Ҝөрдүјүнүз мө’ҹүзәләр

«МӨ’ҸҮЗӘ» сөзүнүн мә’наларындан бири «гејри-адилији илә һејрәт доғуран, гејри-ади бир һадисә, әшја вә јахуд наилијјәтдир». Аллаһын мүдахиләси олмадан баш верән бу ҹүр мө’ҹүзәләри һамымыз ҝөрмүшүк.

Тәбиәтин физики ганунлары һаггында даһа дәрин биликләр газанараг, артыг инсанлар вахтилә гејри-мүмкүн һесаб олунан шејләрә наил олмушлар. Мәсәлән, бу ҝүн компүтерләрин, телевизијанын, космик технолоҝијанын вә башга мүасир техниканын сајәсиндә мүмкүн олан шејләр јүз ил бундан әввәл бир чох инсанлара ағласығмаз ҝәләрди.

Бә’зи алимләр јарадылан дүнјанын бүтүн мө’ҹүзәләрини анламағын мүмкүн олмадығыны дәрк едирләр. Вә буна ҝөрә дә, артыг нәјинсә гејри-мүмкүн олдуғуну там әминликлә иддиа едә билмирләр. Узаг башы, бунун һәгигәтдән кәнар олдуғуну дејәҹәкләр. Беләликлә онлар инди мүмкүн олмајан, лакин ҝәләҹәкдә баш верә биләҹәк «мө’ҹүзәләрин» һәјата кечмәсини еһтимал едирләр.

Һәтта «мө’ҹүзә» сөзүнүн әсас мә’насына, «харигул’адә вә фөвгәлтәбии гүввәләрин тә’сири алтында баш верән һадисә» мә’насына истинад етсәк, дејә биләрик ки, һәр биримиз һәјатымызда мө’ҹүзә ҝөрмүшүк. Мәсәлән, һамымыз Јараданын «фөвгәлтәбии гүввәсинин тә’сири» илә јаранан ҝүнәши, ајы вә улдузлары ҝөрә биләрик. Бундан башга, ким инсан бәдәнинин неҹә фәалијјәт ҝөстәрдијини, бејинин неҹә ишләдијини вә ја инсан ембрионунун неҹә инкишаф етдијини там тәфсилаты илә изаһ едә биләр? Бир китабда дејилир: «Мәркәзи синир системи илә идарә олунан инсан организми чох мүрәккәб олан һәссас апаратдыр. О санки өзүнү тәнзимләјән мүһәррик вә өзүнү тәзәләмә габилијјәтинә малик олан компүтердир. Бу исә мө’ҹүзәли вә бир чох саһәдә дәркедилмәз јарадыҹылыг мәһсулудур» («The Body Machine»). Доғрудан да, «инсан организмини» јарадан Аллаһ, бизи даима һејрәтә салан бир мө’ҹүзә јарадыб. Һәмчинин сизин ҝөрдүјүнүз, амма еһтимал ки, әһәмијјәт вермәдијиниз башга мө’ҹүзәләр дә вар.

Китаб мө’ҹүзә ола биләрми?

Тиражына ҝөрә дүнјада Мүгәддәс Китаб гәдәр ҝениш јајылмыш икинҹи бир китаб јохдур. Сизҹә бу өзү бир мө’ҹүзә дејилми? Онун мөвҹудлуғуну «Аллаһын фөвгәлтәбии гүввәсинин тә’сири» илә изаһ етмәк олармы? Дүздүр, Мүгәддәс Китабын јазылышында Аллаһ инсанлардан истифадә едиб, лакин онлар өз фикирләрини дејил, Аллаһын фикирләрини гәләмә алмышлар (2 Шамуел 23:1, 2; 2 Петер 1:20, 21). Бир дүшүнүн: 1 600 ил әрзиндә јашамыш мүхтәлиф мәншәли бу 40 нәфәр кишиләр арасында чобанлар, һәрбчиләр, балыгчылар, дөвләт хадимләри, һәкимләр, каһинләр вә падшаһлар варды. Белә мүхтәлифлијә бахмајараг, онлар бүтөв бир мүждәни — үмид мүждәсини там дәгигликлә вә доғрулугла чатдыра билмишләр.

