Хош мүждәни бәјан едирик

«Дағлары ашыб-ҝәлән мүждәчинин ајаглары неҹә дә ҝөзәлдир! О, хош мүждә ҝәтирир» (ЈЕШАЈА 52:7).

1, 2. а) Һәр ҝүн һансы фаҹиәләр баш верир? б) Бир чох инсанлар һәр ҝүн пис хәбәрләр ешидәндә өзләрини неҹә һисс едирләр?

БУ ҜҮН бүтүн дүнјада инсанлар даима пис хәбәрләр ешидирләр. Онлар радиону ачыр вә јени өлүмҹүл хәстәликләр һаггында дәһшәтли хәбәрләр ешидирләр. Телевизорда хәбәрләрә бахдыгдан сонра, көмәк диләјән аҹ ушагларын сифәтләри узун мүддәт инсанларын јаддашындан силинмир. Онлар әлләринә гәзет ҝөтүрүр вә партладылмыш биналарын галыглары алтында галан чохсајлы ҝүнаһсыз гурбанлар һаггында охујурлар.

² Елә ҝүн олмур ки, фаҹиә баш вермәсин. Бу дүнјанын сурәтинин пислијә доғру дәјишдијинә шүбһә јохдур (1 Коринфлиләрә 7:31). Гәрби Авропада чыхан иҹтимаи-сијаси журналда гејд едилирди: «Һәрдән елә тәәссүрат јараныр ки, санки дүнја учурума доғру ҝедир». Ҝетдикҹә даһа чох инсанын әлдән дүшмәси тәәҹҹүблү дејил! Бир нәфәр Бирләшмиш Штатларда телевизија хәбәрләринә даир кечирилән иҹтимаи рә’ј сорғусу заманы, еһтимал ки, милјонларла инсанын шәрик олдуглары фикри сөјләмишдир: «Хәбәрләрә бахдыгдан сонра тамамилә руһдан дүшүрәм. Һеч бир јахшы хәбәр јохдур. Адамын әлләри јанына дүшүр».

Һамынын ешитмәли олдуғу хәбәр

3. а) Мүгәддәс Китабда һансы севиндириҹи хәбәр вар? б) Падшаһлыг һаггындакы хош хәбәр бизим үчүн нәјә ҝөрә дәјәрлидир?

³ Бу зүлмәт дүнјада севиндириҹи хәбәр ешитмәк мүмкүндүрмү? Бәли, мүмкүндүр! Мүгәддәс Китабда хош хәбәрин олдуғуну билмәјимиз тәсәлливериҹидир. Бу хәбәр Аллаһын Падшаһлығынын хәстәликләрә, аҹлыға, ҹинајәтә, мүһарибәләрә вә бүтүн әзаблара бирдәфәлик сон гојаҹағы барәдәдир (Мәзмур 46:9; 72:12). Мәҝәр бу хәбәри һамы ешитмәли дејилми? Јеһованын Шаһидләри дә мәһз белә дүшүнүрләр. Буна ҝөрә дә онлар һәр јердә Аллаһын Падшаһлығы һаггындакы хош хәбәри бүтүн милләтләрдән олан инсанлара сә’јлә чатдырмагла танынырлар (Матта 24:14).

4. Бу вә нөвбәти мәгаләдә тәблиғимизин һансы саһәләрини мүзакирә едәҹәјик?

⁴ Бу дәрәҹәдә ваҹиб олан хош хәбәрин, һәтта аз гәбул олунан јерләрдә белә бәјан едилмәсиндә там сурәтдә иштирак етмәкдә бизә нә көмәк едәҹәк? (Лука 8:15). Бу ишдә бизә тәблиғ фәалијјәтимизин үч ваҹиб саһәсинин гыса иҹмалыны нәзәрдән кечирмәк көмәк едәҹәк. Биринҹиси, нијјәтләримизи, јә’ни нә үчүн тәблиғ етдијимизи; икинҹиси, бәјан етдијимиз хәбәри, јә’ни нәји тәблиғ етдијимизи вә үчүнҹүсү, истифадә етдијимиз методлары, јә’ни неҹә тәблиғ етдијимизи арашдыраҹағыг. Әҝәр дүзҝүн нијјәтлә тәблиғ етмәјә давам едириксә, Аллаһын хәбәрини дәгиг чатдырырыгса вә еффектли тәблиғ үсулларындан истифадә едириксә, онда мүхтәлиф мәншәли инсанлара ән јахшы хәбәри — Аллаһын Падшаһлығы һаггындакы хош хәбәри ешитмәк имканы верәҹәјикa.

