр, о да разылашды. О, Мүгәддәс Китабы һәр ҝүн охујур, мәсиһчи јығынҹагларына ҝедирди. Алеһандро һәјатыны тез бир мүддәт әрзиндә сәһмана салды вә алты ај кечмәмиш хош хәбәрин тәблиғиндә иштирак етмәјә башлады. Кечән ил Панамада хош хәбәри тәблиғ едән 10 115 нәфәрдән бири дә о олду.

Хош хәбәр тәвазөкарлар үчүн хејир-дуадыр

10. Хош хәбәрә кимләр һај верир вә онларын һәјата олан нөгтеји-нәзәри неҹә дәјишилир?

¹⁰ Ишајанын пејғәмбәрлијинә әсасән хош хәбәр тәвазөкарлара тәблиғ олунаҹагдыр. Сөһбәт кимләрдән ҝедир? “Һәвариләрин ишләри” китабында “әбәди һәјата мејлли” адлананлардан (Һәвариләрин ишләри 13:48, ЈД). Бунлар ҹәмијјәтин бүтүн тәбәгәләриндән олуб, өз үрәкләрини һәгигәт сөзләри үчүн ачан кәсләрдир. Онлар өјрәнирләр ки, Аллаһын ирадәсини јеринә јетирмәк, дүнјанын тәклиф етдијиндән даһа чох хејир-дуалар ҝәтирир (1 Јәһја 2:15-17). Бәс Јеһованын Шаһидләринә, мүждәнин тәблиғи заманы инсанларын үрәјинә тохунмаг неҹә мүјәссәр олур?

11. Павелин сөзләринә ҝөрә, хош хәбәри неҹә тәблиғ етмәк лазымдыр?

¹¹ Ҝәлин, коринфлиләрә нөвбәти сөзләри јазан һәвари Павелин нүмунәсини нәзәрдән кечирәк. О јазырды: “Гардашлар, мән сизә Аллаһын барәсиндәки шәһадәти е’лан етмәк үчүн јаныныза ҝәлдијим заман, кәлам вә һикмәт үлвијјәти илә ҝәлмәдим. Чүнки мән аранызда икән Иса Мәсиһдән, мәһз чармыха чәкилмиш Иса Мәсиһдән башга һеч бир шеј билмәмәји гәрара алдым” (1 Коринфлиләрә 2:1, 2). Павел тәһсили илә динләјиҹиләринә тәәссүрат бағышламаг фикриндә дејилди. О, јалныз Аллаһдан ҝәләнләри, бу ҝүн Мүгәддәс Китабда јазыланлары өјрәдирди. Павелин, мүждәнин тәблиғиндә бирҝә чалышдыглары Тимотеји нәјә тәшвиг етдијинә дә диггәт јетирин: “Кәламы тәблиғ ет, буну... тә’хирәсалынмазлыг һисси илә ет” (2 Тимотејә 4:2, ЈД). Тимотеј, “кәламы”, Аллаһын Кәламыны тәблиғ етмәли иди. Павел Тимотејә һәмчинин јазырды: “Чалыш ки, өзүнү Аллаһа сынагдан чыхмыш, утанмаға әсасы олмајан вә һәгигәт сөзүнү доғрулугла өјрәдән бир ишчи кими тәгдим едәсән” (2 Тимотејә 2:15).

12. Бу ҝүн Јеһованын Шаһидләри Павелин сөзләринә вә нүмунәсинә неҹә риајәт едирләр?

¹² Јеһованын Шаһидләри Павелин нүмунәсини тәглид едир, һәмчинин онун Тимотејә дедији сөзләрдән нүмунә ҝөтүрүрләр. Онлар Аллаһын Кәламынын һансы гүввәјә малик олдуғуну дәрк едир вә мүнасиб олан үмид вә тәсәлли сөзләрини јахынларына данышанда буну нәзәрә алырлар (Мәзмур 119:52; 2 Тимотејә 3:16, 17; Ибраниләрә 4:12). Доғрудур, јери ҝәләндә, марагланан инсанлара Мүгәддәс Китаба әсасланмыш нәшрләр верирләр ки, онлар асудә вахтларында Мүгәддәс Китаб һаггындакы биликләрини артыра билсинләр. Лакин Шаһидләр, һәмишә Мүгәддәс Јазыларын өзүндә дејиләнләри ҝөстәрмәјә чалышырлар. Онлар баша дүшүрләр ки, Аллаһын сөзү тәвазөкар инсанларын үрәјинә тә’сир едәҹәк. Бундан әлавә, Мүгәддәс Китабы истифадә етдикдә Шаһидләр өзләри дә иманда мөһкәмләнирләр.