Јеһованын Шаһидләри Мүгәддәс Китабы диггәтлә өјрәнир вә һәвари Павелин јаздығы кими, ону «бәшәри сөз олараг дејил, әслиндә олдуғу кими, Аллаһын кәламы олараг» гәбул едирләр (1 Салониклиләрә 2:13). Илләр әрзиндә чап етдикләри нәшрләриндә онлар илк бахышдан зиддијјәтли кими ҝөрүнән парчалары Мүгәддәс Китаб контекстиндә нәзәрдән кечирәрәк изаһ едирләр. Мүгәддәс Китабын дахилиндә олан бу аһәнҝлик өз-өзлүјүндә онун мүәллифинин Аллаһ олдуғуна бир сүбутдурa.

Тарихдә Мүгәддәс Китабдан башга һеч бир китабын мәһв едилмәси үчүн бу гәдәр сә’ј ҝөстәрилмәмишди. Буна бахмајараг, бу китаб мөвҹуд олмасы илә бәрабәр, там вә ја гисмән дүнјанын 2 000-дән артыг дилинә тәрҹүмә едилиб. Бу китабын зәманәмизәдәк бүтөв вә тәһриф олунмадан ҝәлиб чатмасы илаһи мүдахиләјә шәһадәт едир. Мүгәддәс Китаб һәгигәтән дә бир мө’ҹүзәдир!

«Ҹанлы вә тә’сирли» мө’ҹүзә

Фөвгәлтәбии шәфа вермә вә өлүләрин дирилмәси кими кечмиш зәманәдә олан мө’ҹүзәләр артыг баш вермир. Амма Аллаһын јени дүнјасында белә мө’ҹүзәләрин үмумдүнја мигјасында јенидән баш верәҹәјинә әмин олмаг үчүн бүтүн әсасымыз вар. Онлар бәшәријјәтә биз дүшүндүјүмүздән дә артыг сонсуз раһатлыг ҝәтирәҹәк.

Аллаһдан олан Мүгәддәс Китаб бу ҝүн дә инсанларын һәјатында мө’ҹүзәјә бәрабәр һадисәләр јарадыр. Онлары шәхсијјәтләрини јахшылашдырмаға тәшвиг едир. (6-ҹи сәһифәдәки «Аллаһ Кәламынын гүдрәти» чәрчивәсинә бахын.) Ибраниләрә 4:12 ајәсиндә дејилир: «Чүнки Аллаһын сөзү ҹанлы вә тә’сирли, һәр ҹүр икиағызлы гылынҹдан итидир; о, ҹаны вә руһу, ојнаглары вә илији бөлүнҹәјә гәдәр дәлиб кечир вә үрәјин дүшүнҹә вә нијјәтләрини ајырд едир». Бәли, Мүгәддәс Китаб бүтүн дүнјада јашајан алты милјондан артыг инсанын һәјатыны дәјишиб. Бу китаб онларын һәјатына мә’на ҝәтирәрәк, ҝәләҹәјә даир ҝөзәл бир үмид верир.

Мүгәддәс Китабын сизин дә һәјатыныза мө’ҹүзәви тә’сир ҝөстәрмәсинә нә үчүн имкан вермәјәсиниз?

[Һашијә]

[4-ҹү сәһифәдәки чәрчивә]

Нә үчүн белә мө’ҹүзәләр артыг баш вермир?

Мүгәддәс Китабда мүхтәлиф мө’ҹүзәләрдән бәһс едилир (Чыхыш 7:19-21; 1 Падшаһлар 17:1-7; 18:22-38; 2 Падшаһлар 5:1-14; Матта 8:24-27; Лука 17:11-19; Јәһја 2:1-11; 9:1-7). Бу мө’ҹүзәләрин чоху Исанын Мәсиһ олдуғуну вә Аллаһын ону дәстәкләдијини сүбут едирди. Исанын илк давамчылары да мүхтәлиф дилләрдә данышмаг вә пејғәмбәрлик етмәк кими мө’ҹүзәли ән’амлара малик идиләр (Һәвариләрин ишләри 2:5-12; 1 Коринфлиләрә 12:28-31). Бу ҹүр мө’ҹүзәли ән’амлар мәсиһчи јығынҹағы јарандығы заман бөјүк фајда ҝәтирмишди. Неҹә?