Хош хәбәри нә үчүн бәјан едирик?

5. а) Тәблиғ етмәјә илк нөвбәдә бизи нә тәшвиг едир? б) Нәјә ҝөрә демәк олар ки, Мүгәддәс Китабын тәблиғ етмәк әмрини јеринә јетирмәјимиз Аллаһа бәсләдијимиз мәһәббәтин ифадәсидир?

⁵ Әввәлҹә ҝәлин хидмәтимизин биринҹи саһәсини — нијјәтләримизи нәзәрдән кечирәк. Хош хәбәри нә үчүн бәјан едирик? Биз буну Исанын етдији сәбәбдән ирәли ҝәләрәк едирик. О демишдир: «Мән Атаны севирәм» (Јәһја 14:31; Мәзмур 40:8). Бизи тәблиғ етмәјә һәр шејдән өнҹә Аллаһа олан мәһәббәт тәшвиг едир (Матта 22:37, 38). Мүгәддәс Китаб ҝөстәрир ки, Аллаһа хидмәт етмәклә мәһәббәт арасында бағлылыг вар. Орада дејилир: «Аллаһы севмәк, Аллаһын әмрләринә риајәт етмәк демәкдир» (1 Јәһја 5:3; Јәһја 14:21). Аллаһын әмрләри арасында ҝедиб шаҝирдләр һазырламаг әмри вармы? (Матта 28:19). Бәли, вар. Дүздүр, бу сөзләр Иса тәрәфиндән дејилсә дә, онлар Јеһоваја мәхсусдур. Ахы бу неҹә ола биләр? Иса изаһ етмишдир: «Өзүмдән бир шеј етмирәм, амма бунлары Атанын Мәнә өјрәтдији кими сөјләјирәм» (Јәһја 8:28; Матта 17:5). Беләликлә, хош хәбәри тәблиғ етмәк әмрини јеринә јетирмәклә Јеһоваја Ону неҹә севдијимизи ҝөстәририк.

6. Јеһоваја олан мәһәббәт бизи тәблиғ етмәјә неҹә тәшвиг едир?

⁶ Јеһоваја олан мәһәббәтин биздә тәблиғ етмәк арзусу јаратмасынын диҝәр сәбәби исә, Шејтанын Аллаһ һаггында јајдығы јалана гаршы дурмаг истәјимиздир (2 Коринфлиләрә 4:4). Шејтан Аллаһын һакимијјәтинин әдаләтли олдуғуну шүбһә алтына гојду (Јарадылыш 3:1-5). Јеһованын Шаһидләри олан бизләр Шејтанын бөһтанларыны ифша етмәјә вә Аллаһын адыны инсанлар гаршысында иззәтләндирмәјә ҹан атырыг (Јешаја 43:10-12). Бундан әлавә, биз Јеһованын хүсусијјәтләрини вә јолларыны өјрәндијимиз үчүн суса билмәрик. Биз өзүмүзү Аллаһа јахын һисс едир вә сәмими гәлбдән Онун һаггында башгаларына данышмаға ҹан атырыг. Јеһованын хејирхаһлығы вә јолларынын салеһлији бизә о гәдәр севинҹ ҝәтирир ки, даима Онун һаггында данышырыг (Мәзмур 145:7-12). Үрәјимиз, Она һәмд етмәјә вә гулаг асаҹаг һәр бир инсана Онун «фәзиләтләрини» бәјан етмәјә тәшвиг едир (1 Петер 2:9; Јешаја 43:21).

7. Аллаһа олан мәһәббәтдән башга даһа һансы ваҹиб сәбәбә ҝөрә тәблиғ ишиндә иштирак едирик?

⁷ Лакин хидмәтимизи давам етдирмәјимизин башга бир ваҹиб сәбәби дә вар. Биз, пис хәбәрләрин амансыз тәзјиги алтында әзилән вә ја һәр һансы башга сәбәбләр үзүндән әзијјәт чәкән инсанлара тәсәлли вермәк истәјирик. Бунунла биз Исаны тәглид етмәјә ҹан атырыг. Ҝәлин ҝөрәк, «Маркын Мүждәси»нин 6-ҹы фәслиндә бу һагда нә дејилир.

8. «Маркын Мүждәси»нин 6-ҹы фәслиндә Исанын инсанлара бәсләдији һиссләр һаггында нә дејилир?