“Бүтүн јаслылара тәсәлли”

13. 2001-ҹи илдә баш вермиш һансы һадисәләр “јаслылара”, јә’ни кәдәр ичиндә оланлара тәсәлли вермәк зәрурәтини доғурмушдур?

¹³ Архада галан 2001-ҹи илдә чох бәдбәхтликләр баш вермиш вә чох инсанлар тәсәллијә еһтијаҹ дујмушлар. Кечән илин сентјабр ајында Бирләшмиш Штатларда баш верән террор актлары - Нју-Јоркда Дүнја Тиҹарәт Мәркәзинә вә Вашингтонда Пентагона едилән басгынлар - буна аҹы нүмунәдир. Бу һадисә бүтүн өлкәни сарсытды! Белә һадисәләр баш верәркән, Јеһованын Шаһидләри онлара һәвалә едилмиш “јаслылара тәсәлли” вермәк тапшырығыны јеринә јетирмәјә сә’ј ҝөстәрирләр. Буну неҹә етдикләрини ҝөстәрән, бир нечә һадисәни нәзәрдән кечирәк.

14, 15. Кәдәрли оланлара тәсәлли вермәк үчүн, Шаһидләр һәр ики вәзијјәтдә Мүгәддәс Китаб ајәләрини еффектли тәрздә неҹә истифадә етмишләр?

¹⁴ Таммүддәтли хидмәти јеринә јетирән Шаһид, күчә илә ҝедән бир гадындан, јени баш верән террор актлары барәдә фикрини сорушду. Гадын ағламаға башлады. О, баш вермиш һадисәјә тәәссүф етдијини билдириб, кәдәр чәкән инсанлара неҹәсә көмәк етмәк истәјини билдирди. Буна ҹаваб олараг, Шаһид, Аллаһын һәр биримизлә марагландығыны сөјләди вә Ишаја 61:1, 2 ајәләрини охуду. Илһамланмыш бу сөзләр гадына мәнтиги ҝөрүндү, чүнки о, әтрафдакыларын һамысынын “јаслы”, јә’ни кәдәрли олдуғуна диггәт јетирмишди. Гадын Шаһидин тәклиф етдији трактаты ҝөтүрүб, хаһиш етди ки, евдә она баш чәксин.

¹⁵ Ики Шаһид хош хәбәри тәблиғ едәркән, анбарда ишләјән бир кишијә раст ҝәлдиләр. Онлар, Дүнја Тиҹарәт Мәркәзиндә јени баш вермиш һадисәдән сонра, чохларынын еһтијаҹ дујдуғу, Мүгәддәс Китабда олан тәсәлливериҹи сөзләри, онунла бөлүшмәк истәкләрини билдирдиләр. Һәмин киши разылашды вә Шаһидләр она: “Мәсиһ сајәсиндә бөјүк тәсәлли дә тапырыг” сөзләри јазылмыш 2 Коринфлиләрә 1:3-7 ајәсини охудулар. Киши гоншулугда јашајан бу Шаһидләрин, тәсәлливериҹи сөзләри башгалары илә бөлүшмәләрини гијмәтләндирди вә деди: “Гој, Аллаһ сизин бу хејирхаһ ишинизә хејир-дуа версин”.

16, 17. Һансы ики һадисәдән ҝөрүнүр ки, фаҹиәләрдән әзијјәт чәкән вә ја нараһат олан инсанлара Мүгәддәс Китабын васитәсилә һәгиги көмәклик ҝөстәрмәк олар?

