Аллаһа мәһәббәт инсанлары бирләшдирән гүввәдир

БИРИНҸИ әсрин мәсиһчиләри тамамилә мүхтәлиф инсанлардан ибарәт олсалар да, онларын јығынҹағында бирлик һөкм сүрүрдү. Бу инсанларын арасында Асијадан, Авропадан вә Африкадан оланлар варды. Бундан башга, онлар әһалинин мүхтәлиф тәбәгәләрини тәшкил едирдиләр, мәсәлән, бураја каһинләр, әсҝәрләр, гуллар, гачгынлар, сәнәткарлар, пешәкарлар вә таҹирләр дахил иди. Бу мәсиһчиләрин арасында һәм јәһудиләр, һәм дә башга милләтләрдән олан инсанлар вар иди. Мәсиһчи јығынҹағында вахтилә зина едәнләр, һомосексуалистләр, сәрхошлар, оғрулар вә ја сојғунчулугла мәшғул оланлар вар иди. Лакин мәсиһчи олдугдан сонра онлар пис вәрдишләринә сон гојмуш вә иманда бирләшмишдиләр.

Бизим еранын биринҹи әсриндә јашамыш бу инсанлары мәсиһчи тә’лимләри неҹә бирләшдирирди? Нәјә ҝөрә онлар һәм бир-бирләри илә, һәм дә башгалары илә сүлһ ичиндә јашајырдылар? Онлар нә үчүн үсјанларда вә мүнагишәләрдә иштирак етмирдиләр? Еркән мәсиһчи дини индики әсас динләрдән нәјә ҝөрә бу гәдәр фәргләнирди?

Еркән мәсиһчиләрин бирлији

Биринҹи әсрин мәсиһчиләрини бирләшдирән ән әсас гүввә Аллаһа олан мәһәббәт иди. Онлар әсас вәзифәләринин — бүтүн үрәкләри, ҹанлары вә дүшүнҹәләри илә һәгиги Аллаһ олан Јеһованы севмәк олдуғуну баша дүшүрдүләр. Мәсәлән, миллијјәтҹә јәһуди олан һәвари Петерә башга милләтдән олан адамын евинә ҝетмәк бујурулмушду. Башга вахт олсајды, Петер һәмин адамла һеч данышмазды да. Лакин һәварини бу тапшырыға табе олмаға тәшвиг едән илк нөвбәдә Јеһоваја олан мәһәббәт иди. Петер вә башга еркән мәсиһчиләр Аллаһла јахын мүнасибәтләрә малик идиләр. Бу мүнасибәтләр Аллаһын хүсусијјәтләри вә Онун хошуна нәјин ҝәлиб-ҝәлмәдији һаггындакы дәгиг билијә әсасланырды. Вахт кечдикҹә Јеһованын бүтүн хидмәтчиләри баша дүшдүләр ки, Аллаһын ирадәси онларын «бир фикирдә вә ејни рә’јдә» бирләшмәләридир (1 Коринфлиләрә 1:10; Матта 22:37; Һәвариләрин ишләри 10:1-35).

Иса Мәсиһә олан иман Аллаһын хидмәтчиләрини бир-бирләринә даһа да јахынлашдырырды. Онлар Исанын изләрини дәгигликлә изләмәк истәјирдиләр. Иса онлара бујурмушду: «Сизи севдијим кими сиз дә бир-биринизи севин. Әҝәр бир-биринизә гаршы мәһәббәтиниз олса, бундан һәр кәс Мәним шаҝирдләрим олдуғунузу биләҹәк» (Јәһја 13:34, 35). Иса өтәри мәһәббәтдән дејил, фәдакар мәһәббәтдән данышырды. Бу ҹүр мәһәббәтин нәтиҹәси нә ола биләрди? Иса она иман едәнләр үчүн дуа едирди: «Хаһиш едирәм ки, һамысы бир олсун; неҹә ки, еј Ата, Сән Мәндәсән вә Мән дә Сәндәјәм, онлар да Биздә олсунлар» (Јәһја 17:20, 21; 1 Петер 2:21).