⁸ Һәвариләр тәблиғ хидмәтиндән гајытдыгдан сонра етдикләри вә өјрәтдикләри һәр шеј һаггында Исаја данышдылар. Иса һәвариләринин јорғун олдугларыны ҝөрдү вә бирликдә ҝедиб ‘бир аз динҹәлмәји’ тәклиф етди. Онлар гајыға миниб сакит бир јерә ҝетдиләр. Инсанлар саһил бојунҹа далларынҹа гачыб, онлара чатдылар. Бәс бу заман Иса нә етди? Мүгәддәс Китабда: «Иса... бөјүк бир издиһамла гаршылашды вә онлара јазығы ҝәлди; чүнки чобансыз гојунлар кими идиләр. Вә онлара чох шејләр өјрәтмәјә башлады» дејә јазылмышдыр (Марк 6:31-34). Иса јорғун олмасына бахмајараг, инсанлара јазығы ҝәлдијиндән онлара хош хәбәри тәблиғ етмәјә башлады. Бундан ҝөрүнүр ки, Иса бу инсанлары чох севир вә онлара дәрин шәфгәт һисси бәсләјирди.

9. «Маркын Мүждәси»нин 6-ҹы фәслиндәки парчадан һансы нијјәтлә тәблиғ етмәли олдуғумуза даир нә өјрәнирик?

⁹ Мүгәддәс Китабын бу парчасындан нә өјрәнирик? Биз бир мәсиһчи кими хош хәбәри бәјан етмәји вә шаҝирдләр һазырламағы өзүмүзә борҹ билирик. Аллаһын ирадәсинин ‘бүтүн инсанларын хилас олмасындан’ ибарәт олдуғу үчүн хош хәбәри бәјан етмәк мәс’улијјәтини дашыдығымызы дәрк едирик (1 Тимотејә 2:4). Лакин биз јалныз борҹ һиссиндән дејил, һәмчинин инсанлара јазығымыз ҝәлдији үчүн хидмәт едирик. Иса кими биз дә инсанлара шәфгәт һисси бәсләјириксә, үрәјимиз бизи, бундан сонра да хош хәбәри онларла бөлүшмәк үчүн әлимиздән ҝәләни етмәјә тәшвиг едәҹәк (Матта 22:39). Әҝәр дүзҝүн нијјәтлә тәблиғ едириксә, бу иши давам етдирмәкдә бизә һеч нә мане ола билмәз.

Бәјан етдијимиз хәбәр — Аллаһын Падшаһлығы һаггындакы хош хәбәрдир

10, 11. а) Бәјан етдијимиз хәбәри Јешаја пејғәмбәр неҹә тәсвир едир? б) Иса хош хәбәри неҹә бәјан едирди вә мүасир мәсиһчиләр онун нүмунәсинә неҹә риајәт едирләр?

¹⁰ Инди исә хидмәтимизин икинҹи саһәсинә, тәблиғ етдијимиз хәбәрә нәзәр салаг. Биз нәји тәблиғ едирик? Јешаја пејғәмбәр тәблиғ етдијимиз хәбәри чох ҝөзәл тәсвир етмишдир: «Сүлһ хәбәри ҝәтирән, дағлары ашыб-ҝәлән мүждәчинин ајаглары неҹә дә ҝөзәлдир! О, хош мүждә ҝәтирир, гуртулуш хәбәри верир, Сион халгына “Аллаһыныз һөкм сүрүр!” бәјан едир» (Јешаја 52:7).

¹¹ Бу ајәдәки «Аллаһыныз һөкм сүрүр!» ачар ифадәси хатырладыр ки, бәјан етмәли олдуғумуз хәбәр — Аллаһын Падшаһлығы һаггындакы хош хәбәрдир (Марк 13:10). Һәмчинин диггәт јетирин ки, бу ајәдә бәјан етдијимиз хәбәрин мүсбәт ҹәһәтләри гејд едилир. Јешаја «гуртулуш», «хош мүждә» вә «сүлһ» кими ифадәләрдән истифадә едир. Бу пејғәмбәрлик јүзилликләр сонра, ерамызын биринҹи әсриндә, Иса Мәсиһ Аллаһын ҝәләҹәк Падшаһлығы һаггында сә’јлә тәблиғ едәрәк нүмунә вердији заман јеринә јетди (Лука 4:43). Бизим ҝүнләрдә, хүсусилә дә 1919-ҹү илдән е’тибарән, Јеһованын Шаһидләри Аллаһын тә’сис едилмиш Падшаһлығы вә онун ҝәтирәҹәји хејир-дуалар һаггында сә’јлә тәблиғ етмәклә Исанын гојдуғу нүмунәни тәглид едирләр.