¹⁶ Бир Шаһид, марагланан инсанлара тәкрар баш чәкән заман, әввәлләр мараг ҝөстәрмәјән бир гадынын оғлу илә растлашды. Шаһид изаһ етди ки, баш вермиш фаҹиәнин гоншуларына неҹә тә’сир етмәсинә е’тинасыз јанаша билмир. Онун инсанлара баш чәкмәк үчүн хүсуси вахт ајырмасы, һәмин адамы тәәҹҹүбләндирди. Киши, һадисә заманы, Дүнја Тиҹарәт Мәркәзинин јахынлығында ишләдијини вә баш верәнләри ҝөрдүјүнү сөјләди. О, Аллаһын әзаблара нәјә ҝөрә јол вердијини сорушанда, Шаһид Мүгәддәс Китабдан бир нечә ајәни, о ҹүмләдән: “Салеһләрин гуртулушу Рәббдәндир; сыхынты вахтында онларын галасыдыр” сөзләри јазылан Мәзмур 37:39 ајәсини дә охуду. Киши меһрибанлыгла Шаһиддән, онун вә аиләсинин вәзијјәтини өјрәниб, јенидән ҝәлмәсини хаһиш етди вә онлара баш чәкдији үчүн үрәкдән ҝәлән миннәтдарлығыны билдирди.

¹⁷ Баш верән террор актларындан сонра Јеһованын Шаһидләри минләрлә јаслы инсанлара тәсәлли вермишләр. Онларын арасында, Шаһидләрин өз гоншуларына баш чәкәркән растлашдыглары бир гадын да варды. О, баш верән һадисәдән јаман кәдәрләнмишди. Шаһидләр гадына Мәзмур 72:12-14 ајәләриндә јазылмыш: “Чүнки имдада чағырынҹа, фағыры вә јардымчысы олмајан тәвазөкары гуртарар. Јохсула вә дүшкүнә аҹыјар; вә фағырларын ҹанларыны гуртарар. Ҹанларыны һијләдән вә әзијјәтдән гуртарар вә ҝөзүндә онларын ганы дәјәрли олар” сөзләрини охудугда, онлары диггәтлә динләди. Бу сөзләр неҹә дә вахтында дејилмишдир! Гадын Шаһидләрдән хаһиш етди ки, онлар һәмин ајәләри јенидән охусунлар вә сөһбәти давам етдирмәк мәгсәдилә онлары евә дә’вәт етди. Сөһбәтин сонуна јахын Мүгәддәс Китаб өјрәнмәси башланды.

18. Бир Шаһиддән һамы үчүн дуа етмәји хаһиш етдикдә, о, өз јахынларына неҹә көмәк етди?

¹⁸ Бир Шаһид, әввәлләр инсанларын Падшаһлыг һаггындакы хош хәбәрә бөјүк мараг ҝөстәрмәдији, варлы бир әразидә јерләшән ресторанда ишләјир. Террор актларындан сонра, рајонун сакинләринин сарсылдығы һисс олунурду. Һәмин һадисәләрин баш вердији һәфтәдә, ҹүмә ҝүнү, ресторанын мүдири, өләнләрин хатирәсини бир дәгигәлик сүкутла јад етмәк үчүн, әлләриндә шам, һамынын чөлә чыхмасыны хаһиш етди. Шаһид иш јолдашларынын һиссләринә һөрмәт ҝөстәриб чөлә чыхды вә онларла бирликдә сакитҹә дајанды. Мүдир онун Јеһованын Шаһиди, дини хидмәтчи олдуғуну билдији үчүн, бир дәгигәлик сүкутдан сонра, дуа етмәсини хаһиш етди. Шаһид разылашды. О, дуасында гејд етди ки, баш верән һадисәдән сонра чохлары кәдәр ичиндәдир, лакин онлар үмидсизлијә гапылмамалыдырлар. О, белә дәһшәтли һадисәләрин артыг мөвҹуд олмајаҹағы бир вахтдан данышды вә ону да гејд етди ки, Мүгәддәс Китабда олан биликләр, тәсәлли Аллаһына јахынлашмагда бүтүн инсанлара көмәк едәр. Шаһид “амин” дедикдән сонра, мүдир она јахынлашды вә гуҹаглады, онунла ресторандан чыхан 60-дан артыг адамла бирликдә мәсиһчијә өз тәшәккүрүнү билдирди. Мүдир индијәдәк белә бир дуа ешитмәдијини сөјләди.

Әтрафдакылар үчүн хејир-дуа

19. Һансы һадисә ҝөстәрир ки, бә’зи инсанлар Јеһованын Шаһидләринин јүксәк әхлага малик олдугларыны е’тираф едирләр?