Јеһова Өзүнүн һәгиги хидмәтчиләринин үзәринә мүгәддәс руһундан, јә’ни фәал гүввәсиндән төкдү. Бу онларын арасындакы бирлијә көмәк етди. Һәмин руһ онлара Мүгәддәс Китаб тә’лимләрини анламаға көмәк етди вә бу анлајыш бүтүн јығынҹаглар тәрәфиндән гәбул едилди. Јеһованын хидмәтчиләри инсанлара ејни хәбәри чатдырырдылар. Бу хәбәр, Аллаһын Хиласкар Падшаһлығынын, јә’ни бәшәријјәт үзәриндә идарә едәҹәк сәмави һөкумәтин васитәсилә Јеһованын адынын иззәтләнмәси барәсиндәдир. Илк мәсиһчиләр баша дүшүрдүләр ки, онлар ‘бу дүнјадан дејилләр’. Буна ҝөрә дә, вәтәндаш иғтишашлары, јахуд һәрби мүнагишәләр заманы онлар битәрәфлији горујурдулар. Мәсиһчиләр бүтүн инсанларла сүлһдә олмаға чалышырдылар (Јәһја 14:26; 18:36; Матта 6:9, 10; Һәвариләрин ишләри 2:1-4; Ромалылара 12:17-21).

Аллаһын бүтүн хидмәтчиләри үзәрләринә дүшән бирлији горумаг мәс’улијјәтини дәрк едирдиләр. Онлар буну неҹә едә биләрдиләр? Мүгәддәс Китабын мәсләһәтләринә дәгиг сурәтдә риајәт етмәклә. Һәвари Павел мәсиһчиләрә јазмышдыр ки, онлар ‘әввәлки јашајышларына мәхсус олан көһнә мәнлији кәнара атыб’ «јени мәнлији» ҝејинсинләр (Ефеслиләрә 4:22-32).

Бирлијин горунмасы

Сөзсүз ки, биринҹи әсрин мәсиһчиләри һеч дә камил инсанлар дејилдиләр, буна ҝөрә дә онларын бирлијини поза билән вәзијјәтләр јаранырды. Мәсәлән, Һәвариләрин ишләри 6:1-6 ајәләриндән ҝөрүрүк ки, јунандилли јәһудиләрлә ибраниҹә данышан јәһудиләрин арасында фикир ајрылығы јаранмышды, белә ки, јунандиллиләр онларла әдаләтсиз давранылдығыны дүшүнүрдүләр. Анҹаг бу һагда һәвариләрә данышанда, мәсәлә тез вә әдаләтлә һәлл олунду. Даһа сонра јығынҹагда јәһуди олмајан мәсиһчиләрин вәзифәләринә даир фикир ајрылығы јаранды. Мүгәддәс Китаб принсипинә әсасланан гәрар гәбул олунан кими, ону бүтүн јығынҹагларда һамы бир нәфәр кими гәбул етди (Һәвариләрин ишләри 15:1-29).

Бу нүмунәләрдән ҝөрүндүјү кими, биринҹи әсрин мәсиһчиләри арасында јаранан фикир ајрылығы етник чәкишмәләрә вә дини тә’лимләрә даир һәлл олунмаз мүбаһисәләрә ҝәтириб чыхармырды. Нәјә ҝөрә? Она ҝөрә ки, онларын Јеһоваја мәһәббәтләри, Иса Мәсиһә олан иманлары, бир-бирләринә гаршы фәдакар мәһәббәтләри, мүгәддәс руһун рәһбәрлијинә риајәт етмәк истәкләри, Мүгәддәс Китаб тә’лимләрини ејнилә анламалары вә дәјишилмәјә һазыр олмалары еркән мәсиһчи јығынҹағындакы бирлији вә сүлһү горумаға көмәк едирди.

Бизим ҝүнләрдә мөвҹуд олан бирлик

Бизим ҝүнләрдә бирлијә наил олмаг мүмкүндүрмү? Илк мәсиһчиләрин бирлијинә көмәк едән амилләр, индики мүасир мәсиһчиләрә дүнјанын истәнилән һиссәсиндән олан бүтүн иргләрин нүмајәндәләри илә сүлһдә јашамаға көмәк едә биләрми? Бәли, едә биләр! Јеһованын Шаһидләри 230-дан чох өлкә вә әразидә үмумдүнја гардашлыг бирлијинә гошулараг Аллаһа хидмәт едирләр. Онлары да биринҹи әсрин мәсиһчиләрини бирләшдирән ејни амилләр бирләшдирир.