12. Падшаһлыг һаггындакы хош хәбәр ону гәбул едәнләрә неҹә тә’сир ҝөстәрир?

¹² Падшаһлыг һаггындакы хош хәбәр она һај верән инсанлара неҹә тә’сир едир? Исанын ҝүнләриндә олдуғу кими, хош хәбәр инсанлара бу ҝүн дә үмид вә тәсәлли ҝәтирир (Ромалылара 12:12; 15:4). Сәмими гәлбли инсанлар гаршыда даһа јахшы бир дөврүн олаҹағыны ҝөзләмәјә там әсаслары олдуғуну өјрәнәндә үмид әлдә едирләр (Матта 6:9, 10; 2 Петер 3:13). Бу ҹүр үмид Аллаһ горхусуна малик олан инсанлара мүсбәт бахышлары горујуб сахламаға көмәк едир. Мәзмурчу дејир ки, онлары «пис хәбәрләр горхутмаз» (Мәзмур 112:1, 7).

‘Гәлбләри сыныг оланларын јараларыны сарыјан’ хәбәр

13. Јешаја пејғәмбәр хош хәбәри гәбул едәнләрин дәрһал алдыглары хејир-дуалары неҹә тәсвир едир?

¹³ Хош хәбәри гәбул едәнләр дәрһал тәсәлли вә хејир-дуалар әлдә едирләр. Неҹә? Јешаја пејғәмбәр бу хејир-дуалардан бә’зиләринә диггәт јетирмишдир: «Худавәнд Рәббин Руһу үзәримдәдир, чүнки фәгирләрә мүждәни билдирмәк үчүн О мәни мәсһ етди. Гәлбләри сыныг оланларын јараларыны сарымаг үчүн, әсирләрә азадлыг, дустаглара һүрријјәт е’лан етмәк үчүн, Рәббин лүтф илини, Аллаһымызын гисас ҝүнүнү бәјан етмәк үчүн, јаслыларын һамысына тәсәлли вермәк үчүн... Рәбб мәни ҝөндәрди» (Јешаја 61:1-3; Лука 4:16-21).

14. а) «Гәлбләри сыныг оланларын јараларыны сарымаг» ифадәси Падшаһлыг һаггындакы хәбәрә даир бизә нә өјрәдир? б) Гәлбләри сыныг оланлара гајғы ҝөстәрмәкдә Јеһованы неҹә тәглид едирик?

¹⁴ Бу пејғәмбәрлијә әсасән, Иса хош хәбәри тәблиғ етмәклә ‘гәлбләри сыныг оланларын јараларыны сарыјаҹаг’. Јешаја неҹә дә парлаг образ јаратмышдыр! Бир Мүгәддәс Китаб лүғәтинә әсасән, бурада истифадә олунан ибраниҹә «сарымаг» фе’ли «чох вахт дәрман сүртәрәк вә сарыјараг хәстәни мүалиҹә етмәји нәзәрдә тутур». Гајғыкеш тибб баҹысы хәстәнин јарасыны сарыјараг вә ја үзәринә компресс гојараг онун ағрыларыны азалда биләр. Ејнилә гајғыкеш тәблиғчиләр дә, Падшаһлыг һаггындакы хош хәбәри тәблиғ едәркән бу хәбәрә һај верән вә мүәјјән сәбәбләр үзүндән кәдәр ичиндә олан инсанлара јардым едирләр. Тәсәллијә еһтијаҹы оланларын гајғысына галмагла, биз Јеһованы тәглид едирик (Језекел 34:15, 16). Мәзмурчу дејир ки, Аллаһ «сыныг гәлбләрә шәфа верәр, јараларыны сарыјар» (Мәзмур 147:3).

Падшаһлыг һаггындакы хәбәр инсанларын һәјатыны дәјишир

15, 16. Һәјатда баш верән һансы һадисәләр ҝөстәрир ки, Падшаһлыг һаггындакы хәбәр инсанлар үчүн көмәк вә гүввә мәнбәјидир?