Иш ондадыр ки, Мүгәддәс Јазылар о заман һамыда јох иди. Тумарлар вә ја китаблар, адәтән јалныз варлы инсанларда олурду. Бүтпәрәст өлкәләрдә инсанлар Мүгәддәс Китаб вә онун мүәллифи Јеһова Аллаһ һаггында һеч нә билмирдиләр. Буна ҝөрә дә мәсиһчи тә’лимини шифаһи сурәтдә чатдырмаг лазым ҝәлирди. Белә мө’ҹүзәли ән’амлар ҝөстәрирди ки, Аллаһ мәсиһчи јығынҹағына хејир-дуа верир.

Лакин Павелин сөзләринә ҝөрә, белә ән’амлара еһтијаҹ олмајан заман онлара сон гојулаҹагды. «Пејғәмбәрлик ләғв [олаҹаг], дилләр [сусаҹаг], билик арадан [галхаҹаг]... Чүнки билијимиз мәһдуд, пејғәмбәрлијимиз дә мәһдуддур. Камил олан ҝәлдији заман, нисби олан арадан галхаҹаг» (1 Коринфлиләрә 13:8-10).

Бу ҝүн инсанларын Мүгәддәс Китабы охумаг, она әсасланан симфонија вә енсиклопедијалардан истифадә етмәк имканлары вар. Алты милјондан артыг тә’лим алмыш мәсиһчиләр инсанлара Мүгәддәс Китабын васитәси илә Аллаһ һаггында билик алмаға көмәк едирләр. Беләликлә, һеч бир мө’ҹүзә олмадан һәр кәс Иса Мәсиһин Аллаһ тәрәфиндән тә’јин едилән Хиласкар олдуғуна, һабелә Јеһованын Өз хидмәтчиләрини дәстәкләдијинә там әмин ола биләр.

[5-ҹи сәһифәдәки чәрчивә/шәкил]

Артыг өлүб, јохса һәлә дә сағдыр?

Јәһја 19:33, 34 ајәләринә әсасән, «әсҝәрләрдән бири Онун бөјрүнү низә илә дешиб вә о анда орадан ган вә су ахды»ғы заман Иса артыг өлмүшдү. Лакин Мүгәддәс китабын бә’зи тәрҹүмәләриндә Матта 27:49, 50 ајәләриндә јазылыб ки, бу баш верәндә Иса һәлә дә сағ иди. Нә үчүн белә фәрг мөвҹуддур?

Мусанын гануну ҹинајәткарын бүтүн ҝеҹәни дирәк үзәриндә асылы галмасыны гадаған едирди (Ганунун тәкрары 21:22, 23). Бу сәбәбдән, Исанын ҝүнләриндә дирәкдән асылмыш ҹинајәткар әҝәр ахшама јахын һәлә дә сағ идисә, онун ајагларыны сындырырдылар вә беләликлә өлүм просеси даһа да сур’әтләнирди. Бәдән асылы галдығындан артыг нормал нәфәс алмаг мүмкүн олмурду. Әсҝәрләрин Иса илә бәрабәр асылмыш ҹинајәткарларын ајагларыны сындырмалары, амма Исаја тохунмамалары, ону өлмүш һесаб етдикләринә ишарә едир. Чох ҝүман ки, әсҝәр бүтүн шүбһәләри арадан галдырмаг вә Исанын сонрадан дирилмәси еһтималыны истисна етмәк үчүн онун бөјрүнү низәси илә дешди.

Матта 27:49, ЈД, 50 ајәләри һадисәләрин бир гәдәр фәргли ҹәрәјан етдијини ҝөстәрир. Орада дејилир: «Башгасы исә, низәсини ҝөтүрүб онун бөјрүнү дешди вә ганла су ахды. Иса, јенә јүксәк сәслә гышгырыб, ҹаныны тапшырды». Лакин курсивлә јазылмыш ҹүмләјә гәдим Мүгәддәс Китаб әлјазмаларынын һамысында раст ҝәлинмир. Бир чох нүфузлу алимләр белә дүшүнүрләр ки, бу парча даһа сонралар Јәһјанын мүждәсиндән алынмыш, амма сәһв јерә әлавә едилмишдир. Буна ҝөрә дә, бир чох тәрҹүмәләрдә бу ҹүмлә ади вә ја квадрат мө’тәризәләрә алыныр, һашијәләрдә мә’лумат верилир, ја да тамамилә мәтндән чыхарылыр.