Јеһованын Шаһидләринин бирлији илк әввәл онларын Јеһова Аллаһа олан сәдагәтләринә әсасланыр. Бу о демәкдир ки, онлар һәр ҹүр шәраитдә Аллаһа садиг галмаға чалышырлар. Бундан әлавә, онлар Иса Мәсиһә вә онун вердији тә’лимләрә иман тәзаһүр етдирирләр. Бу мәсиһчиләри бир-бирләринә олан фәдакар мәһәббәт башгаларындан фәргләндирир. Бундан башга, Јеһованын Шаһидләри һәр јердә ејни хәбәри — Аллаһын Падшаһлығы һаггындакы хош хәбәри тәблиғ едирләр. Онлар бу Падшаһлыг һаггындакы билији иманындан, иргиндән, милләтиндән вә јахуд игтисади вәзијјәтиндән асылы олмајараг бүтүн инсанларла бөлүшмәјә шаддырлар. Јеһованын Шаһидләри бу дүнјанын ишләринә даир дә өз битәрәфликләрини горујурлар; бу, онлара инсанларын арасындакы бирлији позан сијаси, мәдәни, иҹтимаи вә игтисади мүнагишәләрдән гачынмаға көмәк едир. Вә нәһајәт, бүтүн Шаһидләр Мүгәддәс Китабын нормаларына мүвафиг давранараг бирлијә көмәк етмәк вәзифәләрини е’тираф едирләр.

Башгаларыны ҹәлб едән бирлик

Бу бирлик чох вахт Шаһид олмајан кәсләрдә мараг ојадыр. Мәсәлән, Илзеa Алманијада вахтилә католик монастырында хидмәт едирди. Ону Јеһованын Шаһиди олмаға тәшвиг едән нә олду? Илзе дејир: «Онлар дүнјада ән јахшы инсанлардыр. Онлар мүһарибәләрдә иштирак етмир, јахынларына пислик етмирләр. Онлар истәјирләр ки, инсанлар Аллаһын Падшаһлығынын рәһбәрлији алтында јер үзүндә олаҹаг Ҹәннәтдә хошбәхт јашасынлар».

Даһа бир нүмунә. Икинҹи Дүнја мүһарибәси заманы алман ордусунун әсҝәри Гүнтер Франсада хидмәт едирди. Бир дәфә Гүнтерин хидмәт етдији һиссәдә протестант каһини әсҝәрләр үчүн дини хидмәти иҹра едирди. Каһин дуасында Аллаһдан көмәк, мүдафиә вә гәләбә диләјирди. Хидмәтдән сонра Гүнтер мүшаһидә мәнтәгәсинә чыхыр. О, биноклдан бахыб ҝөрүр ки, башга бир каһин дә ҹәбһәнин о бири һиссәсиндәки дүшмән әсҝәрләр үчүн хидмәт иҹра едир. Сонра Гүнтер гејд едир: «Һәмин каһин дә, чох еһтимал ки, Аллаһдан көмәк, мүдафиә вә гәләбә диләјирди. Мән христиан килсәләринин нәјә ҝөрә бир-бирләринә дүшмән олдугларыны баша дүшә билмирдим». Ҝөрдүјү бу һадисә Гүнтерин јаддашында силинмәз из гојмушдур. Сонралар Гүнтер мүһарибәдә иштирак етмәјән Јеһованын Шаһидләри илә таныш оланда, онларын үмум­дүн­ја гардашлыг бирлијинә гошулду.

Ашок вә Фима шәрг динләриндән биринә мәхсус идиләр. Онларын евиндә танрыја ибадәтҝаһ варды. Онлар бәрк хәстәләнән заман динләрини бир даһа нәзәрдән кечирмәји гәрара алдылар. Ашок вә Фима Јеһованын Шаһидләринә раст ҝәлдиләр. Јеһованын Шаһидләринин арасында һөкм сүрән мәһәббәт вә Мүгәддәс Китаб тә’лимләри онлара дәрин тәәссүрат бағышлады. Инди Ашок вә Фима Јеһованын Пад­шаһлығы һаггындакы хош хәбәри сә’јлә тәблиғ едирләр.

Илзе, Гүнтер, Ашок вә Фима милјонларла инсанлардан ибарәт олан Јеһованын Шаһидләринин үмумдүнја гардашлығынын бир һиссәсидирләр. Онлар Мүгәддәс Китабын вә’динә, јә’ни бу ҝүн Аллаһа бирликдә хидмәт етмәкдә онлара көмәк едән амилләрин, тезликлә бүтүн итаәткар инсанлары бирләшдирәҹәјинә инанырлар. О заман дин наминә һеч бир пис әмәлләр төрәдилмәјәҹәк, парчаланмалар вә ихтилафлар олмајаҹагдыр. Бүтүн дүнја һәгиги Аллаһ олан Јеһоваја бирликдә хидмәт едәҹәкдир (Вәһј 21:4,5).

[Һашијә]

[4 вә 5-ҹи сәһифәләрдәки шәкилләр]

Еркән мәсиһчиләр мүхтәлиф мәншәли олмаларына бахмајараг, Аллаһа бирҝә хидмәт едирдиләр.