¹⁵ Һәјатда баш верән чохсајлы һадисәләр Падшаһлыг һаггындакы хәбәрин гәлби сыныг оланлара неҹә тәсәлли вердијини вә онлары мөһкәмләндирдијини ҝөстәрир. Ҹәнуби Америкадан олан Ореанна адлы гадынын һадисәсини нәзәрдән кечирәк. Бу јашлы гадын јашамаг арзусуну итирмишди. Јеһованын Шаһиди олан бир гадын она баш чәкмәјә, Мүгәддәс Китабы вә «Мәним Мүгәддәс Китаб һекајәләри китабым» нәшрини охумаға башладыb. Депрессијада олан бу гадын әввәлҹә јатагда ҝөзләри јумулу гулаг асыр вә һәрдәнбир дәриндән аһ чәкирди. Лакин чох кечмәдән, онун үчүн охујанда о, чарпајыда отурмаға чалышырды. Бир мүддәт кечдикдән сонра исә о, артыг гонаг отағында креслода отуруб баҹымызы ҝөзләјирди. Сонра исә гадын Падшаһлыг Залында кечирилән мәсиһчи ҝөрүшләринә ҝетмәјә башлады. Бу ҝөрүшләрдә өјрәндикләри ону руһландырды вә о, евинин јанындан кечәнләрин һамысына Мүгәддәс Китаба әсасланан әдәбијјат тәклиф етмәјә башлады. Ореанна 93 јашында вәфтиз олунуб, Јеһованын Шаһиди олду. Падшаһлыг һаггындакы хәбәр онда јашамаг арзусу ојатды (Сүлејманын мәсәлләри 15:30; 16:24).

¹⁶ Падшаһлыг һаггындакы хәбәр сағалмаз хәстәлик уҹбатындан тезликлә өләҹәкләрини билән инсанлара да ҝүҹлү көмәк едир. Гәрби Авропадан олан Маријанын нүмунәсини нәзәрдән кечирәк. О, сағалмаз хәстәликдән әзијјәт чәкир вә бүтүн үмидини итирмишди. Јеһованын Шаһидләри онун јанына ҝәләндә депрессијада иди, лакин Аллаһын нијјәтләри һаггында өјрәнәндә һәјаты мә’на илә долду. О вәфтиз олунуб, сә’јлә тәблиғ етмәјә башлады. Өмрүнүн сон ики или әрзиндә ҝөзләри үмид вә севинҹлә долу иди. Марија өләндә дирилмәјә мөһкәм үмиди варды (Ромалылара 8:38, 39).

17. а) Падшаһлыг һаггындакы хәбәри гәбул едәнләрин һәјаты неҹә дәјишилир? б) Шәхсән сиз неҹә әмин олмусунуз ки, Јеһова «гәдди әјиләнләрин һамысыны галдырыр»?

¹⁷ Бу кими һадисәләр шәһадәтлик едир ки, Падшаһлыг һаггындакы хәбәр Мүгәддәс Китаб һәгигәтини арзулајан инсанларын һәјатыны дәјишир. Әзизләринин өлүмүнә ҝөрә кәдәр ичиндә оланлар дирилмәјә олан үмид барәсиндә ешидәндә јенидән гүввә әлдә едирләр (1 Салониклиләрә 4:13). Еһтијаҹ ичиндә јашајанлар вә аиләләрини ҝүҹлә доландыранлар, әҝәр Јеһоваја садиг галарларса онлары һеч вахт тәрк етмәјәҹәјини өјрәнәндә, шәхси ләјагәт һисси әлдә едир вә ҹәсарәтләнирләр (Мәзмур 37:28). Депрессија илә мүбаризәдә үмидсизлијә гапыланлар Јеһованын көмәји сајәсиндә тәдриҹән дахили гүввә әлдә едир вә һәтта бу хәстәлијин өһдәсиндән ҝәлә билирләр (Мәзмур 40:1, 2). Јеһова Кәламындакы гүввәнин васитәсилә артыг индидән «гәдди әјиләнләрин һамысыны галдырыр» (Мәзмур 145:14). Аллаһын Падшаһлығы һаггындакы хош хәбәрин саһәмиздәки вә мәсиһчи јығынҹағындакы гәлби сыныг инсанлара неҹә тәсәлли ҝәтирдијини ҝөрәндә, бу ҝүн ән јахшы хәбәрә малик олдуғумуза дөнә-дөнә әмин олуруг (Мәзмур 51:17).