¹⁹ Артыг бир чохларынын гејд етдији кими, Јеһованын Шаһидләринин хүсусилә һәмин ҝүнләрдә баш чәкдикләри инсанлар, фајда әлдә едирдиләр. Бир дә ки, сүлһ, дүзҝүнлүк вә јүксәк әхлаг нормаларына тәрәфдар олан инсанлар мүсбәт тә’сир ҝөстәрмәјә биләрми? Мәркәзи Асија өлкәләринин бириндә, Јеһованын Шаһидләри исте’фада олан дөвләт тәһлүкәсизлик органы забити илә гаршылашдылар. О билдирди ки, бир заман она, мүхтәлиф дини тәшкилатларла таныш олмағы тапшырмышдылар. Нөвбә Јеһованын Шаһидләринә чатанда, онларын дүзҝүнлүјү вә виҹданлы олмалары она ҝүҹлү тә’сир бағышлады. Шаһидләрин мөһкәм иманы вә тә’лимләринин Мүгәддәс Китаба әсасланмасы ону валеһ етмишди. Кечмиш забит Мүгәддәс Китабы өјрәнмәјә разылыг верди.

20. а) Кечән ил Јеһованын Шаһидләри тәрәфиндән һәјата кечирилән иш нәјә шәһадәт едир? б) Нәдән ҝөрүнүр ки, бизи гаршыда һәлә чох ишләр ҝөзләјир вә мүждәни тәблиғ етмәк ишинә неҹә јанашырыг?

²⁰ Бу мәгаләдә тәсвир едилән бә’зи һадисәләрдән - һәлә минләрлә белә һадисә садаламаг оларды - ајдын ҝөрүнүр ки, Јеһованын Шаһидләри 2001-ҹи хидмәт или әрзиндә аз иш ҝөрмәјибләрa. Онлар милјонларла инсанларла сөһбәт етмиш, кәдәр ичиндә олан чохларына тәсәлли вермишләр. Онларын тәблиғ иши јахшы бәһрәләр ҝәтирмишдир. 263 431 адам, Аллаһа һәср олундугларына ишарә олараг, суда вәфтиз олунмушлар. Бүтүн дүнјада мүждәчиләрин сајы 1,7 фаиз артмышдыр. Иса Мәсиһин өлүмүнүн Хатирә Ҝеҹәсинә ҝәлән 15 374 986 адамын сајына әсасән исә демәк олар ки, бизи гаршыда һәлә чох ишләр ҝөзләјир (1 Коринфлиләрә 11:23-26). Беләликлә, ҝәлин хош хәбәрә һај вермәјә һазыр олан һәлим инсанлары ахтармаға давам едәк! Һәлә ки, “Рәббин лүтф или” давам едир, ҝәлин “үрәји гырыг оланлара” бундан сонра да тәсәлли верәк. Бизә неҹә дә ҝөзәл иш һәвалә олунуб! Шүбһәсиз ки, бизим һәр биримизә Ишајанын сөзләри доғмадыр: “Рәбб илә чох мәсрур олаҹағам, ҹаным Аллаһымла севиниб ҹошаҹаг” (Ишаја 61:10). Беләликлә, ҝәлин, бундан сонра да “Рәбб Јеһова... бүтүн милләтләрин гаршысында салеһликлә һәмди... битирәҹәкдир”,- пејғәмбәрлик сөзләрини һәјата кечирән Аллаһ үчүн фајдалы олаг (Ишаја 61:11).

[Һашијә]

Јадыныздадырмы?

• Исанын тәблиғ етдији хош хәбәр һәлим инсанлара һансы хејир-дуалары ҝәтирирди?

• Биринҹи әсрдә Исанын шаҝирдләринин тәблиғ етдији хош хәбәрә һај верәнләр һансы хејир-дуалары алырдылар?

• Хош хәбәр, она бу ҝүн һај верән инсанлар үчүн хејир-дуаја неҹә чеврилир?

• Хош хәбәри тәблиғ етмәк кими мәс’ул ишимизә неҹә јанашырыг?

[29-32-ҹи сәһифәләрдәки һесабата нәшрин өзүндә бахын]

2001 ЈЕҺОВАНЫН ШАҺИДЛӘРИНИН ХИДМӘТ ИЛИ ҮЧҮН ҮМУМДҮНЈА ҺЕСАБАТЫ

[25-ҹи сәһифәдәки шәкилләр]

Јеһованын Шаһидләри мүждәни тәблиғ етмәк вәзифәләрини һеч заман унутмурлар.

[26-ҹы сәһифәдәки шәкилләр]

Хош хәбәрә һај верәнләр, бирләшмиш үмумдүнја гардашлығына говушурлар.