Весткот вә Һортун гәдим јунан мәтнинә әсасән едилмиш «Јени Дүнја Тәрҹүмәси»ндә бу ҹүмлә гоша квадрат мө’тәризәјә алыныб. Онларын нәшрләриндә бу ҹүмләјә олан гејддә дејилир: «Там дәгигләклә демәк олар ки, бу ҹүмлә көчүрүҹүләр тәрәфиндән әлавә едилмишдир».

Беләликлә, бүтүн фактлар Јәһја 19:33, 34 ајәләриндә јазыланларын дәгиг олдуғуну тәсдигләјир: Рома әсҝәри Исанын бөјрүнү низәси илә дешәндә, о һәгигәтән дә артыг өлмүшдү.

[6-ҹы сәһифәдәки чәрчивә/шәкил]

Аллаһ Кәламынын гүдрәти

Јенијетмә Детлефин валидејнләри бошандыгдан сонра о, наркотик, ички вә һеви-метал дүнјасына гуршандыb. Тезликлә скинһед адланан бандаја дахил олдугдан сонра кәскин давранышына ҝөрә полислә гаршылашмалы олду.

1992-ҹи илдә шимали-шәрги Алманијада барларын бириндә 60 нәфәр скинһедлә 35 нәфәр панк арасында ганлы чәкишмә баш верди. Панклардан бири, Томас адлы ҝәнҹ, бәрк дөјүлдүјүндән алдығы хәсарәтләрдән тезликлә вәфат етди. Банданын башчыларындан бә’зиләри, Детлеф дә дахил олмагла јахаландылар. Бу һадисә күтләви информасија васитәләриндә бөјүк сәс-күјә сәбәб олду.

Һәбсханадан чыхдыгдан гыса бир вахт сонра Јеһованын Шаһидләриндән бири она: «Нә үчүн һәјат проблемләрлә долудур?» адлы трактат верир. Детлеф о дәгигә јазыланларын һәгигәт олдуғуну анлајыб Шаһидләрлә Мүгәддәс Китабы өјрәнмәјә башлады. Бу, онун һәјатыны тамамилә дәјишди. 1996-ҹы илдән башлајараг, о, Јеһованын адыны сә’јлә иззәтләндирир.

Кечмиш панкчы олан Зигфрид, давада өлдүрүлмүш ҝәнҹ Томасын јахын досту иди. О да сонрадан Шаһид олду вә инди јығынҹагда ағсаггалдыр. Бир дәфә Зигфрид мә’рузә илә чыхыш етмәк үчүн Детлефин јығынҹағына ҝәлир (јери ҝәлмишкән, Томасын да анасы һәрдән о јығынҹаға ҝәлир). Мә’рузәдән сонра Детлеф ону наһара дә’вәт едир. 10 ил бундан әввәл өз нифрәтләрини гәтијјән ҹиловламағы баҹармајан бу ики шәхс арасында бу ҝүн гардашлыг мәһәббәти өзүнү ачыг ајдын бүрузә верир.

Детлефлә Зигфрид јер үзүндә гурулаҹаг Ҹәннәтдә Томасы гаршылајаҹаглары вахты сәбирсизликлә ҝөзләјирләр. Детлеф белә дејир: «Бу һагда фикирләшәндә ҝөз јашларымы сахлаја билмирәм. Етдијимә ҝөрә чох пешманам». Онлар бу ҝүн башгаларына Јеһова илә таныш олуб Мүгәддәс Китабын вердији үмидә севинмәјә көмәк едирләр. Онларын үмуми арзусу ҝәләҹәкдә Томаса да көмәк етмәкдир.

Будур Аллаһ Кәламынын гүдрәти!

[Һашијә]

[4-ҹү сәһифәдәки шәкил]

Инсан бәдәни јарадылан мө’ҹүзәдир.

[Иҹазә илә]

Anatomy Improved and Illustrated, London, 1723, Bernardino Genga