«Аллаһа дуам, онларын хиласы үчүндүр»

18. Јәһудиләр хош хәбәри рәдд етдикдә Павел һансы һиссләри кечирирди вә нәјә ҝөрә?

¹⁸ Бәјан етдијимиз хәбәрин ән јахшы хәбәр олмасына бахмајараг, чохлары ону гәбул етмир. Белә һалларда һансы һиссләри кечиририк? Павелин кечирдији һиссләри. О, тез-тез јәһудиләрә тәблиғ едирди, лакин онларын әксәријјәти гуртулуш хәбәрини рәдд етдиләр. Павел буна ҝөрә чох кәдәрләнмишди. О е’тираф едирди: «Бөјүк кәдәрим вә үрәјимдә даими изтирабым вар» (Ромалылара 9:2). О, тәблиғ етдији јәһудиләрә шәфгәт һисси бәсләјир вә онларын бу хәбәрә гулаг асмадыглары үчүн кәдәрләнирди.

19. а) Нәјә ҝөрә һәрдән кәдәрләнмәјимиз тәәҹҹүблү дејил? б) Дурмадан тәблиғ етмәкдә Павелә нә көмәк едирди?

¹⁹ Биз дә инсанлара шәфгәт һисси бәсләдијимиз үчүн тәблиғ едирик. Буна ҝөрә дә тәәҹҹүблү дејил ки, инсанлар Падшаһлыг һаггындакы хәбәри рәдд едәндә кәдәрләнирик. Бу, бизим тәблиғ етдијимиз инсанларын руһани рифаһынын гејдинә галдығымызы ҝөстәрир. Анҹаг биз һәвари Павелин нүмунәсини унутмамалыјыг. Дурмадан тәблиғ етмәкдә она нә көмәк едирди? Јәһудиләрин Аллаһын кәламыны рәдд етмәси онун үчүн чох ағыр олса да, Павел онларын арасында хош хәбәрә һај верәнләрин олаҹағына инанырды. О үмид едирди ки, Мәсиһи гәбул едәҹәк инсанлар тапылаҹаг. Буна ҝөрә дә Павел ајры-ајрылыгда һәр бир јәһуди һаггында дүшүнәрәк јазмышдыр: «Үрәјимдәки арзу вә Исраил үчүн Аллаһа дуам, онларын хиласы үчүндүр» (Ромалылара 10:1).

20, 21. а) Тәблиғ хидмәтимиздә Павелин нүмунәсини неҹә тәглид едә биләрик? б) Нөвбәти мәгаләдә тәблиғ хидмәтимизин һансы саһәси мүзакирә олунаҹаг?

²⁰ Павелин ики ваҹиб шеји гејд етдијинә нәзәр салаг: о, һеч олмазса, бә’зи инсанларын хилас олмасыны бүтүн үрәкдән арзу едир вә бу һагда Аллаһа јалварырды. Бу ҝүн биз Павелин нүмунәсини тәглид едирик. Биз хош хәбәрә мејлли оланлары ахтарыб тапмағы сәмими гәлбдән арзулајырыг. Биз белә инсанлары тапа билмәк вә онларын хиласа апаран јол илә ҝетмәләринә көмәк едә билмәк үчүн, һәмишә Јеһоваја дуа едирик (Сүлејманын мәсәлләри 11:30; Језекел 33:11; Јәһја 6:44).

²¹ Лакин Падшаһлыг һаггындакы хәбәрин мүмкүн гәдәр чох инсанлара чатмасы үчүн, биз нә үчүн вә нәји тәблиғ етдијимиздән башга, неҹә тәблиғ етдијимизә дә диггәт јетирмәлијик. Бу мөвзу нөвбәти мәгаләдә мүзакирә олунаҹаг.

[Һашијәләр]

Сиз нә өјрәндиниз?

• Биз нә үчүн тәблиғ едирик?

• Инсанлара чатдырмаг истәдијимиз ән ваҹиб хәбәр һансыдыр?

• Падшаһлыг һаггындакы хәбәри гәбул едәнләр һансы хејир-дуалары алырлар?

• Тәблиғ хидмәтимизи давам етдирмәкдә бизә нә көмәк едәҹәк?

[20-ҹи сәһифәдәки шәкилләр]

Падшаһлыг һаггындакы хәбәр гәлбләри сыныг оланлара гүввә верир.

[22-ҹи сәһифәдәки шәкилләр]

Дуа тәблиғ хидмәтиндә дөзүмлү олмаға көмәк едир.